1, 2. ¿Jantʼoj in tʼajál abal ku ukʼin?

 PATAL u ukʼnének jun a kʼicháj. Walám jun i atikláb ukʼin tam ti waʼtsin jun in tsakámil kom in atsʼálak lej kulbél. Jayej walám ku ukʼin tam ki tʼilaʼ jantʼoj kʼijidh axi i watʼaʼ ti biyál o tam ku wichiy ki tsuʼuw jun i jaʼúb axi biyálits yab i tsuʼtal.

² Pero jawaʼ más in tʼajál ku ukʼin jats tam i yajnál i ichích. Walám tu kʼambiyámal jitaʼ o walám i kwaʼal jun i yawʼláts axi lej kidháb. Jayej, walám u lej ukʼnének kom talnek jun i yanél axi i lej kʼanidhál. Walám wawáʼ jayej ki atsʼaʼ ejtíl a Jeremías, tam tin tsuʼuw abal kʼwajatak ti talabedháb a Jerusalén kʼal an babilonios. Jajáʼ in uluw: «In jaʼlíl u wal ejtíl i itseʼ [...]. Yab u éjtowal ku jilaʼ tin ukʼnal» (Lam. 3:​48, 49).

 3. ¿Jantʼoj in atsʼál a Jehová tam kin tsuʼuw abal kʼwajat i yajchiknál? (Isaías 63:9).

³ A Jehová in exlál jaleʼ tu ukʼnének ani in exlál jayil i kalel i tʼajámal. An Biblia tu ólchal abal a Jehová in tʼajál ti kwéntaj tam kʼwajat i yajchiknál ani neʼets tu ku atsʼaʼ tam ki konchij abal tu ku tólmiy (Sal. 34:15). A Jehová tu tsuʼtal ani tu atsʼál, Jajáʼ pel jun i Tataláb axi tu lej kʼanidhál ani in lej yajnál tam kin tsuʼuw abal wawáʼ u ukʼnal, jaxtám etsʼey in aliyal jantʼiniʼ tu ku tólmiy (ka ajiy Isaías 63:9).

 4. ¿Jawaʼ tam tʼiplabchik axi ti Biblia neʼets ki exóbnaʼ ani jantʼoj i exobnál tin kwéntaj a Jehová?

 ⁴ An Biblia in ólnal jantʼoj in tʼajaʼ a Jehová tam tin tsuʼuw abal in tʼojnálil kʼwajatak ti ukʼnal. Ejtíl, ki tsalpay kʼal a Ana, kʼal a David ani kʼal an tsʼalej Ezequías. ¿Jaleʼ ti ukʼin ani jantʼiniʼ ti tólmiyat kʼal a Jehová? ¿Jantʼiniʼ ti neʼets tu ku tólmiy in tʼiplábil tam i yajnál i ichích kom u kʼambiyámej o tam yabáts i elál jantʼoj ki tʼajaʼ?

TAM IT UKʼNAL KOM A KʼIBAMAL JUN A YANÉL BAN TSEMLÁJ

 5. ¿Jantʼiniʼ tin atsʼálak a Ana?

⁵ Ki tsuʼuw jaleʼ tu lej ukʼnalak a Ana. A Ana kʼwajatak in lej yajchiknál. In tomkíl jayej kʼwajatak tómkidh kʼal kʼeʼat i mimláb axi in bij Peniná, ani kʼal axéʼ xi mimláb, a Ana u lej kʼwíynalak ani u odhnábak. Jayej, a Ana yab in éjtowalak kin koʼoy i tsakam, pero a Peniná in kwaʼalak yan (1 Sam. 1:​1, 2). A Peniná etsʼey kʼwajatak in teʼchikal ani in odhnál a Ana. ¿Jantʼiniʼ ti neʼets ka atsʼaʼ max tatáʼ kit tʼajchin nixéʼ? A Ana in atsʼálak «lej yajchik in ichích, jaxtám u lej ukʼnalak ani yab in léʼak ti kʼapul» (1 Sam. 1:​6, 7, 10).

 6. ¿Jantʼoj in tʼajaʼ a Ana abal yab ka atáj kʼal an tʼeʼpintaláb?

⁶ ¿Jantʼoj in tʼajaʼ a Ana abal yab ka atáj kʼal an tʼeʼpintaláb? Jajáʼ kʼalej ban tabernáculo juʼtáj tu kʼakʼnabak a Jehová. Walám tam ti kʼwájatakits utat ban wiʼleb in lej ólonchij a Jehová ani ukʼin, in lej konchij a Jehová abal ka tʼajan ti kwéntaj ani in uchaʼ: «Ka tʼajaʼ tin kwéntaj abal in kʼwajat u lej yajchiknál» (1 Sam. 1:10b, 11). A Ana in ólchij a Jehová patal jawaʼ in atsʼálak. A Jehová in lej kʼanidhálak a Ana, jaxtám i exlál abal in lej yajnaʼ tam tin tsuʼuw abal u ukʼnal a Ana.

 7. ¿Jantʼiniʼ tin atsʼaʼ a Ana talbél tin ólonchamal a Jehová?

⁷ ¿Jantʼiniʼ tin atsʼaʼ a Ana tam tin ólchij a Jehová jawaʼ jajáʼ in atsʼálak ani tam ti kanatbedháj kʼal an sumo sacerdote Elí? An Biblia in ulal abal «kʼalej tin kʼimáʼ, kʼapúts ani in ukʼchiy an tʼeʼpintaláb» (1 Sam. 1:​17, 18). Belits abal a Ana in áynanchij kʼal an kʼibataláb, in atsʼaʼ i koyataláb tin ichích kom jajáʼ in jilchij an kʼibataláb a Jehová. A Jehová in tʼajaʼ ti kwéntaj an kʼibataláb axi in kwaʼalak a Ana, jaxtám in otsʼówiy ani talbél in lábliy kʼal i tsakam (1 Sam. 1:​19, 20; 2:21).

8, 9. Kʼal jawaʼ in ulal Hebreos 10:​24, 25, ¿jaleʼ ti kwaʼal ki lej tsápnanchij abal ku kʼalej ti tamkuntaláb? (Ka tsuʼuw jayej an imagen).

⁸ ¿Jantʼoj i exobnál? ¿Kʼwajat a tametnál jun i kʼibataláb axi in tʼajál kit ukʼin? Walám a yajnál kom a kʼibaʼ jun a jaʼúb o jun a yanél ban tsemláj. Nixéʼ awil kin tʼajaʼ ka léʼnaʼ kit kʼwajiy kwetém, pero ka tʼilaʼ jantʼoj in tʼajaʼ a Ana. Jajáʼ kʼalej ban tabernáculo ani tanáʼ kanatbedháj kʼal a Jehová. Jayetsej neʼets  kin tʼajaʼ a Jehová max kit kʼalej ti tamkuntaláb belits max yab it kanat o it kʼwajat tʼeʼpidh (ka ajiy Hebreos 10:​24, 25). Ti tamkuntaláb neʼets ki atsʼaʼ i textos axi neʼets tu ku kanatbédhaʼ. Nixéʼ neʼets kin tʼajaʼ abal ki jalkʼuy i tsalápil ani ki koʼoy i tsalap axi tekedh ani neʼets ki atsʼaʼ más kanat ani kulbél belits max an kʼibataláb yab tixkʼanének.

⁹ Ti tamkuntaláb an epchalchik tu kanatbedhál ani tu tejwamédhanchal abal tu kʼanidhál, nixéʼ in tʼajál abal ki atsʼaʼ más kanat (1 Tes. 5:​11, 14). Ki tsuʼuw jawaʼ in uluw jun i epchal axi pel i precursor especial ani in kʼibaʼ in kʼimádhil. Jajáʼ in ulal: «Junchikíl u yéjenchal kin kʼwajiy kwetém kom in lej ukʼnal tam ku tʼilaʼ u kʼimádhil. Pero tam in kʼalel ti tamkuntaláb, tanáʼ u elál an tsapláb axi u yéjenchal abal yab ku walbaʼ tu baʼ. An tokʼtsixtaláb axi in binál an epchalchik ani an kaw axi tin uchálchik in tʼajál abal ku atsʼaʼ más kanat. Junchikíl in ulel lej tʼeʼpidh ti tamkuntaláb, pero tam in kʼwajat kʼal an epchalchik u atsʼál más kanat». Tam u kʼalel ti tamkuntaláb a Jehová in éjtowal kin eyendhaʼ an epchalchik abal tu ku tólmiy.

10. ¿Jantʼiniʼ ti éjtowal ki nitsʼbiy a Ana tam i atsʼál abal an tʼeʼpintaláb kʼwajat tu atál?

¹⁰ A Ana in atsʼaʼ más kanat tam tin ólonchij a Jehová ani tam tin ólchij jantʼiniʼ tin atsʼálak. Tatáʼ jayej a éjtowal ka tʼajaʼ jawaʼ in ulal 1 Pedro 5:​7, a éjtowal ka ólchij a Jehová patal jawaʼ a atsʼál ani ka lej belaʼ abal Jajáʼ neʼets ti otsʼówiy. Jun i epchal mimláb tu ólchal jantʼiniʼ tin atsʼaʼ tam ti tsémdhanchat in tomkíl kʼal an kwéʼ. An epchal in ulal: «U atsʼaʼ lej yajchik u ichích ma u tsalpay abal yab jaykʼiʼ neʼetsak kin wichiy ku atsʼaʼ kulbél». ¿Kʼal jantʼoj ti tólmiyat an epchal? Jajáʼ in ulal: «Tam u ólonchal a Jehová u tʼajál ti kwéntaj abal Jajáʼ tin otsʼówiyal ani tin tejwamédhanchal abal tin kʼanidhál. Junchikíl yab u exlálak jantʼiniʼ ku ólchij a Jehová jawaʼ u atsʼál, pero u exlál abal Jajáʼ tin exbayalak. Tam u atsʼálak abal an tʼeʼpintaláb kʼwajatak tin atál, in utelak kʼal a Jehová abal ku konchij ti kin tólmiy. Dhúbatkʼij u atsʼálak i koyataláb tu ichích ani u éjtowalak ku áynanchij tin tʼojchichíl». Tam a ólchal a Jehová jawaʼ a atsʼál, Jajáʼ ti atsʼanchal an yajal ani in éxbayal jawaʼ kʼwajat a watʼal. Walám a Jehová yabaye neʼets ti tíxkʼanchij an yajal axi a kwaʼal pero neʼets ti kanatbédhaʼ ani neʼets ti tólmiy abal ka atsʼaʼ i koyataláb ta ichích (Sal. 94:19; Filip. 4:​6, 7). Ka tʼilaʼ abal a Jehová in tsuʼtal patal an tsapláb axi a tʼajál abal kit kʼwajiy putudh kʼal Jajáʼ ani Jajáʼ neʼets ti lábliy (Heb. 11:6).

TAM IT UKʼNAL KOM IT KʼAMBIYÁMEJ

11. ¿Jantʼiniʼ tin atsʼaʼ a David tam ti u lej odhnábak?

¹¹ A David in tamétnaʼ yan i kʼibataláb kʼal axi tʼajan abal ka ukʼin. Kʼwiyan kʼal yan i atikláb ani ma kʼámbiyat kʼal in jaʼúb ani kʼal in yanél (1 Sam. 19:​10, 11; 2 Sam. 15:​10-14, 30). Jun a kʼicháj jajáʼ in uluw: «In tsekéts tin lej ukʼnal, patal akal expidh in ukʼnal ani lej atsʼemits u tseyil». ¿Jaleʼ tin atsʼálak antsanáʼ a David? Jajáʼ in uluw: «Pel kom lej yan axi kʼwajat tin odhnál» (Sal. 6:​6, 7). A David tʼajan kin lej yajchiknaʼ, jaxtám u lej ukʼnalak.

12. Kʼal jawaʼ in ulal Salmo 56:​8, ¿jantʼoj in lej belálak a David?

¹² A David in lej yajchiknaʼ, pero in lej belálak abal u lej kʼanidhábak kʼal a Jehová. Jajáʼ in uluw: «A Jehová in tʼajál ti kwéntaj jaleʼ tin ukʼnal» (Sal. 6:8). Kʼeʼat a kʼicháj jayej in dhuchaʼ an kaw axi kʼwajat ti Salmo 56:8 (ka ajiy). Axéʼ xi kaw in tejwamedhál abal a Jehová tu lej kʼanidhál ani in léʼ kin exlaʼ jantʼiniʼ  ti atsʼál. A David in uluw abal kʼwajat ti dhaychinal kʼal a Jehová in jaʼlíl in wal al jun i balixtaláb ani in kwaʼal dhuchadh al jun i libro. A David in lej belálak abal a Jehová in exlálak patal jawaʼ in yajchiknámal ani in exlálak an kʼibataláb axi kʼwajatak in tametnál. Jayej in belálak abal kʼal a Jehová u exbayábak jantʼiniʼ tin atsʼálak

13. ¿Jantʼoj neʼets tu ku kanatbédhaʼ max jitaʼ tu kʼambiyámal? (Ka tsuʼuw jayej an imagen).

¹³ ¿Jantʼoj i exobnál? ¿Ti kʼambiyámal o ti yajbedhanchamal a ichích jun i atikláb axi a lej kʼanidhál? ¿A atsʼál yajchik a ichích kom ti kʼambiy a kʼimádhil o a tomkíl? O ¿kom yabáts a áynanchij ta exláx kʼal jitaʼ kʼal axi a tsálpayalak kit tomkin? ¿A atsʼál tʼeʼpidh kom jun a yanél o jun a jaʼúb in jilaʼ kin tʼojonchij a Jehová? Ki tsuʼuw jantʼiniʼ tin atsʼaʼ jun i epchal tam ti kʼámbiyat kʼal in kʼimádhil ani jilan. Jajáʼ in uluw: «Yab jaykʼiʼ u tsalpay abal nanáʼ neʼetsak ku watʼaʼ nixéʼ. U atsʼálak in tsakúl, in tʼeʼpidh ani abal yab jantʼoj u jalbíl». ¿Jantʼoj neʼets ti tólmiy max it kʼambiyámej? Ka tʼilaʼ abal a Jehová yab jaykʼiʼ neʼets ti walbaʼ. An epchal in uluw: «U tʼajaʼ ti kwéntaj abal an atiklábchik junchikíl neʼets ka ukʼpin, pero a Jehová yab jaykʼiʼ neʼets kin tʼajaʼ nixéʼ. Jajáʼ pel jantʼiniʼ jun i púlik tʼujub, yab jaykʼiʼ neʼets ka yatsin ani etsʼey neʼets ka kʼwajiy kʼal wawáʼ» (Sal. 37:28). Etsʼey ka tʼilaʼ abal a Jehová jats axi más ti kʼanidhál. Walám lej yajchik jawaʼ ti tʼajchij jun a jaʼúb o jun a yanél, pero etsʼey ka tʼilaʼ abal a Jehová u lej tʼeʼpinal kʼal tatáʼ (Rom. 8:​38, 39). A Jehová etsʼey neʼets ti kʼanidhaʼ belits max jitaʼ ti kʼambiy.

14. ¿Jantʼoj tu exóbchal jawaʼ in ulal Salmo 34:18?

¹⁴ Jawaʼ in uluw a David ti Salmo 34:18 in éjtowal ti lej kanatbédhaʼ max jitaʼ ti kʼambiy (ka ajiy). Axéʼ xi versículo in eyendhál an kaw, «jitaʼchik kʼwajat ukʼtsidh kʼal an tʼeʼpintaláb» ani kʼeʼat i libro in ulal abal awits ka wilkʼaʼ antséʼ:«Jitaʼchik in atsʼál abal yabáts in kwaʼal i aychixtaláb». ¿Jantʼoj in tʼajál a Jehová kʼal jitaʼchik in atsʼál antsanáʼ? Axéʼ xi versículo jayej in ulal abal a Jehová «kʼwajat utat kʼal jitaʼchik in kwaʼal yajlidh in ichích» kom kʼambiyámej. A Jehová pel ejtíl jun i Tataláb axi in kitnál in tsakámil tam in tsuʼtal abal u ukʼnal ani in kanatbedhál kʼal in káwintal. Jajáʼ tu atsʼanchal an yajal axi i atsʼál ani dhúbatkʼij tu tólmiyal. Jayej in léʼ tu ku jéldhanchij i ichích abal yabáts ki lej yajchiknaʼ ani tu uchál abal neʼets tu ku pidhaʼ yan i alwaʼtaláb axi taʼtal a kʼicháj. Nixéʼ tu tólmiyal abal ki kuxuy an kʼibataláb axi xowéʼ i tamtém (Is. 65:17).

 TAM IT UKʼNAL KOM A KWAʼAL JUN I YAWʼLÁTS

15. ¿Jaleʼ ti lej ukʼin a Ezequías?

¹⁵ Tam ti an tsʼalej Ezequías in kwaʼalak 39 i támub tsʼatʼey jun i yawʼláts axi lej kidháb. A Jehová in eyendhaʼ an kawlomej Isaías abal kin uchaʼ abal neʼets ka tsemets (2 Rey. 20:1). A Ezequías kʼwajatak lej tʼeʼpidh kom in exlaʼ abal yabáts in kwaʼalak i aychixtaláb. Kʼwajiy ti lej ukʼnal ani in lej konchij ka tólmiyat kʼal a Jehová (2 Rey. 20:​2, 3).

16. ¿Jantʼoj in tʼajaʼ a Jehová abal kin tólmiy a Ezequías?

¹⁶ Tam ti a Jehová in atsʼaʼ an oláb axi in tʼajaʼ a Ezequías ani in tsuʼuw abal kʼwajatak ti ukʼnal, in lej yajnanchij. Jaxtám in abaʼ an kawlomej Isaias abal kin uchaʼ axéʼ xi kaw: «Tu atsʼanchámal a olábil ani u tsuʼuw abal it kʼwajat ti ukʼnal, neʼets tu jeldhaʼ». In uchaʼ abal neʼets kin nákedhanchij in ejatal, ani abal neʼets kin kʼaniy an bichow Jerusalén abal yab ka odhnáj kʼal an asirios (2 Rey. 20:​4-6).

17. ¿Jantʼiniʼ tu tólmiyal a Jehová tam i kwaʼal jun i yawʼláts axi yabáts neʼets ka tixkʼan? (Salmo 41:3; ka tsuʼuw jayej an imagen).

¹⁷ ¿Jantʼoj i exobnál? ¿Jantʼoj a éjtowal ka tʼajaʼ max a kwaʼal jun i yawʼláts axi yabáts neʼets ka tixkʼan? Ka ólchij a Jehová jantʼiniʼ ta atsʼál ani yab ki tʼeʼpin max i kʼwajat ti ukʼnal biyat a ólonchal a Jehová. An Biblia in ulal abal «a Jehová pel jun i Tataláb axi tu yajnanchal ani Jajáʼ neʼets tu ku kanatbédhaʼ tam i tamtém an kʼibataláb» (2 Cor. 1:​3, 4). Patal i exlál abal a Jehová yab neʼets tu ku tʼajat tíxkʼanchij patal an kʼibataláb axi i kwaʼal. Pero i exlál abal Jajáʼ neʼets tu ku tólmiy abal ki kuxuy (ka ajiy Salmo 41:3). A Jehová neʼets tu ku tólmiy kʼal an espíritu santo abal tu ku pidhaʼ i tsapláb, abal tu ku tólmiy ki exlaʼ jantʼoj ki tʼajaʼ ani abal ki atsʼaʼ koyat i ichích (Prov. 18:14; Filip. 4:13). Jayej tu lej kanatbedhál kom in ulúmal abal neʼets kin tixkʼaʼ patal an yawʼláts axi waʼats (Is. 33:24).

18. ¿Jawaʼ tam texto ti lej tólmiyamal tam a atsʼámal it lej tʼeʼpidh? (Ka tsuʼuw jayej an recuadro « I kaw axi a Jehová in eyendhál abal tu ku kanatbédhaʼ tam u ukʼnal»).

¹⁸ A Ezequías lej kanatbedháj kʼal an kaw axi uchan kʼal a Jehová. A Jehová neʼets tu ku kanatbédhaʼ kʼal an Biblia, jaxtám in tʼajaʼ abal ka jilkʼon dhuchadh i kaw axi in éjtowal tu ku kanatbédhaʼ tam u kʼwajat tʼeʼpidh (Rom. 15:4). Ki tsuʼuw jawaʼ in uluw jun i epchal axi u kʼwajíl ti África Occidental, jajáʼ u lej ukʼnalak kom elchin i cáncer. Jajáʼ in ulal: «Jun i texto axi tin lej kanatbedhál, jats jawaʼ in ulal Isaías 26:3. Yab i exlál jantʼoj neʼets ki watʼaʼ ti ejatal. Pero axéʼ xi versículo tin exóbchal abal a Jehová tu pidhál i koyataláb ani tu tólmiyal abal ki exlaʼ jantʼoj ki tʼajaʼ». ¿A tʼilál jun i texto axi ti lej kanatbédhaʼ tam  ta atsʼálak it lej tʼeʼpidh ani yab a exlálak jantʼoj ka tʼajaʼ?

19. ¿Jantʼoj tam alwaʼtaláb neʼets ki batsʼuw?

¹⁹ U kʼwajatits tin taltal axéʼ xi xeʼtsintaláb ani an kʼibataláb neʼets ka yáney más. Jaxtám neʼets ki tamétnaʼ yan jantʼoj axi neʼets tu ku ukʼindhaʼ. Pero in tʼiplábil a Ana, a David ani an tsʼalej Ezequías, tu tejwamédhanchal abal a Jehová in tʼajál ti kwéntaj tam u ukʼnal ani tu atsʼanchal an tʼeʼpintaláb axi i kwaʼal. Jajáʼ in exlál jaleʼ ti ukʼnének, jaxtám, tam tatáʼ a tamtém jun i kʼibataláb ka ólchij a Jehová jantʼiniʼ ta atsʼál. Ka tsápnanchij kit kʼwajiy utat kʼal an epchalchik kom jajáʼchik ti lej kʼanidhál. Ani ka jilaʼ abal a Jehová ti kanatbédhaʼ kʼal an Biblia. Ka tʼilaʼ abal max kit kʼwajiy putudh kʼal a Jehová, Jajáʼ neʼets ti lej lábliy. Lej weʼits a Jehová neʼets kin tixkʼaʼ patal an yajchiktaláb axi in tʼajál abal ku ukʼin (Apoc. 21:4). Ban ít tsabál neʼets ki áynanchij ku ukʼin, pero jats kom u kʼwajat lej kulbél.