AJUMTALÁB 4
Jajáʼ in kulbedhaʼ in tátaj ani a Jehová
¿Jitaʼ játs an tsakam tsʼikʼách axi kʼwajat ti walekláb?... An Biblia yab in ólnál in bij, pero tu ólchal abal in bij in tátaj pél a Jefté. Jajáʼ in tʼajaʼ jantʼoj axi in kulbedhaʼ a Jehová ani a Jefté. ¿A léʼ ka exlaʼ más tin kwéntaj a Jefté ani in tsʼikʼáchil?
A Jefté pélak jún i alwaʼ inik. Jajáʼ in jilálak i kʼij abal kin exóbchij in tsʼikʼáchil tin kwéntaj a Jehová. Jaye pélak jún i inik tsapik axi in exlálak jantʼiniʼ ti kin ókʼnaʼ an bichow. Jaxtám uchan kʼal an israelitas: «¿A léʼ tu ku ókʼnanchij an pejextaláb?».
Abal kin átaʼchik an pejextaláb a Jefté in konchij in tólmixtal a Jehová. In uchaʼ abal max kin átaʼchik neʼetsak kin tʼajaʼ axéʼ: tam ka wichiy tin kʼimáʼ an kʼaʼál atikláb axi ka kalej abal ka batsʼuwat neʼetsak kin pidhaʼ
abal a Jehová. ¿Jantʼoj in léʼ kin uluw nixéʼ? Abal nixéʼ xi atikláb kwaʼalak ka kʼwajiy ani ka tʼójon abal etsʼey ti an tabernáculo in kʼál a Dios. An tabernáculo pélak juʼtá an atiklábchik kʼalelak abal kin kʼakʼnaʼ a Jehová. ¿In átaʼ a Jefté an pejextaláb? Antsanáʼ. ¿Jitaʼ játs an kʼaʼál atikláb axi kalej?...¡Pél in junkats tsʼikʼáchil! Ani xowéʼ a Jefté kwaʼalak kin jilaʼ abal ka kʼalej ti kʼwajíl ti an tabernáculo. Axéʼ in tʼajaʼ abal ka lej tʼeʼpin, ¿a tʼilal jantʼoj in uchamalak a Jehová? Jaxtám uchan kʼal in tsʼikʼáchil: «Tátaj, kwaʼal ka putuw jawaʼ a uchaʼ a Jehová».
Okʼox, in tsʼikʼáchil jaye in atsʼaʼ tʼeʼpidh. ¿Jaleʼ? Kom tam ka kʼwájiyak ti an tabernáculo jajáʼ yab neʼetsak kin ejtow ka tomkin ani kin koʼoy i tsakam. Pero jajáʼ in léʼak kin putuw jawaʼ in tátaj in uchamalak a Jehová. Jayétsekʼij in léʼak kin kulbedhaʼ a Jehová. Ani nixéʼ játsak axi más exbadh abal jajáʼ ani yab an tomkintaláb o kin koʼoy i tsakam. Jaxtám kʼalej ti kʼwajíl abal etsʼey tin kʼimáʼ a Dios.
¿A tsalpayal abal jajáʼ in kulbedhaʼ a Jehová ani a Jefté?... ¡Antsanáʼ! Tatáʼ jaye a ejtowal ka nitsʼbiy in tsʼikʼáchil a Jefté. Max ka kʼanidhaʼ a Jehová ani ka belkaʼ, jajáʼ neʼets ka lej kulbéj kʼal tatáʼ. Jaye neʼets ka lej kulbéj a tátaj ani a nánaj.