¿Jantʼoj a tʼajál tam it jikʼél?... Walám neʼets ka uchaʼ a tátaj ani a nánaj abal ti tólmiy. Jaye waʼats kʼeʼat i atikláb axi in ejtowal ti tólmiy kom más tsapik. ¿A exlál jitaʼ játs?... Pél a Jehová. Ani a ejtowal ka konchij abal etsʼey ti tólmiy. Axéʼ játs axi in tʼajaʼ a David. Jajáʼ pélak jún i kwitól axi yab jikʼmaʼ, kom in belálak kʼal a Jehová. Ti an Biblia neʼets ka elaʼ an tʼilab tin kwéntaj a David.

Ma tin tsakamtal, a David exóbchin kʼal in tátajchik abal kin kʼanidhaʼ a Jehová. Axéʼ in tʼajaʼ abal yab ka jikʼey, bélits abal in támetnaʼ yán jantʼoj kʼakʼadh. Kom jajáʼ in exlálak abal a Jehová pélak in jaʼúb ani abal neʼetsak ka tolmiyat. Jún i kʼícháj tam ti a David kʼwajat in beletnál an borregos, ¡chích jún i púlik tsój ani in neʼdhaʼ jún i borrego! ¿A exlál jantʼoj in tʼajaʼ a David? In ayoknaʼ an tsój ani in tsemdhaʼ-kwaʼ kʼal in kʼubak. Ani tam ti jún i oso in léʼak kin kʼapuw an borregos a David jaye in tsemdhaʼ. ¿Kʼal jitaʼ ti tolmiyat a David abal yab ka jikʼey?... Pél kʼal a Jehová.

Wanaj ki tsuʼuw kʼeʼat i tʼiplab tam ti a David jaye in tejwaʼmédhaʼ abal yab u jikʼélak. Pél tam ti an israelitas kʼwajatak ti péjéx kʼal an bichow filisteo. Jún i soldado filisteo axi in bijak Goliat pélak jún i inik ¡lej yejnek ani tsapik! A Goliat in tilibnálak an soldados axi pélak i israelitas ani jaye a Jehová. In uchálak an soldados: «¡Jitaʼ in léʼ ti péjéx kʼal nanáʼ!». Pero patalchik in tsʼejnálak ani yab jitaʼ in léʼak ti péjéx kʼal jajáʼ. Tam ti a David in atsʼaʼ jawaʼ in uluw a Goliat, in tókʼtsiy: «Nanáʼ neʼets tin péjéx kʼal tatáʼ. A Jehová neʼets ti kin tólmiy ani neʼets tu átaʼ». ¿Yab aníts abal a David yab u jikʼélak?... Antsanáʼ. ¿A léʼ ka exlaʼ jantʼoj watʼey tálbél?

A David in tákuy bóʼ i tʼujub axi olilíl ani jún i widhokʼláb ani kalej abal ti péjéx kʼal a Goliat. Tam ti a Goliat in tsuʼuw abal a David pélak jún i tsakam kwitól, in tilibnáʼ. Tam a David in uchal: «Tatáʼ it tal kʼal jún i nakat kutsíl abal ti kin tomolnaʼ, ¡pero nanáʼ neʼets tu tomolnaʼ kʼal in bij a Jehová!». Tam, a David ádhláts abal kin tamuw a Goliat biyat u ádhil in punuwal jún i tʼujub ti an widhokʼláb ani in kwiʼnanchij, tam, in tsʼoʼpanchij in lej píkʼib  ani ¡ijkanal tsémenek! Tam ti an filisteos in tsuʼuw jawaʼ watʼenek, ádhlátschik kom lej jikʼey. ¿Jaleʼ a David in ejtow kin átaʼ a Goliat?... Pél kom tolmiyat kʼal a Jehová, ¡ani jajáʼ más tsapik yab ejtíl nixéʼ xi inik lej yejnek ani tsapik!

¿Jantʼoj tu exóbchal an tʼilab tin kwéntaj a David?... Abal a Jehová in kwaʼal más in tsap yab ejtíl jún i atikláb. Jaxtám, tam ka atsʼaʼ abal it jikʼél, ka tʼilaʼ: A Jehová pél a jaʼúb ani jajáʼ neʼets ti tólmiy abal yab ka tsʼejnaʼ ni jantʼoj.