AJUMTALÁB 5
A Samuel etsʼey in tʼajaʼ jawaʼ a Jehová in léʼak
Ma tin tsakamtal a Samuel kʼwajiy ani tʼójon ti an tabernáculo. An tabernáculo pélak juʼtá an atiklábchik kʼalelak kin kʼakʼnaʼ a Jehová. ¿A léʼ ka exlaʼ jaleʼ a Samuel u kʼwajílak tanáʼ? Abal ki exlaʼ an tokʼtsixtaláb, ki exóbnaʼ okʼox an tʼilab tin kwéntaj in nánaj. In bij pélak Ana.
A Ana in léʼak kin koʼoy jún i tʼeleʼ pero yab in ejtowalak kin koʼoy, jaxtám in konchij a Jehová al jún i oláb: «Jehová ti kin tólmiy». Ani in uchaʼ: «Max ku koʼoy jún i tsakam neʼets tu pidhaʼ abal ka kʼwajiy ani ti tʼojonchij ti an tabernáculo». A Jehová in atsʼanchij in olábil tam, a Ana in ejtow kin koʼoy jún i tʼeleʼ, in bijiy Samuel. A Ana in putuw jawaʼ in uchaʼ a Jehová, kom tam ti a Samuel in kwaʼalak óx o tséʼ i tamub in neʼdhaʼ ti tabernáculo abal kin tʼojonchij a Dios.
A Elí játs axi in ókʼnálak ti an tabernáculo. Jaye tsablom in kwitólil u tʼojnálak tanáʼ. An atiklábchik axi ka kʼwájiyak tanáʼ, kwaʼalak kin tʼajaʼ axi alwaʼ kom tanáʼ u kʼakʼnabak a Jehová. Pero a Samuel in tsuʼtalak abal in kwitólilchik a Elí in tʼajálak jawaʼ yab alwaʼ. ¿A tsalpayal abal a Samuel in tʼajaʼ jayétsekʼij?... Imbáj, a Samuel in aynanchij kin tʼajaʼ jawaʼ a Jehová in léʼak, antsanáʼ jantʼiniʼ ti exóbchin kʼal in tátajchik.
¿Jantʼoj in tomnálak kin tʼajaʼ a Elí? ¿A tsalpayal abal kwaʼalak kin exóbchij in tsakámil?... ¡Antsanáʼ! A Elí yab kwaʼalak kin jilaʼ abal ka kʼwajiychik tin kʼimáʼ a Dios, pero yab in tʼajaʼ ni jantʼoj. A Jehová lej tsákuy kʼal jajáʼ ani kʼal in tsakámilchik, jaxtám tin boliychik.
A Samuel in ólchij a Elí jawaʼ a Jehová in uluw
Jún i akal tam ti a Samuel kʼwajatak ti wáyal, in atsʼaʼ abal u tawnábak ani uchan: «¡Samuel!». Jajáʼ ádhláts ma juʼtá ti kʼwajatak a Elí, pero uchan kʼal a Elí nanáʼ yab tu tawnámal. Axéʼ watʼey junílekʼij, tin oxchíl a Elí in uchaʼ a Samuel: «Max kit wichiy ka atsʼaʼ abal it tawnáb, ka tókʼtsiy: ‹Kit káwin Jehová, kom in kʼwajat tu otsʼówiyal›». Tam ti a Samuel tokʼtsin uchan kʼal a Jehová: «Ka uchaʼ a Elí abal neʼets ku boliy in yanél kom in tʼajámal yán jantʼoj axi yab alwaʼ». ¿Walám in atsʼaʼ kʼibat a Samuel kin ólchij axéʼ a Elí? ¿Jantʼoj a tsalpayal?... Antsanáʼ. Bélits abal a Samuel lej jikʼélak, in ólchij a Elí jawaʼ a Jehová in uluw. A Dios in putuw in káwintal, kom a Elí ani tsablom in tsakámil tsemets tálbél.
A Samuel pél jún i alwaʼ tʼiplab abal wawáʼ. Bélits abal in tsuʼuw kʼeʼat i atiklábchik kin tʼajaʼ jawaʼ yab alwaʼ, jajáʼ etsʼey in tʼajaʼ jawaʼ a Jehová in léʼak. ¿Tatáʼ, jaye neʼets ka tʼajaʼ? ¿Neʼets ka nitsʼbiy a Samuel ani ka belkaʼ a Jehová? Max ka tʼajaʼ, neʼets ka kulbedhaʼ a Jehová, jaye a tátaj ani a nánaj.
