ABAL AXI TÓMKIDH
4. Kit pakwlanchíxin
¿JANT’INI’?
Tam i pákwlanchal jita’, i úk’chiyal jawa’ tu t’ajchij ani yab i dhayál i lokotaláb. Axé’ yab in le’ kin uluw abal ne’ets ki t’aja’ ejtíl max yab wát’enek jant’oj.
JAWA’ IN ULAL AN BIBLIA: «Ka k’ayana’ ani ka pákwlanchij jitats ti odhnál k’al i kaw» (Colosenses 3:13).
«Tam a k’anidhál jita, yab a lej t’ajál ti kwéntaj jayíl u uk’pinal, jawa’ a t’ajál ti kwéntaj pel an tsapláb axi in t’ajál abal kin jalk’uy jant’ini’ in ey» (Aaron).
¿JALE’ TI LEJ EXBADH?
Ki ko’oy i lokotaláb tu ódhnanchal i éjatal ani in t’ajál abal yab ki ats’a’ kulbél k’al i tomkíl o i k’imadhil.
«Jun a k’icháj, u ats’a’ lej k’ibat ku pákwlanchij u tomkíl jawa’ tin t’ajchij. Jawa’ xowé’ u yajnál játs abal yab u pákwlanchij dhubat. Max u pakwlanchámalak dhubat yab ne’etsak ki alk’idh yajchikna’» (Julia).
¿JANT’OJ A ÉJTOWAL KA T’AJA’?
KA TSALPAY K’AL AXÉ’
Tam a tomkíl o a k’imadhil kin t’aja’ jant’oj axi ka yajna’ ka tsalpay k’al axé’:
¿A lej yajnál dhúbatk’ij jawa’ kit uchan?
¿A yéjenchal abal ets’ey kit konchat ka pákwlanchij jita’, o a tsápnanchal ka uk’chiy?
KA T’ILA’ AXÉ’ K’AL A TOMKÍL
¿I jilál ka wat’ey yan i k’ij abal ku pakwlachíxin?
¿Jant’oj i éjtowal ki t’aja’ abal dhúbatk’ij ku pakwlachíxin?
JAWA’ A ÉJTOWAL KA T’AJA’
Yab ka tsalpay abal a tomkíl o a k’imadhil t’ajchílits ti odhnál.
Ka tsápnanchij ka exbay jawa’ in ats’ál a tomkíl o a k’imadhil, ka t’ila’ abal «patal i t’ajál jawa’ yab alwa’» (Santiago 3:2).
«Tam i exlál abal ti tsablóm u uk’pinének yab k’ibat i ats’ál ku pakwlanchíxin. Pero más t’ojláb pel tam expidh junkats axi uk’pin. I yéjenchal yan i tsa’ataláb abal ki konchij i tomkíl o i k’imadhil tu ku pákwlanchij ani ki pákwlanchij jawa’ tu ku t’ajchij» (Kimberly).
JAWA’ IN ULAL AN BIBLIA: «Ka dhubat ts’ejka’chik ta kwetémtal an k’ibataláb» (Mateo 5:25).
Kit pakwlanchíxin pel ejtíl ka tepdha’ jun i k’amal.
