¿A léʼ ki tʼilaʼ jawaʼ watʼey ti biyál? Ka tsalpay abal u kʼwajat ti an biyál bichow Jericó, ti an tsabál ti Canaán. Tanáʼ an atiklábchik yab in belal a Jehová. Pero, tanáʼ u kʼwajíl jún i uxum axi in bij Rahab. Jajáʼ yab pélak jantʼiniʼ axi más.

Ma tin tsakamtal, a Rahab in atsʼámalak yán i tʼilab tin kwéntaj a Jehová. In exlálak jantʼiniʼ tin tólmiy an bichow Israel abal kin átaʼ kʼal jitaʼ ti tomólnábak. Jún i tʼiplab, pél tam ti a Jehová in eyendhaʼ a Moisés abal kin kaldhaʼ an israelitas ti Egipto. ¡Ma in pejaʼ tsʼejel an mar Rojo abal an bichow kin ejtow ka watʼey! Ani xowéʼ, a Rahab in atsʼál jún i olchixtaláb axi in lej jikʼpaʼ: abal ¡an israelitas kʼwajat utat ti Jericó!

Jún i akal, tsáb i israelitas u otsel ti Jericó abal kin kwátsiy an bichow. U ulelchik tin kʼimáʼ a Rahab, ani jajáʼ in uchál abal in ejtowalchik ka jilkʼon. An éyal axi ti Jericó in exlaʼ abal al nixéʼ xi akal tsáb i kwátsix ulnek al an bichow ani kʼwajat tin kʼimáʼ a Rahab. Jaxtám in abaʼ in tʼojnálilchik abal ka aliyat. ¿Jantʼoj in tʼajaʼ a Rahab? In tsinál an kwátsix tin ókʼ an atáj ani in uchál an inikchik axi in abaʼ an éyal: «An kwátsix kʼwajatakchik tejéʼ pero kʼalets. Max ka aynaʼchik walám ka bajuyej». ¿A léʼ ka exlaʼ jaleʼ tin tólmiy axéʼ xi tsáb i kwátsix?... Kom jajáʼ in belál a Jehová, jaye in exlál abal an israelitas neʼets ka tolmiyat kʼal a Jehová abal kin kʼálnaʼ an bichow Jericó ani an tsabál axi ti Canaán.

Okʼxidh ka kalejchik an kwátsix in uchál a Rahab: tam a Dios kin talabedháj an bichow, jajáʼ ani in yanél yab neʼets ka tsemets. ¿Jantʼoj kwaʼal kin tʼajaʼ a Rahab abal kin kʼániy in ejatal?... Uchan kʼal an kwátsix: «Ka palaʼ axéʼ xi tsakniʼ tsʼáj ti ventana ani ka tamkuy a yanél altáj ta kʼimáʼ. Max ka tʼajaʼchik, neʼets ka kʼániy a ejatal». A Rahab in tʼajál antsanáʼ jantʼiniʼ ti uchan kʼal an kwátsix. ¿A léʼ abal tu tʼilchij jantʼoj watʼey tálbél?...

Junchik i kʼícháj tálbél, an israelitas u belalchik yaníl abal kin tóniy an bichow. Tin naktal nixéʼ xi akak a kʼícháj u belalchik tsʼibkʼakʼadh abal kin tóniy an bichow, júníl ta kʼícháj. Pero tin búkchíl a kʼícháj in tʼajálchik búk in akan abal kin tóniy an bichow, ani tam u dhájnalchik lej tsapik. Jún dhubatkʼij, watʼey jantʼoj axi in lej jikʼpaʼchik. ¡A Jehová in  tʼajál ka jólan an pakdhaʼ baʼteʼ axi in tóniyal a Jericó! Pero, ¿jantʼoj watʼel kʼal in kʼimáʼ a Rahab? Yab jólan in kʼimáʼ, kom in kwaʼal palat jún i tsakniʼ tsʼáj ti ventana. ¿A tsuʼtal an tsʼáj ti walekláb?... ¡Antsanáʼ tin kʼániy in ejatal a Rahab ani in yanélchik!

¿Jaleʼ tin ejtow kin kʼániy in ejatal a Rahab?... Kom in belkaʼ a Jehová. Tam ti tʼílchin jawaʼ a Dios in tʼajámalak, a Rahab in punuw in aychixtal kʼal a Jehová. Tatáʼ jaye kʼwajat a exobnál yán jantʼoj tin kwéntaj jajáʼ. ¿Neʼets ka belkaʼ a Jehová jantʼiniʼ a Rahab?... ¡Antsanáʼ!