¿A exlál jantʼoj in léʼ kin uluw an káw tsinat?... * Pél jantʼoj axi lej wéʼ i atiklábchik in exlál. An Biblia in ólnál jantʼoj lej exbadh axi kʼwajat tsinat ani in bíjiyal ti «tsinat tsalap axi tal kʼal a Dios». Ani pél tʼokat kom tal kʼal a Dios. Tin tujtal yab jitaʼ in exlálak. Ma an ángeles in léʼakchik kin exlaʼ axéʼ. ¿A léʼ ka exlaʼ jawaʼ kʼwajat tsinat?...

In tʼajál yán i tamub a Jehová Dios in tsʼejkaʼ an kʼaʼál inik ani an kʼaʼál uxum. ¿A exlál jantʼiniʼ in bij?... Pél a Adán ani a Eva. Jajáʼchik u kʼwajílak ti an alabél tsabál bijidh Edén. A Dios in tsʼejkaʼ an tsabál lej alabél abal kin ejtowchik ka kʼwajiy tanáʼ. A Jehová in léʼak abal jajáʼchik ani in tsakámil kin tsʼejkaʼ alabél tin puwél an Tsabál ejtíl axi ti Edén. Jajáʼ in léʼak abal patal an atiklábchik ka kʼwajiy abal etsʼey al jún i alabél tsabál. Pero yab putun. ¿Jaleʼ?

Pél kom a Adán ani a Eva yab in belkaʼ a Dios, jaxtám xowéʼ yab u kʼwajíl al jún i alabél tsabál. Pero a Dios in uluw abal jún a kʼícháj neʼets kin wenkʼow an tsabál lej alabél ani tanáʼ an atiklábchik neʼets ka kʼwajiy kulbél ani abal etsʼey. Axéʼ, kʼwajiy tsinat al yán i kʼij kom ni jún i atikláb in exlálak. ¿Jantʼiniʼ ti neʼets kin putuw jawaʼ in uluw?

Jawaʼ kʼwajatak tsinat kʼayúm kʼayúm ti exláj. A Jesús in exóbchij an atiklábchik tin kwéntaj axéʼ tam ti chích ti Tsabál. In wilkʼanchij jantʼoj játs in Eyaltal a Dios. Tam i ólonchal a Dios i konchal: «Ka chích a eyaltal». ¿Jaleʼ? Kom nixéʼ xi éyal neʼets kin wenkʼow an Tsabál lej alabél.

¿A léʼ kit kʼwajiy ti an alabél tsabál?... Ka tʼilaʼ abal expidh an atiklábchik axi kin belkaʼ a Dios játs axi neʼets ka kʼwajiy ti an alabél Tsabál abal etsʼey. An Biblia in ólnál tin kwéntaj i inikchik ani i uxum axi in belkaʼ a Dios. Al axéʼ xi folleto neʼets ki exóbnaʼ jitaʼchik játs axéʼ xi atikláb ani jantʼiniʼ i ejtowal ki nitsʼbiy. ¿A léʼ ka exlaʼchik?...