EXOBINTALÁB 49
AJATLÁB 147 Dios nos promete la vida eterna
¿Jantʼoj a yéjenchal ka tʼajaʼ abal kit kʼwajiy abal etsʼey?
«Nanáʼits tin tsakámil a Dios ani patal jitaʼ tin kin tsuʼuw ani ti kin belaʼ, jats jajáʼchik ka pidhan i ejataláb abal etsʼey» (JUAN 6:40).
JAWAʼ NEʼETS KI EXÓBNAʼ
Tejéʼ neʼets ki tsuʼuw an alwaʼtaláb axi in bátsʼuwal jitaʼchik takudh abal ka kʼalej ti éb ani abal jitaʼchik neʼets ka kʼwajiy tejéʼ tsabál.
1. ¿Jaleʼ ti yan i atikláb yab in belál max neʼets ki ejtow ku kʼwajiy abal etsʼey?
YAN i atiklábchik in lej tʼajál ti kwéntaj jawaʼ in kʼapal ani in tʼajál i ejercicio kom in léʼ ka kʼwajiy kanat. Belits antsanáʼ jajáʼchik in exlál abal yab neʼets kin ejtow ka kʼwajiy abal etsʼey. Pero a Jesús in uluw abal waʼats jun i aychixtaláb abal ku kʼwajiy abal etsʼey, antsanáʼ tin ulal Juan 3:16 ani 5:24.
2. ¿Jantʼoj in ulal an capítulo 6 in kʼál a Juan tin kwéntaj an ejataláb abal etsʼey? (Juan 6:39, 40).
2 Jun i kʼicháj a Jesús in tʼajaʼ jun i labidh tʼajbiláb abal kin pijchij yan i atikláb. a An atiklábchik in lej jikʼpaʼ jawaʼ in tʼajaʼ a Jesús, pero más in jikʼpaʼchik jawaʼ in uluw tam ti chudhey. A Jesús in uchaʼ an atiklábchik abal axi tsémenek in kwaʼal an aychixtaláb ka edháj ani neʼets kin ejtow ka kʼwajiy junílekʼij abal etsʼey (ka ajiy Juan 6:39, 40). Axéʼ xi aychixtaláb jayej pel abal tatáʼ ani a yanél axi koyomadh. Jawaʼ a Jesús in léʼak tu ku exóbchij játs abal patal an atikláb axi koyomadh neʼets ka edháj ani abal tatáʼ ani a yanél neʼets ka ejtowchik kin kʼwajiy abal etsʼey. Pero waʼats kʼeʼat i kaw axi a Jesús in uluw ti Juan capítulo 6 axi yan i atikláb in atsʼaʼchik kʼibat kin belaʼ. Ki tsuʼuw jantʼoj jats axi in uluw a Jesús.
3. ¿Jantʼoj jats axi in uluw a Jesús ti Juan 6:51?
3 Tam ti an atiklábchik axi ti Capernaúm in atsʼaʼ abal a Jesús kʼwajat ti kaw tin kwéntaj an pan, jajáʼchik in tsalpay kʼal an maná axi pidhan an israelitas tam ti kʼwajatak ban desierto. An Biblia in ulal abal an maná pel an «pan axi in bínaʼ a Jehová» (Sal. 105:40; Juan 6:31). A Jesús in eyendhaʼ an tʼiplab in kʼál an maná abal kin pidhaʼ más i exobchixtaláb an atiklábchik. Belits abal a Jehová in eyendhaʼ an maná abal kin pijchij an israelitas, talbél jajáʼchik tsemets (Juan 6:49). Talbél a Jesús in uluw abal jajáʼ játs «an kʼapnél axi tal ti éb», jayej in uluw abal «pel i kʼapnél axi paʼiy ti éb» ani in uluw abal «pel ejtíl i kʼapnél axi in binál i ejataláb» (Juan 6:32, 33, 35). Talbél jajáʼ in uluw: «Nanáʼits ejtíl i kʼapnél axi paʼiy ti éb. Jitáts kin kʼapuw axéʼ xi kʼapnél, neʼets kin koʼoy i ejataláb abal etsʼey» (ka ajiy Juan 6:51). An judíos yab in éxbaychik jaleʼ ti a Jesús in uluw abal jajáʼ játs an pan axi paʼiy ti eb ani jaleʼ tin uluw abal nixéʼ xi pan más alwaʼ, ani yab ejtíl an maná axi pidhan an israelitas. Tam, ¿jantʼoj jats axi a Jesús in léʼak abal an atiklábchik kin exbay? Wawáʼ jayej i léʼ ki exbay jantʼoj in léʼak kin uluw a Jesús kom i léʼ abal i yanél ani wawáʼ ki batsʼuw an ejataláb abal etsʼey. Ki tsuʼuw jantʼoj játs axi a Jesús in léʼak tu ku exóbchij.
«AN PAN AXI EJAT ANI IN ANAM TʼUʼÚL»
4. ¿Jaleʼ ti an atiklábchik jikʼey kʼal jawaʼ in uluw a Jesús?
4 An atiklábchik axi kʼwajatak in atsʼál a Jesús lej jikʼeychik kom a Jesús in uluw abal neʼets kin bínaʼ in anam tʼuʼúl abal jajáʼchik kin ejtow ka kʼwajiy abal etsʼey. Walám jajáʼchik in tsalpay abal kwaʼalak kin kʼapchij in anam tʼuʼúl a Jesús ani jajáʼchik in exlálak abal nixéʼ yab in tomnálak kin tʼajaʼchik (Juan 6:52). Pero a Jesús in uluw kʼeʼat jantʼoj: «expidh max ka kʼapuw u anam tʼuʼúl ani max ka utsʼaʼchik u xitsʼál tam neʼets ka koʼoychik i ejataláb abal etsʼey» (Juan 6:53).
5. ¿Jaleʼ ti exlál abal a Jesús yab kʼwajatak in ulal abal ka kʼapchat in anam tʼuʼúl kʼal an atiklábchik?
5 Tam ti a Noé kʼwajiy tejéʼ tsabál uchanchik abal yab kwaʼalak kin kʼápuwchik i xitsʼ (Gén. 9:3, 4). Ani jayetsej uchan an israelitas ban abatnaxtaláb axi pidhan a Moisés. An abatnaxtaláb in ulalak abal patal jitaʼ kin kʼapuw i xitsʼ kwaʼalak ka tsemdháj (Lev. 7:27). Ani a Jesús in exóbchij an judíos abal kwaʼalakchik kin bélkaʼ an abatnaxtaláb axi pidhan a Moisés (Mat. 5:17-19). Jaxtám ti exlál abal a Jesús yab kʼwajatak in uchál an judíos abal ka kʼapchat in tʼuʼúl ani ka utsʼunchat in xitsʼál. Kʼal axéʼ xi kaw a Jesús kʼwajatak in tólmiyal an atiklábchik abal kin exbay jantʼoj kwaʼalak kin tʼajaʼ abal kin koʼoychik i ejataláb abal etsʼey (Juan 6:54).
6. ¿Jaleʼ ti exlál abal a Jesús expidh kʼwajatak in eyendhál jantʼiniʼ i tʼiplab in xitsʼál ani in anam tʼuʼúl?
6 A Jesús kʼwajatak in eyendhál jun i tʼiplab abal kin exóbchij an atiklábchik. Jayetsej in tʼajaʼ tam tin tʼilmay jun i mimláb axi ti Samaria. Jajáʼ in uchaʼ: «Jitáts kin utsʼaʼ an jáʼ axi nanáʼ ku pidhaʼ tin kwéntaj in ejatal, yabáts neʼets ka chíkey. Pel ejtíl i elel jáʼ axi yab jaykʼiʼ u dhíkel ani neʼets kin koʼoy i ejataláb abal etsʼey» (Juan 4:7, 14). b A Jesús yab kʼwajatak in uchál an samaritana abal max kin utsʼaʼ an jáʼ axi ban mom neʼets kin koʼoy i ejataláb abal etsʼey. Jayej, a Jesús yab kʼwajatak in uchál an atikláb axi ti Capernaúm abal neʼets kin koʼoy i ejataláb abal etsʼey max ka kʼapchat in anam tʼuʼúl ani max ka utsʼanchat in xitsʼál.
IN EYENDHAʼ JUNÍLEKʼIJ AN TʼIPLAB TIN KWÉNTAJ AN XITSʼ ANI IN ANAM TʼUʼÚL
7. ¿Jantʼiniʼ tin éxbayal talchik i atikláb jawaʼ in uluw a Jesús ti Juan 6:53?
7 Talchik i atikláb in tsalpayal abal tam ti a Jesús in uluw an kaw axi ti Juan 6:53, kʼwajatak in tʼipoyal jantʼiniʼ tin léʼak abal ka tʼajan an Cena del Señor (Mat. 26:26-28). Jaxtám jajáʼchik in ulal abal kwaʼal ka kʼapat an pan ani an vino axi u watʼbab ban Cena del Señor. ¿Walám tekedh nixéʼ xi tsalap? Lej exbadh ki tʼajaʼ ti kwéntaj max chubax nixéʼ, kom támub ti támub u támkunal kʼal wawáʼ yan i atikláb abal ki tʼilchij in tsémtal a Jesús. Ki tsuʼuw jaleʼ ti yab junat jawaʼ in ulal Juan 6:53 kʼal jawaʼ in uluw a Jesús ban Cena del Señor.
8. ¿Jaleʼ ti yab junat jawaʼ in uluw a Jesús ban támub 32 kʼal jawaʼ in uluw ban támub 33? (Ka tsuʼuw jayej an imágenes).
8 Ki tsuʼuw jantʼoj jats axi watʼey. Okʼox, ¿jaykʼij ani juʼtáj tin uluw a Jesús an kaw axi kʼwajat ti Juan 6:53-56? Axéʼ xi kaw in uluw ti Galilea ban tamúb 32 ani an Cena del Señor in tʼajaʼ jun i tamúb talbél ti Jerusalén. Tsabchíl, ¿jitaʼchik in uchaʼ axéʼ xi kaw? Tam ti a Jesús kʼwajatak ti Galilea, an atiklábchik kʼal axi tu aliyábak, expidh u aliyábak abal ka píjchiyat (Juan 6:26). Ani tam ti a Jesús in uluw jun i exobchixtaláb axi jajáʼchik in atsʼaʼ kʼibat kin exbay, pilmejchik kʼal a Jesús ani jayej pilméj talchik in aykolil (Juan 6:14, 36, 42, 60, 64, 66). Pero jawaʼ watʼey nixéʼ a kʼichaj lej pilits kʼal jawaʼ watʼey ban tamúb 33 tam ti a Jesús in tʼipoy an Cena del Señor. Ban tamúb 33 a Jesús kʼwajatak kʼal an 11 i abatwálej, jajáʼchik jayej yab in lej exbayalak jawaʼ a Jesús kʼwajatak in ulal, pero yab in tʼajaʼchik ejtíl an atiklábchik axi ti Galilea. Axéʼchik xi abatwálej in lej belálak abal a Jesús pelak in tsakámil a Dios ani jats axi abnenek tejéʼ tsabál (Mat. 16:16). A Jesús in uluw axéʼ xi kaw: «Tatáʼchik jats axi it xeʼtsinének kʼal nanáʼ belits abal u tametnámal i yajchiktaláb» (Luc. 22:28). Kʼal jawaʼ i exobnámal ma tejéʼ i éxbayal abal jawaʼ in ulal Juan 6:53 yab kʼwajatak in ulal jantʼiniʼ ka tʼajan an Cena del Señor. Pero xowéʼ ki exóbnaʼ kʼeʼat i tsalap.
An capítulo 6 in kʼál a Juan in olnál jawaʼ a Jesús in uchaʼ an atiklábchik axi ti Galilea (kʼwatab). Jun i támub talbél a Jesús kʼwajatak ti Jerusalén ani expidh kʼal an abatwálejchik (winab). (Ka tsuʼuw an párrafo 8).
¿JANTʼINIʼ TIN TOMNÁL KI EXBAY JAWAʼ IN ULUW A JESÚS?
9. ¿Jitaʼchik kʼwajatak ti uchnal an kaw axi in uluw a Jesús ban Cena del Señor?
9 Ban Cena del Señor, a Jesús in pidhaʼ in abatwálej i pan axi yab in kwaʼalak i levadura ani in uchaʼ abal nixéʼ in tʼipoyalak in iniktal. Talbél jayej in pidhaʼ i vino ani in uchaʼchik abal nixéʼ in tʼipoyalak «an pacto axi kʼwajatak in tsʼejkál kʼal jajáʼchik» (Mar. 14:22-25; Luc. 22:20; 1 Cor. 11:24). Lej exbadh ki exlaʼ jantʼoj in léʼak kin uluw a Jesús, kom al axéʼ xi pacto expidh u ajiyáb jitaʼ neʼets ti ábatnom kʼal a Jesús ti éb. Jajáʼchik jats axi u bijiyáb ti «bichow Israel» (Heb. 8:6, 10; 9:15). An abatwálejchik yab in exbay jawaʼ a Jesús in uluw nixéʼ a kʼicháj. Pero al wéʼ i kʼij jajáʼchik neʼetsak ka takuyat kʼal i espíritu santo abal ka kʼalechik ti ábatnom kʼal a Jesús, ani antsanáʼ jayej tin bájuwchik ka ajiyat ban ít pacto (Juan 14:2, 3).
10. ¿Jaleʼ ti yab junat jawaʼ in uchaʼ a Jesús an atiklábchik axi ti Galilea kʼal jawaʼ in uchaʼ in abatwálej? (Ka tsuʼuw jayej an imagen).
10 Tam ti a Jesús in tʼipoy jantʼiniʼ tin léʼak ka tʼílchin in tsémtal, expidh kʼwajatak «kʼal wéʼ i atikláb». Al axéʼ xi mudhél i atikláb kʼwajatak ajidh an abatwálejchik axi kʼapúts kʼal jajáʼ tam tin tʼajaʼ an Cena del Señor (Luc. 12:32). Jajáʼchik ani kʼeʼat i atikláb axi ajidh ban pacto, jats axi in tomnálak kin kʼapuw an pan ani kin utsʼaʼ an vino. Patal jajáʼchik in kwaʼal an aychixtaláb ka kʼalej ti éb ti ábatnom kʼal a Jesús. Jawaʼ a Jesús in uchaʼ in abatwálej yab junat kʼal jawaʼ in uchaʼ an atiklábchik axi ti Galilea. Ti Galilea a Jesús kʼwajatak in tʼilmayal yan i atikláb ani kʼwajatak in exóbchal kʼeʼat jantʼoj.
Expidh talchik i epchal in utsʼál an vino ani in kʼapal an pan ban Conmemoración. Pero jayej axi más in éjtowal kin batsʼuw i ejataláb abal etsʼey max kin lej belaʼ abal a Jesús in bínaʼ in ejatal abal tu ku kʼaniy. (Ka tsuʼuw an párrafo 10).
11. ¿Jaleʼ ti exlál abal an aychixtaláb axi a Jesús in uchaʼ an atiklábchik axi ti Galilea yab expidh pelak abal jajáʼchik?
11 Ban támub 32 tam ti a Jesús kʼwajatak in tʼilmayal an atiklábchik axi ti Galilea, jajáʼchik expidh in aychalak ka pidhan i pan. Pero nixéʼ a kʼicháj a Jesús kʼwajatak in ólchalchik tin kwéntaj jun i kʼapnél kʼal axi neʼetsak ka tolmiyat abal kin koʼoy i ejataláb abal etsʼey. Jayej in uchaʼchik abal max ka tsemets in kwaʼal an aychixtaláb abal ka edháj ani abal ka kʼwajiy abal etsʼey. An aychixtaláb axi kʼwajatak in olnál a Jesús ban capítulo 6 in kʼál a Juan yab expidh pelak abal jun i mudhél i atikláb, pelak abal patal an atikláb. Jajáʼ in uluw: «Nanáʼits ejtíl in kʼapnél axi in paʼiy ti éb, jitats kin kʼapuw axéʼ xi kʼapnél neʼets ka pidhan i ejataláb abal etsʼey. [...] Ani u anam tʼuʼúl axi neʼets ku bínaʼ neʼets ti tólmiychik abal kit kʼwajiy abal etsʼey» (Juan 6:51). c
12. ¿Jantʼoj in uluw a Jesús abal kwaʼal ki tʼajaʼ abal ki batsʼuw i ejataláb abal etsʼey?
12 ¿Walám a Jesús kʼwajatak in uchál an judíos abal jitakits tam atikláb neʼetsak kin batsʼuw i ejataláb abal etsʼey? Imbáj. Jajáʼ in uluw abal expidh jitaʼ kin kʼapuw an pan, ani axéʼ in tʼajálchik tam kin tejwamédhaʼ i belomtaláb kʼal a Jesús. Xowéʼ ta kʼicháj jayej waʼats yan i atikláb axi in ulal abal in belál kʼal a Jesús, jajáʼchik in tsalpayal abal expidh in yéjenchal kin belaʼ kʼal a Jesús abal kin bátsʼuwchik i ejataláb abal etsʼey (Juan 6:29, Nueva Versión Internacional). Pero max ki tsalpay, jayetsej watʼey kʼal an atiklábchik axi ti Gálilea. Jajáʼchik in belálak kʼal a Jesús, pero talbél in jílkakay. ¿Jaleʼ tin tʼajaʼchik antsanáʼ?
13. ¿Jantʼoj in yéjenchal ki tʼajaʼ abal ku wenkʼon tin aykolil a Jesús?
13 Yan i atikláb axi píjchiyat kʼal a Jesús expidh u utelak abal ka pidhan jawaʼ in yéjenchal. Jajáʼchik neʼetsak kin aynaʼ a Jesús pero expidh max ka pidhan jawaʼ in léʼak. In léʼak abal ka jeldháj, ka píjchiyat ani ka exóbchat, pero expidh jawaʼ jajáʼchik in léʼak kin atsʼaʼ. Pero a Jesús in uchaʼchik abal kwaʼalak kin tʼajaʼchik kʼeʼat jantʼoj abal kin bájuwchik tin aykolil. A Jesús chich tejéʼ tsabál abal kin tólmiy an atiklábchik ani yab expidh abal kin pijchij. Axéʼchik xi atikláb kwaʼalak ka utey kʼal a Jesús, kwaʼalak kin batsʼuw an exobchixtaláb axi jajáʼ in binál ani ka bélkaxin (Juan 5:40; 6:44).
14. ¿Jantʼoj kwaʼal ki tʼajaʼ abal ki batsʼuw an alwaʼtaláb kom a Jesús in bínaʼ in ejatal?
14 A Jesús in exóbchij in aykolil abal kwaʼalakchik kin lej belaʼ abal in anam tʼuʼúl ani in xitsʼál jats axi neʼetsak ka eyan abal jajáʼchik kin koʼoy i ejataláb abal etsʼey. Ani jayetsej kwaʼal ki tʼajaʼ wawáʼ, kwaʼal ki tejwamédhaʼ i belomtaláb (Juan 6:40). Abal ki batsʼuw an alwaʼtaláb axi in uluw a Jesús ti Juan 6:53, kwaʼal ki tejwamédhaʼ abal i bélal abal a Jesús in bínaʼ in ejatal abal tu ku kʼaniy. Axéʼ xi alwaʼtaláb jayej in éjtowal kin batsʼuw axi más an atikláb (Efes. 1:7).
15, 16. ¿Jantʼoj tam alwaʼtaláb tu ólchal an capítulo 6 in kʼál a Juan abal neʼets ki batsʼuw?
15 Ban capítulo 6 in kʼál a Juan i exóbnaʼ abal i bátsʼuwal yan i alwaʼtaláb wawáʼ ani i yanél. A Jesús in tejwamédhaʼ abal in kʼanidhálak an atiklábchik. Jun i tʼiplab, in jeldhaʼ i yaʼul axi ti Galilea, in pijchij yan i atikláb ani in ólchij tin kwéntaj in Éyaltal a Dios (Luc. 9:11; Juan 6:2, 11, 12). Ani jayej in exóbchichik abal jajáʼ jats an kʼapnél axi in binál i ejataláb (Juan 6:35, 48).
16 A Jesús kawin tin kwéntaj «kʼeʼat i múkeʼ i ovejas», pero jajáʼchik yab in tomnál kin kʼapuw an pan nibal kin utsʼaʼ an vino tam u tʼílchinal in tsémtal a Jesús (Juan 10:16). Jajáʼchik jayej in bátsʼuwal i alwaʼtaláb kom a Jesús in bínaʼ in ejatal. In bátsʼuwal axéʼ xi alwaʼtaláb tam kin belaʼ abal a Jesús in bínaʼ in ejatal abal tu ku kʼaniy (Juan 6:53). Pero tam jun i epchal in kʼapal an pan ani in utsʼál an vino, in tejwamedhál abal takuyámej abal ka kʼalej ti éb ti ábatnom tin Éyaltal a Dios. Jawaʼ i exobnámal ban capítulo 6 in kʼál a Juan lej exbadh abal patal wawáʼ, max u ajidh abal ku kʼalej ti éb o max i kwaʼal an aychixtaláb abal ku kʼwajiy tejéʼ tsabál. Al axéʼ xi capítulo i exobnámal abal lej exbadh ki koʼoy i belomtaláb abal ki ejtow ku kʼwajiy abal etsʼey.
AJATLÁB 150 ¡Jehová será tu Salvador!
a Ban exobintaláb axi ti watʼey an semana i exóbnaʼ Juan 6:5-35.
b An jáʼ axi a Jesús in eyendhaʼ jantʼiniʼ i tʼiplab, in tʼipoyal patal jawaʼ a Jehová in tʼajámal abal ki ejtow ki batsʼuw i ejataláb abal etsʼey.
c An capítulo 6 in kʼál a Juan in tejwamedhál abal patal an atikláb in éjtowal kin batsʼuw i ejataláb abal etsʼey, kom al nixéʼ xi pejach in eyendhál an kaw «jitáts» ani «patalchik» (Juan 6:35, 40, 47, 54, 56-58).
