¿A ATSʼÁL tʼojláb kit exobláts semana ti semana? ¿A itʼixnál? Yan i epchal jayej in atsʼál tʼojláb ti exóbal. Pero ka tsalpay abal waʼats yan jantʼoj axi i tʼajál belits abal i itʼixnál, o belits abal kwaʼal ki jólkʼanchij i kʼij, ejtíl abal tu achim. Pero i tʼajál axéʼ kom talbél ku achin i atsʼál más kanat. Tam i exobnál an Biblia jayej i éjtowal ki atsʼaʼ antsanáʼ, kom pel ejtíl max ku achin ani ku tʼoke kʼal i jáʼ (Efes. 5:26). An tsalapchik axi tal alál in éjtowal ti lej tólmiy:

• Ka tsʼejkaʼ jun i programa. An exobintaláb ti kwetémtal pel jantʼoj lej exbadh ani etsʼey kwaʼal ki tʼajaʼ (Filip. 1:10). Abal yab ka ukʼchiy an kʼicháj ani an hora tam neʼets ta exóbal, a éjtowal ka dhuchaʼ al jun i uw, ani ka tsʼatʼaʼ juʼtáj wílkʼidh ka ejtow ka tsuʼuw, ejtíl ban wíʼleb in kʼal an refrigerador. Jayej a éjtowal ka punuw jun i alarma ban teléfono abal ti tʼilchij.

• Ka tsalpay jay i kʼij neʼets ta exóbal. Talchik i epchal in lej kulbetnál ti exóbal ani in éjtowal ka kʼwajiy ketél jun i hora ti exóbal. Pero kʼeʼatchik u tsekel ani más in kulbetnál ka exobláts ti wachik. Tatáʼ, ¿jantʼoj a kulbetnál? Max yab i lej kanat ta exóbal, a éjtowal ki exobláts 10 minutos. Walám ka tsalpay abal lej wéʼ i kʼij, pero lej alwaʼ ka tʼajaʼ kom kʼayúm kʼayúm neʼets ka ujnaʼ. Walám tam ka tujchíts ta exóbal, ka léʼnaʼ ka áynanchij (Filip. 2:13).

• Ka koʼoy tsálpadhits jantʼoj neʼets ka exóbnaʼ. Max ka aychij tam i ketélits abal tikʼelej ka takuy jantʼoj neʼets ka exóbnaʼ, yab neʼets ka eyendhaʼ alwaʼ an kʼij (Efes. 5:16). A éjtowal ka tsʼejkaʼ jun i lista ani tanáʼ ka dhuchaʼ patal an artículos ani an tsalapchik axi a léʼ ka exóbnaʼ. Max waʼats jantʼoj axi yab a lej éxbayal, a éjtowal ka dhuchaʼ. Tam kʼwajatits ta exóbal, walám jayej ka kalej kʼeʼatchik i tsalap axi ka léʼnaʼ ka exóbnaʼ ani nixéʼ a éjtowal ka dhuchaʼ ban lista.

• Junchikíl neʼets ka yéjenchij ka wéʼ jalkʼuy jawaʼ a exobnámal. An tsalap kʼal patal axéʼ pel ki exobláts semana ti semana. Jaxtám junchikíl neʼets ka yéjenchij ka jaluw a kʼicháj ani an hora abal ta exóbal. O walám yab neʼets ka ejtow ki exobláts yan i kʼij antsanáʼ jantʼiniʼ ta kwaʼalak tsalpadh, jayej walám neʼets ka yéjenchij ka jaluw jawaʼ neʼets ka exóbnaʼ.

Max ka exóbnaʼ an Biblia ta kwetémtal semana ti semana, neʼets ka batsʼuw yan i alwaʼtaláb. Ejtíl, neʼets ki utey más kʼal a Jehová, neʼets ka exlaʼ jantʼoj ka takuy ka tʼajaʼ ta ejatal ani neʼets ka atsʼaʼ más kanat (Jos. 1:8).