AJUMTALÁB 2
A Rebeca in léʼak kin kulbedhaʼ a Jehová
A Rebeca pélak jún i uxum axi in kʼanidhálak a Jehová. In tomkíl axi in bij Isaac, jaye in kʼanidhálak a Jehová. Al axéʼ xi tʼilab neʼets ki tsuʼuw jantʼiniʼ ti exláxin, jaye neʼets ki exóbnaʼ jantʼiniʼ a Rebeca in tejwaʼmédhaʼ abal in léʼak kin kulbedhaʼ a Jehová.
In tátajchik a Isaac in bijak Abrahán ani Sara. A Abrahán in léʼak abal in tsakámil ka tomkin kʼal jún i uxum axi kin tʼojonchij a Jehová. Pero jajáʼchik u kʼwajílak ti Canaán, tanáʼ an atiklábchik yab in kʼakʼnálak a Jehová. Jaxtám in abaʼ jún in tʼojnálil (walám a Eliezer) abal ka kʼalej ti Harán. ¿Jaleʼ tin abaʼ tanáʼ? Kom ti Harán u kʼwajílak in yanel a Abrahán, ani tanáʼ, walám a Eliezer kin elaʼ jún i alwaʼ mímláb abal a Isaac.
A Rebeca koʼoy ka tʼójon lej tsapik abal kin pidhaʼ i jaʼ an camellos
A Eliezer ani kʼeʼatchik in tʼojnálil a Abrahán belátschik lej ow. In neʼdhálak 10 i camellos kitadh kʼal i kʼapnél ani i tsʼejwalixtaláb. Pero a Eliezer ¿jantʼiniʼ ti neʼetsak kin elaʼ jún i mímláb abal a Isaac? Jajáʼ in exlálak abal an atiklábchik al nixéʼ xi bichow kʼalelak kin kaldhaʼ i jaʼ ti mom. Jaxtám, tam ti ulitschik ti Harán, kʼalejchik juʼtá ti kʼwajatak nixéʼ xi mom. Tam, in tʼajchij jún i oláb a Jehová ani in uchaʼ: «Neʼets ku konchij jún i tsʼikʼách abal ti kin pidhaʼ i jaʼ. Ani max jajáʼ ti kin pidhaʼ i jaʼ ani jaye abal an camellos, tam neʼets ku exlaʼ abal játs an uxum axi tatáʼ a takuyámal».
Al nixéʼ xi kʼij a Rebeca ulits ti mom. An Biblia in ulal abal pélak jún i tsʼikʼách lej alabél. A Eliezer in konchij i jaʼ ani jajáʼ tokʼtsin: «Neʼets tu pidhaʼ i jaʼ ani jaye abal an camellos» Kom an camellos in tekedh utsʼál i jaʼ jaxtám a Rebeca koʼoy kin kaldhaʼ lej yán. A Rebeca in tʼajaʼ ¡yaníl in akan abal kin iyaʼ an jaʼ! Ka metʼaʼ an walekláb. ¿Jantʼoj in tʼajál a Rebeca?... A Eliezer in lej jikʼpaʼ tam ti in tsuʼuw abal u tʼojnal lej tsapik: ¡A Jehová in tokʼtsinchámal in olábil!
A Eliezer in pidhaʼ a Rebeca i alwachik tsʼejwalixtaláb, ani jajáʼ in kaniy a Eliezer ani axi más an tʼojnal al an atáj juʼtá ti kʼwajílak kʼal in yanél. A Eliezer in wilkʼanchij jaleʼ ti aban kʼal a Abrahán ti Harán, ani jaye in ólchij jantʼiniʼ ti tokʼtsinchat in olábil kʼal a Jehová. Tam ti in yanél a Rebeca in atsʼaʼ nixéʼ, lej kulbéjchik. Ani uchan a Eliezer: «A Rebeca in ejtowal ka tomkin kʼal a Isaac».
A Rebeca kʼalej kʼal a Eliezer ti Canaán ani tomkin kʼal a Isaac
¿Walám a Rebeca in léʼak ka tomkin kʼal a Isaac?... Tam ti jajáʼ konówiyat kʼal in yanél in uluw abal in léʼ ka tomkin. ¿Jaleʼ? Kom jajáʼ in exlálak abal a Eliezer ábnenek kʼal a Jehová. Jaxtám a Rebeca kʼalej kʼal jajáʼ ti Canaán, ani tam ti ulitschik, a Rebeca tomkin kʼal a Isaac.
A Rebeca in belkaʼ a Jehová, jaxtám ti lábliyat. Ani yab expidh nixéʼ: yán i tamub tálbél, al in yanél a Rebeca a Jesús in bajuw ka waʼtsin. Max tatáʼ ka belkaʼ a Jehová jantʼiniʼ a Rebeca jaye neʼets ti lábliy. Ani neʼets ka tʼajaʼ abal a Jehová ka lej kulbéj kʼal tatáʼ.
