¿AN CHUBAXTALÁB kʼal jantʼoj? Kʼal tálchik i konowixtaláb lej exbadh axi in tʼajamal yán i atiklábchik. Walám ma tatáʼ a tʼajamal axéʼ xi konowixtaláb:

• ¿Chubax u tʼeʼpinal a Dios kʼal wawáʼ?

• ¿Neʼets ka taley jún a kʼicháj an pextaláb ani an yajchiktaláb?

• ¿Janéy u watʼel tam ku tsemets?

• ¿Waʼats jún i aychixtaláb abal an tsemélomchik?

• ¿Jantʼini ti kwaʼal ku oláts abal a Dios tu ku atsʼaʼ?

• ¿Jantʼini ti éjtowal ki elaʼ an kulbetaláb?

¿Juʼtáj ti éjtowal ki elaʼ in tokʼtsixtal axéʼchik xi konowixtaláb? Waʼats yán i libros axi in takal ti pidhaʼ an tokʼtsixtaláb, pero yab júnkudh in tsalápil. Ani tálchik in kwaʼal in jalbil jún i wéʼ i kʼij, pero talbél yabats kom u jalkʼuyab o u tʼajnal ti ít.

Pero, waʼats jún i libro axi yab u janamkáw. A Jesucristo in uluw al jún i oláb: «A káwintal ‹pél an› chubaxtaláb» (Juan 17:17). Xóʼ u exláb nixéʼ xi kawintaláb jantʼini an Tʼokat-Dhuchlab. An xeklek axi in aynál, ti tejwamédhanchal jantʼini an Biblia in tokʼtsiyal an konowixtalábchik axi dhúchadh ebál, an tokʼtsixtaláb axi u bináb pél tajax ani tekedh.

¿JALEʼ TU TʼAJNAL AXÉʼ XI KONOWIXTALÁB? Kom u kʼwajíl kʼal i atiklábchik axi lej pojkax ani odhnax. Jáyej yán axi u belom kʼal a Dios, in olnál abal jajáʼ in kulbetnál kin tʼajaʼ ki yajchiknaʼ.

JAWAʼ AN BIBLIA TU EXÓBCHAL: A Dios yab jáykʼij tu odhnál. «¡Ni wéʼ yab ki tsalpay abal an Dios axi chubax in tʼajál i pojkaxtaláb ani abal an Dios Axi Patal in Ejtowal kin Tʼajaʼ tu ku odhnaʼ!», in ulal Job 34:10. Kom a Dios tu lej kʼanidhál, in kwaʼal jún i alabél tsalap abal an atiklábchik, jaxtám, a Jesús tu exóbchij ki konoy al an oláb: «Tátaj ‹axi kʼwajat› ti éb [...] kit chich, ka tʼajaʼ tit lej Tsʼalej tejéʼ tsabál. Kin tʼajchij jáyej an inikchik a kulbétal tejéʼ tsabál jantʼini u tʼajnal a kulbétal tiwaʼ ti éb» (Mateo 6:9, 10). A Dios chubax u tʼeʼpinal kʼal wawáʼ. Jaxtám, ma in jilaʼ ka tsemdhaj in Tsakámil abal kin putuw jawaʼ in tsálpayal (Juan 3:16).

Ka tsuʼuw jáyej Génesis 1:26-28; Santiago 1:13, ani 1 Pedro 5:6, 7.

¿JALEʼ TU TʼAJNAL AXÉʼ XI KONOWIXTALÁB? Kom an pextaláb in aynanchal kin tsemdhaʼ yán i atiklábchik. Ani patal wawáʼ i watʼamal yán i yajchiktaláb.

JAWAʼ AN BIBLIA TU EXÓBCHAL: A Dios in ulúmal abal neʼets kin chiʼdhaʼ an paz tin puwél an Tsabál. Al in Eyaltal, o abatnaxtal axi kʼwajat ti éb, an atiklábchik yabats «jaykʼij más neʼets kin dhaykʼaʼ i pextaláb», ma «in kutsílal neʼets kin eyendhaʼ abal kin tʼojonchij an tsabál» (Isaías 2:4). Jáyej a Dios neʼets kin talabedhaʼ an odhnaxtaláb ani an yajchiktaláb. Tin kwéntaj an atiklábchik an Biblia in ulal axéʼ xi káw: «Ani a Dios neʼets kin tʼajchij in bichówil kin tsuʼuw expidh jawaʼ alwaʼ, [...]. Talíts an tsemlaj, an ukʼiltaláb, an tʼeʼpintaláb, an yajchiktaláb. Yabats waʼats jawaʼ yab alwaʼ ejtil ti jaykʼij». Tám, an odhnaxtaláb axi i tsuʼtal xóʼ ta kʼicháj neʼets ka taley (Revelación [Apocalipsis] 21:3, 4).

Ka tsuʼuw jáyej Salmo 37:10, 11; 46:9, ani Miqueas 4:1-4.

¿JALEʼ TU TʼAJNAL AXÉʼ XI KONOWIXTALÁB? Yán axi in belál a Dios, in olnál abal tam ku tsemets u kalel i éjatal ani u xeʼtsinal ti ikʼ. Waʼats axi in ulal abal an tsemélomchik in éjtowal kin odhnaʼ axi ejat o abal a Dios in chikál axi pójkaxchik abal etsʼey al an kʼamal.

JAWAʼ AN BIBLIA TU EXÓBCHAL: Tam ku tsemets u talel i éjatal. An «tsemélomchik [...] yabats in exlál ni jantʼoj», in ulal Eclesiastés 9:5. Kom an tsemélomchik yabats in éjtowal kin exlaʼ, kin atsʼaʼ, ni kin tʼajaʼ ni jantʼoj, yab in éjtowal kin odhnaʼ ni kin tólminchij axi ejat (Salmo 146:3, 4).

Ka tsuʼuw jáyej Génesis 3:19 ani Eclesiastés 9:6, 10.

¿JALEʼ TU TʼAJNAL AXÉʼ XI KONOWIXTALÁB? Patal i léʼ ku kʼwajiy kulbél junax kʼal i yanel axi kʼanidhál. Jaxtám, tam u tsémel jún i jaʼub, i léʼ ku wichiy ki tsuʼuw junílekʼij.

JAWAʼ AN BIBLA TU EXÓBCHAL: Yán i atiklábchik axi tsémenek neʼets ka wíchbanchat in éjatal. A Jesús in uluw: «lej chubax neʼets kin bajuw an hora tam neʼets ku tawnaʼ ka edhaj patal an tsemélomchik, [axi kʼwajat tin tsalápil a Dios]» (Juan 5:28, 29). An atiklábchik axi ka wíchbanchat in éjatal tejéʼ ti tsabál neʼets kin ejtow ka kʼwajiy tajaʼ, ani neʼets kin tsuʼuw wenkʼodh ti jún i alabél-tsabál, antsanáʼ jantʼini tin léʼak a Dios ma tin tujtal (Lucas 23:43). Tám, al an kʼicháj axi taʼtal, an atiklábchik axi kin belkaʼ a Dios neʼets ka kulbéj kom yabats neʼets ka yawʼláts ani neʼets ka kʼwajiy abal etsʼey. An Biblia in ulal: «An bolidhchik neʼets kin kʼalnaʼ an tsabál, ani neʼets ka kʼwajiy tajaʼ abal etsʼey» (Salmo 37:29).

Ka tsuʼuw jáyej Job 14:14, 15; Lucas 7:11-17, ani Hechos 24:15.

¿JALEʼ TU TʼAJNAL AXÉʼ XI KONOWIXTALÁB? Casi patal axi in kʼakʼnalchik a Dios, in ólonchal. Pero yánchik in atsʼal abal yab u tokʼtsinchab in olábil.

JAWAʼ AN BIBLIA TU EXÓBCHAL: A Jesús tu uchaʼ abal yab kwaʼal ku wichʼkʼon ki uluw jayétsej an káw ti olábil. In uluw antséʼ: «Tam kit ólonchik yab kit alkʼidh ‹wichʼkʼon ka uluw jayetsejkʼij›» (Mateo 6:7). Max i léʼ abal a Dios tu ku atsʼaʼ, kwaʼal ki ólonchij jantʼini jajáʼ in kulbetnál. Jaxtám, okʼox in tomnál ki exobnaʼ jawaʼ játs in kulbétal ani talbél ku oláts jantʼini jajáʼ in kónial. 1 Juan 5:14. tu uchál: «‹I éjtowal ki konoy jawaʼ ki leʼnaʼ›, kom i tsoʼobits abal tu atsʼal jawakitskʼij ki konchij, ‹júnkudh kʼalʼ in kulbétal›».

Ka tsuʼuw jáyej Salmo 65:2; Juan 14:6, 14, ani 1 Juan 3:22.

¿JALEʼ TU TʼAJNAL AXÉʼ XI KONOWIXTALÁB? Yán i atiklábchik in tsálpayal abal neʼets ka kulbédhanchat in éjatal max kin koʼoy i túmin, i alubentaláb ani ka exlomnaj kʼal yán i atiklábchik, jaxtám in tsápnanchal kin koʼoy patal axéʼ pero, yab jaykʼij in bájwal kin elaʼ patal an kulbetaláb.

JAWAʼ AN BIBLIA TU EXÓBCHAL: A Jesús in tejwamedhaʼ jantʼini ti éjtowal ki elaʼ an kulbetaláb tam tin uluw: «kulbél játs jitaʼchik in atsʼal i yejenchixtaláb espiritual» (Mateo 5:3, NM). Expidh neʼets ki elaʼ an kulbetaláb max ki exlaʼ an chubaxtaláb kʼal a Dios, ani jawaʼ jajáʼ in tsálpayal kin tʼajaʼ abal wawáʼ. Nixéʼ xi chubaxtaláb i elál ti Biblia, ani ki exlaʼ tu tólmiyal ki tsuʼuw jawaʼ játs más exbadh abal i éjatal, ani jawaʼ ibaj. Max ki jilaʼ abal an Biblia tu ku beldhanchij i tsalápil ani i tʼajbilábil, neʼets kin tʼajaʼ ku kʼwajiy más kulbél (Lucas 11:28).

Ka tsuʼuw jáyej Proverbios 3:5, 6, 13-18 ani 1 Timoteo 6:9, 10.

 I tsuʼumalits jún i wéʼ jantʼini an Biblia in tokʼtsiyal akak i konowixtaláb. ¿A léʼ ka exlaʼ más? Max tatáʼ pél jún i atikláb «axi in atsʼal i yejenchixtaláb espiritual», neʼets ka léʼnaʼ ka exlaʼ más. Walám tatáʼ a kwaʼal kʼeʼat i konowixtaláb, ejtil: Max a Dios u tʼeʼpinal kʼal wawáʼ ¿Jaleʼ tin jilámal ka watʼey yantom i pojkaxtaláb ani yajchiktaláb? ¿Jantʼini ti a éjtowal ka alwamedhaʼ a éjatal kʼal a yanel? An Biblia in tokʼtsiyal lej alwaʼ axéʼ ani kʼeʼat más i konowixtaláb.

Pero yán i atiklábchik yab in exlál jantʼoj kin tʼajaʼ, max kin aliy an tokʼtsixtaláb al an Biblia o ibáj. In tsuʼtalchik jantʼini jún i libro lej púlik ani kʼibat kin éxbay. ¿A léʼ kit tolminchat abal ka elaʼ an tokʼtsixtaláb axi in binál an Biblia? An ólchixchik kʼal a Jehová ti pidhál tsáb i tolmixtaláb.

Axi okʼox pél an folleto Jawaʼ a Dios tu ólchal lej alwaʼ, tsʼejkadh abal kin tólmiy an atiklábchik axi lej tʼojlidh, abal kin exobnaʼ jantʼini an Biblia in tokʼtsiyal i konowixtaláb axi lej exbadh. An tsábchil tolmixtaláb; pél kit exóbchin tsʼejwalidh kʼal an Biblia ta kʼimáʼ. Jún i ólchix kʼal a Jehová, bajudh ti exóbchix kʼal an Biblia, neʼets ti jolkʼanchij jún i wéʼ i kʼij patal an semana abal ti tsaʼbiy ta kʼimáʼ o juʼtáj tatáʼ ka léʼnaʼ abal ti exóbchij kʼal an Biblia. Yán i atiklábchik tolminchamej kʼal an exobchixtaláb axi in batsʼumal, ani yán in tʼajamal ti kwéntaj kulbél, abal in elámal an chubaxtaláb.

Tatáʼ jáyej a éjtowal ka tsuʼuw ta kwetémtal abal an chubaxtaláb axi tal ti Biblia, in kwaʼal lej yán in jalbil. Yab expidh tu walkál kʼal tálchik i belomtaláb axi tu jikʼedhal, axi ukʼpidh ani yab chubax, jáyej tu pidhál i aychixtaláb ani tu kulbédhanchal i éjatal. A Jesús in uluw: «Neʼets ka exlaʼ an chubaxtaláb ani játs neʼets ti walkaʼ» (Juan 8:32).