Konowixtalábchik axi a tʼajámal
¿Jaleʼ tin uluw a Jesús, «in cheʼenek ani játs ti waʼtsinének i kʼibataláb»?
A Jesús in uluw abal yab in tomnál ku kʼwajiy tu péjel. Pero jun a kʼicháj a Jesús in uchaʼ an abatwálejchik: «Yab ka kʼibtsʼodh tsálpaychik abal an atiklábchik neʼets ka kʼwajiy kulbél kom nanáʼ in cheʼenek tejéʼ tsabál. In cheʼenek ani játs ti waʼtsinének i tomolnaxtaláb. U tomolnáb i tataláb kʼal in kwitólil, i mimláb kʼal in tsʼikʼáchil ani i uxum iyám kʼal in alʼíb» (Mat. 10:34, 35). ¿Jantʼoj in léʼak tu ku exóbchij a Jesús kʼal axéʼ xi kaw?
A Jesús yab in léʼak abal an yaneláb ka bukʼlaxin. Pero in exlálak abal jats neʼetsak ka watʼey kʼal an exobchixtaláb axi in binálak. Jitaʼchik in léʼ kin tʼajaʼ ti aykol kʼal a Jesús kwaʼal kin exbay abal in yanél walám yab neʼets kin kulbétnaʼ. Max jun i atikláb u kʼwiynal kʼal in tomkíl o kʼal in kʼimádhil, o kʼal kʼeʼat in yanél, walám neʼets kin atsʼaʼ kʼibat kin tʼajaʼ ti aykol kʼal a Jesús.
An Biblia in uchál axéʼ in aykolil a Jesús: «Ka lubaʼ kit kʼwajlelenchik jun ejet kʼal patal an atikláb» (Rom. 12:18). Pero an exobchixtaláb axi a Jesús tu jilchij in éjtowal ka otsits ejtíl jun i kutsíl al i yanél. Axéʼ in éjtowal ka watʼey max wawáʼ i batsʼúmal an exobchixtaláb, pero walám i yanél tu pojkál ani yab tu jilchal ku exobláts. Max játs jawaʼ i watʼamal, tam u putnal an kaw axi in uluw a Jesús, abal i yanél játs axi neʼets tu ku kʼwiyaʼ (Mat. 10:36).
Waʼats i epchal axi u kʼwajíl kʼal in yanél axi in kwaʼal pil i belomtaláb. Jajáʼchik in tametnál yan i kʼibataláb ani in atsʼál kʼibat ka kʼwajiy putudh kʼal a Jehová ani a Jesús. Walám ka nixoknájchik kin tʼajaʼ i ajib axi yab tekedh, ani játs tanáʼ ti kwaʼal kin tákuy jitaʼ in léʼ kin kulbedhaʼ. A Jesús in uluw: «Yab u éjtowal ku bíjiy tu kʼál, jitáts in kʼadhpidh kʼanidhál in tátaj o in mim ani max nanáʼ tokot lej wéʼ tin kʼanidhál» (Mat. 10:37). Kʼal axéʼ xi kaw a Jesús yab in léʼnaʼ kin uluw abal in aykolil yab kwaʼalak kin kʼanidhaʼ in tátaj. Jawaʼ a Jesús in léʼak tu ku exóbchij jats abal kwaʼal ki tʼajaʼ ti kwéntaj jantʼoj játs axi más exbadh ti ejatal. Max jun i yanél tu ku kʼwiyaʼ kom i kʼakʼnál a Jehová, wawáʼ i áynanchal ki kʼanidhaʼ, pero i éxbayal abal jawaʼ más exbadh, jats ki kʼanidhaʼ a Jehová.
I lej yajnál tam i yanél tu kʼwiyál kom i kʼakʼnál a Jehová. Pero wawáʼ i lej tʼilál an kaw axi a Jesús in uluw: «Jayej yab u éjtowal ku bíjiy tu kʼál jitáts yab in léʼ ka yajchikiyat ani ma ka tsemdháj tin ebál abal pel i tsʼatʼel kʼal nanáʼ» (Mat. 10:38). Wawáʼ i exlál abal neʼets ki yajchiknaʼ max i léʼ ki tsʼatʼénchij a Jesús. Jun i tʼiplab, walám i yanél tu ku kʼwiyaʼ. Pero wawáʼ i aychal abal kʼal jawaʼ ki tʼajaʼ, jun a kʼicháj i yanél kin léʼnaʼ kin exóbnaʼ an Biblia (1 Ped. 3:1, 2).