EXOBINTALÁB 29
Ki tólmiy a Jesús kom játs axi tu okʼnál
«In pidhnének kʼal a Dios ku ábatnaʼ patal axi ti éb ani ti tsabál» (MAT. 28:18).
AJATLÁB 13 Cristo es nuestro modelo
JAWAʼ NEʼETS KI EXÓBNAʼ *
1. ¿Jantʼoj játs axi in léʼ a Jehová abal ka tʼajan xowéʼ?
A JEHOVÁ in léʼ abal an alwaʼ kaw ka olnáj tin puwél an Tsabál (Mar. 13:10; 1 Tim. 2:3, 4). Kom axéʼ xi tʼojláb lej exbadh abal a Jehová, in takuyámal in Tsakámil abal kin ókʼnaʼ. A Jesús kʼwajat in okʼnál lej alwaʼ an olnomtaláb. Jaxtám i exlál abal tam a Jehová kin chiʼdhaʼ an Armagedón, neʼets kin atsʼaʼ lej kulbél kʼal an tʼojláb axi kʼwajinek ti tʼajnal (Mat. 24:14).
2. ¿Jantʼoj neʼets ki exóbnaʼ?
2 Neʼets ki exóbnaʼ abal a Jesús kʼwajat in eyendhál «an tʼojnal axi putudh ani tsalpadh» abal tu ku exóbchij ani kin ókʼnaʼ an olnomtaláb (Mat. 24:45). Jayej neʼets ki exóbnaʼ jantʼiniʼ i éjtowal ki tólmiy a Jesús ani «an tʼojnal axi putudh ani tsalpadh».
A JESÚS JÁTS AXI IN OKʼNÁL AN OLNOMTALÁB
3. ¿Jantʼoj tam tʼojláb pidhnének a Jesús?
3 ¿Jaleʼ ti exlál abal a Jesús jats axi in okʼnál an olnomtaláb? Tam ti a Jesús neʼetsakits ka wichiy ti éb, tamkun kʼal talchik in aykolil ti Galilea ani in uchaʼ: «In pidhnének kʼal a Dios ku ábatnaʼ patal axi ti éb ani ti tsabál». Talbél in uluw axéʼ xi kaw: «Kit kʼalechik tin puwél an tsabál, ka exóbchij tin patál an inikchik u káwintal abal ti kin tsʼatʼénchij» (Mat. 28:18, 19). A Jesús in batsʼúmal yan i tʼojláb, ani jun kʼal axéʼ pel kin ókʼnaʼ an olnomtaláb.
4. ¿Jaleʼ ti lej belál abal a Jesús kʼwajat in okʼnál an olnomtaláb xowéʼ ta kʼicháj?
4 A Jesús in uluw abal an alwaʼ kaw neʼets ka olnáj tin puwél an tsabál, ani abal jajáʼ neʼets ka kʼwajiy kʼal wawáʼ ma ka talabedháj an tʼojláb (Mat. 28:20). Kʼal axéʼ i éxbayal abal a Jesús neʼets kin ókʼnaʼ an olnomtaláb ma xowéʼ ta kʼicháj.
5. ¿Jantʼiniʼ u kʼwajat tu tólmix abal ka putun a Salmo 110:3?
5 A Jesús in exlálak abal xowéʼ ta kʼicháj neʼetsak ka waʼtsin yan i ólnom kʼal an alwaʼ kaw. In lej belálak abal neʼets ka putun axéʼ xi kaw: «Jitaʼ ti tʼójonchal neʼets kin léʼnaʼ ka tólmixin tam Tatáʼ ka ókʼnaʼ an tʼojláb» (Sal. 110:3). Max tatáʼ it kʼwajat ti ólnom, kʼwajat a tólmiyal a Jesús ani «an tʼojnal axi putudh ani tsalpadh». Jayej kʼwajat ti tólmix abal ka putun axéʼ xi kʼej kaw. Axéʼ xi tʼojláb u aynancháb ka tʼajan bélits abal waʼats talchik i kʼibataláb.
6. ¿Jawaʼ játs an kʼaʼál kʼibataláb axi i tametnál?
6 Waʼats yan jitaʼ axi tu tomolnál. Ejtíl, an apóstatas, i eyalchik ani jitaʼchik in okʼnál an kʼakʼnaxtaláb axi yab chubax. Jajáʼchik in búkʼuwal i janamtaláb tin kwéntaj i tʼojlábil. Walám i yanél, i exlowál o i juntal tʼojnal kin belaʼ jawaʼ u uluwáb. Nixéʼ walám kin tʼajaʼ abal tu ku kʼanchij ki kʼakʼnaʼ a Jehová ani ki ólnaʼ an alwaʼ kaw. Al talchik i bichow an epchalchik u kʼwiynal, u kwadhnal ani ma u baliyáb ti wikʼaxteʼ. Yab i jikʼpál axéʼ kom a Jesús in uluw abal neʼets ku kʼwiyan kom pel u aykol kʼal jajáʼ (Mat. 24:9). Nixéʼ in tejwamedhál abal pel u aykol kʼal a Jesús ani abal a Jehová kʼwajat in lábliyal i tʼojlábil (Mat. 5:11, 12). A Satanás játs axi in tʼajál abal ku ayoknáj pero yab neʼets kin ejtow kin kúbdhaʼ a Jesús. An alwaʼ kaw kʼwajat ti olnáb tin puwél an tsabál, ani játs kom a Jesús kʼwajat tu tólmiyal.
7. ¿Jaleʼ ta lej belál abal a Apocalipsis 14:6, 7 kʼwajat ti putnal?
7 Kʼeʼat i kʼibataláb játs abal waʼats yan i kawintaláb. Ban tsuʼbixtaláb axi a Jesús in tejwamédhanchij an abatwálej Juan, in tólmiy kin tʼajaʼ ti kwéntaj abal bélits abal waʼats yan i kawintaláb, an alwaʼ kaw neʼetsak ka olnáj tin puwél an tsabál (ka ajiy Apocalipsis 14:6, 7). ¿Jantʼoj tʼajnének abal ka putun axéʼ xi tʼojláb? Punuwámej i publicaciones al watʼadh 1.000 i kawintaláb ti jw.org. An Kwenél i Ókʼnom in ulúmal abal ka wilkʼáj al watʼadh 700 i kawintaláb an libro Kit kʼwajiy kulbél abal etsʼey, kom axéʼ játs axi i eyendhál abal ki bínaʼ i exobintaláb kʼal an Biblia. Tsʼejkamej i videos abal jitaʼchik yab otsʼox ani i publicaciones ti braille abal jitaʼchik yab u tsuʼux. Kʼal axéʼ xi tʼojláb, xowéʼ más yan i atikláb in éjtowal kin exlaʼ an alwaʼ kaw. Yan i atikláb al «píl i kawintaláb» kʼwajat in exobnál an chubaxtaláb axi ti Biblia. Antsanáʼ kʼwajat ti putnal an kʼej kaw tin kwéntaj an olnomtaláb (Zac. 8:23; Sof. 3:9). Patal axéʼ xi tʼojláb kʼwajat ti tʼajnal kom a Jesús kʼwajat in okʼnál.
8. ¿Jantʼoj bajuwámej ka tʼajan ban olnomtaláb?
8 Tin bichówil a Jehová, waʼats watʼadh 8 millones i atikláb axi u kʼwajíl al watʼadh 240 i bichow. Ani tin nakél an támub kʼwajat ti pujnal miles i atikláb. Pero jawaʼ más exbadh játs abal axéʼchik xi aykol kʼwajat in tsápnanchal kin jalkʼuy jantʼiniʼ in ey (Col. 3:8-10). Yan kʼal jajáʼ ti biyál pélakchik i iníkbej ani i uxúmbej. Kʼeʼatchik lej pojkaxak ani in kʼwiyálak axi más. Pero xowéʼ kʼwajat ti putnal an kaw axi ti Isaías 2:4: «Yabáts neʼetschik ti pejex». Kom chudhél i tsápnanchal ki jalkʼuy jantʼiniʼ i ey, nixéʼ in tʼajál abal yan i atikláb kin léʼnaʼ ka utey tin bichówil a Jehová. Antsanáʼ i tejwamedhál abal i belkál a Jesucristo, kom játs axi tu okʼnál (Juan 13:35; 1 Ped. 2:12). Ani i exlál abal axéʼ kʼwajat ti watʼel kom a Jesús kʼwajat tu tólmiyal.
A JESÚS KʼWAJAT IN EYENDHÁL JUN I TʼOJNAL
9. Kʼal jawaʼ in ulal Mateo 24:45-47, ¿jantʼoj in uluw a Jesús abal neʼets ka watʼey xowéʼ ta kʼicháj?
9 (Ka ajiy Mateo 24:45-47). A Jesús in uluw abal tin taltal an xeʼtsintaláb, neʼetsak kin bíjiy jun i «tʼojnal axi putudh ani tsalpadh», jajáʼchik neʼets tu ku pidhaʼ an exobchixtaláb axi i yéjenchal. Axéʼ xi tʼojnal kʼwajat in pútuwal lej alwaʼ in uchbíl xowéʼ ta kʼicháj. A Jesús kʼwajat in eyendhál «an tʼojnal axi putudh ani tsalpadh» abal tu ku exóbchij, ani jayej abal kin exóbchij an atiklábchik axi in léʼ ka utey kʼal a Jehová. Jajáʼchik yab jaykʼiʼ in ulúmal abal játs axi in abatnálchik in bichówil a Jehová (2 Cor. 1:24). In exlálchik abal a Jesucristo játs axi kʼwajat «tu okʼnál ani tu beldhál» (Is. 55:4).
10. ¿Kʼal jawaʼ tam libro axi tejwaʼ ban imagen a exlaʼ tin kwéntaj a Jehová?
10 Ma ti 1919, «an tʼojnal axi putudh ani tsalpadh» in tsʼejkámal yan i publicaciones abal kin tólmiy an atiklábchik kin exlaʼ tin kwéntaj a Jehová. Ti 1921 kaldháj ti inglés an libro El Arpa de Dios, tanáʼ u olnábak talchik i exobchixtaláb axi ti Biblia. Ani talbél tujey ti kaldháb kʼeʼat i libros. ¿Kʼal jawaʼ tam libro i tujey tatáʼ a exóbnal an Biblia? Walám pel kʼal an libro: «Sea Dios veraz», La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Qué enseña realmente la Biblia? o kʼal axi kalej talbél, ¿Qué nos enseña la Biblia? O walám itekʼij ta tujchamal ti exóbal ani kʼwajat a eyendhál an libro Kit kʼwajiy kulbél abal etsʼey. Axéʼ xi libros lej eynének kom in tolmiyámal yan i atikláb abal ka utey kʼal a Jehová.
11. ¿Jaleʼ ti patal i yéjenchal ku exóbchin?
11 Yab expidh axi u tujél kin exóbnaʼ an Biblia in yéjenchal ka exóbchat, jayej jitaʼchik biyál tin exlál tin kwéntaj a Jehová in yéjenchal. An abatwálej Pablo in uluw abal jitaʼchik in éxbayalits in káwintal a Dios, jayej in yéjenchal ka exóbchat. Jayej in uluw abal jitaʼ kin eyendhaʼ axéʼ xi exobchixtaláb, neʼets kin exbay «jawaʼ alwaʼ ani jawaʼ yab alwaʼ» (Heb. 5:14). Walám ki atsʼaʼ kʼibat ki bélkaʼ a Jehová kom an atiklábchik in tʼajál yan jantʼoj axi kidháb. Pero a Jesús kʼwajat tu pidhál yan i exobchixtaláb axi kaldhach ti Biblia, axéʼ tu tólmiyal abal ki koʼoy tsapik i bélomtal. Jajáʼ in eyendhál «an tʼojnal axi putudh ani tsalpadh» abal tu ku pidhaʼ axéʼ xi exobchixtaláb.
12. ¿Jantʼoj i tʼajámal abal ki puwénchij in bij a Dios antsanáʼ jantʼiniʼ tin tʼajaʼ a Jesús?
12 Wawáʼ exom i puwénchal in bij a Dios antsanáʼ jantʼiniʼ tin tʼajaʼ a Jesús (Juan 17:6, 26). Jun i tʼiplab, ti 1931 u bíjiyat tu ólchixchik kʼal a Jehová. Antsanáʼ i tejwamedhál abal lej exbadh abal wawáʼ in bij a Dios (Is. 43:10-12). Ani ti octubre ti 1931, tujey ti tejwamél in bij a Dios ban portada in kʼál axéʼ xi revista ti inglés. Jayej punuwámej in bij a Dios ban Traducción del Nuevo Mundo juʼtáj tin tomnál ka kʼwajiy. Wawáʼ yab i tʼajál jantʼiniʼ an atiklábchik axi in ulal abal in kʼakʼnál a Dios, pero in tíxkʼanchal in bij ban Biblia.
A JESÚS IN TʼÓJOJOYAL IN AYKOLIL
13. ¿Jaleʼ ta lej belál abal a Jesús kʼwajat in eyendhál «an tʼojnal axi putudh ani tsalpadh»? (Juan 6:68).
13 A Jesús in eyendhál «an tʼojnal axi putudh ani tsalpadh» abal kin tamkuy jun i bichow tejéʼ Tsabál axi kin kʼakʼnaʼ expidh a Jehová. ¿Jantʼiniʼ a atsʼál tatáʼ kom it kʼwajat tin bichówil a Jehová? Walám tatáʼ jayej a atsʼál ejtíl a Pedro. Jajáʼ in uchaʼ a Jesús: «¿Kʼal jitaʼ ku kʼalej? Expidh tatáʼ a olnál i alwaʼ kaw» (Juan 6:68). ¿Juʼtaj walám u kʼwajatak max yabak u útenek tin bichówil a Jehová? A Jesús in eyendhál in bichówil a Jehová abal tu ku exóbchij, ani abal tu ku tólmiy ki exóbchij an atikláb. Jayej tu tólmiyal ki jalkʼuy jantʼiniʼ i ey abal ki kulbedhaʼ a Jehová (Efes. 4:24).
14. ¿Jantʼiniʼ ti tolmiyámal tatáʼ in bichówil a Jehová ma ti tújenek an coronavirus?
14 A Jesús in exlál jantʼiniʼ tu ku ókʼnaʼ tam i watʼal i kʼibataláb. Játs jawaʼ in tʼajaʼ tam ti tujey an coronavirus. Yan i atikláb u lej jikʼélak ani yab in exlálak jantʼoj kin tʼajaʼ, pero a Jesús kʼwájinek tu ku exóbchij lej alwaʼ. U uchan ki eyendhaʼ an cubrebocas, ani yab ki lej uténchij an atiklábchik. An ókʼnom uchanchik abal kin tʼajaʼ ti kwéntaj patal an epchal, ani kin tólmiy kʼal jawaʼ in yéjenchal (Is. 32:1, 2). Jayej, an olchixtaláb axi tu pidhámal an Kwenél i Ókʼnom tu lej exobchámal ani tu kanatbedhámal.
15. ¿Jantʼoj tam olchixtaláb binámej ma ti tújenek an coronavirus, ani jantʼoj tam alwaʼtaláb i batsʼúmal?
15 Tam ti tujey an coronavirus jayej u uchan jantʼiniʼ ti neʼetsak ku olnomáts, ani jantʼiniʼ ti neʼets ku tamkun. I tujchij ku tamkun por videoconferencia, ani an púlik tamkuntaláb i tsuʼuw ti Internet. Jayej tujey tu ólnom kʼal an cartas ani kʼal an teléfono. A Jehová in lej labliyámal axéʼ xi tʼojláb. Yan i sucursales in olnámal abal yánenek an publicadores. Yan i epchal in watʼamal yan jantʼoj kʼijidh ban olnomtaláb (ka tsuʼuw an recuadro « A Jehová in lábliyal an olnomtaláb»).
16. ¿Jantʼoj i lej belál?
16 Walám talchik i epchal kin tsalpay abal in bichówil a Jehová in lej watʼkʼanchal jantʼiniʼ tu beletnámal ma ti tújenek an coronavirus. Pero patal i tʼajámal ti kwéntaj abal an olchixtaláb axi u pidhnének játs axi in tomnálak ki batsʼuw (Mat. 11:19). Max ki lej tsalpay jantʼiniʼ tu okʼnámal a Jesús, yab neʼets ku jikʼey kʼal an kʼibataláb axi ki tamétnaʼ axi taʼtal a kʼicháj, kom i lej belál abal a Jehová ani a Jesucristo neʼets kin áynanchij tu ku béletnaʼ (ka ajiy Hebreos 13:5, 6).
17. ¿Jantʼiniʼ a atsʼál tatáʼ kom a Jesús kʼwajat tu okʼnál?
17 ¡Lej kulbél i atsʼál kom a Jesús tu okʼnál! Tin bichówil a Jehová waʼats yan i atikláb axi pil ti walkidh, pil in káwintal ani pil in bichówil. U kʼwajat alwaʼ exóbchidh, ani u exóbchinal abal jantʼiniʼ ku olnomáts. Jayej i áynanchal ki jalkʼuy jantʼiniʼ i ey ani i tsápnanchal ku kʼanidháxin. ¡I atsʼál lej kulbél kom a Jesús kʼwajat tu okʼnál!
AJATLÁB 16 Alabemos a Jehová por su Hijo, el Ungido
^ Xowéʼ ta kʼicháj, millones i atikláb kʼwajat in olnál an alwaʼ kaw. Walám tatáʼ jayej kʼwajat ti tólmix. Axéʼ in tejwamedhál abal kʼwajat a jilál abal a Jesús ti ókʼnaʼ. Al axéʼ xi exobintaláb neʼets ki tsuʼuw i tʼiplabchik axi in tejwamedhál abal a Jesús kʼwajat in okʼnál an olnomtaláb. Ki tʼilaʼ axéʼ neʼets tu ku tólmiy abal ki áynanchij ki tʼojonchij a Jehová ani ki belkaʼ a Jesucristo.
