Neʼets tu tʼilchij jún i tʼilab tin kwéntaj jún i kwitól axi in kʼáninchij in ejatal an abatwále Pablo. Yab i exlál jantʼiniʼ in bijak pero, i exlál abal pélak in sobrino a Pablo. Pélak jún i kwitól axi yab u jikʼélak. ¿A léʼ tu tʼilchij jantʼoj in tʼajaʼ?...

A Pablo kʼwajatak al an wikʼaxteʼ ti Jerusalén, kom in ólchalak an atiklábchik tin kwéntaj a Jesús. Pero waʼatsak junchik i inik axi in pojkálak a Pablo, tam in tsálpaychik kin tʼajaʼ jantʼoj axi yab alwaʼ. In léʼakchik ka kʼalej ani kin uchaʼ an ókʼnom kʼal an soldados: «Ka abaʼ an soldados abal kin neʼdhaʼ a Pablo tin tamét an éyal». Jajáʼchik neʼetsak kin kwátsiy a Pablo ti bél, abal kin ¡tsemdhaʼ! tam ka watʼey.

In sobrino in atsʼaʼ jawaʼ leʼnabak ka tʼajchin a Pablo. ¿Jantʼoj in ejtowalak kin tʼajaʼ in sobrino? Kʼalej kin ólchij in itsán. Tam, a Pablo in uchaʼ: «Kit kʼalej dhubatkʼij juʼtá ti kʼwajat an ókʼnom kʼal an soldados ani ka ólchij patal». Nixéʼ kʼibatak kin tʼajaʼ, kom an ókʼnom in kwaʼalak lej púlik in éy. ¿Kʼalej ti káw in sobrino a Pablo kʼal jajáʼ?... Antsanáʼ, in sobrino a Pablo yab jikʼey ani in ólchij patal.

An ókʼnom kʼal an soldados in alwaʼ otsʼówiy jawaʼ uchan. Abal yab ka tsemdháj a Pablo in abaʼ al pil i bichow, axi in bij Cesarea ani jaye in abaʼ jún i 500 i soldados abal ka beletnaj a Pablo. Ani in uchaʼ: «Ka neʼdhaʼchik al axéʼ xi akal». ¿Kʼáninchat in ejatal a Pablo o tsemdháj kʼal an inikchik axi pojkax? ¿Jantʼoj a tsalpayal tatáʼ?... Antsanáʼ, ¡yab tsemdháj! Nixéʼchik xi inik yab in ejtow kin tʼajchij ni jantʼoj a Pablo.

¿A kulbetnaʼ axéʼ xi tʼilab?... ¿A tsuʼuw abal in sobrino a Pablo yab jikʼey? ¡Tatáʼ a ejtowal ka tejwaʼmédhaʼ abal yab it jikʼél jantʼiniʼ jajáʼ! Yab kwaʼal ku jikʼey tam ki ólchij an atiklábchik tin kwéntaj a Jehová. ¿A léʼ ka tejwaʼmédhaʼ abal yab it jikʼél ani ka aynanchij ka olnaʼ tin kwéntaj a Jehová?... Lej exbadh ki aynanchij ki olnaʼ tin kwéntaj a Dios. Antsanáʼ yán i atiklábchik neʼets kin ejtow kin kʼániy in ejatal.