ABAL AXI TÓMKIDH
1. Ka pidha’ in exbádh an tomkintaláb
¿JANT’INI’?
An atikláb axi in pidhál in exbádh an tomkintaláb in éxbayal abal kwa’al ka k’wajiy junax, jaxtám yab in tsálpayal ka jilaxin.
Talchik i atikláb axi tómkidh in áynanchal junax abal yab jant’oj ka uchan k’al in yanél. Pero más exbadh ka k’wajiychik junax kom chubax u k’anidháx ani u k’ak’náx.
JAWA’ IN ULAL AN BIBLIA: «An tomkidh inik yab kwa’al kin jílkakay in k’imadhil» (1 Corintios 7:11).
«Max a pidhál in exbádh an tomkintaláb yab ne’ets kit alk’idh tsakuy k’al a tomkíl. Jayej yab ne’ets ka ats’a’ k’ibat ka pákwlanchij a tomkíl ani ka konchij ti pákwlanchij, ani tam ka ko’oychik jun i k’ibataláb yab ne’ets ka tsalpay kit jilaxin» (Micah).
¿JALE’ TI LEJ EXBADH?
Max axi tómkidhchik yab kin pidha’ in exbádh an tomkintaláb, tam kin ko’oy jun i k’ibataláb, dhubat ne’ets kin tsalpay ka jilaxin. Ne’etschik kin tsalpay abal yabák tomkinének.
«Yan i atikláb in tsálpayal abal max yab kin éjtowchik ka k’wajiy alwa’ in éjtowal ka jilaxin. Max tam ti it tomkin a tsalpay abal a éjtowal kit jilaxin tam ka lé’na’, pel kom yab a pidhál in exbádh an tomkintaláb» (Jean).
¿JANT’OJ A ÉJTOWAL KA T’AJA’?
KA TSALPAY K’AL AXÉ’
¿Jant’oj a t’ajál tam kit tsákuychik?
¿A tsálpayal abal yabak it tomkinének ?
¿A tsálpayal abal ne’etsak kit k’wajiy más kulbél max it tomkinénekak k’al k’e’at?
¿A ulumal «ne’ets tu jílkakay» o «ne’ets ku aliy k’e’at»?
Max a tsalpayámal jant’oj ejtíl axé’, in tomnál ka pidha’ más in jalbíl an tomkintaláb.
KA T’ILA AXÉ’ K’AL A TOMKÍL
¿Yabáts i pidhál in exbádh an tomkintaláb? ¿Jale’ walám?
¿Jant’oj i éjtowal ki t’aja’ abal ki áynanchij ki pidha’ in exbádh an tomkintaláb?
JAWA’ A ÉJTOWAL KA T’AJA’
Ka dhúchunchij a k’imadhil jawa’ a ats’ál abal k’al jajá’.
Ka ko’oy jun i foto in k’ál a k’imadhil ju’táj ti t’ojnal.
Max yab it k’wajat k’al a k’imadhil ka tsápnanchij ka tawna’.
JAWA’ IN ULAL AN BIBLIA: «Jajá’chik pel ejtíl max júnkatsits tin éb kom pel k’al a Dios tit junkuwát, jaxtám yabáts alwa’ max an inik kin jílkakay in k’imadhil» (Mateo 19:6).
