A Jehová in léʼ abal ki «kʼanidhaʼ an putudhtaláb» (Miqueas 6:8). An putudhtaláb lej exbadh al an tomkintaláb, kom antsanáʼ a tomkíl neʼets ti ólchij jawaʼ in atsʼál. Ani axéʼ lej exbadh abal a tomkintal ka kʼwajiy más tsapik.

Xóʼ ta kʼícháj, an putudhtaláb kʼwajat ti kʼibel al an tomkintaláb. Jaxtám abal ka beletnaʼ a tomkintal kwaʼal ka tʼajaʼ tsáb i tʼajbiláb.

AXI AN BIBLIA IN ÓLNÁL: «[Ka tʼajaʼ ti kwéntaj] jawaʼ játs axi más exbadh» (Filipenses 1:10, TNM). In tomnál ka punuw okʼox a tomkintal, kom játs axi más exbadh ta ejatal.

A Jehová in léʼ abal tatáʼ kit kʼwajiy putudh kʼal a tomkíl ani abal tsablom kit kʼwajiychik lej kulbél (Eclesiastés 9:9). Jajáʼ in ulal abal kwaʼal ka lej tʼajaʼ ti kwéntaj a tomkíl, jaxtám in tomnál ka alimchikiy jantʼiniʼ ka kulbedhaʼ (1 Corintios 10:24). Ka tejwamédhanchij a tomkíl abal lej chubax a kʼanidhál ani abal a yéjenchal.

AXI A EJTOWAL KA TʼAJAʼ:

• Ka jilaʼ i kʼij abal ka tʼajaʼ ti kwéntaj a tomkíl

• Ka tsalpay jawaʼ in yéjenchal a tomkíl ani yab expidh axi a yéjenchal tatáʼ

AXI AN BIBLIA IN ÓLNÁL: «Max an inik kin metʼaʼ i uxum ani expidh kin atʼax tsalpay walbinénekits tin ichích kʼal jajáʼ» (Mateo 5:28, TNM). Max jún kin aynanchij kin atʼax tsalpay, ejtíl max kʼwajatits in kʼambiyal in tomkíl.

A Jehová in ulal abal lej yejentál ka beletnaʼ a ichích (Proverbios 4:23; Jeremías 17:9). Ani abal ka beletnaʼ, ka lej tʼajaʼ ti kwéntaj jawaʼ a tsuʼtal (Mateo 5:29, 30). Ka aynaʼ in tʼiplabil a Job, jajáʼ in uluw abal yab neʼets kin metʼaʼ kʼal i kidháb leʼnomtaláb jún i uxum axi yab pél in kʼimádhil (Job 31:1). Yab ka metʼaʼ i pornografía. Yab ka léʼnaʼ jún i atikláb axi yab pél a tomkíl.

AXI A EJTOWAL KA TʼAJAʼ:

• Ka tejwamédhanchij axi más abal tatáʼ a kwaʼalits a uchbíl kʼal a tomkíl

• Ka kʼakʼnaʼ jawaʼ in atsʼál a tomkíl ani yab kit xeʼtsin tit kʼambibíl