1. Ka olnaʼ kʼal jun i tʼiplab jaleʼ ti lej exbadh ki jilaʼ abal a Jehová tu ku exóbchij.

 KA TSALPAY abal tatáʼ it kʼwajat kʼíbenek al jun i tsʼén, tatáʼ i jikʼél kom lej púlik an alteʼ, ani waʼats i koʼnél axi in éjtowal ti odhnaʼ, jayej kʼakʼadh ki ijkan al jun i jol o ti tʼeʼtsiy jun i púlik tʼujub. Pero neʼets ka atsʼaʼ lej kulbél max ti júnaʼ jitaʼ axi in exlálits an bel ani ti ólchij juʼtáj kit kʼalej. Axéʼ xi xeʼtsintaláb pel ejtíl nixéʼ xi tsʼen, waʼats yan jantʼoj kʼakʼadh axi in éjtowal tu ku kʼíbedhaʼ ani tu ku owmedhaʼ kʼal a Jehová. Pero a Jehová játs axi tu ólchal juʼtáj tin tomnál ku xeʼtsin abal yab ku kʼibej ani ki ejtow ku ulits ban alabél tsabál. Tanáʼ neʼets ki koʼoy i ejataláb abal etsʼey.

2. ¿Jantʼoj in tʼajál a Jehová abal tu ku ókʼnaʼ?

² ¿Jantʼoj in eyendhál a Jehová abal tu ku ókʼnaʼ? Jawaʼ más in eyendhál pel an Biblia, pero jayej in eyendhál i inikchik abal tu ku ókʼnaʼ. Jun i tʼiplab, in eyendhál «an tʼojnal axi putudh ani tsalpadh», jajáʼchik tu pidhál i exobchixtaláb axi kaldhach ti Biblia, axéʼ tu tólmiyal abal ki exlaʼ jantʼoj ki tʼajaʼ ti ejatal (Mat. 24:45). Jayej in eyendhál an ókʼnomchik kʼal an circuito ani an ókʼnomchik axi ti tamkuntaláb abal tu ku kanatbédhaʼ ani tu ku tólmiy tam i tametnál i kʼibataláb. I lej kʼakʼnál kom a Jehová kʼwajat in eyendhál axéʼchik xi inik abal tu ku ókʼnaʼ tin taltal axéʼ an xeʼtsintaláb, kom lej kʼibat jawaʼ kʼwajat ti watʼal. Axéʼ tu tólmiyal abal ki ejtow ki áynanchij ki jaʼúbnaʼ a Jehová, ani ki ejtow ku xeʼtsin ban bel axi neʼets tu ku neʼdhaʼ ban ejataláb abal etsʼey.

3. ¿Jantʼoj neʼets ki exóbnaʼ?

³ Junchikíl neʼets ki atsʼaʼ kʼibat ki bélkaʼ jawaʼ a Jehová tu konchal. An epchalchik axi tu okʼnál pel i atikláb axi wálbidh ejtíl wawáʼ, ani walám junchikíl yab neʼets ki kulbétnaʼ jawaʼ jajáʼchik tu uchál. Walám ma ki bajuw ki tsalpay abal yab neʼets  ka eyan jawaʼ kʼwajatchik tu uchál, ani awits ki tsalpay abal yab tal kʼal a Jehová. Tam ki watʼaʼ nixéʼ kwaʼal ki tʼilaʼ abal a Jehová játs axi kʼwajat in okʼnál in bichówil ani jawaʼ tu konchal ki tʼajaʼ játs axi más alwaʼ. Ki exóbnaʼ ox i tsalap axi neʼets tu ku tólmiy ki belaʼ más kʼal a Jehová. Kʼaʼál tsalap, ¿jantʼiniʼ tin ókʼnaʼ a Jehová in bichówil ti biyál? Tsabchíl, ¿jantʼoj kʼwajat in tʼajál xowéʼ abal kin ókʼnaʼ? Ani oxchíl, ¿jantʼoj tam alwaʼtaláb neʼets ki batsʼuw max ki jilaʼ abal a Jehová tu ku ókʼnaʼ?

¿JANTʼINIʼ IN ÓKʼNAʼ A JEHOVÁ AN BICHOW ISRAEL?

4, 5. ¿Jantʼiniʼ ti tejwaméj abal a Jehová kʼwajatak in eyendhál a Moisés abal kin ókʼnaʼ an israelitas? (Ka tsuʼuw an dibujo axi kʼwajat ban portada).

⁴ A Jehová in eyendhaʼ a Moisés abal kin kaldhaʼ an israelitas ti Egipto, ani in tejwamédhanchij an israelitas abal kʼwajatak in eyendhál a Moisés abal kin tolmiychik. Jun i tʼiplab, in eyendhaʼ jun i kʼamal lej púlik abal kin tajbay an israelitas tam akal ani in eyendhaʼ jun i tokow abal kin tsalmiy an israelitas tam kʼicháj (Éx. 13:21). A Moisés ani an israelitas in aynaʼchik nixéʼ xi tokow ani jaxtám in ejtowchik ka ulits ban Mar Rojo. Tam ti an israelitas in tsuʼuw abal kuxlab tal an egipcios, lej jikʼeychik kom yab in kwaʼalak juʼtáj ka adhláts. Jajáʼchik in tsalpay abal yab alwaʼ jawaʼ in tʼajaʼ a Moisés kom neʼdhaʼchik tanáʼ. Pero a Moisés yab ukʼpin, pel kʼal a Jehová ti uchan ka kʼalej tanáʼ (Éx. 14:2). A Jehová in kʼaniy an israelitas kom Jajáʼ in tʼajaʼ jantʼoj axi an israelitas yabak in aychal (Éx. 14:​26-28).

⁵ Al cuarenta i támub, a Moisés in aynaʼ an tokow axi a Jehová kʼwajatak in eyendhál abal kin ókʼnaʼ an israelitas. a Junchikíl, a Jehová in tʼajálak abal an tokow ka jilkʼon eblim tin kʼimáʼ a Moisés, nixéʼ in tʼajálak abal an israelitas kin tsuʼuw abal kʼwajatak ti eyendháb a Moisés (Éx. 33:​7, 9, 10). Al nixéʼ xi tokow, a Jehová in tawnálak a Moisés, ani talbél a Moisés in uchálak an israelitas jawaʼ u uchnalak kʼal a Jehová (Sal. 99:7). A Jehová in tejwamédhaʼ abal exomak in eyendhál a Moisés abal ka ókʼnaʼ an israelitas.

6. ¿Jantʼoj in tʼajaʼ yan i israelitas? (Números 14:​2, 10, 11).

⁶ Yan i israelitas yab in léʼnaʼ kin tʼajaʼ ti kwéntaj abal a Jehová kʼwajatak in eyendhál a Moisés abal ka okʼnáj (ka ajiy Números 14:​2, 10, 11). Jajáʼchik lej jekʼombéj ani yab in léʼnaʼ kin bélkaʼ Moisés, jaxtám a Jehová yab in jílaʼchik ka otsits ban tsabál axi neʼetsak kin pidhaʼ (Núm. 14:30).

7. ¿Jitaʼchik más in jilaʼ ka ókʼnaʼ kʼal a Jehová? (Números 14:24; ka tsuʼuw jayej an imagen).

⁷ Pero waʼtsin i israelitas axi bélkaxin. Jun kʼal axéʼ pel a Caleb, a Jehová in uluw axéʼ: «A Caleb tin bélkaʼ kʼal patal in ichích» (ka ajiy Números 14:24). Jajáʼ lej lábliyat kʼal a Jehová, ani tam ti ulits ti Canaán ma jilchat kin takuy juʼtáj in léʼak ka kʼwajiy (Jos. 14:​12-14). Antsanáʼ jantʼiniʼ a Caleb, talbél waʼtsin i israelitas axi jayej in jilaʼ ka okʼnáj kʼal a Jehová. Tam ti a Josué in kalchiy a Moisés, jajáʼchik lej bélkaxin ani in kʼakʼnaʼ a Josué (Jos. 4:14). Jaxtám a Jehová in lábliychik ani in jilchij ka otsits ban tsabál axi neʼetsak ka pidhan (Jos. 21:​43, 44).

8. ¿Jantʼoj in tʼajaʼ a Jehová abal kin ókʼnaʼ in bichówil tam ti waʼtsin i tsʼalej? (Ka tsuʼuw jayej an imagen).

⁸ Talbél, a Jehová in tujchij kin eyendhaʼ i jueces abal kin ókʼnaʼ in bichówil, ani más talbél tam ti waʼtsinits i tsʼalej ti Israel, a Jehová in bíjiy i kawlomej abal kin ókʼnaʼ an israelitas. An tsʼálejchik axi in kʼanidhálak a Jehová in jilaʼ ka exóbchat kʼal an kawlomejchik. Jun i  tʼiplab pel a David, jajáʼ in jilaʼ ka boliyat kʼal a Natán (2 Sam. 12:​7, 13; 1 Crón. 17:​3, 4). Kʼeʼat i tʼiplab pel a Jehosafat, jajáʼ in tʼajaʼ ti kwéntaj jawaʼ uchan kʼal an kawlomej Jahaziel ani in uchaʼ an bichow abal jayej kin bélkaʼ an kawlomejchik (2 Crón. 20:​14, 15, 20). Jayej an tsʼalej Ezequías in konchij i tolmixtaláb an kawlomej Isaías, tam ti an bichow kʼwajatak in tametnál jun i kʼibataláb lej púlik (Is. 37:​1-6). Max an tsʼalej kin bélkaʼ jawaʼ in ulal an kawlomej, a Jehová in lábliyalak ani in beletnálak an bichow (2 Crón. 20:​29, 30; 32:22). Lej tejwaʼak abal a Jehová kʼwajatak in eyendhál an kawlomej abal kin ókʼnaʼ an bichow. Pero waʼtsin yan i israelitas ani i tsʼálejchik axi yab in léʼnaʼ ka bélkaxin (Jer. 35:​12-15).

¿JANTʼOJ IN TʼAJAʼ A JEHOVÁ ABAL KIN ÓKʼNAʼ AN EPCHALCHIK AXI TI KʼAʼÁL I SIGLO?

9. ¿Jantʼiniʼ tin ókʼnaʼ a Jehová in bichówil ti kʼaʼál i siglo? (Ka tsuʼuw jayej an imagen).

⁹ Ti kʼaʼál i siglo a Jehová in tujchij kin tʼojojoy in bichówil ani in bíjiy a Jesús ti ókʼnom kʼal an tamkuntaláb (Efes. 5:23). Pero a Jesús yab u xeʼtsinalak kin tʼilmay an epchalchik ti junchik abal kin uchaʼ jantʼoj kwaʼalak kin tʼajaʼ, jajáʼ in eyendhálak an abatwálej ani an ókʼnomchik axi ti Jerusalén (Hech. 15:​1, 2). Jayej bíjiyat i ókʼnom ban tamkuntalábchik abal kin ókʼnaʼ an epchalchik (1 Tes. 5:12; Tito 1:5).

10. a) ¿Jantʼoj in tʼajaʼ yan i epchal axi ti kʼaʼál i siglo kʼal an olchixtaláb axi pidhan? (Hechos 15:​30, 31). b) ¿Jaleʼ ti yan i epchal yab in jilaʼ ka okʼnáj kʼal a Jehová? (Ka tsuʼuw an recuadro « ¿Jaleʼ ti yan i atikláb yab in leʼnámal ka bélkaxin?»).

¹⁰ ¿Jantʼoj in tʼajaʼ an epchalchik axi ti kʼaʼál siglo kʼal an olchixtaláb axi pidhan? Yan i epchal bélkaxin kʼal in kulbétal, ani in atsʼaʼchik lej kulbél kʼal jawaʼ uchan (ka ajiy Hechos 15:​30, 31). Pero, ¿jantʼoj kʼwajat in tʼajál a Jehová xowéʼ ta kʼicháj abal tu ku ókʼnaʼ?

¿JANTʼINIʼ KʼWAJAT TU OKʼNÁL A JEHOVÁ XOWÉʼ TA KʼICHÁJ?

11. Ka olnaʼ jun i tʼiplab axi kin tejwamédhaʼ abal Jehová kʼwajat in eyendhál i atiklábchik abal kin ókʼnaʼ in bichówil.

¹¹ Xowéʼ ta kʼicháj a Jehová in áynanchal kin eyendhaʼ a Jesús ani an Biblia abal tu ku ókʼnaʼ. Pero, ¿walám in aynanchámal kin eyendhaʼ i atiklábchik abal tu ku ókʼnaʼ? Aníts. Jun  i tʼiplab, ki tsalpay kʼal jawaʼ watʼey tin taltal an támub 1870. A Charles Russell ani in tolmiwal in éxbaychik abal ti 1914 neʼetsak ka watʼey jantʼoj lej exbadh tin kwéntaj in Éyaltal a Dios (Dan. 4:​25, 26). ¿Jantʼiniʼ tin ejtow kin éxbaychik nixéʼ? Kom in exóbnaʼchik an kʼej kaw axi kʼwajat ti Biblia, ani kom tolmiyat kʼal a Jehová kʼal an espíritu santo. Ti 1914 watʼey yan jantʼoj tin puwél an tsabál, axi in tejwamédhaʼ abal in Éyaltal a Dios tujey ti ábatnom ti éb. Nixéʼ an támub tujey an Primera Guerra Mundial, waʼtsin i jayil, tʼeleláts an tsabál ani bukʼey i yawʼláts (Luc. 21:​10, 11). Tejwámej abal a Jehová kʼwajatak in eyendhál axéʼchik xi inik abal kin ókʼnaʼ in bichówil.

12, 13. ¿Jantʼoj in tʼajaʼ in bichówil a Jehová belits abal exomak an Segunda Guerra Mundial?

¹² Ki tsalpay kʼal kʼeʼat jantʼoj axi watʼey tam ti exomak an Segunda Guerra Mundial. An epchalchik axi in okʼnálak in bichówil a Jehová in exóbnaʼchik jawaʼ in ulal Apocalipsis 17:​8, ani in éxbaychik abal talbél kʼal an Segunda Guerra Mundial yabaye neʼetsak ka ulits a Armagedón. Jayej in éxbaychik abal talbél kʼal an pextaláb, neʼetsak ka waʼtsin wéʼ i koyataláb ani jaxtám neʼetsak kin ejtowchik ka olnomáts. In bichówil a Jehová in tʼajaʼ jantʼoj axi walám an epchalchik in jikʼpaʼ. In tujuwchik jun i escuela axi in bij Colegio Superior Bíblico de la Watchtower de Galaad, b axéʼ neʼetsak ka eyan abal ka tʼojojoyat an epchalchik ani ka aban ti tolmix tin puwél an tsabál. Belits abal exomak an Segunda Guerra Mundial, aban yan i epchalchik ti tolmix al pílchik i bichow. Jayej tʼojojoyat kʼeʼat i escuela axi in bij Curso en el Ministerio Teocrático. c Axéʼ neʼetsak kin tólmiy an epchalchik abal ka bajudhméj ban olnomtaláb. Axéʼ xi tsab i escuela eyan abal an epchalchik kin ejtow kin tʼajaʼ an tʼojláb axi neʼetsak kin tʼajaʼ talbél.

¹³ I tʼajál ti kwéntaj abal a Jehová in ókʼnaʼ in bichówil tam ti exomak an Segunda Guerra Mundial. Tam ti taley axéʼ xi pextaláb, an epchalchik in ejtow kin áynanchij ti ólnom al yan i bichow axi tin puwél an tsabál. Axéʼ eynének abal yan i atikláb kin exlaʼ a Jehová, ani ki áynanchij ki olnaʼ an alwaʼ kaw.

14. ¿Jaleʼ tin tomnál ki bélkaʼ jawaʼ tu konchal an ókʼnomchik ani in bichówil a Jehová? (Apocalipsis 2:1; ka tsuʼuw jayej an imagen).

 ¹⁴ Xowéʼ ta kʼicháj, an epchalchik axi u tolmix ban Kwenél i Ókʼnom in áynanchal kin jilaʼ abal ka ókʼnaʼ kʼal a Cristo. Tam jajáʼchik kin bínaʼ jun i olchixtaláb, etsʼey in tʼajál ti kwéntaj max nixéʼ játs jawaʼ a Jehová ani a Jesús in léʼ abal ka tʼajan. Jajáʼchik in eyendhál an ókʼnom kʼal an circuito ani an ókʼnomchik axi ban tamkuntaláb, abal kin watʼbanchij axéʼ xi olchixtaláb an tamkuntalábchik. d Patal an ókʼnomchik pel ejtíl max kʼwajat tin winab kʼubak a Jesúcristo (ka ajiy Apocalipsis 2:1). Pero kom an ókʼnomchik jayej wálbidh, junchikíl neʼets ka ukʼpin, antsanáʼ jantʼiniʼ ti ukʼpin a Moisés, a Josué ani an abatwálejchik (Núm. 20:12; Jos. 9:​14, 15; Rom. 3:23). Pero i exlál abal a Jesús kʼwajat in okʼnál an Kwenél i Ókʼnom ani an ókʼnomchik axi ti tamkuntaláb, ani neʼets kin áynanchij kin tʼajaʼ ma tin taltal axéʼ an xeʼtsintaláb (Mat. 28:20). Jaxtám in tomnál ki bélkaʼ patal an olchixtaláb axi tu pidhál axéʼchik xi epchal, kom pel kʼal a Jehová ti kʼwajat ti eyendháb abal tu ku ókʼnaʼ.

AN ALWAʼTALÁB AXI I BÁTSʼUWAL MAX KI JILAʼ ABAL A JEHOVÁ TU KU ÓKʼNAʼ

15, 16. ¿Jantʼoj a exobnál kʼal in tʼiplábil axéʼchik xi epchal?

¹⁵ Xowéʼits i éjtowal ki batsʼuw yan i alwaʼtaláb, max ki bélkaʼ jawaʼ tu konchal in bichówil a Jehová. Jun i tʼiplab, a Andy ani in kʼimádhil Robyn, in tsápnanchij kin bélkaʼ an exobchixtaláb axi in ulal abal kwaʼal ku kʼwajiy kulbél kʼal jawaʼ i kwaʼal (Hebreos 13:5). Kom in tʼajaʼchik nixéʼ, xowéʼ in ejtowamal ka tolmixin abal ka tsʼejkáj i atáj juʼtáj u kʼakʼnáb a Jehová. An epchal mimláb in ulal: «Yan i kalel u kʼwajiy al i atáj axi lej tsipkats ani ma yab i kwaʼalak juʼtáj ki tsʼejkaʼ an kʼapnél. Jayej, nanáʼ u kulbetnál ku kaldhaʼ i fotos, pero koʼoy ku nujuw an cámaras ani kʼeʼat jantʼoj axi u eyendhálak. U lej yajnaʼ tam tu nujuw, pero u léʼak ku nitsʼbiy a Sara ani yab neʼetsak kin wílkʼin kuxlab abal ku metʼaʼ jawaʼ u jilaʼ (Heb. 11:15). ¿Jantʼiniʼ tin atsʼálchik xowéʼ kʼal jawaʼ in takuy kin tʼajaʼ? A Robyn in ulal: «I atsʼál lej kulbél kom kʼwajat i eyendhál i ejatal ani jawaʼ i kwaʼal abal ki tʼojonchij a Jehová. Tam i putuwal kʼal an tʼojláb axi tu bíjchal in bichówil a Jehová, u kʼwajíl ki tsalpay jantʼiniʼ neʼets ku tʼójon ban alabél tsabál».  A Andy in ulal axéʼ: «I atsʼál u lej kulbél kom kʼwajat i eyendhál jawaʼ i kwaʼal abal ki tʼojonchij más a Jehová».

¹⁶ ¿Jantʼoj tam kʼeʼat i alwaʼtaláb i bátsʼuwal max ki bélkaʼ jawaʼ tu konchal a Jehová? Ki tsuʼuw jantʼoj in tʼajaʼ jun i epchal axi in bij Marcia. Tam ti taʼpan ti exóbal, jajáʼ in léʼnaʼ kin tujchij ti precursora (Mat. 6:33; Rom. 12:11). Jajáʼ in ulal jantʼoj in tʼajaʼ: «Jun i universidad tin pidhálak jun i beca abal kin exobláts tseʼ i támub. Pero nanáʼ u léʼak ku tʼojonchij más a Jehová, jaxtám u takuy ku exóbnaʼ kʼeʼat i tʼojláb abal ku ejtow ku elaʼ jawaʼ u yéjenchal, ani ku ejtow ku tʼajaʼ tin precursora. U atsʼál lej kulbél kom u takuy ku tʼajaʼ axéʼ. Xowéʼ in tolmix jantʼiniʼ in precursora regular, u éjtowal ku takuy an kʼij axi neʼets tin tʼojnal ani jayej in kʼalel tin tolmix talchik a kʼicháj ti Betel».

17. ¿Jantʼoj tam kʼeʼat i alwaʼtaláb i bátsʼuwal max ki jilaʼ abal Jehová tu ku ókʼnaʼ? (Isaías 48:​17, 18).

¹⁷ Junchikíl a Jehová tu pidhál i exobchixtaláb axi tu tólmiyal abal yab ki kʼaʼinchij an tumín ani yab ki tʼajaʼ jantʼoj axi tu ku owmedhaʼ kʼal a Jehová ani ki kʼibchij. Antsanáʼ tu okʼnál a Jehová, ani tu exóbchal jantʼoj ki tʼajaʼ abal yab ki yajchiknaʼ ti ejatal, ani ki koʼoy i koyataláb ti ichích (1 Tim. 6:​9, 10). Patal axéʼ tu tólmiyal abal ki tʼojonchij a Jehová kʼal patal i kanat, ani tu tólmiyal abal ki atsʼaʼ u kulbél (ka ajiy Isaías 48:​17, 18).

18. ¿Jaleʼ a léʼ abal a Jehová ti ókʼnaʼ?

¹⁸ A Jehová neʼets kin áynanchij kin eyendhaʼ i atiklábchik abal kin ókʼnaʼ in bichówil tin taltal axéʼ an xeʼtsintaláb, ani ban Mil i Támub axi ka kʼwajiy ti eyal a Jesús (Sal. 45:16). ¿Jantʼoj neʼets ki tʼajaʼ al nixéʼ xi kʼij? ¿Neʼets ki jilaʼ abal a Jehová tu ku ókʼnaʼ belits max kwaʼal ki jalkʼuy i tsalápil? Max xowéʼ i ujnámits tu bélkax, axi taʼtal a kʼicháj yab neʼets ki atsʼaʼ kʼibat ki tʼajaʼ. Jaxtám, ki áynanchij ki bélkaʼ jitaʼchik a Jehová in bijiyámal abal tu ku ókʼnaʼ (Is. 32:​1, 2; Heb. 13:17). A Jehová in tejwamedhál abal i éjtowal ki belaʼ kʼal Jajáʼ. A Jehová neʼets tu ku ókʼnaʼ abal yab ku kʼibej al axéʼ xi xeʼtsintaláb ani ki ejtow ku ulits ban alabél tsabál, tanáʼ neʼets ki ejtow ku kʼwajiy abal etsʼey.