Abal ka exláj jant’ini’ játs a ey, yab expidh kwa’al kit éxlanchat a bij, kwa’al kit éxlanchat jant’oj a belál, jawa’ a tsálpayal ani jawa’ a t’ajál.

Max a exlál jant’ini’ játs a ey, yab ne’ets ka jila’ abal a at tsakam ti ucha’ jant’oj ka t’aja’.

“«Yan i atikláb in lé’ ka uchan jawa’ kwa’al kin t’aja’, ma an toltom axi kwa’al kin éyendha’» (Adrian).

«U tsápnanchal ku t’aja’ jawa’ tekedh, bélits abal junchikíl we’ k’ibat. Naná’ u exlál jant’ini’ játs u ja’úbchik ani jant’ini’ játs u ey» (Courtney).

JAWA’ IN ULAL AN BIBLIA: «Yab ka jila’ abal axé’ xi xe’tsintaláb kin exóbchij a tsalapil, ka jila’ abal a Dios ti jálk’unchij a tsalap» (Romanos 12:2).

Abal ka exla’ jant’ini’ játs a ey ani jawa’ kwa’alej ka jalk’uy, ka tsalpay k’al ox jant’oj, jawa’ a bajuwámal, jawa’ a yéjenchalej ka t’aja’ ani jawa’ a belál. Ka konowiy ta kwetémtal axé’.

Jawa’ a bajuwámal: «¿Jant’oj játs axi u exlál ku t’aja’ alwa’? ¿U exlál ku abatna’ tu ba’? ¿In ulel k’ijilej ju’táj tin yejencháb? ¿U kulbetnál tin t’ojnal? Ani ¿in alwa’ inik?».

JAWA’ A ÉJTOWAL KA T’AJA’: Max yabayej a exlál jant’ini’ a ey, ka konchij a tátaj o a ja’úb ti ólchij.

JAWA’ IN ULAL AN BIBLIA: «Ti júnchik an inik kin alwa’ met’a’ in kwete’ t’ajbíl, max in t’ajál alwa’ ka kulbéj, yab kin tsalpay abal jajá’ expidh lej alwa’, ani in at inik imbáj» (Gálatas 6:4).

Jawa’ a yéjenchalej ka t’aja’: «¿Jant’oj in tomnál ku jalk’uy k’al jant’ini’ u ­ey? ¿Jayk’i’ tu ats’ál más k’ibat ku t’aja’ jawa’ tekedh? ¿Jant’oj játs axi tin atálej junchikíl?».

JAWA’ IN ULAL AN BIBLIA: «I k’ambiyal i kwete’ ichích ani pel u janamkaw max ki uluw: yab pel u wálbidh inik» (1 Juan 1:8).

Jawa’ a belál: «¿Jant’oj játs axi u belál, ani jale’? ¿U belál k’al a Dios? ¿Jale’ u belál k’al a Dios? ¿Jant’oj játs axi yab tekedh u tsu’tal ka t’ajan? ¿Jant’oj tam tsalap u kwa’al abal axi ta’tál a k’icháj?».

JAWA’ IN ULAL AN BIBLIA: «An tsalpadhtaláb ne’ets ti béletna’, ani an exlomtaláb ne’ets ti k’aniy» (Proverbios 2:11).