Tu ku olchij wéʼ tin kwéntaj tatáʼ.

In waʼtsin ban tamub 1979, ti Estados Unidos. U tátajchik jilaxin tam ti u kwaʼalak óx i tamub. U mamá tin yedhaʼ jantʼiniʼ in ujnámchik an judíos, in kʼalelak al i escuelas judías, axi u bijiyabak yeshivás. Tam ti u kwaʼalak buk i tamub u kʼalej tu kʼwajíl ti Israel; an escuela juʼtáj tin kʼalelak u exlabak jantʼiniʼ ki kibutz, kom kʼwajatak al i kwenchal juʼtáj waʼatsak yan i tʼayabláb. Jun i tamub talbél u ­kʼalej tu kʼwajíl ti México.

Belits abal yab waʼatsak jun i templo juʼtáj tin kʼwajilak, u áynanchij ku tʼajaʼ jawaʼ u ujnám: ti kʼicháj sabado u lekʼwtsiyalak an velas, u ajiyalak an Torá [axéʼ pelak an dhuchlabil an judíos], abal kin olon u éyendhalak jun i libro ­axi in bij sidur, tanaʼ tu ajiyalak an olábchik. U kulbetnálak ku olchij u juntal exóbal abal jawaʼ u belál jats axi chubax. Yab jaikʼiʼ u ajiyamalak an Nuevo Testamento, axi u kaw tin kwéntaj in olnomtalabil ani in exóbchixtal a Jesucristo; u mamá yab jaikʼiʼ tin jilalak ku ajiy kom in ulal abal  walám ti kin jalkunchij jawaʼ u belalak.

¿Jantʼoj in tʼajaʼ abal ka leʼna ka ajiy an Nuevo Testamento?

Tam ti u putuw 17 i tamub, in wichiy ti Estados Unidos abal ku talabedhaʼ an exobintaláb. Jun i jaʼúb axi in belalak kʼal a Cristo, tin uchaʼ abal max yab ku belaʼ kʼal a Jesús yab neʼetsak ku atsʼaʼ kulbél tu éjatal; tam u tokʼtsiy:

—Abal kʼwajat kambidh jitaʼchik in belál kʼal a Jesus. Ani tin uchaʼ:

—¿A ajiyamal an Nuevo Testamento?

—U tokʼtsiy abal Imbáj.

—Tam, ¿jantʼiniʼ a éjtowal ka uluw jawaʼ a tsálpayal? Nixéʼ yab alwaʼ, okʼox kwaʼal ka exla.

Jawaʼ in uluw, tin tʼajchij ku tsalpay abal kwaʼalak ku exlaʼ. Jaxtám, u batskʼunchij an Biblia ani u neʼdhaʼ abal ku ajiy an Nuevo Testamento.

¿A kulbetnaʼ jawaʼ a ajiy?

U lej jikʼpaʼ ku exla abal pel an judíos axi in dhuchaʼ an Nuevo Testamento. Biyat tu áynanchalak ku ajiy, u éjtow ku tsuʼuw abal a Jesús pel jun i inik lej kʼanidhom ani abal in leʼak kin tólmiy an atiklábchik, ani yab kin odhnaʼ. Jaxtám in kʼalej ti biblioteca ku aliy i libros axi u kawak tin kwéntaj a Jesús. Pero ni jun kʼal axéʼ xi libros tin tólmiy ku belaʼ abal a Jesús pel an Mesías. Junchik in ulalak abal a Jesús pel a Dios, pero axéʼ yabak tekedh abal naná. Jaxtám u tsalpay tu kwetémtal: «¿Jitaʼ in tawnalak a Jesús tam tin tʼajalak an oláb?». U tʼilál abal a Jesús tsemets, pero an Biblia in ulal tin kwéntaj a Dios: «Tatáʼ yab it tsemel». *

¿Tam jantʼoj a tʼajaʼ?

Kom u exlalak abal an chubaxtaláb yab u jalkʼunal, naná neʼetsak ku tsápnanchij ku elaʼ. Jaxtám u ólonchij a Dios ani u olchij jawaʼ u atsʼálak tu ichích —ani, al axéʼ xi kʼij, yab u éyendhaʼ an libro abal ku ajiy an oláb—. Ani tam tin taley tin ol, tin takchij an wileb tsáp i ólchix kʼal a Jehová. In tʼilmáts kʼal jajaʼchik ani tin jilchij jun i folleto. Nixéʼ xi folleto ani kʼal jawaʼ tin exóbchij talbél, tin tólmiy abal ku tʼajaʼ ti kwéntaj abal jawaʼ in belálchik jats axi kʼwajat ti Biblia. Jun i tiplab, an ólchixchik kʼal a Jehová, yab in belál abal a Jesús pel jun i Dios, in belálchik abal pel «in Tsakámil a Dios» * ani «axi kʼaʼál tsʼejkáj kʼal a Dios». *

Talbél in wichiy ti México ani tanaʼ u áynanchij ku exóbnaʼ an kʼejab kaw tin kwéntaj an Mesias kʼal an ólchixchik. ¡Waʼats yan i kʼejab kaw! Pero bélits antsanáʼ, yabak u lej belál. U konowiyalak tu kwetémtal: «¿Pel a Jesús expidh axi in putuw patal axéʼ xi kʼejab kaw? ¿Ani max expidh in tejwamédhaʼ abal pel an Mesías abal kin kʼambiy an atiklábchik?».

¿Jantʼoj jats axi ti tólmiy abal ka belaʼ?

Pel kom an ólchixchik kʼal a Jehová tin tejwamédhanchij junchik i kʼejab kaw axi ni jun i inik in éjtowal kin putuw. A Miqueas in uluw kʼal watʼadh 700 i tamub okʼxidh, abal an Mesías neʼets ka watʼsinak ti bichow Belén. * ¿Jitaʼ in éjtowalak kin tákuy juʼtáj neʼets ka waʼtsin? A Isaías in uluw abal an Mesías neʼetsak ka tsemdháj ejtíl jun i pojkax inik, ani neʼetsak ka joliyat tin jolimtal axi tuminladh. * Patal an kʼej kaw axi uluwat putun kʼal a Jesús.

Jawaʼ tin tólmiy, pel ku exlaʼ juʼtáj ti tal in yaneláb a Jesús. An Biblia in ulal abal an Mesías neʼetsak ka chích tin yanél a David. * An judíos in tʼajalak ti kwéntaj juʼtáj ti talak an yanelábchik, ani max a Jesús yabak waʼtsinek tin yanelil a David, an atiklábchik kʼal axi tu tómolnabak dhubatkʼij neʼetsak kin olnaʼ. Pero yabchik in tʼajaʼ, kom in exlalak abal in yanél ­tal kʼal a David. ­U bijiyabak kʼal an atiklábchik abal pel in «Tsakámil a David». *

Ti tamub 70, talbél tam ti tsemets a Jesús, an romanos in otsaʼ a Jerusalén, ani kʼibej patal jawaʼ kʼwajatak dhuchadh. Abal an Mesías kin tejwamedhaʼ abal tal kʼal in yanél a David, kwaʼalak ka waʼtsin okʼxidh al nixéʼ xi tamub.

¿Tam xowéʼ jantʼoj a tsálpayal?

Ti Deuteronomio 18:18, 19, a Dios in kʼej uluw abal neʼetsak ka waʼtsin ti Israel jun i kawlomej ejtíl a Moisés ani in uluw: «Neʼets ku punuw jun i inik, ani neʼets kin uluw jawaʼ u tsálpayal, ani jitaʼ yab kin bélkanchij in káwintal, naná neʼets ku boliy». Talbél ku exóbnaʼ kidhat an Biblia, u lej belaʼ abal a Jesús de Nazaret jatsak al nixéʼ xi kawlomej.