ABAL AXI TÓMKIDH
2. Kit tolmíxin
¿JANT’INI’?
An tomkinélchik xi u tolmíx, pel ejtíl tsab i atikláb axi ne’ets in beldhál jun i avión. Lej júnaxchik u tsalpax, ani tin tsablóm u tolmíx tam ka wa’atsin jun i k’ibataláb.
JAWA’ IN ULAL AN BIBLIA: «Jajá’chik pel ejtíl max júnkatsits tin éb» (Mateo 19:6).
«An inik ani an uxum kwa’al ka tolmíxin abal ka k’wajiychik junkudh» (Christopher).
¿JALE’ TI LEJ EXBADH?
Max an tomkinél yabchik ka tolmíxin, tam kin ko’oychik jun i k’ibataláb, ne’etschik ti k’wiyáx ani yab ne’ets kin tsejk’a, bélits max pel jant’oj axi yab lej exbadh.
«Lej exbadh abal axi tómkidh ka t’ojonchik junax. U tomkíl ani naná’ i tsápnanchal ku tolmíxin ani ku t’ilmáts, yab alk’idh tu k’wajat junax» (Alexandra).
¿JANT’OJ A ÉJTOWAL KA T’AJA’?
KA TSALPAY K’AL AXÉ’
¿A tsálpayal abal an tumín axi a atál expidh pel abal tatá’?
¿A ats’ál abal más it k’ijidhbél tam xant’oj a k’imadhil o a tomkíl?
¿Yab a lej kulbetnál ka junkuw in yanél a tomkíl o a k’imadhil, bélits abal jajá’chik u lej júnkunal?
KA T’ILA’ AXÉ’ K’AL A TOMKÍL
¿Jant’oj játs axi más i kulbetnál ki t’aja’ junax?
¿Jant’oj i éjtowalej ki t’aja’ junax?
¿Jant’oj i éjtowal ki t’aja’ abal ku t’ojon junax?
JAWA’ A ÉJTOWAL KA T’AJA’
Ka tsalpay abal a k’imadhil ani tatá’ k’wajatchik ta ubát’ k’al an pelota. ¿Jant’ini’ a éjtowalchik kit tolmíxin abal ka ata’ axi jun an equipo?
Ka tsalpay abal kwa’al ka ata’chik ta tsablóm, ani yab expidh tatá’.
«Yab exbadh jita’ kin ata’. Jawa’ más exbadh játs kit k’wajiychik junkudh ani kulbél» (Ethan).
JAWA’ IN ULAL AN BIBLIA: «Yab ka tsalpay expidh ta kwetémtal abal expidh tatá’ ka wat’a’ alwa’, ka tólmiy axi k’e’atchik abal kin wat’a’ jayej alwa’» (Filipenses 2:3, 4).
