1. ¿Jaleʼ tu jumbiyáb in bichówil a Jehová kʼal jun i paraíso ani jantʼoj jats axi etsʼey i léʼ ki tʼajaʼ?

 XOWÉʼ ta kʼicháj waʼats jun i paraíso ban tsabál juʼtáj ti waʼats yan i alwaʼtaláb ani kʼwajat ti tʼajnal yan i tʼojláb. Tanáʼ u kʼwajíl yan i atikláb, u kʼwajílchik lej kulbél ani yab jaykʼiʼ in tsalpayámal ka kalejchik tanáʼ. Axéʼchik xi kʼwajílom in léʼ abal ka utey más i atikláb tejéʼ tin bichowil a Jehová, axi pel ejtíl jun i alabél tsabál. a

2. ¿Jaleʼ ti jikʼpál ki exlaʼ abal waʼats jun i paraíso espiritual?

² Al axéʼ xi xeʼtsintaláb waʼats yan i pojkaxtaláb ani yan jantʼoj kidháb, belits antsanáʼ tin bichowil a Jehová waʼats yan i koyataláb ani u kʼwajíl lej alwaʼ (1 Juan 5:19; Apoc. 12:12). A Jehová in exlál abal a Satanás in léʼ tu ku odhnaʼ, jaxtám in tsʼejkámal jun i bichow abal wawáʼ ku kʼwajiy alwaʼ béletnadh. An Biblia tu ólchal abal in bichówil a Jehová pel ejtíl jun i paraíso lej alabél, kom kʼwajat alwaʼ wakʼadh ani tanáʼ i éjtowal ku kʼalej tu tsinél (Is. 4:6; 58:11). Patal jitaʼchik u kʼwajíl al axéʼ xi paraíso kʼwajatchik lej kulbél ani in atsʼálchik alwaʼ béletnadh, belits abal eléb waʼats yan i kʼibataláb (Is. 54:14; 2 Tim. 3:1).

3. ¿Jantʼiniʼ ti putun ti biyál an kʼej kaw axi kʼwajat ti Isaías capítulo 65?

 ³ Ban capítulo 65 in kʼál a Isaías, a Jehová in olnaʼ jantʼiniʼ ti neʼets ku kʼwajiy ban paraíso espiritual ani axéʼ xi kʼej kaw putun ban támub 537 okʼxidh ka waʼtsin a Jesús. Al nixéʼ xi támub, an judíos axi u koʼyábak ti Babilonia walkáj ani wichiy ti Jerusalén. A Jehová in tólmiy an judíos abal kin tsab tsʼejkaʼ an bichow Jerusalén ani an templo. Axéʼ xi templo neʼetsak ka eyan abal ka wichiy ka kʼakʼnáj a Jehová jantʼiniʼ tin tomnál (Is. 51:11; Zac. 8:3).

4. ¿Jantʼiniʼ ti putnének xowéʼ ta kʼicháj jawaʼ in ulal an capítulo 65 ti Isaías?

⁴ Axéʼ xi kʼej kaw jayej putun ban támub 1919, tam ti yan i atikláb tujey ti kalel ban kʼakʼnaxtaláb axi yab chubax. Ma ti nixéʼ a kʼicháj, kʼwajinek ti puwel an paraíso espiritual ani xowéʼ ta kʼicháj waʼats yan i tamkuntaláb tin puwél an tsabál. Yan i atikláb lej pojkaxak ti biyál ani in tʼajálak i tʼajbiláb axi kidháb, pero jajáʼchik in jalkʼuyámal in ejatal (Efes. 4:24). Yan kʼal an kaw axi in uluw an kawlomej Isaías neʼets ka putun ban alabél tsabál, pero xowéʼ ta kʼicháj exomits i bátsʼuwal yan i alwaʼtaláb. Ki exóbnaʼ jawaʼ jats an alwaʼtaláb axi i bátsʼuwal ani jaleʼ ti etsʼey i léʼ ku kʼwajiy tin bichówil a Jehová.

AN ALWAʼTALÁB AXI I BÁTSʼUWAL KOM U KʼWAJAT TIN BICHÓWIL A JEHOVÁ

5. Kʼal jawaʼ in ulal Isaías 65:​13, ¿jawaʼ jats an alwaʼtaláb axi in bátsʼuwal jitaʼchik kʼwajat tin bichówil a Jehová?

⁵ U kʼwajat kanat ani i kwaʼal an exobchixtaláb axi i yéjenchal, axi pel ejtíl i kʼapnél. An kawlomej Isaías in uluw jantʼiniʼ u kʼwajíl jitaʼchik kʼwajat tin bichówil a Jehová, pero jayej in olnál jantʼiniʼ tu kʼwajílchik axi kʼwajat eléb (ka ajiy Isaías 65:13). A Jehová tu pidhál patal jawaʼ i yéjenchal abal ki ejtow ku kʼwajiy utat kʼal Jajáʼ, tu pidhál an espíritu santo, an Biblia ani yan i exobchixtaláb axi pel ejtíl i kʼapnél ani i jáʼ. Nixéʼ jats axi tu tólmiyal abal ku kʼwajiy kanat ani kulbél (ka jumbiy kʼal Apocalipsis 22:17). Pero jitaʼchik yab kʼwajat tin bichówil a Jehová in watʼal i jayil ani u chikél ani yab in kwaʼal jawaʼ in yéjenchal abal ka utey kʼal a Jehová (Amós 8:11).

6. ¿Jantʼoj in ulal a Joel 2:​21-24 abal tu pidhál a Jehová?

⁶ Al jun i kʼej kaw axi in uluw an kawlomej Joel, a Jehová in uchaʼ in bichówil abal neʼetsak kin pidhaʼ jawaʼ más in yéjenchal, ejtíl an vino, an aceite de oliva ani kʼeʼat i kʼapnél axi u lej yejencháb (Joel 2:​21-24). Kʼal axéʼ xi kaw, a Jehová in tejwamédhaʼ abal neʼetsak kin pidhaʼ in bichówil patal jawaʼ in yéjenchal. ¿Jantʼiniʼ tin beletnál? In pidhámal an Biblia, i publicaciones, jun i página ti internet, an tamkuntalábchik ani an púlik tamkuntaláb. Antsanáʼ i éjtowal ku kʼwajiy kanat ani ki koʼoy an exobchixtaláb axi i yéjenchal.

7. ¿Jaleʼ ti atsʼál lej kulbél ti ichích? (Isaías 65:14).

⁷ I atsʼál kulbél ti ichích. I lej kʼákʼnanchal a Jehová patal jawaʼ tu pidhál, jaxtám i éjtowal ku kʼwajiy kulbél (ka ajiy Isaías 65:14). ¿Jaleʼ ti atsʼál u kulbél? Kom i elámal yan i exobchixtaláb ani i kaw axi lej kʼijidh ti Biblia. Jayej, kom i kwaʼal jun i aychixtaláb ani nixéʼ xi aychixtaláb i kwaʼal kom a Jesús in bínaʼ in ejatal. Wawáʼ i lej kulbetnál ku tʼilmáts kʼal kʼeʼatchik i epchal tin kwéntaj axéʼ xi alabél aychixtaláb (Sal. 34:8; 133:​1-3).

8. ¿Jantʼoj jats axi más u tejwamél tin bichówil a Jehová?

⁸ Tin bichówil a Jehová u lej tejwamél abal u kʼwajat junkudh ani abal u kʼanidháx. Axéʼ xi kʼanidhomtaláb tu tólmiyal ki exbay jantʼiniʼ neʼets ku kʼwajiy ban alabél tsabál. Tanáʼ patal neʼets ku kʼwajiyits junkudh ani neʼets ki tejwamédhaʼ i kʼanidhomtaláb kʼal axi más (Col. 3:14). Jun i epchal mimláb in ulal abal in lej jikʼpaʼ tam tin exlaʼ an ólchixchik kʼal a Jehová. In  ulal: «Nanáʼ yab u atsʼálak kʼijidh tu ejatal ani yab u atsʼálak kulbél kʼal u yanél, ma tu exlaʼ an ólchixchik kʼal a Jehová tikʼelej tu exlaʼ jantʼiniʼ in tomnál ku tejwamédhaʼ i kʼanidhomtaláb». Max jun i atikláb in léʼ kin atsʼaʼ kulbél tin ejatal, kwaʼal ka otsits tin bichówil a Jehová. Axéʼ xi xeʼtsintaláb tu kʼwiyál, pero a Jehová ani in bichówil axi kʼwajat ti éb tu lej kʼanidhál (Is. 65:15).

9. ¿Jantʼoj neʼets ka watʼey kʼal an yajal axi i kwaʼal ti ichích? (Isaías 65:​16, 17).

⁹ Tu tólmiyal abal yab ki atsʼaʼ lej tʼeʼpidh. Isaías 65:14 in ulal abal jitaʼchik yab in léʼ ka kʼwajiy ban paraíso espiritual, «neʼets ka dhajan kʼal an yajal tin ichích ani neʼets ka ukʼindháj kʼal yan i tʼeʼpintaláb». Pero, ¿jantʼoj neʼets ka watʼey kʼal in bichówil a Jehová? ¿Jantʼoj neʼets ka watʼey kʼal patal an tʼeʼpintaláb axi jajáʼchik in tametnál? A Jehová in ulal: «Neʼets ka ukʼchiychik an tʼeʼpintaláb axi a watʼaʼ ti biyál» (ka ajiy Isaías 65:​16, 17). A Jehová in ulúmal abal neʼets ka taley patal an yajchiktaláb ani kʼayúm kʼayúm neʼets ki ukʼchiy an yajal axi i kwaʼal ti ichích ani yabáts neʼets ki yajnaʼ tam ki tʼilaʼ.

10. ¿Jaleʼ ta tsálpayal tatáʼ abal lej kʼijidh ku kʼwajiy kʼal an epchalchik? (Ka tsuʼuw jayej an foto).

¹⁰ Xowéʼ ta kʼicháj, jayej i éjtowal ki atsʼaʼ koyat i ichích tam u kʼwajat ti tamkuntaláb, kom tanáʼ i éjtowal ki ukʼchiy patal an tʼeʼpintaláb axi i kwaʼal. Pero, ¿jantʼiniʼ i éjtowal ku tólmixin wawáʼ abal antsanáʼ kin atsʼaʼ an epchalchik? Max ki tsápnanchij ki tejwamédhaʼ i kʼanidhomtaláb, i kʼayaʼtaláb, ki tʼajaʼ tu alwaʼ inik ani ku kʼwajiy koyat kʼal an epchalchik. Patal axéʼ jats jawaʼ a Jehová tu tólmiyal ki tejwamédhaʼ kʼal an espíritu santo (Gál. 5:​22, 23). Pel jun i lablixtaláb lej púlik ki ejtow ku kʼwajiy tin bichówil a Jehová. Max etsʼey ku jilkʼon tejéʼ, neʼets ki ejtow ki tsuʼuw jantʼiniʼ u putnal patal jawaʼ in ulúmal a Jehová ani neʼets ku kʼwajiy al jun i alabél tsabál tam tu ku ábatnaʼits in Éyaltal a Dios.

11. ¿Jantʼiniʼ i atsʼál kom u kʼwajat tin bichówil a Jehová? (Isaías 65:​18, 19).

¹¹ U kʼwajat kulbél ani i kʼakʼnál jawaʼ i kwaʼal. An kawlómej Isaías in uluw jaleʼ tin tomnál ki atsʼaʼ kulbél ani jats kom in bichówil a Jehová xowéʼ ta kʼicháj pel jun i paraíso espiritual ani pel a Jehová in tsʼejkámal (ka ajiy Isaías 65:​18, 19). Jaxtám a Jehová tu uchál abal ki tólmiy an atiklábchik abal kin jilaʼ an kʼakʼnaxtaláb axi yab chubax ani ka otsits tin bichówil a Jehová, kom tejéʼ neʼets ka kʼwajiychik más alwaʼ. I atsʼál lej kulbél kom u kʼwajat tin bichówil a Jehová ani i léʼ ki tʼilchij kʼeʼat i atiklábchik  tin kwéntaj an lablixtaláb axi kʼwajat i bátsʼuwal (Jer. 31:12).

12. ¿Jantʼiniʼ ta atsʼál tam ka ajiy Isaías 65:​20-24 ani ka tsalpay kʼal patal jawaʼ a Jehová neʼets tu ku pidhaʼ?

¹² Patal axi kʼwajat i tʼójonchal a Jehová i atsʼál lej kulbél ani i kʼákʼnanchal patal jawaʼ neʼets tu ku pidhaʼ ban alabél tsabál. Ka tsalpay kʼal patal jawaʼ neʼets ka ejtow ka tʼajaʼ ban alabél tsabál ani patal jawaʼ neʼets ka tsuʼuw tanáʼ. An Biblia tu ólchal axéʼ: «Tanáʼ yabáts neʼets ka tsemets an tʼeleʼchik, ani axi yejtsel yabáts neʼets ka tsemets expidh kom yánits i támub in kwaʼal». Jayej in ulal abal «patal neʼets kin tsʼejkaʼ in kʼimáʼ ani neʼets kin eyendhaʼ. Neʼets kin tʼojonchij an tsabál ani neʼets kin kʼapuw jawaʼ kin tʼayaʼ. Patal jawaʼ kin tʼajaʼchik neʼets ka kalej alwaʼ kom neʼets ka lábliyat kʼal a Jehová». A Jehová in ulúmal abal neʼets ku kʼwajiy alwaʼ ani neʼets ki atsʼaʼ alwaʼ béletnadh. Jajáʼ in exlálits jawaʼ i yéjenchal ani neʼets tu ku pidhaʼ, ani jayej neʼets tu ku pidhaʼ patal jawaʼ i léʼ ti ichích (Is. 65:​20-24; Sal. 145:16).

13. ¿Jantʼiniʼ u tʼipoyáb ti Isaías 65:25 patal jawaʼ in tomnál ki tʼajaʼ abal ki kulbedhaʼ a Jehová?

¹³ I atsʼál alwaʼ béletnadh ani yab u jikʼél. A Jehová in tolmiyámal yan in atikláb axi ti biyál pojkaxak abal kin jalkʼuy jantʼiniʼ in ey (ka ajiy Isaías 65:25). Jajáʼchik in exobnámal yabáts ti lej tsákulom (Rom. 12:2; Efes. 4:​22-24). Patal wawáʼ axi i tʼójonchal a Jehová pel u waláblom ani junchikíl i tʼajál jawaʼ yab tekedh, belits antsanáʼ a Jehová in tʼajámal abal yan i atikláb axi tin puwél an tsabál ka kʼwajiychik junkudh, ka kʼanidháxin ani ka kʼwajiychik koyat (Tito 2:11). I exlál abal expidh a Jehová in éjtowal kin tʼajaʼ nixéʼ.

14. ¿Jantʼiniʼ tin tʼajaʼ ti kwéntaj jun i epchal abal putun tin ejatal jawaʼ in ulal Isaías 65:25?

¹⁴ Pero, ¿chubax i éjtowal ki jalkʼuy jantʼiniʼ i ey? Aníts, ani waʼats jun i tʼiplab axi in tejwamedhál abal jats watʼenek. Jun i inik axi in kwaʼal 20 i támub lej pojkaxak ani uxúmbej. Yaníl báliyat ti wikʼaxteʼ kom in kwéʼyalak i carros ani kom in tʼajálak yan jantʼoj más. Jayej in lej kulbetnálak ti pejéx, pero tam ti tujey in exobnál an Biblia kʼal an ólchixchik kʼal a Jehová ani ka kʼalej ti tamkuntaláb, in tʼajaʼ ti kwéntaj abal tanáʼ tin tomnálak ka kʼwajiy. Tam ti pujan, in tʼajaʼ ti kwéntaj abal putun tin ejatal jawaʼ in ulal Isaías 65:​25, jajáʼ pelak ejtíl jun i tsój axi lej pojkax ani wenkʼon ejtíl jun i cordero axi lej maxu.

15. ¿Jaleʼ ti léʼ ki tólmiy an atiklábchik abal ka otsits tin bichówil a Jehová ani jantʼiniʼ ti neʼets ki tʼajaʼ?

¹⁵ Isaías 65:13 u tujél kʼal axéʼ xi kaw: «Axéʼ jats jawaʼ in ulal a Jehová, axi más Púlik in Éy». Ani an versículo 25 in ulal: «Jats jawaʼ in ulal a Jehová». Axéʼ xi kaw tu tejwamédhanchal abal jawaʼ in ulal a Jehová etsʼey u putnal (Is. 55:​10, 11). A Jehová in uluw abal neʼetsak kin koʼoy jun in bichówil axi u jumbiyáb kʼal jun i paraíso ani jats exomits i tsuʼtal xowéʼ. Tin bichówil a Jehová u kʼwajat alwaʼ béletnadh ani u kʼwajat koyat, belits abal waʼats i pojkaxtaláb ban xeʼtsintaláb (Sal. 72:7). Jaxtám i léʼ ki tólmiy patal an atikláb axi ki ejtow abal ka otsits tin bichówil a Jehová ani kin batsʼuw patal axéʼ xi alwaʼtaláb, pero ¿jantʼiniʼ i éjtowal ki tʼajaʼ? Max ki áynanchij kʼal an olnomtaláb (Mat. 28:​19, 20).

¿JANTʼINIʼ I ÉJTOWAL KI TÓLMIY AN ATIKLÁBCHIK ABAL KA OTSITS TIN BICHÓWIL A JEHOVÁ?

16. ¿Jaleʼ ti an atiklábchik in léʼ ka utey tin bichówil a Jehová?

¹⁶ Patal wawáʼ i éjtowal ku tólmixin abal an atiklábchik kin léʼnaʼ ka otsits tin bichówil a Jehová ani kin tʼajaʼ ti kwéntaj abal jats tejéʼ tin tomnál ka kʼwajiy. ¿Jantʼiniʼ i éjtowal ki tʼajaʼ nixéʼ? Max ki nitsʼbiy jantʼiniʼ  in ey a Jehová. A Jehová yab tu nixoknál abal ki tʼajaʼ jawaʼ in léʼ, Jajáʼ tu útuwal kʼal i kʼanidhomtaláb (Jer. 31:3; Juan 6:44). Tam jun i atikláb kin tʼajaʼ ti kwéntaj jantʼiniʼ jats in ey a Jehová, nixéʼ in tʼajál abal kin léʼnaʼ ka utey kʼal Jajáʼ. ¿Jantʼoj i éjtowal ki tʼajaʼ wawáʼ abal an atiklábchik kin léʼnaʼ ka utey tin bichówil a Jehová?

17. ¿Jantʼiniʼ i éjtowal ki tólmiy an atiklábchik abal ka utey tin bichówil a Jehová?

¹⁷ Max ki tejwamédhanchij an epchalchik abal i kʼanidhál ani ki tʼajaʼ tu alwaʼ inik kʼal jajáʼchik, tam an atiklábchik neʼets kin léʼnaʼ ka utey tin bichówil a Jehová. Wawáʼ i léʼ abal patal an atikláb axi ka kʼalej ti tamkuntaláb, kin uluw antsanáʼ jantʼiniʼ an atiklábchik axi walám kʼalej ban tamkuntaláb axi ti Corinto: «Lej chubax kʼwajat a Dios kʼal tatáʼchik» (1 Cor. 14:​24, 25; Zac. 8:23). Jaxtám ti lej exbadh ku kʼwajiy koyat kʼal axi más (1 Tes. 5:13).

18. ¿Jantʼoj neʼets kin tʼajaʼ abal an atiklábchik kin léʼnaʼ ka utey tin bichówil a Jehová?

¹⁸ Jayej in tomnál ki tsápnanchij ki tejwamédhanchij an epchalchik abal i kʼanidhál, antsanáʼ jantʼiniʼ in tʼajál a Jehová. Nixéʼ neʼets tu ku tólmiy abal ki tʼajchij ti kwéntaj jawaʼ in tʼajálchik alwaʼ ani yab ki lej tʼajchij ti kwéntaj tam u ukʼpinalchik. An kʼanidhomtaláb neʼets tu ku tólmiy abal ki tsʼejkaʼ jawákits tam kʼibataláb axi ki koʼoy kʼal jun i epchal, kom neʼets ki tsápnanchij ki belkaʼ axéʼ xi tsalpadh kaw: «Expidh ka tʼajchij alwaʼ a at-inik, kit yajnanchixin ani kit pakwlanchíxin» (Efes. 4:32). Jitakits tam atikláb axi jayej kin léʼnaʼ ka kʼanidháj, neʼets kin léʼnaʼ ka utey tin bichówil a Jehová. b

 KU JILKʼON TEJÉʼ TIN BICHÓWIL A JEHOVÁ

19. a) ¿Jantʼoj in ulal talchik i epchal axi wíchenek tin bichowil a Jehová? (Ka tsuʼuw an recuadro « Owméjchik kʼal a Jehová pero talbél wichiy»). b) ¿Jantʼoj jats axi kwaʼal ki tsápnanchij ki tʼajaʼ? (Ka tsuʼuw jayej an imagen).

¹⁹ Lej kʼijidh i atsʼál kom u kʼwajat tin bichówil a Jehová. Tejéʼ i bátsʼuwal yan i alwaʼtaláb ani lej yan axi kʼwajat i tsápnanchal ki tʼojonchij. Etsʼey ki kʼákʼnanchij a Jehová kom in kwaʼal jun in bichówil ani kom tu jilchal ku kʼwajiy tejéʼ. Patal jitaʼchik in léʼ kin atsʼaʼ kanat, kin atsʼaʼ kulbél, ka kʼwajiy alwaʼ béletnadh ani kin atsʼaʼ koyat in ichích, kwaʼal ka otsits tin bichówil a Jehová ani ka jílkʼonits tanáʼ. Pero kwaʼal ki lej béletnaʼ ti baʼ, kom a Satanás in léʼ tu ku kʼambiy ani in léʼ tu ku owmedhaʼ kʼal in bichówil a Jehová (1 Ped. 5:8; Apoc. 12:9). Yab ki jilaʼ abal a Satanás tu ku ataʼ, etsʼey ki tsápnanchij abal in bichówil a Jehová ka kʼwajiy alabél, ka kʼwajiy tʼokat ani patal ku neʼdháxin alwaʼ.