Patal i yéjenchal i tumín abal ki pidhaʼ i yanel jawaʼ in yéjenchal (Proverbios 30:8). «An tumín pél jantʼoj axi tu tólmiyal» (Eclesiastés 7:12). Tam junchikíl walám kʼibat ka atsʼaʼ kit tʼilmáts kʼal a yanel tin kwéntaj an tumín, pero yab ka jilaʼ abal axéʼ kin tʼajaʼ abal ka koʼoy i kʼibataláb ti al a tomkintal (Efesios 4:32). Tsablom ta éb in tomnál ka tsalpay kʼal jantʼoj ti neʼets ka pakuwchik an tumín.

AXI AN BIBLIA IN ÓLNÁL: «Max neʼets ka tsʼejkaʼ i atáj ka okʼox tsalpay max a kwaʼalits an tumín abal ka talaʼ tsʼejkaʼ» (Lucas 14:28). Tsablom ta éb in tomnál ka tsalpay jantʼiniʼ ti neʼets ka eyendhaʼ an tumín axi a kwaʼalchik dhayach (Amós 3:3). Ka tsálpaychik okʼox jantʼoj neʼets ka tsʼaʼiy ani jáy a ejtowal ka pakuw (Proverbios 31:16). Max a kwaʼalchik yán i tumín axéʼ yab in léʼ kin uluw abal tʼájatits kwaʼal ka pakuw. Yab kit tokʼlin, ka pakuw expidh jawaʼ a kwaʼal (Proverbios 21:5; 22:7).

AXI A EJTOWAL KA TʼAJAʼ:

• Max ka jilkʼon wéʼ i tumín tin taltal an semana, kit tʼilmáts kʼal a tomkíl jantʼiniʼ ti neʼets ka eyendhaʼ

• Max a kwaʼalchik i tokʼlab, ka tʼajaʼ jún i tsʼejkantaláb abal yabáts kit lej pakwláts. Jún i tʼiplab, tatáʼ a ejtowal ka tsʼejkaʼ an kʼapnél ta kʼimáʼ ani antsanáʼ yab ka tsʼaʼiy juʼtáj píl

AXI AN BIBLIA IN ÓLNÁL: «Ka tʼajaʼ jawaʼ tekedh, yab expidh tin tsuʼuxtal a Jehová jayej tin tsuʼuxtal an inikchik» (2 Corintios 8:21, TNM). Ka uchaʼ a tomkíl jáy a atál ani jáy a pakuwal.

Okʼxidh ka pakuw i tumín kit tʼilmáts kʼal a tomkíl (Proverbios 13:10). Max kit tʼilmáts etsʼey tin kwéntaj axéʼ neʼetschik kit kʼwajiy kulbél. An tumín axi a atál yab expidh pél abal tatáʼ, jayej pél abal a yanel (1 Timoteo 5:8).

AXI A EJTOWAL KA TʼAJAʼ:

• Kit tʼilmáts kʼal a tomkíl abal jáy a ejtowalchik ka pakuw kʼalejkʼij

• Yab ka aychij abal ka waʼtsin jún i kʼibataláb abal kit tʼilmáts tin kwéntaj i tumín