1, 2. ¿Jantʼoj in watʼaʼ talchik i epchal tam ti kʼwajatak ti exláx?

 TAM jun i epchal kʼwajat ti exláx, pel jantʼoj lej alabél ani lej kʼijidh. Max tatáʼ kʼwajat ti exláx kʼal jun i epchal, lej chubax abal a léʼ abal patal ka kalej lej alwaʼ. Nixéʼ játs jawaʼ in ulúmal yan i epchal. Jun i tʼiplab, jun i epchal axi in bij Tina a ani u kʼwajíl ti Etiopía in ulal: «Tam ti u tomkíl ani nanáʼ u kʼwajatak tu exláx lej kʼijidh i atsʼálak, i tʼilálak yan jantʼoj axi exbadhak pero jayej u lej teʼnalak. Lej kulbél u atsʼálak kom ti tsablom u lej kʼanidháx».

² Kʼeʼat i tʼiplab pel an epchal Alessio, axi u kʼwajíl al an bichow ti Países Bajos, jajáʼ in ulal:«U lej kulbétnaʼ tam tu exlaʼ jantʼiniʼ in ey u tomkíl tam ti u kʼwajatak tu exláx. Pero jayej i koʼoy i kʼibataláb». Al axéʼ xi exobintaláb neʼets ki tsuʼuw abal an epchalchik axi kʼwajat ti exláx neʼets kin koʼoy talchik i kʼibataláb, pero jayej neʼets ki tsuʼuw abal an Biblia in éjtowal kin tólmiy abal ki tamétnaʼ. Jayej neʼets ki tsuʼuw jantʼoj in éjtowal kin tʼajaʼ an epchalchik axi ti tamkuntaláb abal kin tólmiychik.

¿JANTʼOJ IN LÉʼ KIN BAJUW JITAʼCHIK KʼWAJAT TI EXLÁX?

3. ¿Jantʼoj in léʼ kin bajuw jitaʼchik kʼwajat ti exláx? (Proverbios 20:25).

³ Lej kʼijidh tam jun kʼwajat ti exláx, pero jayej pel jantʼoj lej exbadh kom neʼets ka tólmiyat kin takuy max neʼets ka tomkin. Tam jun i epchal neʼets ka tomkin in tsʼejkál jun i kaw kʼal a Jehová, jajáʼchik in uchál abal neʼets ka kʼanidháxin ani ka kʼakʼnaxin abal etsʼey. Pero okʼxidh ku tomkin kwaʼal ki lej tsalpay alwaʼ (ka ajiy  Proverbios 20:25). Jitaʼchik kʼwajat ti exláx neʼets ka tólmiyat kin exlaʼ jantʼiniʼ játs in lej ey an epchal axi kʼwajat in exlál ani kin takuy alwaʼ jawaʼ neʼets kin tʼajaʼ. Talchik i epchal in takuy ka tomkin ani talchik in takuyámal yabáts kin áynanchij ti exláx. Pero max kin takuy ka jilaxin yab in léʼ kin uluw abal in tʼajaʼchik jantʼoj axi kidháb. Nixéʼ xi kʼij axi in eyendhaʼchik abal ka exláxin pelak kʼal jun i tsalap, ka tólmiyatchik abal kin takuy jantʼoj neʼets kin tʼajaʼ.

4. ¿Jaleʼ tin yéjenchal ki exlaʼ jawaʼ játs an tsalap tam jun i epchal kʼwajat ti exláx?

⁴ ¿Jaleʼ ti lej alwaʼ ki exbay jawaʼ játs an tsalap tam jun i epchal kwitól ani jun i tsʼikʼách kʼwajat ti exláx? Kom neʼets ka tólmiyat jitaʼchik yabaye tomkidh abal yab kin kʼatsubnaʼ jun i epchal max yab in tsalpayal ka tomkin kʼal jajáʼ. Max u kʼwajatits tómkidh o max u kʼwajat kwetém, in tomnál ki exbay tin kwéntaj axéʼ. Jun i tʼiplab, talchik i epchal in tsalpayal abal max jun i epchal kʼwajatchik ti exláx, kwaʼalits ka tomkin, ani nixéʼ xi tsalap in tʼajámal abal talchik i epchal kin atsʼaʼ u wéʼ jikʼél. A Melissa pel jun i epchal axi u kʼwajíl ti Estados Unidos, jajáʼ in ulal: «Talchik i epchal in lej nixoknál jitaʼchik kʼwajat ti exláx, ani nixéʼ in tʼajámal abal kin áynanchij junax belits abal yab u neʼdháxchik alwaʼ. Ani waʼats jitaʼchik in takuyal yab kin exlaʼ nibal jitaʼ abal yab ka uchan jantʼoj».

KA TSÁPNANCHIJ KIT EXLÁXIN ALWAʼ

5, 6. ¿Jantʼoj in tomnál kin tʼajaʼ ti kwéntaj jitaʼchik kʼwajat ti exláx? (1 Pedro 3:4).

⁵ ¿Jantʼoj neʼets ti tólmiy ka takuy max neʼets kit tomkin kʼal an epchal kʼal axi kʼwajat ti exláx? Ka tsápnanchij ka exlaʼ alwaʼ an epchal. Okʼxidh ka tujchij ti exláx walám a exlálakits jun i wéʼ. Pero xowéʼ kwaʼal ka exlaʼ jantʼiniʼ játs in lej ey axéʼ xi epchal (ka ajiy 1 Pedro 3:4). In tomnál ka lej tʼajchij ti kwéntaj an jaʼubtaláb axi in kwaʼal kʼal a Jehová, jantʼiniʼ u tsalpax ani jantʼoj in atsʼál. Biyat a exlál an epchal neʼets ka ejtow ka tókʼtsiy axéʼchik xi konowixtaláb: «¿Walám kin ejtow kin putuw in uchbíl jantʼiniʼ i tómkidh inik o tómkidh mimláb? ¿Walám ku neʼdhaxin alwaʼ?» (Prov. 31:​26, 27, 30; Efes. 5:33; 1 Tim. 5:8). «¿Walám ki ejtow ku kʼanidháxin ani ku beletnáxin? ¿Walám ku ejtow ku kúxunchij jantʼiniʼ in ey?» (Rom. 3:23). b Ani yab ka ukʼchiy abal jawaʼ más exbadh yab játs max junat a ey, pel max neʼets ka ejtow kit kuxunchixin.

 ⁶ ¿Jantʼoj más in tomnál ka exlaʼ biyat it kʼwajatchik ta exláx? Okʼxidh kit tujey ka kʼanidhaʼ más an epchal axi kʼwajat a exlál, lej alwaʼ kit tʼilmátschik ani ka uluwchik jawaʼ tam ayláb a léʼ ka bájuwchik. Jayej lej alwaʼ ka exlaʼ max in kwaʼal jun i yawʼláts, max in kwaʼal i kʼibataláb kʼal an tumín o max in watʼamal jantʼoj yajchik ti biyál. Pero yab in tomnál ka dhubat konoy an epchal tin kwéntaj axéʼ (ka jumbiy kʼal Juan 16:12). Max a atsʼál abal kʼwajat ti kónomchikal kʼal yan jantʼoj axi yabaye in tomnál kin exlaʼ, ka uchaʼ abal yabaye in tomnál ka ólchij. Pero ka tʼilaʼ abal an epchal neʼets kin yejenchij kin exlaʼ más tin kwéntaj tatáʼ, abal kin exlaʼ jantʼoj kin takuy kin tʼajaʼ. Jaxtám lej alwaʼ ka tsalpay jaykʼiʼ neʼets ka tokʼtsinchij an epchal jawaʼ in léʼ kin exlaʼ.

7. ¿Jantʼoj in éjtowal kin tʼajaʼ an epchalchik abal ka exláxin más alwaʼ? (Ka tsuʼuw an recuadro « Tam u kʼwajíl al pil i bichow an epchal axi kʼwajat a exlál», jayej ka tsuʼuw an imágenes).

⁷ ¿Jantʼoj neʼets ti tólmiy abal ka exlaʼ alwaʼ an epchal? A éjtowal ka tʼajchij i konowixtaláb ani ka lej otsʼówiy jawaʼ ti uchaʼ ani tam jajáʼ ti konowiy kʼal jantʼoj, etsʼey ka uchaʼ an chubaxtaláb ani ka uchaʼ jawaʼ a atsʼál (Prov. 20:5; Sant. 1:19). Walám ka ejtow ka tʼajaʼ jun jantʼoj juʼtáj ka ejtowchik kit tʼilmáts, ejtíl kit kʼalechik ti kʼapul, kit kʼalechik ti belelél juʼtáj waʼats yan i atikláb ani kit kalejchik ta ólnom. Kʼeʼat jantʼoj axi in éjtowal ti tólmiychik abal kit exláxinchik alwaʼ, pel ka watʼaʼchik i kʼij kʼal a jaʼúb ani kʼal a yanél. A éjtowalchik kit tamkun kʼal kʼeʼat i epchalchik abal ka tsuʼuw jantʼiniʼ in ey tam kʼwajat kwetém o kʼal kʼeʼat i atiklábchik. Nixéʼ játs jawaʼ in tʼajaʼ a Albert tam ti kʼwajatak ti exláx kʼal a Alicia, jajáʼ u kʼwajíl al an Países Bajos: «I tʼajálak yan jantʼoj junax abal ku exláxin, ejtíl i tsʼejkálak an kʼapnél junax ani i wejkʼálak an atáj. Nixéʼ tu tólmiy ki tsuʼuw jantʼoj i witʼál ki tʼajaʼ ani jantʼoj in yéjenchalej ki exóbnaʼ abal ki tʼajaʼ más alwaʼ».

8. ¿ Jaleʼ ti lej exbadh abal an epchalchik axi kʼwajat ti exláx kin exóbnaʼchik junax an Biblia?

⁸ Kʼeʼat jantʼoj axi neʼetschik ti tólmiy kit exláxinchik más alwaʼ, pel ka exóbnaʼchik junax an Biblia. Axéʼ lej exbadh kom max ka tákuychik kit tomkin neʼets ka koʼoy ka kaldhaʼ i kʼij abal an kʼakʼnaxtaláb kʼal a yanél, antsanáʼ neʼets ka ejtowchik kit kʼwajiy más utat kʼal a Jehová (Ecl. 4:12). Jaxtám lej exbadh abal ma xowéʼ ka jolkʼaʼits i kʼij abal ka exóbnaʼchik junax an Biblia. Lej exbadh ki tʼilaʼ abal an epchalchik axi kʼwajat ti exláx yabaye pel i yaneláb ani abal an epchal inik yabaye in okʼnál an epchal mimláb. Pero max kin ujnaʼchik ti exóbal junax neʼets kin ejtow kin tʼajaʼ  ti kwéntaj an jaʼubtaláb axi in kwaʼal kʼal a Jehová. A Max ani a Laysa, u kʼwajílchik ti Estados Unidos, jajáʼchik tu ólchal an alwaʼtaláb axi in batsʼuw kom u exóbalakchik junax. A Max in ulal: «Ma ti tujchij ku exláxin, i tsápnanchij ki exóbnaʼ i publicaciones axi u kaw tin kwéntaj jantʼiniʼ ku exláxin más alwaʼ, kʼal tin kwéntaj an tomkintaláb ani jantʼiniʼ ku kʼwajiy más alwaʼ kʼal i yanél. Nixéʼ tin tólmiy abal yab ku atsʼaʼ kʼibat ku tʼilmay a Laysa tin kwéntaj axéʼ».

KʼEʼAT JANTʼOJ AXI IN LEJ TOMNÁL KIN TʼAJAʼCHIK TI KWÉNTAJ

9. ¿Jitaʼchik i éjtowal ki ólchij abal u kʼwajat tu exláx kʼal jun i epchal?

⁹ ¿Jitaʼchik neʼets ka ólchij? Expidh tatáʼchik neʼets ka takuy jitaʼ neʼets ka ólchij. Max itekʼij ti tújenek ti exláx walám ka tákuychik ka ólchij expidh talchik i epchal (Prov. 17:27). Nixéʼ neʼets ti tólmiy abal yab kit lej nixoknáj ani yab ki lej konomchikat kʼal jantʼoj. Pero, max yab ka ólchichik nibal jitaʼ, nixéʼ neʼets kin tʼajaʼ abal kit xeʼtsinchik ti tsininíl ani nixéʼ lej kʼakʼadh. Jaxtám lej alwaʼ ka ólchij a yanél, talchik a jaʼúb ani an ókʼnomchik, kom jajáʼchik awil ti tólmiy kʼal jawaʼ ka yejenchij (Prov. 15:22).

10. ¿Kʼal jantʼoj neʼets ka tólmiyat an kwitól ani an tsʼikʼách abal yab ka walbin biyat kʼwajatchik ti exláx? (Proverbios 22:3).

¹⁰ ¿Kʼal jantʼoj neʼets ka tólmiyat an kwitól ani an tsʼikʼách abal yab kin tʼajaʼ jun i walabtaláb biyat kʼwajat ti exláx? Walám neʼets kin léʼnaʼ kin tejwamédhaʼ abal u kʼanidháx pero kwaʼal kin lej tʼajaʼ ti kwéntaj abal jawaʼ in tʼajál yab kin lúklinchij in bij a Jehová (1 Cor. 6:18). Jaxtám yab kit kʼatsubchik kʼal jawaʼ kidháb, yabchik kit xeʼtsin lej kwetém ani yab ka watʼkʼanchij kʼal an utsʼnél (Efes. 5:3). Max ka tʼajaʼchik nixéʼ, neʼets ka léʼnaʼchik kit kwatsiy junax ani neʼetschik ka atsʼaʼ kʼibat kit kʼwajiychik tʼokat tin wal a Jehová. Jaxtám, kit tʼilmátschik abal ka olnaʼ jantʼoj neʼets ka tʼajaʼ biyat kʼwajat ti exláx ani antsanáʼ yab ka lúklinchij in bij a Jehová (ka ajiy Proverbios 22:3). Ka tʼajaʼ ti kwéntaj jawaʼ in tʼajaʼ a Dawit ani a Almaz, jajáʼchik u kʼwajíl ti Etiopía: «I tsápnanchalak abal etsʼey ku xeʼtsin kʼal i jaʼúbchik ani ku kʼwajiy juʼtáj waʼats yan i atikláb, yab jaykʼiʼ u jilkʼon kwetém ban carro nibal ti kʼimáʼ. Nixéʼ tu tólmiy abal yab ku walbin».

11. ¿Jantʼoj kwaʼal kin lej tʼajaʼ ti kwéntaj an kwitól ani an tsʼikʼách axi kʼwajat ti exláx?

¹¹ ¿Walám kidháb abal an kwitól ani an tsʼikʼách kin tejwamédhaʼ abal u kʼanidháxchik? Biyat an kwitól ani an tsʼikʼách más neʼets ti exláx, walám neʼets kin léʼnaʼ kin tejwamédhaʼchik abal u kʼánidhax (Cant. 1:2; 2:6). Pero max expidh ka tsalpay abal a léʼ kit kwatsiy kʼal an kwitól o kʼal an tsʼikʼách, tam yabáts neʼets ka ejtow kit tsalpaxin tekedh ani yabáts neʼets ka tʼajaʼ ti kwéntaj jawaʼ más exbadh. Max ka lej watʼkʼanchij tam a léʼ ka tejwamédhanchij abal a kʼanidhál, walám ka kʼibchij a Jehová ani ma ka tʼajaʼ jun i walabtaláb (Prov. 6:27). Jaxtám, tam ka tujchij ti exláx in tomnál kit tʼilmátschik abal antsanáʼ ka exlaʼchik jantʼiniʼ ti neʼets ka tejwamédhaʼ abal it kʼanidháx ani yab ka kʼibchij jun i tsalpadh kaw axi ti Biblia (1 Tes. 4:​3-7). c Ka tsalpaychik kʼal axéʼ: «Tam an atiklábchik tu tsuʼtal tsab ti eb, ¿jantʼoj in tsalpayal kʼal jawaʼ i tʼajál? Kʼal jawaʼ u tʼajál, ¿walám kin atsʼaʼ kʼibat kin tʼajaʼ jawaʼ tekedh an epchal axi kʼwajat u exlál?».

12. ¿Jantʼoj in tomnál kin tʼajaʼ jitaʼchik kʼwajat ti exláx tam kin koʼoy jun i kʼibataláb?

¹² Pero ¿jantʼoj in tomnál ka tʼajaʼ max junchikíl yab junat jawaʼ a tsalpayalchik? Junchikíl yab neʼets kit tsalpaxin junat, pero, ¿walám yabáts in tomnál ka áynanchij ti exláx kʼal an kwitól o an tsʼikʼách? Imbáj, patal an epchal axi kʼwajat ti exláx in tametnál i kʼibataláb. Jun i tomkinél neʼets ka kʼwajiy alwaʼ max ka tolmixin  abal kin tsʼejkaʼchik an kʼibataláb. Jaxtám, max xowéʼ ka tsʼejkaʼchik an kʼibataláb axi a tametnál, nixéʼ neʼets kin tejwamédhaʼ abal tam kit kʼwajiychik tómkidh jayetsej neʼets ka tʼajaʼ. Ka konowiy ta baʼ: «¿I éjtowal ku tʼilmáts tekedh ani ki tejwamédhaʼ abal u kʼakʼnax tam kʼwajat i tsʼejkál jun i kʼibataláb? ¿I bátsʼuwal abal u ukʼpin ani i tsápnanchal ki jalkʼuy jantʼiniʼ i ey? ¿I kónoyal ku pakwlanchat tam u ukʼpinének? ¿I pákwlanchal, max jajáyej axi ukʼpin?» (Efes. 4:​31, 32). Pero max etsʼey it kʼwajatchik ta péjel, yab ka tsalpay abal tam kit tomkin neʼets ka tixkʼan nixéʼ xi kʼibataláb. Jaxtám, max ka tʼajaʼchik ti kwéntaj abal yab neʼets kit neʼdhaxin alwaʼ, jawaʼ más alwaʼ, játs ka kúbdhaʼchik ti exláx. d

13. ¿Jantʼoj kwaʼal kin tʼajaʼ ti kwéntaj an kwitól ani an tsʼikʼách abal kin exlaʼ jay i kʼij neʼets ti exláx?

¹³ ¿Al jay i kʼij kwaʼal kit kʼwajiychik ti exláx? An Biblia in ulal abal max jun dhúbatkʼij i léʼ ki tʼajaʼ jantʼoj, yab neʼets ka kalej alwaʼ (Prov. 21:5). Jaxtám, kwaʼal ka lej tsápnanchij ka exlaʼ an epchal kʼal axi a tsalpayal kit tomkin. Pero jayej yab lej alwaʼ ka lej owedhaʼ jawaʼ a tsalpayal ka tʼajaʼ, kom walám «awits ka yajbédhanchij in ichích» an epchal kʼal axi it kʼwajat ta exláx (Prov. 13:12). Jayej walám neʼets ka atsʼaʼ más kʼibat kit kʼwajiy tʼokat tin wal a Jehová, kom biyat más it exlaxchik, más neʼets ka léʼnaʼ kit kʼwajiychik utat (1 Cor. 7:9). Yab ka lej tsalpay jay i kʼij a neʼdhál ti exláx, jawaʼ más in tomnál jats ka tsalpay kʼal axéʼ: «¿Jantʼoj más in tomnál ku exlaʼ tin kwéntaj axéʼ xi epchal?».

¿JANTʼINIʼ IN ÉJTOWAL AN EPCHALCHIK KIN TÓLMIY JITAʼCHIK KʼWAJAT TI EXLÁX?

14. ¿Jantʼiniʼ i éjtowal ki tólmiy jitaʼchik kʼwajat ti exláx? (Ka tsuʼuw jayej an imagen).

¹⁴ ¿Jantʼiniʼ i éjtowal ki tólmiy jun i epchal axi kʼwajat ti exláx? I éjtowal ki kániychik ti kʼapul, jayej i éjtowal ki kaniy kʼal an kʼakʼnaxtaláb kʼal i yanél o ku kʼalej tu belelél kʼal jajáʼchik (Rom. 12:13). Antsanáʼ neʼets ki tólmiychik abal ka exláxin más. I éjtowal ki júnaʼ juʼtáj jajáʼchik kin léʼnaʼ ka kʼalej, jayej i éjtowal ki kaniy ti kʼimáʼ abal kin ejtowchik ka tʼilmáts ani yabchik ka kʼwajiy kwetém (Gál. 6:10). Ban párrafo 7 u kawin tin kwéntaj a Alicia ani jajáʼ in ulal axéʼ: «A Albert ani nanáʼ i lej kʼakʼnálak tam an epchalchik tu uchálak abal i éjtowalak ku kʼalej tin kʼimáʼ max i yéjenchalak ku tʼilmáts ani yab ku kʼwajiy kwetém». Ani max an epchalchik axi kʼwajat ti exláx tu ku kaniy ki júnaʼ, ki tʼajaʼ, kom antsanáʼ kʼwajat i tólmiyalchik. Jayej kwaʼal ki lej tʼajaʼ ti kwéntaj jaykʼiʼ ti neʼets kin yejenchij ku wéʼ nixkʼin abal jajáʼchik kin ejtow ka wéʼ tʼilmáts, pero jayej yab ki lej jílkakay (Filip. 2:4).

15. ¿Jantʼoj más i éjtowal ki tʼajaʼ abal ki tólmiy jitaʼchik kʼwajat ti exláx? (Proverbios 12:18).

 ¹⁵ Kʼeʼat jantʼoj axi in lej tomnál ki tʼajaʼ ti kwéntaj max i léʼ ki tólmiy jitaʼchik kʼwajat ti exláx, játs kʼal jawaʼ i ulal. Junchikíl neʼets kin yejenchij yab ki uluw jawaʼ i tsalpayal (ka ajiy Proverbios 12:18). Walám tam ki exlaʼ abal tsab i epchal kʼwajat ti exláx, dhúbatkʼij neʼets ki léʼnaʼ ki ólchij axi kʼeʼatchik, pero yab wawáʼ axi in tomnál ki olnaʼ. Jayej yab in tomnál ku xeʼtsin ki olnaʼ jawaʼ in tʼajálchik, nibal ki kawiliy (Prov. 20:19; Rom. 14:10; 1 Tes. 4:11). Yab in tomnál ku xeʼtsin ki kónomchikiy kʼal jantʼoj axi walám jajáʼchik yabaye in tsalpayámal, ejtíl max neʼets ka tomkinits. A Elise ani in tomkíl in ulalchik: «Yab i atsʼálak alwaʼ tam ku kónoyat jaykʼiʼ neʼets ku tomkin, kom wawáʼ yabaye i tsálpayalak kʼal nixéʼ».

16. ¿Jantʼoj in tomnál ki tʼajaʼ max ki exlaʼ abal tsab i epchal in tsalpay abal yabáts neʼets kin áynanchij ti exláx?

¹⁶ ¿Jantʼoj kwaʼal ki tʼajaʼ max ki exlaʼ abal tsab i epchal axi kʼwajatak ti exláx, in takuy abal yabáts neʼets kin áynanchij? Yab ku kʼwajiy ki kónomchikiy jaleʼ ti jilaxin ani yab ki tólmiy nibal jun kʼal jajáʼchik (1 Ped. 4:15). Jun i epchal axi in bij Lea in ulal: «Nanáʼ ani an epchal kʼal axi kʼwajatak tin exláx i uluw abal yabáts neʼetsak ki áynanchij, talbél u atsʼaʼ abal talchik i epchal xeʼetsak in olnál jaleʼ tu jilaxin, nixéʼ u lej yajnaʼ». I exóbnaʼits abal max tsab i epchal axi kʼwajatak ti exláx yabáts kin áynanchij, yab in tomnál ki tsalpay abal játs kom in tʼajaʼ jantʼoj axi kidháb. Ban kʼij axi kʼwajiy ti exláx, in tʼajaʼchik ti kwéntaj abal yab neʼets kin ejtow ka kʼwajiychik junax. Pero max in tákuychik nixéʼ neʼets kin lej yajnaʼchik ani walám junchikíl neʼets kin atsʼaʼchik lej kwetém, tanáʼ játs juʼtáj neʼets kin yejenchij abal ki tólmiy (Prov. 17:17).

17. ¿Jantʼoj kwaʼal kin áynanchij kin tʼajaʼ jitaʼchik kʼwajat ti exláx?

¹⁷ I exóbnaʼits abal tam tsab i epchal kʼwajat ti exláx neʼets kin tamétnaʼ i kʼibataláb, pero jayej in éjtowalchik kin atsʼaʼ lej kʼijidh. A Jessica in ulal: «Koʼoy ki lej tsápnanchij biyat u exláx, pero in lej kulbél kom i eyendhaʼ alwaʼ an kʼij abal ku exláxin alwaʼ». Max kʼwajat ta exláx kʼal jun i epchal, ka tsápnanchij abal ka exlaʼ alwaʼ jantʼiniʼ jats in ey. Nixéʼ neʼets ti lej tólmiychik abal ka takuy alwaʼ jantʼoj neʼets ka tʼajaʼ.