1, 2. ¿Jantʼoj tam alwaʼtaláb in bátsʼuwal jitaʼchik u pújnal?

 TAM jun i atikláb ka pujan in bájuwal tin jaʼúb a Jehová ani in atsʼál lej kulbél kom in éjtowal kin jaʼúbnaʼ. Ani ma neʼets kin ejtow kin atsʼaʼ antsanáʼ jantʼiniʼ tin atsʼálak a David, jajáʼ in uluw: «In atsʼál lej kulbél an atikláb axi Tatáʼ a utúmal ta bichówil Jehová» (Sal. 65:4).

² A Jehová in takuyal alwaʼ jitaʼchik neʼets ka otsits tin bichówil. Ban exobintaláb axi ti watʼey semana i exóbnaʼ abal a Jehová in utuwal tin bichówil an atiklábchik kʼal axi chubax u leʼnáb ka jaʼubnáj (Sant. 4:8). Tam jun i atikláb kin pidhaʼ in ejatal a Jehová ani ka pujan in jaʼubnál más. A Jehová in uchamal axéʼ xi kaw patal jitaʼ ka pujan: «Neʼets tu lej lábliy ani neʼets tu pidhaʼ patal jawaʼ a yéjenchal» (Mal. 3:10; Jer. 17:​7, 8).

3. ¿Jantʼoj kwaʼal kin tʼajaʼ patal axi pújadhits? (Eclesiastés 5:​4, 5).

³ Lej alwaʼ abal it pujanits. Pero xowéʼ abal okʼox neʼets kin yejenchij ka tsápnanchij ka putuw kʼal jawaʼ a uchamal a Jehová, belits max ka tamétnaʼ jun i kʼibataláb o jun i takaxtaláb (ka ajiy Eclesiastés 5:​4, 5). Jayej neʼets kin yejenchij ka tsápnanchij ka aynaʼ a Jesús ani ka tʼajaʼ jawaʼ jajáʼ tu konchal (Mat. 28:​19, 20; 1 Ped. 2:21). Axéʼ xi exobintaláb neʼets tu ku lej tólmiy abal ki ejtow ki tʼajaʼ.

 «KA NITSʼBIY A JESÚS BELITS MAX KA TAMÉTNAʼ JUN I KʼIBATALÁB O JUN I TAKAXTALÁB»

4. ¿Jantʼoj in léʼak a Jesús abal ki exbay? (Lucas 9:23).

⁴ Yab ka tsalpay abal tam kit pujan neʼets ka tixkʼan an kʼibataláb. A Jesús in uluw abal patal jitaʼ «in léʼ ka tsʼatʼey kʼal jajáʼ» neʼets kin tamétnaʼ i kʼibataláb (ka ajiy Lucas 9:23). A Jesús yab kʼwajatak in ulal abal etsʼeyits neʼets ku kʼwajiy ki yajchiknaʼ. Jajáʼ in léʼak ki exbay abal neʼets ki batsʼuw i lablixtaláb, pero junchikíl neʼets ki tamétnaʼ i kʼibataláb ani junchikíl lej yajchik (2 Tim. 3:12).

5. ¿Jantʼoj tam alwaʼtaláb in uluw a Jesús abal neʼets kin batsʼuw jitaʼchik kin tsápnanchij kin tʼojonchij más a Jehová?

⁵ Walám tatáʼ a koʼoyámal i kʼibataláb kʼal a yanél o a koʼoyámal ka jilaʼ yan jantʼoj axi a kwaʼalak kom a léʼak ka tʼojonchij más a Jehová (Mat. 6:33). Pero ka lej belaʼ abal a Jehová in lej tʼajál ti kwéntaj an tsapláb axi a tʼajál abal ka tʼojonchij (Heb. 6:10). Ani walám a tʼajál ti kwéntaj abal lej chubax an kaw axi in uluw a Jesús: «Chubax nanáʼ tu uchálchik abal neʼets ka pidhan más yan kʼal a Dios jitáts in jilamal jantʼoj tin ebal u bij, ani tin ebal abal pel i ólnanchix kʼal an alwaʼ kaw. Antsanáʼ neʼets ka pidhan max in jilamal in kʼimáʼ, in epchal, in uxum epchal, ma in tátaj, ma in mim, in tomkíl, in tsakámil, ani in tsabálil. Tejéʼ tsabál neʼets kin batsʼuyej ma boʼ inik wichkʼodh in kʼimáʼ, in epchalchik, in uxum epchal, in mim, in tsakámilchik ani in tsabálilchik» (Mar. 10:​29, 30). An lablixtaláb axi a Jehová tu pidhámal más yan kʼal jawaʼ i kʼibamal (Sal. 37:4).

6. ¿Jaleʼ ti talbél tu pujnének neʼets kin yéjenchij ki tsápnanchij abal yab tu ku ataʼ jun i kidháb leʼnomtaláb?

⁶ Belits max jun ka pujan neʼets kin yejenchij kin tsápnanchij abal yab ka atáj kʼal jun i kidháb leʼnomtaláb (1 Juan 2:16). Ani axéʼ jats kom belej u wálbidh ani walám ma ki atsʼaʼ jantʼiniʼ an abatwálej Pablo, jajáʼ in uluw: «Tu lej lupudh ichích u kulbetnál in ábatnaxtal a Dios ku tʼajchij. Abaʼ aniʼ u kulbetnál, bel waʼats tu ichích in tsap an walabtaláb» (Rom. 7:​22, 23). Junchikíl walám neʼets ki atsʼaʼ wéʼ tʼeʼpidh kom walám i atsʼál abal yab neʼets ki ejtow ki tʼajaʼ etsʼey jawaʼ tekedh. Pero max ki tʼilaʼ jawaʼ i uchaʼ a Jehová tam ti pidhaʼ i ejatal, nixéʼ neʼets tu ku tólmiy abal yab tu ku ataʼ an takaxtaláb. Antsanáʼ yab neʼets ki atsʼaʼ kʼibat tam ki tamétnaʼ jun i takaxtaláb. ¿Jaleʼ?

7. ¿Jaleʼ ti lej exbadh ki tʼilaʼ abal i pidhámal i ejatal a Jehová?

⁷ Tam ti pidhaʼ i ejatal a Jehová wawáʼ i uchaʼ abal yabáts neʼets ki tʼajaʼ jawaʼ wawáʼ i kulbetnál. Xowéʼ abal okʼox expidh neʼets ki tʼajaʼ jawaʼ Jajáʼ tu ku konchij, belits max kwaʼal ki jilaʼ ki tʼajaʼ jantʼoj axi i kulbetnálak (Mat. 16:24). Tam ki tamétnaʼ jun i kʼibataláb yabáts neʼets ku kʼwajiy ki tsalpay jantʼoj neʼets ki tʼajaʼ, kom jawaʼ i léʼ játs ki tʼajchij in kulbétal a Jehová. Nixéʼ jats jawaʼ i takuy ki tʼajaʼ tam ti pidhaʼ i ejatal a Jehová ani u pujan. Tam ki tamétnaʼ jun i kʼibataláb neʼets ki léʼnaʼ ki tʼajaʼ jantʼiniʼ a Job, jajáʼ in uluw: «Etsʼey neʼets kin kʼwajiy putudh kʼal a Jehová» (Job 27:5).

8. ¿Jantʼoj neʼets tu ku tólmiy abal yab tu ku ataʼ jun i kidháb leʼnomtaláb?

⁸ ¿Jantʼoj neʼets tu ku tólmiy abal yab tu ku ataʼ jun i takaxtaláb? Max etsʼey ki tsalpay abal i pidhámalits i ejatal a Jehová. Jun i tʼiplab, yab neʼets ki kʼatsubnaʼ jun i atikláb kʼal axi yab u tómkidh, kom tam ti pidhaʼ i ejatal a Jehová i takuy abal yabáts neʼets ki tʼajaʼ nixéʼ. Max i kwaʼalits tsalpadh  jantʼoj neʼets ki tʼajaʼ yab neʼets ki yajchiknaʼ talbél. Nixéʼ neʼets tu ku tólmiy abal ku owméj kʼal nixéʼ xi walabtaláb (Prov. 4:​14, 15).

9. ¿Jantʼoj neʼets ka tʼajaʼ max etsʼey ka tʼilaʼ jawaʼ a uchaʼ a Jehová tam ti a pidhaʼ a ejatal?

⁹ ¿Jantʼoj neʼets ki tʼajaʼ max ku ólchin jun i tʼojláb axi tu tʼokʼbanchal ku kʼalej ti tamkuntaláb? Yabáts neʼets kin yejenchij ki tsalpay jantʼoj neʼets ki tʼajaʼ, kom tam ti pidhaʼ i ejatal a Jehová i uchaʼ abal jawaʼ más exbadh játs ki tʼojonchij. Jaxtám, yab neʼets ki batsʼuw jawákits tam tʼojláb ani talbél tikʼelej neʼets ki aliy jantʼiniʼ ki tʼojonchij más a Jehová. In tʼiplábil a Jesús neʼets tu ku lej tólmiy. Jajáʼ in kwaʼalakits takudh abal neʼets kin tʼajchij in kulbétal a Jehová, ani kom wawáʼ i léʼ ki nitsʼbiy a Jesús, yab neʼets ki batsʼuw ki tʼajaʼ jantʼoj axi a Jehová yab in kulbetnál, dhúbatkʼij neʼets ki pojkaʼ (Mat. 4:10; Juan 8:29).

10. ¿Jantʼiniʼ neʼets tu ku tólmiy a Jehová abal ki áynanchij ki nitsʼbiy a Jesús talbél tu pujnének?

¹⁰ Tam ki tamétnaʼ jun i kʼibataláb o jun i takaxtaláb, neʼets ki ejtow ki tejwamédhaʼ abal chubax i léʼ ki nitsʼbiy a Jesús. I exlál abal a Jehová neʼets tu ku tólmiy kom an Biblia in ulal axéʼ: «A Dios neʼets ti jilaʼ kit nixoknáj expidh ma juʼtáj wichat ka ejtow ka kuxuy, neʼets ti tólmiy abal ka kuxuy» (1 Cor. 10:13).

¿JANTʼOJ A ÉJTOWAL KA TʼAJAʼ ABAL ETSʼEY KA NITSʼBIY A JESÚS?

11. ¿Jantʼoj i éjtowal ki tʼajaʼ abal ki áynanchij ki nitsʼbiy a Jesús? (Ka tsuʼuw jayej an imágenes).

¹¹ A Jesús in tʼojonchij a Jehová kʼal patal in kanát kom etsʼey in ólonchalak (Luc. 6:12). ¿Jantʼoj a éjtowal ka tʼajaʼ abal ka nitsʼbiy a Jesús talbél ti pujnének? Ka ujnaʼ ka tʼajaʼ jantʼoj axi ti utuw más kʼal a Jehová. An Biblia tu ólchal abal yab ku jilkʼon  tanakʼij, in ulal abal «ki putuw kʼal an chubaxtaláb ani ki áynanchij» (Filip. 3:16). Walám a atsʼámal tin kwéntaj i epchalchik axi in tsapnanchámal kin tʼojonchij más a Jehová. Ejtíl waʼats jitaʼchik kʼalnek ban Escuela para Evangelizadores del Reino o kʼalnek al pil i kwenchaláb juʼtáj tu yejencháb más i ólnom. Walám ma tatáʼ jayej ka ejtow ka bajuw nixéʼ xi ayláb, kom in tʼojnálil a Jehová etsʼey in aliyal jantʼiniʼ kin tʼojonchij más (Hech. 16:9). Pero max xowéʼ yab a éjtowal ka tʼajaʼ axéʼ, yab ka tsalpay abal a Jehová yab kʼwajat in pidhál in jalbíl jawaʼ a tʼajál. Jawaʼ más exbadh játs yab ka walbaʼ ta báʼ ani ka áynanchij ka tʼojonchij a Jehová (Mat. 10:22). A Jehová in atsʼál lej kulbél max tatáʼ ka tʼajaʼ patal jawaʼ ka ejtow abal ka tʼojonchij ani nixéʼ neʼets ti tólmiy abal ka áynanchij ka nitsʼbiy a Jesús talbél ti pujnének (Sal. 26:1).

12, 13. ¿Jantʼoj a éjtowal ka tʼajaʼ max junchikíl ka atsʼaʼ abal yabáts kʼwajat a tʼójonchal a Jehová kʼal patal a kanát? (1 Corintios 9:​16, 17; ka tsuʼuw jayej an recuadro « Jawaʼ a éjtowal ka tʼajaʼ abal ka áynanchij ka tʼojonchij a Jehová»).

¹² Max a atsʼál abal yabáts a lej kulbetnál kit kalej tit ólnom ani ka ajiy an Biblia, ¿jantʼoj a éjtowal ka tʼajaʼ? Max játs jawaʼ a atsʼaʼ talbél ti pujnének, yab ka tsalpay abal a Jehová ti walbaʼits, junchikíl neʼets ki atsʼaʼ antsanáʼ kom u wálbidh. Jawaʼ neʼets tu ku tólmiy ki tixkʼaʼ nixéʼ xi tsalap, játs ki tsalpay kʼal in tʼiplábil in kʼal an abatwálej Pablo. An abatwálej Pablo in tsápnanchalak kin nitsʼbiy a Jesús, pero in exlálak abal junchikíl neʼetsak kin atsʼaʼ kʼibat kin tʼajaʼ jawaʼ tekedh (ka ajiy 1 Corintios 9:​16, 17). Jajáʼ in uluw: «Belits max ku olnaʼ kʼal i tsapláb, pel u uchbíl». Jawaʼ an abatwálej Pablo in léʼak tu ku exóbchij játs abal etsʼey neʼetsak kin  tsápnanchij kin olnaʼ an alwaʼ kaw, belits abal junchikíl yab kin atsʼaʼ lej kanat.

¹³ Ka tʼajaʼ ti kwéntaj abal jawaʼ a atsʼál ta ichích yab kin tʼajaʼ ka takuy jantʼoj axi yab in tomnál. Tam ka atsʼaʼ abal yab a kwaʼal an tsapláb abal ka tʼajaʼ jawaʼ tekedh, ka tsápnanchij ka nitsʼbiy an abatwálej Pablo ani ka tʼajaʼ jawaʼ in tomnál. A Jehová neʼets ti tólmiy abal ka jalkʼuy jawaʼ a atsʼál. Max ka tsápnanchij ka exóbnaʼ an Biblia, kit kʼalej ti tamkuntaláb, kit kalej tit ólnom ani ka ólonchij a Jehová, tam neʼets ka áynanchij ka nitsʼbiy a Jesús talbél ti pujnének. Jayej, neʼets ka ejtow ka kanatbédhaʼ an epchalchik axi ti tamkuntaláb kʼal jawaʼ ka tʼajaʼ (1 Tes. 5:11).

«KA TʼAJAʼ TI KWÉNTAJ JANTʼOJ EXOM A TʼAJÁL»

14. ¿Jantʼoj in tomnál ka konowiy ta baʼ tam junchikíl? (2 Corintios 13:5).

¹⁴ Talbél ti pujnének, lej exbadh ka tʼajaʼ ti kwéntaj jantʼoj kʼwajat a tʼajál kʼal a ejatal (ka ajiy 2 Corintios 13:5). Ejtíl, ka tʼajaʼ ti kwéntaj max kʼwajat a ólonchal a Jehová chudhél chudhél, max a ajiyal an Biblia, max i kʼalel k’al patal an tamkuntaláb ani max it kalel ti ólnom. Jayej ka tsalpay max a éjtowal ka tʼajaʼ jantʼoj más, ejtíl a éjtowal ka konowiy ta kwetemtal axéʼ: «¿U éjtowal ku wilkʼaʼ alwaʼ jawaʼ u belál? ¿Jantʼoj u éjtowal ku tʼajaʼ abal ku kulbétnaʼ más tin ólnom? ¿U ólchal a Jehová tu olabil patal jawaʼ u atsʼál ani tejwaʼ abal u bélal kʼal Jajáʼ? ¿U tsápnanchal kin kʼalej al patal an tamkuntaláb? ¿Jantʼoj neʼets ti kin tólmiy abal ku bínaʼ i alwaʼ tokʼtsixtaláb ani ku tʼajaʼ ti kwéntaj jawaʼ u olnáb ti tamkuntaláb?».

15, 16. ¿Jantʼoj i exobnál kʼal jawaʼ in watʼaʼ a Robert?

¹⁵ Lej exbadh ki tʼajaʼ ti kwéntaj max yab i kwaʼal jun i kidháb leʼnomtaláb axi awits tu ku ataʼ. Ki tsuʼuw kʼal jun i tʼiplab jaleʼ ti lej alwaʼ ki tʼajaʼ axéʼ, jun i epchal axi in bij Robert in ulal: «Tam ti nanáʼ u kwaʼalak 20 i támub, jun i tsʼikʼách axi pelak u juntal tʼojnal tin kaniy tin kʼimáʼ talbél kʼal an tʼojláb, kom neʼetsak ka kʼwajiy kwetém. U uchaʼ abal imbáj, pero jajáʼ yab tin lej bélchij ani talbél u wilkʼanchij jaleʼ ti yab neʼetsak kin kʼalej». A Robert yab in jilaʼ ka atáj kʼal nixéʼ xi takaxtaláb, pero in ulal abal talbél kʼwajiy in tsalpayal kʼal jawaʼ in watʼaʼ ani in exbay abal in éjtowalak kin tʼajaʼ kʼeʼat jantʼoj. Jajáʼ in uluw: «Yab u ejtow ku tʼajaʼ jantʼiniʼ a José, yab u ejtow ku dhubat pojkaʼ jawaʼ kidháb (Gén. 39:​7-9). U atsʼaʼ kʼibat ku dhubat pojkaʼ jawaʼ kidháb,  pero jayej u tʼajaʼ ti kwéntaj abal u yéjenchalak kin utey más kʼal a Jehová».

¹⁶ Xowéʼ ka tsalpay abal tatáʼ a tamétnaʼ jun i takaxtaláb ani dhubat it nixkʼin. Pero xowéʼ lej alwaʼ ka tʼajaʼ jantʼiniʼ a Robert, ka konowiy ta baʼ: «¿U atsʼaʼ kʼibat ku pojkaʼ an takaxtaláb?». Max a tʼajaʼ ti kwéntaj abal in yéjenchal ka jalkʼuy jantʼoj, yab ka walbaʼ taʼ baʼ. Yab ka atsʼaʼ kidháb kom a tʼajaʼ ti kwéntaj abal in yéjenchal ka jalkʼuy jantʼoj. Ka ólchij a Jehová jawaʼ a atsʼál ani ka tsápnanchij ka tʼajaʼ jantʼoj abal kit utey más kʼal a Jehová. Nixéʼ neʼets ti tólmiy abal ka léʼnaʼ ka bélkaʼ (Sal. 139:​23, 24).

17. Antsanáʼ jantʼiniʼ a Robert, ¿jantʼoj neʼets ka watʼey max etsʼey ku kʼwajiy putudh kʼal a Jehová?

¹⁷ A Robert in áynanchal tu ku uchaʼ jantʼoj más watʼey, in ulal axéʼ: «Tam tu tʼilmayits tekedh u juntal tʼojnal ani u uchaʼ abal yab in neʼets tin kʼimáʼ, jajáʼ tin uchaʼ, ‹lej alwaʼ jawaʼ a tʼajaʼ›. Tam nanáʼ u konoy jaleʼ tin ulal nixéʼ. Jajáʼ tin uchaʼ abal jun in jaʼúb axi ti biyál pelak i ólchix kʼal a Jehová, in uluw abal an ólchixchik kʼal a Jehová axi tsakamej in tʼajál jawaʼ kidháb, expidh abal in tsinkál. Nixéʼ xi tsʼikʼách in uchaʼ in jaʼúb abal neʼetsak ti kin kʼambiy abal kin tsuʼuw jantʼoj ku tʼajaʼ. U atsʼál lej kulbél kom yab u kʼibchij a Jehová».

18. ¿Jantʼoj a léʼ ka áynanchij ka tʼajaʼ talbél tit pujnének? (Ka tsuʼuw jayej an recuadro « Tsab i artículos axi neʼets ti lej tólmiy»).

¹⁸ Tam jun i atikláb in pidhál in ejatal a Jehová ani u pújnal in tejwamedhál abal in léʼ kin kʼakʼnaʼ abal etsʼey. Ka tʼilaʼ abal a Jehová in tʼajál ti kwéntaj an kʼibataláb axi a tametnál ani in tsuʼtal an tsapláb axi a tʼajál abal ka kuxuy jun i takaxtaláb. Jajáʼ in tʼajál ti kwéntaj an tsapláb axi a tʼajál abal kit kʼwajiy putudh kʼal Jajáʼ ani neʼets ti lábliy. Jajáʼ neʼets ti tólmiy kʼal an espíritu santo abal ka tʼajaʼ jawaʼ tekedh (Luc. 11:​11-13). Tatáʼ neʼets ka ejtow ka áynanchij ka nitsʼbiy a Jesús talbél ti pujnének.