Belits abal i tamtém i kʼibataláb, a Jehová in léʼ abal ki koʼoy i kʼayaʼtaláb. ¿Jaleʼ ti a Jehová tu konchal ki tʼajaʼ nixéʼ? Ani ¿jantʼoj neʼets tu ku tólmiy abal ku kʼwajiy kulbél biyat u aychix?

¿JALEʼ TI A JEHOVÁ IN LÉʼ ABAL KI KOʼOY I KʼAYAʼTALÁB?

An Biblia in ulal: «A Jehová in aychal kʼal i kʼayaʼtaláb abal tu ku tólmiy. Jajáʼ neʼets ka kubiy abal tu ku yajnanchij. A Jehová pel jun i Dios axi in tʼajál jawaʼ tekedh. Neʼets ka lej kulbéj patal jitaʼ kʼwajat ti aychix kʼal Jajáʼ kʼal i kanataláb» (Is. 30:18). A Isaías in dhúchunchij axéʼ xi kaw an judíos axi jekʼom (Is. 30:1). Pero axéʼ xi kaw jayej neʼetsak kin lej tólmiy an judíos axi u bélkax, ani xowéʼ ta kʼicháj jayej neʼets tu ku lej tólmiy wawáʼ.

Pero tam, ¿jaleʼ ti kwaʼal ki koʼoy i kʼayaʼtaláb biyat i aychal ka ulits in kʼichájil a Jehová? Kom jayetsej kʼwajat in tʼajál a Jehová. A Jehová in kwaʼalits bíjidh an kʼicháj ani an hora tam neʼets kin putuw jawaʼ in ulúmal (Mat. 24:36). Tam kin bajuw nixéʼ a kʼicháj, neʼets ka tejwaméj abal patal jawaʼ in ulúmal a Satanás yab chubax. A Jehová neʼets kin talabedhaʼ a Satanás, pero neʼets kin yajnanchij in tʼojnálil.

Biyat i aychal in kʼichájil a Jehová walám yab neʼets tu ku tíxkʼanchij patal an kʼibataláb. Pero tu uchamal abal neʼets tu ku tólmiy abal ku kʼwajiy kulbél. Antsanáʼ tin ulal an kaw axi in dhuchaʼ a Isaías, jajáʼ in uluw abal i éjtowal ki aychij kʼal i kanataláb in kʼichájil a Jehová (Is. 30:18). a Ki tsuʼuw tseʼ i tsalap axi neʼets tu ku tólmiy ki tʼajaʼ axéʼ.

¿JANTʼOJ I ÉJTOWAL KI TʼAJAʼ BIYAT U AYCHIX?

Ka tsalpay kʼal an alwaʼtaláb axi a kwaʼal. An tsʼalej David in tsuʼuw yan i kʼibataláb tin nakél in ejatal (Sal. 37:35). Belits antsanáʼ jajáʼ in uluw axéʼ xi kaw: «Ka aychij kʼal a Jehová kʼal i kanataláb. Yab kit tsákuy kʼal an atiklábchik axi pojkax, tam ka tsuʼuw abal kʼwajatchik alwaʼ» (Sal. 37:7). ¿Jantʼiniʼ tin eyendhaʼ an tsʼalej David axéʼ xi kaw tin ejatal? Jajáʼ yab jaykʼiʼ in ukʼchiy jawaʼ a Jehová in uluw abal neʼets kin tʼajaʼ abal ka kʼániyat. Jayej in lej tsalpay ban alwaʼtaláb axi kʼwajatak in bátsʼuwal (Sal. 40:5). Max wawáʼ jayej ki lej tsalpay ban alwaʼtaláb axi a Jehová kʼwajat tu pidhál, yab neʼets ki atsʼaʼ kʼibat ki koʼoy i kʼayaʼtaláb biyat u aychix.

 Ki puwénchij a Jehová juʼtámakits ku kʼwajiy. Walám pel a David axi in dhuchaʼ an Salmo 71, jajáʼ in uchaʼ axéʼ xi kaw a Jehová: «Etsʼey neʼets tu puwénchij biyat in aychix» (Sal. 71:14). ¿Jantʼoj in tʼajálak a David abal kin puwénchij a Jehová? In tʼílchalak kʼeʼat i atikláb tin kwéntaj a Jehová ani in ajtinchalak (Sal. 71:​16, 23). Wawáʼ jayej i éjtowal ki puwénchij a Jehová tam u ólnom, tam i tʼilchal i yanél ani i jaʼúb tin kwéntaj a Jehová ani tam i ajtinchal i ajatláb. Tam ki kʼwajiy ti ajat ka lej tʼajaʼ ti kwéntaj jantʼoj ti exóbchal nixéʼ xi ajatláb. Patal axéʼ neʼets tu ku tólmiy abal ku kʼwajiy kulbél biyat u ulel in kʼichájil a Jehová.

Ka tsápnanchij ka jaʼúbnaʼ an epchalchik. Tam ti a David in tamétnaʼ i kʼibataláb jajáʼ in uchaʼ axéʼ xi kaw a Jehová: «Tam kin kʼwajiy kʼal jitaʼ ti kʼakʼnál, neʼets ku puwénchij a bij» (Sal. 52:9). A David in junkuw i atiklábchik axi in kʼakʼnálak a Jehová ani jaxtám in atsʼaʼ kanat. Wawáʼ jayej i éjtowal ki jaʼúbnaʼ an epchalchik tam ku kalej tu ólnom, tam ku kʼalej ti tamkuntaláb ani al kʼeʼat a kʼicháj (Rom. 1:​11, 12).

Etsʼey ki tʼilaʼ an aychixtaláb axi i kwaʼal. Salmo 62:5 in ulal: «Neʼets tin aychix kʼal a Dios kom Jajáʼ tin pidhámal an aychixtaláb». Lej exbadh ki tʼilaʼ etsʼey an aychixtaláb axi i kwaʼal, ani más max biyálits tu kʼwajat tu aychix. In lej tomnál ki belaʼ abal a Jehová neʼets kin putuw in káwintal. ¿Jantʼoj i éjtowal ki tʼajaʼ abal etsʼey ki belaʼ kʼal a Jehová? Kwaʼal ki exóbnaʼ an Biblia ani an kʼej kaw axi putnénekits. Ki lej tʼajaʼ ti kwéntaj abal an tsalap axi kʼwajat ti Biblia lej jununúl ani ki tsalpay jantʼoj tu exóbchal tin kwéntaj a Jehová (Sal. 1:​2, 3). Jayej ki áynanchij ki konchij a Jehová tu ku tólmiy ku kʼwajiy utat kʼal Jajáʼ biyat i aychal abal Jajáʼ kin putuw patal jawaʼ in ulúmal (Jud. 20, 21).

Antsanáʼ jantʼiniʼ a David, i lej belál abal a Jehová kʼwajat in metʼál jitaʼchik kʼwajat in aychal kʼal Jajáʼ ani yab jaykʼiʼ neʼets kin jilaʼ kin kʼanidhaʼchik (Sal. 33:​18, 22). Jaxtám, max i léʼ ki áynanchij kulbél biyat i aychal ka ulits in kʼichájil a Jehová, ki tsalpay ban alwaʼtaláb axi i kwaʼal, ki puwénchij a Jehová, ki tsápnanchij ki jaʼúbnaʼ an epchalchik ani etsʼey ki tʼilaʼ an aychixtaláb axi i kwaʼal.