¿A ajiyámal An Ólchix Uw axi kalnek al axéʼ an támub? Ka tsuʼuw max a tʼilál an tokʼtsixtaláb in kʼál axéʼ an konowixtalábchik:

¿Jantʼoj in tsálpayal a Jehová tin kwéntaj an mimlábchik?

Yab in kʼeʼatnál. A Jehová yab in pidhál más in jalbíl an inikchik. Jajáʼ in otsʼówiyal an mimlábchik. In lej tʼajál ti kwéntaj jantʼoj in atsʼál an mimlábchik ani an kʼibataláb axi in tametnálchik. A Jehová jayej in pidhál jun in uchbíl an epchalchik mimláb ani in belál abal neʼets kin putuw alwaʼ in tʼojlábil (w24.01, páginas 15 ani 16).

¿Jantʼiniʼ i éjtowal ki bélkaʼ axéʼ xi kaw axi in ulal Efesios 5:7: «Yab ka bínaʼ ta baʼ ki junkun kʼal jajáʼchik»?

An abatwálej Pablo tu uchál abal yab ki junkuw i atiklábchik axi neʼets tu ku tʼajaʼ ku owméj kʼal a Jehová. In tomnál ki tʼajaʼ ti kwéntaj jitaʼchik i júnkuwal kom juʼtámakits i éjtowal ki elaʼ i atiklábchik axi yab neʼets tu ku tólmiy, ejtíl ban redes sociales (w24.03, páginas 22 ani 23).

¿Jawaʼ jats an tʼilabchik axi yab chubax axi yab in tomnál ki otsʼówiy?

Walám jun i epchal in léʼ tu ku kanatbédhaʼ kʼal jun i kaw ani walám tu ku abchij jantʼoj, pero yab in exlál max chubax nixéʼ. O walám ki batsʼuw jun i correo axi yab i aychalak. Jayej walám ki elaʼ jun i atikláb axi ejtíl max in léʼ kin exlaʼ tin kwéntaj an Biblia pero pel jun i apóstata (w24.04, página 12).

¿Jantʼiniʼ ti neʼets kin boliy a Jehová a Salomón, an atiklábchik axi tsemets ti Sodoma ani Gomorra ani an atiklábchik axi tsemets ban Diluvio?

Yab i exlál max talabedháj abal etsʼey ani yabáts neʼets ka wichbanchat in ejatal. Jawaʼ i exlál jats abal a Jehová in exlál patal jawaʼ watʼey ani abal tu lej yajnanchal (w24.05, páginas 3 ani 4).

¿Jantʼoj i exobnál kom a Jehová pel ejtíl «jun i púlik tʼujub»? (Deut. 32:4).

Kʼal a Jehová i éjtowal ku tsinkʼon. I éjtowal ki belaʼ kʼal Jajáʼ kom etsʼey in pútuwal in káwintal. A Jehová yab jaykʼiʼ in jálkʼuyal jantʼiniʼ in ey ani yab jaykʼiʼ neʼets kin jalkʼuy in tsalápil (w24.06, páginas 26 ma ti 28).

¿Jantʼoj neʼets tu ku tólmiy abal yab ki atsʼaʼ kʼibat tam ku jalkʼun al jun i tamkuntaláb?

Ki lej belaʼ abal a Jehová neʼets tu ku tólmiy antsanáʼ jantʼiniʼ in tólmiy in tʼojnálil ti biyál. Yab ki jumbiy an epchalchik kʼal axi ban tamkuntaláb juʼtáj tu kʼwajatak. Ki junkuw an epchalchik ani ki tsápnanchij ki jaʼúbnaʼ (w24.07, páginas 26 ma ti 28).

¿Jantʼoj i exobnál kʼal óxlom an tʼiplab axi kʼwajat ti Mateo capítulo 25?

An tʼiplab in kʼál an ovejas ani an cabras tu exóbchal abal kwaʼal ku kʼwajiy putudh ani ki tólmiy a Jesucristo. An tʼiplab in kʼál an laju i tsʼikʼách tu exóbchal abal kwaʼal ki tejwamédhaʼ abal u kʼwajat tʼojojodh ani tʼajtʼóm ti kwéntaj. Ani an tʼiplab in kʼál an talentos tu exóbchal abal kwaʼal ki tejwamédhaʼ abal u ikʼax tu tʼojnal (w24.09, páginas 20 ma ti 24).

¿Jay in tʼekʼem in kwaʼalak an pórtico axi kʼwajatak tin tamét an templo in kʼál a Salomón?

Al talchik i dhuchlab axi ti biyál, a 2 Crónicas 3:4 in ulal abal an pórtico in kwaʼalak «120 codos» in tʼekʼem. Kʼal axéʼ i éxbayal abal an baʼteʼ in kwaʼalak 53 metros in tʼekʼem. Pero kʼeʼatchik i dhuchlab in ulal abal in tʼekʼem pelak «20 codos», axéʼ pel 9 metros in tʼekʼem. Axéʼ jats jawaʼ más tekedh ki belaʼ, ¿jaleʼ? Max ki tʼajaʼ ti kwéntaj in tsʼikwém an baʼteʼ in kʼál an templo, i tsalpanchal abal max an pórtico pelak 53 metros in tʼekʼem, an baʼteʼ yab neʼets kin ejtow kin kuxuy (w24.10, página 31).

¿Jantʼiniʼ ti éxbayal an kaw, «an tolmix ókʼnom kwaʼal kin koʼoy junkats in kʼimádhil»? (1 Tim. 3:12).

Yab kwaʼal ka kwatsiy kʼal jun i mimláb axi yab pel in kʼimádhil, kwaʼal kin lej tʼajaʼ ti kwéntaj in kʼimádhil ani yab kwaʼal ti alkʼidh kʼatsub kʼal kʼeʼat i mimláb (w24.11, página 19).

¿Jaleʼ i exlál abal ti Juan 6:53 a Jesús yab kʼwajatak in olnál jantʼiniʼ ka tʼilchat in tsémtal?

Ti Juan 6:​53, a Jesús in uluw abal kwaʼal ki kʼapchij in tʼuʼúl ani ki útsʼanchij in xitsʼál. A Jesús in uluw axéʼ an kaw ban támub 32 ani kʼwajatak ti Galilea in tʼilmayal yan i judíos axi yabaye in belálak kʼal jajáʼ. Jun i támub talbél, a Jesús in uluw jantʼiniʼ ka tʼilchat in tsémtal, kʼwajatak ti Jerusalén pero expidh in uchaʼ jitaʼchik neʼetsak ka kʼalej ti eyal kʼal jajáʼ ti éb (w24.12, páginas 10 ani 11).