1, 2. a) ¿Juʼtáj ti kʼwajatak a Pablo tam tin dhúchunchij an carta an epchalchik axi ti Éfeso? b) ¿Jawaʼ tam tsab i konowixtaláb neʼets ki tókʼtsiy?

 TAM ti an abatwálej Pablo kʼwajatak ti wikʼaxteʼ ti Roma in léʼak kin kanatbédhaʼ an epchalchik, pero kom yab in éjtowalak ka kʼalej kin tsaʼbiy, jaxtám in dhuchaʼ i cartas. Jun i carta in abchij an epchalchik axi ti Éfeso ban támub 60 o 61 (Efes. 1:1; 4:1).

² Laju i támub okʼxidh kin abaʼ axéʼ an carta, an abatwálej Pablo lej xeʼtsin ti ólnom ti Éfeso (Hech. 19:​1, 8-10; 20:​20, 21). Jajáʼ in lej kʼanidhálak an epchalchik ani in léʼak kin tólmiy abal kin áynanchij kin kʼakʼnaʼ a Jehová, pero ¿jaleʼ tin dhúchunchij an epchalchik tin kwéntaj an tajaxtaláb ani an yikʼwaxtaláb? ¿Ani jantʼoj i éjtowal ki exóbnaʼ patal wawáʼ kʼal jawaʼ a Pablo in uluw al axéʼ xi carta? Jats neʼets ki tsuʼuw al axéʼ an exobintaláb.

¿JALEʼ TI KʼWAJATAKCHIK BAN YIKʼWAXTALÁB?

3. ¿Jantʼoj tam tʼiplab in eyendhaʼ an abatwálej Pablo ti Efesios capítulo 5?

³ An abatwálej Pablo in uchaʼ axéʼ xi kaw an epchalchik axi ti Éfeso: «Tatáʼchik it kʼwajatak ban yikʼwaxtaláb tin kwéntaj an walabtaláb, pero xowéʼ it kʼwajatchik ban tajaxtaláb» (Efes. 5:8). Jajáʼ in eyendhaʼ an tʼiplab tin kwéntaj an tajaxtaláb ani an yikʼwaxtaláb, abal kin uluw jantʼiniʼ an epchalchik axi ti Éfeso in jalkʼuyámal in ejatal. Okʼox ki exóbnaʼ jaleʼ ti a Pablo in uchaʼ an epchalchik abal ti biyál «kʼwajatak ban yikʼwaxtaláb».

4. ¿Jaleʼ ti ulal abal an atiklábchik axi ti Éfeso kʼwajatak ban yikʼwaxtaláb?

 ⁴ Kʼwajatak ban kʼakʼnaxtaláb axi yab chubax. Tam ti an epchalchik axi ti Éfeso yabaye in exlálak tin kwéntaj a Jehová, in belálak yan jantʼoj axi yab chubax ani jayej in belálak kʼal an dhimantaláb. Tanáʼ ti Éfeso kʼwajatak jun i templo lej púlik ani alwaʼ tsʼejkadh ani u eyendhábak abal ka kʼakʼnáj an diosa Ártemis. Pelak jun i templo lej exladh ani u kʼalelak yan i atikláb abal kin kʼakʼnaʼ i dioses. Waʼatsak i atikláb axi in atálak yan i tumín kom in tsʼejkálak i tsakam templos tʼijax ani in nújuwalak (Hech. 19:​23-27). Jayej, an atiklábchik axi u kʼwajílak tanáʼ lej éxladhak kom in tʼajálak an dhimantaláb (Hech. 19:19).

5. ¿Jaleʼ ti ulal abal an atiklábchik axi ti Éfeso ejtíl max in kwaʼalak yikʼwtsidh in tsalápil?

⁵ Kʼwajatak in tʼajálchik i kidháb tʼajbiláb. An atiklábchik axi ti Éfeso in tʼajálak yan jantʼoj kidháb, ejtíl ti iníkbej ani ti uxúmbej ani yabáts in atsʼálak tidhetál kʼal jawaʼ in tʼajál. Nixéʼ jats u tejwamélak ban obras de teatro axi u tʼájnalak ban bichow ani jats walím in tʼilálakchik ban ajib (Efes. 5:3). An atiklábchik axi ti Éfeso yabáts in atsʼálak tidhetál tam ka walbinchik. Jajáʼchik yabáts in atsʼálak kidháb tin ichích tam kin tʼajaʼ jun i walabtaláb (Efes. 4:​17-19). Yabak in tsálpayal max a Jehová in yajnál jawaʼ jajáʼchik exomak in tʼajál. Jajáʼchik yabáts in exlálak jantʼoj jats axi alwaʼ ani jantʼoj jats axi kidháb, jaxtám an abatwálej Pablo in uluw abal jajáʼchik «in kwaʼalak yikʼwtsidh in tsalápil, ani jaxtám yab in éjtowalakchik kin tajax exlaʼ a Dios».

6. ¿Jaleʼ ti an abatwálej Pablo in uluw abal an epchalchik axi ti Éfeso xeʼetsakits ban tajaxtaláb?

⁶ Talchik i atikláb axi ti Éfeso in jilaʼ kin tʼajaʼ patal nixéʼ ani ejtíl max kalejchik ban yikʼwaxtaláb. Jaxtám a Pablo in uchaʼchik abal xowéʼ ejtíl max xeʼetsakits ban tajaxtaláb (Efes. 5:8). Jajáʼchik kʼwájatakits in beldhál in ejatal jantʼiniʼ in kónoyal a Jehová, jaxtám xeʼetsakits ban tajaxtaláb (Sal. 119:105). Yabáts in kʼakʼnálak kʼeʼat i dioses ani yabáts in tʼajálak i kidháb  tʼajbiláb kʼal in iniktal. Jajáʼchik kʼwajatak in tsápnanchal kin nitsʼbiy a Jehová ani kin kʼakʼnaʼ jantʼiniʼ Jajáʼ in kónoyal (Efes. 5:1).

7. ¿Jaleʼ ti junat jawaʼ in watʼaʼ an epchalchik ti Éfeso kʼal jawaʼ in watʼal xowéʼ an epchalchik?

⁷ Tam ti wawáʼ yabaye i kʼakʼnálak a Jehová, jayej u xeʼetsak ban yikʼwaxtaláb kom walám i tʼajálak jantʼoj axi kidháb o i kʼakʼnálak kʼeʼat i dioses. Pero tam ti exlaʼ a Jehová, jalkʼun i ejatal. I tujchij ki béldhaʼ i ejatal antsanáʼ jantʼiniʼ in kónoyal a Jehová, i tsápnanchij ki tʼajaʼ jawaʼ tekedh ani i jilaʼ jawaʼ kidháb, nixéʼ tu pidhámal yan i alwaʼtaláb (Is. 48:17). Belits antsanáʼ, junchikíl walám neʼets ki atsʼaʼ kʼibat ki áynanchij ban tajaxtaláb ani neʼets ki atsʼaʼ abal i léʼ ku wichiy ki tʼajaʼ jawaʼ i tʼajálak ti biyál. Ki exóbnaʼ jantʼoj neʼets tu ku tólmiy abal yab ku wichiy ban yikʼwaxtaláb.

YAB KU WICHIY BAN YIKʼWAXTALÁB

8. Kʼal jawaʼ in ulal Efesios 5:​3-5, ¿jantʼoj yab in tomnálak kin tʼajaʼ an epchalchik axi ti Éfeso?

⁸ (Ka ajiy Efesios 5:​3-5). Abal an epchalchik axi ti Éfeso yabáts ka wichiy ban yikʼwaxtaláb, kwaʼalak kin áynanchij kin pojkaʼ patal jawaʼ a Jehová yab in kulbetnál. Jajáʼchik yabáts in tomnálak kin tʼajaʼ patal nixéʼ, pero jayej yab kwaʼalak ti kidháb kʼatsub kʼal i tʼajbiláb axi yab alwaʼ. A Pablo in tʼilchij an epchalchik abal yab kwaʼalak kin tʼajaʼ patal nixéʼ. Max kin tʼajaʼchik, yab neʼetsak kin bátsʼuw an alwaʼtaláb axi neʼetsak kin bínaʼ in Éyaltal a Dios.

9. ¿Jaleʼ ti kwaʼal ki lej tʼajaʼ ti kwéntaj abal yab tu kʼatsub kʼal jantʼoj axi kidháb?

⁹ Wawáʼ jayej kwaʼal ki lej béletnaʼ ti baʼ abal yab ki tʼajaʼ jantʼoj axi kidháb, kom antsanáʼ ejtíl max neʼets ku wichiy ban yikʼwaxtaláb (Efes. 5:11). Yaníl tʼajnének ti kwéntaj abal jun i atikláb axi in aynanchal kin tsuʼuw o kin atsʼaʼ jantʼoj axi kidháb, talbél in bájuwal kin tʼajaʼ jun i tʼajbiláb axi kidháb (Gén. 3:6; Sant. 1:​14, 15). Jun i tʼiplab, al jun i bichow, yan i epchal in tsʼejkaʼ jun i grupo ban teléfono abal ka tʼilmáts ani kin abaʼ i mensajes. Jajáʼchik in kwaʼalak tsalpadh kin eyendhaʼ nixéʼ an grupo abal ka tʼilmátschik kʼal jawaʼ in exobnál ban Biblia. Pero kʼayúm kʼayúm tújeychik in tʼilál kʼeʼat jantʼoj axi yab exbadh ani talbél éxpidhits u tʼilomak tin kwéntaj an sexo. Talbél, yan i epchal in uluw abal kʼal jawaʼ in tʼilálak tanáʼ jats ti tʼajan abal ka walbin.

10. ¿Jantʼoj in léʼ a Satanás abal ki tʼajaʼ? (Efesios 5:6).

¹⁰ Jawaʼ a Satanás in lej ujnám kin tʼajaʼ jats kin kʼibloj an atiklábchik abal yab kin exbay jantʼoj jats axi alwaʼ ani jantʼoj imbáj (Is. 5:20; 2 Cor. 4:4). Jaxtám axéʼ an xeʼtsintaláb tu tʼajál ki tsalpay abal yab kidháb abal jun kin tʼajaʼ ti iníkbej o ti uxúmbej, o kin tʼajaʼ kʼeʼat i kidháb tʼajbiláb ejtíl nixéʼ (2 Ped. 2:19). Jaxtám waʼats yan i películas ani i programas ban televisión ani ban internet axi in tʼajál abal an atiklábchik kin tsalpay abal yab kidháb patal nixéʼ. A Satanás in léʼ abal ki tsalpay abal patal nixéʼ yab neʼets tu ku odhnaʼ ani ma neʼets ku kʼijidhbéj (ka ajiy Efesios 5:6).

11. Kʼal jawaʼ in watʼaʼ a Angela, ¿jaleʼ ti lej exbadh ki bélkaʼ jawaʼ in ulal Efesios 5:7? (Ka tsuʼuw jayej an imágenes).

¹¹ A Satanás in léʼ abal ki junkuw i atiklábchik axi neʼets tu ku tʼajaʼ ku owméj kʼal a Jehová. Jaxtám an abatwálej Pablo in uchaʼ an epchalchik axi ti Éfeso abal yab kin junkuw jitaʼ in tʼajálak jawaʼ kidháb. In uchaʼ: «Yab ka bínaʼ ta baʼ ki junkun kʼal jajáʼchik» (Efes. 5:7). Ani xowéʼ ta kʼicháj más in tomnál ki tʼajaʼ ti kwéntaj jitaʼchik i  júnkuwal kom juʼtámakits i éjtowal ki elaʼ i atiklábchik axi yab neʼets tu ku tólmiy. Jun i epchal axi u kʼwajíl ti Asia ani in bij Angela, a tu ólchal jaleʼ ti kʼakʼadh ki lej eyendhaʼ an internet. In uluw: «Kʼayúm exomak ti jalkʼunal u tsalápil ani yab u tʼajálak ti kwéntaj. Talbél in tujey ku jaʼúbnaʼ ban redes sociales i atiklábchik axi yab in belkál jawaʼ in ulal an Biblia ani ma u bajuw ku tsalpay abal yab lej kidháb max ku tʼajaʼ jawaʼ a Jehová yab in kulbetnál». Pero an ókʼnomchik in tólmiy a Angela abal kin lujkuw in tsalápil. In ulal: «Xowéʼ u tsápnanchal yabáts ku lej eyendhaʼ an redes sociales. Jawaʼ u tʼajál jats ku exóbnaʼ más an Biblia abal ku koʼoy i tsalap axi alwaʼ».

12. ¿Jantʼoj kwaʼal ki tʼajaʼ max i léʼ ki áynanchij ki bélkaʼ jawaʼ tu konchal a Jehová?

¹² An atiklábchik in tsálpayal abal yab lej kidháb jawaʼ in tʼajál, pero yab ki jilaʼ abal nixéʼ xi tsalap tu ku kʼambiy (Efes. 4:​19, 20). Ki tsalpay ti kwetémtal kʼal axéʼ: «¿U tsápnanchal yab ku lej junkuw an atiklábchik axi yab in kʼakʼnál a Jehová, ejtíl ban escuela, ban tʼojláb o pil juʼtáj? ¿U tʼajál jawaʼ in ulal a Jehová abal tekedh, belits max an atiklábchik yab kin kulbétnaʼ?». Jaxtám ti 2 Timoteo 2:​20-22, tu exóbchal abal kwaʼal ki takuy alwaʼ jitaʼ i junkuwál ti tamkuntaláb, kom yab patal axi u utel ti tamkuntaláb neʼets tu ku tólmiy abal ki áynanchij ki kʼakʼnaʼ a Jehová.

KI ÁYNANCHIJ BAN TAJAXTALÁB

13. ¿Jantʼoj jats ki áynanchij ban tajaxtaláb? (Efesios 5:​7-9).

¹³ Tam ti a Pablo in uchaʼ an epchalchik axi ti Éfeso abal yab ka wichiy ban yikʼwáx, jayej in uchaʼchik abal kwaʼalak kin áynanchij ban tajaxtaláb (ka ajiy Efesios 5:​7-9). ¿Jantʼoj in léʼ tu ku exóbchij axéʼ xi kaw? Abal juʼtámakits ku xeʼtsin kwaʼal ki tsápnanchij ki tʼajaʼ jawaʼ a Jehová in léʼ. Jawaʼ neʼets tu ku tólmiy ki tʼajaʼ axéʼ, jats ki ajiy an Biblia ani ki exóbnaʼ, ani jayej ki exóbnaʼ an publicaciones. Tam ki exóbnaʼ  an Biblia ani an publicaciones, ki lej tʼajaʼ ti kwéntaj in tʼiplábil a Jesucristo ani jawaʼ tu exóbchij, kom jajáʼ jats axi tu olchámal an tajaxtaláb (Juan 8:12; Prov. 6:23).

14. ¿Jantʼiniʼ tu tólmiyal an espíritu santo?

¹⁴ Abal ki áynanchij ban tajaxtaláb jayej i yéjenchal abal a Jehová tu ku tólmiy kʼal an espíritu santo. ¿Jaleʼ? Kom ban xeʼtsintaláb kʼwajat ti yanel an tʼajbiláb axi kidháb (1 Tes. 4:​3-5, 7, 8). A Jehová neʼets tu ku tólmiy kʼal an espíritu santo abal yab tu ku ataʼ an tsalapchik axi waʼats al axéʼ an xeʼtsintaláb. Jayej, an espíritu santo neʼets tu ku tólmiy ki tʼajaʼ «jawaʼ alwaʼ, jawaʼ chubax ani jawaʼ bolidh» (Efes. 5:9).

15. ¿Jantʼoj i éjtowal ki tʼajaʼ abal a Jehová tu ku pidhaʼ an espíritu santo? (Efesios 5:​19, 20).

¹⁵ A Jesús in uluw abal a Jehová «neʼets kin pidhaʼ i espíritu santo kʼal jitats ka konchin» (Luc. 11:13). Tam, abal ki batsʼuw i espíritu santo, kwaʼal ki konchij a Jehová tam i ólonchal. Tam i puwénchal a Jehová ban tamkuntaláb junax kʼal an epchalchik, jayej i bátsʼuwal an espíritu santo (ka ajiy Efesios 5:​19, 20). An espíritu santo neʼets tu ku tólmiy ki tʼajaʼ jawaʼ a Jehová in kulbetnál.

16. ¿Jantʼoj neʼets tu ku tólmiy abal ki takuy alwaʼ jawaʼ neʼets ki tʼajaʼ? (Efesios 5:​10, 17).

¹⁶ Tam neʼets ki takuy ki tʼajaʼ jantʼoj, etsʼey kwaʼal ki tsalpay jawaʼ jats in kulbétal a Jehová (ka ajiy Efesios 5:​10, 17). Tam i aliyal i tsalpadh kaw ti Biblia, pel ejtíl max kʼwajat i konoyal a Jehová jantʼoj in tsálpayal kʼal jawaʼ i léʼ ki tʼajaʼ. Max ki eyendhaʼ axéʼ xi tsalpadh kaw ti ejatal, neʼets ka kalej más alwaʼ jawaʼ i léʼ ki tʼajaʼ.

17. ¿Jantʼiniʼ i éjtowal ki eyendhaʼ alwaʼ an kʼij? (Efesios 5:​15, 16, ka tsuʼuw jayej an imagen).

¹⁷ An abatwálej Pablo jayej in uchaʼ an epchalchik abal kin eyendhaʼ alwaʼ an kʼij (ka ajiy Efesios 5:​15, 16). A Satanás in léʼ abal ku kʼwajiy tʼojlidh kʼal patal jawaʼ waʼats ban xeʼtsintaláb ani yabáts ku jolkʼan ki tʼojonchij a Jehová (1 Juan 5:19). Max yab ki tʼajaʼ ti kwéntaj, awits ki tujchij  ki léʼnaʼ más an tumín, walám ki léʼnaʼ tu exóbal más al jun i escuela axi exladh, o ki aliy jun i tʼojláb axi más alwaʼ. Pero max ki tʼajaʼ antsanáʼ, yabáts neʼets ku jolkʼan ki tʼojonchij a Jehová. Max jats kʼwajat i watʼál, tam exomits tu tsalpax ejtíl an atiklábchik axi ban xeʼtsintaláb. Yab kidháb ku tʼójon, nibal ku exobláts, pero yab kwaʼal ki jilaʼ abal nixéʼ ka wenkʼon más exbadh ti ejatal. Abal ki áynanchij ku xeʼtsin ban tajaxtaláb, kwaʼal ki eyendhaʼ alwaʼ an kʼij, axéʼ jats ki aliy jantʼiniʼ ki tʼojonchij más a Jehová kom nixéʼ jats axi más exbadh.

18. ¿Jantʼoj in tʼajaʼ a Donald abal kin eyendhaʼ más alwaʼ an kʼij?

¹⁸ Ki tsalpay jantʼoj i éjtowal ki tʼajaʼ abal ki tʼojonchij más a Jehová. Jats jawaʼ in tʼajaʼ a Donald, jajáʼ u kʼwajíl ti Sudáfrica. Jajáʼ in uluw axéʼ: «U tsalpay jantʼiniʼ kʼwajatak u eyendhál u ejatal. U ólonchij a Jehová abal ti kin tólmiy ku tʼojonchij más. U konchij ti kin tólmiy ku elaʼ kʼeʼat i tʼojláb, kom u léʼak kin kalej más ban olnomtaláb. A Jehová tin tokʼtsinchij u olábil ani u ejtow ku elaʼ kʼeʼat i tʼojláb. Junax kʼal u kʼimádhil i tʼajaʼ tu precursores».

19. ¿Jantʼoj i éjtowal ki tʼajaʼ abal ki áynanchij ban tajaxtaláb?

¹⁹ An carta axi an abatwálej Pablo in dhúchunchij an epchalchik axi ti Éfeso lej eyan abal jajáʼchik kin áynanchij kin kʼakʼnaʼ a Jehová ani jayej neʼets tu ku lej tólmiy wawáʼ. I exóbnaʼits abal neʼets tu ku lej tólmiy abal ki takuy alwaʼ kʼal jantʼoj neʼets ku kʼijidhbéj ani jitaʼchik neʼets ki jaʼúbnaʼ. Jayej tu kanatbédhaʼ abal ki áynanchij ki exóbnaʼ an Biblia, kom antsanáʼ i jilál abal a Jehová tu ku béldhanchij i ejatal. Tu tólmiy ki tʼilaʼ abal an espíritu santo jats axi neʼets tu ku tólmiy abal ki áynanchij ki jalkʼuy jantʼiniʼ i ey. Max ki bélkaʼ axéʼchik xi exobchixtaláb axi tu pidhaʼ an abatwálej Pablo, neʼets ki ejtow ki tʼajaʼ jawaʼ tekedh ani neʼets ki kulbedhaʼ a Jehová. Antsanáʼ neʼets ki ejtow ku jílkʼon ban tajaxtaláb ani yab neʼets ku kʼalej juʼtáj ti yíkʼwax.