Junchik i atikláb tu tilibnál ani u tsakúl tam ki ólchij tin kwéntaj a Jehová. ¿Jantʼoj i atsʼál tam ki watʼaʼ axéʼ? Walám ki tsalpay: «Yabáts neʼets ku olnaʼ tin kwéntaj a Jehová». ¿A watʼamal axéʼ?... An Biblia in ólnál tin kwéntaj jún i inik axi in kʼanidhálak a Jehová, pero weʼits kin jilaʼ ti káw tin kwéntaj a Jehová. In bijak Jeremías. Wanaj ki tsuʼuw jantʼoj in watʼaʼ.

Tam ti kwitólej, a Jeremías pidhan jún i tʼojláb lej exbadh kʼal a Jehová. Kwaʼalak kin ólchij an atiklábchik abal kin jilaʼ kin tʼajaʼ jawaʼ yab alwaʼ. A Jeremías jikʼey, kom pélak jún i tʼojláb kʼibat. Jaxtám in uchaʼ a Jehová: «Nanáʼ in kwitólej ani yab u exlál janéy neʼets ku uchaʼchik». Pero a Jehová in tókʼtsiy: «Yab kit jikʼey, nanáʼ neʼets tu tólmiy».

Tam a Jeremías in tujchij kin uchaʼ an bichow: «Max yabchik ka jilaʼ ka tʼajaʼ jawaʼ  yab alwaʼ neʼetschik kit talabedháj». ¿Tʼajan ti kwéntaj?... Imbáj, kʼal junchik i atikláb ma tilibná ani kʼeʼatchik tsákuy. ¡Ma leʼnabak ka tsemdháj! ¿Jantʼoj a tsalpayal abal in atsʼaʼ a Jeremías?... Jajáʼ lej jikʼey, ani in uluw: «Yabáts neʼets ku olnaʼ más tin kwéntaj a Jehová». Pero ¿chubax jawaʼ in uluw? ¿Chubax in jilaʼ kin olnaʼ tin kwéntaj a Jehová?... Imbáj. A Jeremías yab in ejtow kin jilaʼ ti káw tin kwéntaj a Jehová kom in lej kʼanidhálak. Yab in walbaʼ tin báʼ, jaxtám a Jehová in kʼániy kʼal jitaʼ ti odhnábak.

Jún i tʼiplab, pél tam ti junchik i inik axi pojkax in baliy a Jeremías al jún i mom axi lupudh. Kʼwajatak ti luptsʼinal ti mom, ani tanáʼ a Jeremías yab in kwaʼalak i kʼapnél ani i jaʼ. ¡An inikchik in léʼak abal a Jeremías ka tsemets tanáʼ! Pero ¿kʼaniyat a Jeremías? Antsanáʼ, kom a Jehová in tʼajaʼ abal ka kaldháj ti mom.

Al axéʼ xi tʼilab i exobnámal abal tam junchikíl a Jeremías in atsʼaʼ lej jikʼél, aba aniʼ yab in jilaʼ ti káw tin kwéntaj a Jehová. ¿Jantʼoj a ejtowal ka exóbnaʼ kʼal in tʼiplábil a Jeremías?... Tam junchikíl walám an atiklábchik ti tilibnáʼ o ka tsákuy kʼal tatáʼ tam ka ólchij tin kwéntaj a Dios. O walám ma kit tidhebéj o kit jikʼey. Pero yab ka jilaʼ tit káw tin kwéntaj a Jehová. Ka tʼilaʼ abal jajáʼ etsʼey neʼets ti tólmiy, antsanáʼ jantʼiniʼ tin tólmiy a Jeremías.