EXOBINTALÁB 34
AJATLÁB 107 Dios nos enseñó a amar
¿Jantʼoj in tʼajál an ókʼnomchik abal kin tejwamédhanchij i kʼanidhomtaláb jitaʼchik walbinének?
«A Dios lej alwaʼ inik ani in aychal abal ki tʼeʼpin kʼal a wálab» (ROM. 2:4).
JAWAʼ NEʼETS KI EXÓBNAʼ
Tejéʼ neʼets ki tsuʼuw jantʼoj in tʼajál an ókʼnomchik abal kin tólmiy jun i epchal axi in tʼajámal jun i walabtaláb axi lej púlik.
1. ¿Jantʼoj awits ka watʼey kʼal jun i atikláb axi walbinének?
BAN exobintaláb axi ti watʼey semana i exóbnaʼ abal an abatwálej Pablo in uchaʼ an epchalchik axi ti Corinto jantʼiniʼ tin tomnálak kin boliy jun i inik axi in tʼajaʼ jun i walabtaláb axi lej púlik. An ókʼnomchik koʼoy kin pilmedhaʼ axéʼ xi inik ti tamkuntaláb kom yab tʼeʼpin kʼal in wálab. Pero tejéʼ neʼets ki exóbnaʼ abal awits ka tólmiyat jun i atikláb abal ka tʼeʼpin kʼal in wálab (Rom. 2:4). ¿Jantʼiniʼ u eyendháb an ókʼnomchik kʼal a Jehová abal kin tólmiy jun i atikláb abal ka tʼeʼpin kʼal in wálab?
2, 3. ¿Jantʼoj kwaʼal ki tʼajaʼ max ki exlaʼ abal jun i epchal walbinének ani jaleʼ ti neʼets ki tʼajaʼ?
2 Ki tsalpay abal jun i atikláb in tʼajámal jun i walabtaláb lej púlik ani i exlál abal kʼal nixéʼ an walabtaláb awits ka pilmedháj ti tamkuntaláb. ¿Jantʼoj in tomnál ki tʼajaʼ? An ókʼnomchik in yéjenchal kin exlaʼ jantʼoj watʼey, kom antsanáʼ neʼets kin ejtow kin tólmiy. Jaxtám kwaʼal ki uchaʼ an epchal axi walbinének abal ka kʼalej kin konchij i tolmixtaláb an ókʼnomchik (Is. 1:18; Hech. 20:28; 1 Ped. 5:2).
3 Pero, ¿jantʼoj in tomnál ki tʼajaʼ max an epchal yab in léʼ ka kʼalej kin ólchij an ókʼnomchik jawaʼ in tʼajámal? Wawáʼ i léʼ ki tólmiy an epchal, jaxtám kwaʼal ku kʼalej wawáʼ ki tʼilmay an ókʼnomchik. Antsanáʼ neʼets ki tejwamédhanchij abal i kʼanidhál, kom i léʼ abal ka tólmiyat. Max jajáʼ yab kin jilaʼ in wálab, neʼets ka owméj kʼal a Jehová ani neʼets kin odhnaʼ an tamkuntaláb. Walám neʼets ki atsʼaʼ kʼibat ki tʼilmay an ókʼnomchik, pero neʼets ki tʼajaʼ kom i kʼanidhál a Jehová ani an epchal (Sal. 27:14).
¿JANTʼINIʼ IN TÓLMIYAL AN ÓKʼNOMCHIK JITAʼ WALBINÉNEK?
4. ¿Jaleʼ ti an ókʼnomchik neʼets ka tamkun kʼal an epchal axi in tʼajámal an walabtaláb?
4 Tam jun i epchal kin tʼajaʼ jun i walabtaláb, an ókʼnomchik axi ti tamkuntaláb in takuyal ox i ókʼnom abal kin tsʼejkaʼchik jun i comité a ani kin tʼilmay an epchal axi wálbin. Axéʼchik xi ókʼnom in yéjenchal kin koʼoy yan i tsaʼataláb ani jayej kin exbay jantʼoj jats axi neʼets kin ejtow kin tʼajaʼ. Jajáʼchik in léʼ kin tólmiy an epchal abal ka tʼeʼpin kʼal in wálab, pero yab in éjtowal kin nixoknaʼ abal kin tʼajaʼ (Deut. 30:19). In éxbayalchik abal yab patal an epchal axi walbinének neʼets kin léʼnaʼ kin batsʼuw an tolmixtaláb antsanáʼ jantʼiniʼ in tʼajaʼ an tsʼalej David (2 Sam. 12:13). Waʼats talchik axi yab in léʼ kin bélkaʼ an abatnaxtaláb axi u pidhnal kʼal a Jehová (Gén. 4:6-8). Belits antsanáʼ, an ókʼnomchik neʼets kin exaʼ kin tólmiy an epchal axi walbinének abal ka tʼeʼpin kʼal in wálab. ¿Jantʼoj in tʼajál ti kwéntaj an comité de ancianos tam kin tʼilmay an epchal axi walbinének?
5. ¿Jantʼoj kwaʼal kin tʼilaʼ an ókʼnomchik tam ka tʼilmáts kʼal jun i epchal axi walbinének? (2 Timoteo 2:24-26; ka tsuʼuw jayej an imagen).
5 An ókʼnomchik in éxbayal abal an epchal axi walbinének pel ejtíl i oveja axi kʼwajat kʼíbenek (Luc. 15:4, 6). Tam an ókʼnomchik u tʼilom kʼal an epchal axi walbinének, in tejwamedhál tin wál ani kʼal in káwintal abal in kʼanidhálchik an epchal. Yabchik in tsapik tawnál nibal in kʼwiyál. Jajáʼchik yab in tʼilmayal an epchal expidh abal kin kónomchikiy jantʼoj watʼey o abal kin uchaʼ jantʼoj neʼets ka watʼey kʼal jajáʼ. Jajáʼchik in tsápnanchal kin nitsʼbiy a Jehová ani jaxtám in tʼajálchik jawaʼ in ulal 2 Timoteo 2:24-26 (ka ajiy). Tam u tʼilomchik kʼal an epchal in tejwamédhanchal i kʼanidhomtaláb, in tʼajálchik ti alwaʼ inik ani in koʼonchal i kʼayaʼtaláb, kom in léʼchik kin tólmiy abal kin jalkʼuy in ey.
Antsanáʼ jantʼiniʼ tin tʼajálak an béletnom ovejas ti biyál, xowéʼ an ókʼnomchik in tsápnanchal kin aliy an epchalchik axi owmének kʼal a Jehová. (Ka tsuʼuw an párrafo 5).
6. ¿Jantʼiniʼ u tʼojojonal an ókʼnomchik okʼxidh kin tʼilmay an epchal axi walbinének? (Romanos 2:4).
6 An ókʼnomchik in jolkʼál i kʼij abal kin exbay jantʼoj in tsálpayal a Jehová. Jajáʼchik in tʼajál ti kwéntaj an kaw axi in uluw an abatwálej Pablo: «A Dios lej alwaʼ inik ani in aychal abal ki tʼeʼpin kʼal a wálab» (ka ajiy Romanos 2:4). Jajáʼchik in tsápnanchal kin tʼajaʼ ti alwaʼ inik kʼal an atikláb axi walbinének, kom antsanáʼ in ey a Jehová. In tʼilálchik abal in tʼojlábil pel kin béletnaʼ an epchalchik ani jaxtám in exlál abal kwaʼal kin bélkaʼ a Cristo ani kin nitsʼbiy (Is. 11:3, 4; Mat. 18:18-20). Okʼxidh ka tamkun kʼal an epchal axi walbinének, jajáʼchik in ólonchal a Jehová ani in konchal abal ka tólmiyat, kom in léʼchik kin tólmiy an atikláb abal ka tʼeʼpin kʼal in wálab. Jayej, in aliyalchik i olchixtaláb ban Biblia ani ban publicaciones ani in konchal abal ka tólmiyatchik kʼal a Jehová kin exbay jantʼoj in atsʼál an atikláb ani kʼal jantʼoj ti tʼajan abal ka wálbin. Jayej u kʼwajílchik kin tsalpay jantʼoj in yéjenchal kin exbay tin kwéntaj an atikláb axi walbinének (Prov. 20:5).
7, 8. ¿Jantʼoj in tʼajál an ókʼnomchik abal kin nitsʼbiy a Jehová tam in tʼilmayal an epchal axi walbinének?
7 An ókʼnomchik in tejwamedhál abal kʼayaʼlidh ejtíl a Jehová. Jajáʼchik in tʼajál ti kwéntaj jantʼiniʼ in tolmiyámal a Jehová an atiklábchik axi walbin ti biyál. Jun i tʼiplab, a Jehová in tʼilmay kʼal yan i kʼayaʼtaláb a Caín ani in uchaʼ abal in éjtowalak kin jaʼúbnaʼ ti ít, pero jayej in uchaʼ jantʼoj awitsak ka watʼey max yab kin jalkʼuy in ey (Gén. 4:6, 7). Ani tam ti an tsʼalej David wálbin, a Jehová in abaʼ an kawlómej Natán abal kin tʼilmay. A Natán in eyendhaʼ jun i tʼiplab abal kin tólmiy a David kin tsalpay kʼal jawaʼ in tʼajámal (2 Sam. 12:1-7). Jayej, a Jehová yaníl in abaʼ i kawlómej ban bichow Israel abal kin tólmiychik ka tʼeʼpin kʼal in wálab ani ka wichiy kʼal Jajáʼ (Jer. 7:24, 25). A Jehová dhúbatkʼij in tólmiy in tʼojnálil ani yab in aychij ma ka tʼeʼpinchik kʼal in wálab. Jajáʼ jats axi okʼox in tʼajaʼ jantʼoj abal kin tólmiy in tʼojnálil. In uchaʼ abal ka tʼeʼpinchik kʼal in wálab, belits abal belej kʼwajatak in tʼajál i walabtaláb.
8 ¿Jantʼoj in tʼajál an ókʼnomchik abal kin nitsʼbiy a Jehová tam neʼets kin tólmiy jun i atikláb axi walbinének? Antsanáʼ jantʼiniʼ in ulal 2 Timoteo 4:2, kwaʼal kin tejwamédhanchij yan i kʼayaʼtaláb. Yabchik in tomnál ka itʼixbéj, kwaʼal kin tʼilmay tekedh, abal an epchal axi walbinének kin léʼnaʼ kin jalkʼuy in ey. Pero max an ókʼnomchik ka tsákuy o ka itʼixbéj, an epchal yab neʼets kin léʼnaʼ kin tʼajaʼ ti kwéntaj an exobchixtaláb axi kʼwajat ti pidhnal ani yab neʼets kin léʼnaʼ ka tʼeʼpin kʼal in wálab.
9, 10. ¿Jantʼiniʼ in éjtowal an ókʼnomchik kin tólmiy an epchal axi walbinének abal ka tsálpaxin kʼal jawaʼ in tʼajaʼ?
9 An ókʼnomchik in tsápnanchal kin exlaʼ kʼal jantʼoj ti tʼajan abal an epchal ka walbin. Jun i tʼiplab, ¿walám yabáts u exóbalak kʼal an Biblia o yabáts u lej kalelak ti ólnom? ¿Walám yabáts in lej ólonchalak a Jehová? ¿In jilaʼ abal ka otsits tin ichích i tsalap axi yab tekedh? ¿Jitaʼchik in júnkuwalak ani kʼal jitaʼ tu kʼijidhbélak? ¿Walám pel kʼal nixéʼ ti tujey ti jalkʼuncháb in tsalápil? ¿In éxbayal abal in yajbédhanchij in ichích a Jehová kʼal jawaʼ in tʼajaʼ?
10 An ókʼnomchik in tomnál kin tsalpay alwaʼ jantʼoj tam konowixtaláb neʼets kin tʼajchij an epchal. Yab kwaʼal kin kónomchikiy kʼal jantʼoj axi walám yab in yéjenchal kin exlaʼ ani yab kwaʼal kin tidhebédhaʼ. Max kin tejwamédhanchij i kʼanidhomtaláb, tam an epchal axi walbinének neʼets kin ejtow kin ólnaʼ jawaʼ in atsʼál ani neʼets kin éxbaychik kʼal jantʼoj ti tʼajan abal ka wálbin (Prov. 20:5). An ókʼnomchik jayej in éjtowal kin eyendhaʼ i tʼiplab abal kin tólmiy an epchal kin exbay jaleʼ ti yab alwaʼ jawaʼ in tʼajaʼ, antsanáʼ jantʼiniʼ tin tʼajaʼ a Natán tam tin tʼilmay a David. Axéʼ walám kin tʼajaʼ abal an epchal kin yajnaʼ jawaʼ in tʼajámal ani ka tʼeʼpin kʼal in wálab tam ka tʼilmayat kʼal an ókʼnomchik.
11. ¿Jantʼoj in tʼajaʼ a Jesús kʼal an atiklábchik axi walbinének?
11 An ókʼnomchik in tsápnanchal kin nitsʼbiy a Jesús. Jun i tʼiplab, a Jesús in konowiy axéʼ a Saulo de Tarso: «Saulo, Saulo, ¿jaleʼ tin ayoknál?». A Jesús in konowiy axéʼ kom in léʼak abal a Saulo kin exbay abal yab alwaʼ jawaʼ kʼwajatak in tʼajál (Hech. 9:3-6). Ani ti Apocalipsis 2:20, 21, a Jesús in uluw axéʼ: «U pidhámalits nixéʼ a Jezabel i kʼij abal ka tʼeʼpin kʼal in wálab».
12, 13. ¿Jantʼoj in éjtowal kin tʼajaʼ an ókʼnomchik abal an epchal kin ejtow kin tejwamédhaʼ abal u tʼeʼpinal kʼal in wálab? (Ka tsuʼuw jayej an imágenes).
12 Antsanáʼ jantʼiniʼ a Jesús, an ókʼnomchik yab in dhubat tsálpayal abal an epchal yab in léʼ ka tʼeʼpin kʼal in wálab. Waʼats i epchal axi neʼets kin tejwamédhaʼ abal u tʼeʼpinal kʼal in wálab tam kʼaʼál ka tʼilmayat kʼal an ókʼnomchik, pero kʼeʼatchik imbáj. Jaxtám, an ókʼnomchik in éjtowal kin tʼilmay kʼeʼat a kʼicháj an epchal axi walbinének. Walám talbél ti tʼilmayamej kʼal an ókʼnomchik, an epchal ka jílkʼon ti tsalpax kʼal jawaʼ uchan ani walám kin konchij a Jehová abal ka pákwlanchat jawaʼ in tʼajaʼ (Sal. 32:5; 38:18). Walám tam ka tʼilmayat juníl kʼal an ókʼnomchik, an epchal kin tejwamédhaʼ abal in jalkʼuyámal in ey.
13 Abal an ókʼnomchik kin ejtow kin tólmiy an epchal ka tʼeʼpin kʼal in wálab, in yéjenchal kin tejwamédhaʼ abal in éxbayal jawaʼ in atsʼál ani kin tejwamédhanchij i kʼanidhomtaláb. An ókʼnomchik in konchal a Jehová abal ka láblinchat an tsapláb axi exom in tʼajál ani in aychal abal an epchal ka tsálpaxin ani ka tʼeʼpin kʼal in wálab (2 Tim. 2:25, 26).
An ókʼnomchik in éjtowal ka tamkun más i kalel kʼal jun i atikláb axi walbinének, antsanáʼ an atikláb neʼets kin koʼoy más i kʼij abal ka tʼeʼpin kʼal in wálab. (Ka tsuʼuw an párrafo 12).
14. ¿Jitaʼ in tomnál ki puwénchij tam jun i epchal ka tʼeʼpin kʼal in wálab?
14 Wawáʼ i atsʼál u lej kulbél tam jun i atikláb ka tʼeʼpin kʼal in wálab (Luc. 15:7, 10). Pero, ¿walám pel an ókʼnomchik axi in tomnál ka puwénchat kom an epchal tʼeʼpin kʼal in wálab? Imbáj. An abatwálej Pablo in uluw abal nixéʼ xi atikláb «walám ka jálkʼunchat in tsalápil kʼal in tólmixtal a Dios». Kʼal axéʼ i éxbayal abal pel a Jehová axi in tólmiyal an epchal abal kin jalkʼuy in tsalápil ani in ey (2 Tim. 2:25). Jaxtám pel a Jehová axi in tomnál ka puwénchat, yab an ókʼnomchik. An abatwálej Pablo in uluw abal max an epchal ka tʼeʼpin kʼal in wálab neʼets kin exbay más alwaʼ an chubaxtaláb, neʼets kin boliy in tsalápil ani yab neʼets ka kʼámbiyat kʼal a Satanás (2 Tim. 2:26).
15. ¿Jantʼiniʼ in éjtowal an ókʼnomchik kin áynanchij kin tólmiy an epchal axi tʼeʼpin kʼal in wálab?
15 Max an epchal ka tʼeʼpin kʼal in wálab, an ókʼnomchik neʼets kin áynanchij kin tsaʼbiy abal kin tólmiy kin koʼoy tsapik in bélomtal, jayej abal yab ka atáj kʼal a Satanás ani abal kin éjtow kin tʼajaʼ jawaʼ alwaʼ (Heb. 12:12, 13). An ókʼnomchik yab neʼets kin ólchij an epchalchik jantʼoj tam walabtaláb in tʼajaʼ an epchal. Pero, ¿jantʼoj walám neʼets kin yéjenchij kin ólchij an epchalchik?
«KA BOLIY TIN TAMÉT AN EPCHALÁB»
16. Kʼal jawaʼ in ulal 1 Timoteo 5:20, ¿jitaʼchik jats axi kwaʼal kin exlaʼ abal boliyatits jun i epchal?
16 (Ka ajiy 1 Timoteo 5:20). A Timoteo pelak i ókʼnom. Jajáʼ uchan kʼal an abatwálej Pablo abal kwaʼalak kin boliy an epchal axi wálbin ani abal kwaʼalak kin tʼajaʼ «tin tamét an epchaláb». Pero, ¿jitaʼchik tam epchal kwaʼalak kin exlaʼ? Yab patal an tamkuntaláb, expidh an epchalchik axi in exlaʼ an walabtaláb axi in tʼajaʼ an epchal, walám kom in tsuʼuwchik o walám kom ólchat kʼal an epchal axi wálbin. An ókʼnomchik kwaʼal kin ólchij axéʼchik xi epchal abal tʼilmayatits an epchal axi wálbin ani boliyatits.
17. Max yan i epchal in exlál abal jun i epchal walbin, ¿jantʼoj tam olchixtaláb kwaʼal ka bináj ani jaleʼ ti kwaʼal ka tʼajan?
17 Pero, ¿jantʼoj kwaʼal kin tʼajaʼ an ókʼnomchik max patal an tamkuntaláb in exlál tin kwéntaj in wálab jun i epchal, o max talbél neʼets kin exlaʼchik? An ókʼnomchik kwaʼal kin boliy an epchal tin tamét patal an tamkuntaláb. Jaxtám jun i ókʼnom neʼets kin ólnaʼ tin tamét an tamkuntaláb abal boliyatits an epchal axi wálbin. ¿Jaleʼ ti kwaʼal kin tʼajaʼchik? An abatwálej Pablo in uluw axéʼ: «Abal axi kʼeʼatchik ka jikʼey» ani yab kin léʼnaʼchik kin tʼajaʼ jun i walabtaláb.
18. ¿Jantʼoj in tʼajál an ókʼnomchik tam ka walbin jun i epchal axi yabaye in kwaʼal 18 i támub? (Ka tsuʼuw jayej an imagen).
18 ¿Jantʼoj kwaʼal kin tʼajaʼ an ókʼnomchik max an epchal axi wálbin yabaye in kwaʼal 18 i támub? An ókʼnomchik neʼets kin takuy tsab i ókʼnom abal ka tʼilmáts kʼal an tsakam ani kʼal in tátajchik, max jajáʼchik pel i ólchix kʼal a Jehová. b Axéʼ xi tsab i ókʼnom neʼets kin tʼajaʼ ti kwéntaj jantʼoj exom in tʼajál an tatalábchik abal kin tólmiy in tsakámil kin lujkuw in belil ani ka tʼeʼpin kʼal in wálab. Max an ókʼnomchik kin tʼajaʼ ti kwéntaj abal an tsakam kʼwajat in bátsʼuwal an tolmixtaláb, walám kin tákuychik abal yab in yéjenchal ka tʼajan jun i comité de ancianos. Axéʼ jats kom a Jehová in pidhámal in uchbíl an tataláb kin boliy an tsakam kʼal i kʼanidhomtaláb (Deut. 6:6, 7; Prov. 6:20; 22:6; Efes. 6:2-4). An ókʼnomchik neʼets kin áynanchij kin tʼilmay tam junchikíl an tatalábchik abal kin tsuʼuw max exom in tólmiyal an tsakam. Pero, ¿jantʼoj neʼets ka watʼey max an tsakam yab in léʼ ka tʼeʼpin kʼal in wálab ani yab in léʼ kin jalkʼuy in ey? Tam jun i comité de ancianos neʼets ka tʼilmáts kʼal jajáʼ ani kʼal in tátajchik, max jajáʼchik pel i ólchix kʼal a Jehová.
Max jun i epchal axi yabaye in kwaʼal an 18 i támub ka walbin, an ókʼnomchik neʼets ka tʼilmáts kʼal jajáʼ ani kʼal in tátajchik. (Ka tsuʼuw an párrafo 18).
«A JEHOVÁ TU LEJ KʼANIDHÁL ANI TU YÁJNANCHAL»
19. ¿Jantʼoj in tʼajál an ókʼnomchik abal kin nitsʼbiy a Jehová tam in bóliyal jun i epchal axi walbinének?
19 An ókʼnomchik axi u tolmix ban comité de ancianos in léʼ abal an tamkuntaláb ka kʼwajiy tʼokat, kom jats in uchbíl axi pidhnének kʼal a Jehová (1 Cor. 5:7). Pero jayej in tsápnanchal kin tólmiy an epchal axi walbinének abal ka tʼeʼpin kʼal in wálab. Antsanáʼ in nitsʼbiyal a Jehová kom Jajáʼ tu lej kʼanidhál ani tu yajnanchal (Sant. 5:11). Ki tʼajaʼ ti kwéntaj an kaw axi in dhuchaʼ an abatwálej Juan tam ti lej payeblábits: «Tsakámilchik, nanáʼ tu dhúchunchal axéʼ xi kaw abal yab ki wálbin. Belits max ki walbin, kʼwajat a Jesucristo tin tamét a Dios abal ti tólmiychik» (1 Juan 2:1).
20. ¿Jantʼoj neʼets ki tsuʼuw al axi jun an exobintaláb?
20 Lej yajchik tam jun i atikláb axi walbinének yab in léʼ ka tʼeʼpin kʼal in wálab. Max jats ka watʼey, kwaʼal ka pilmedháj ti tamkuntaláb. ¿Jantʼoj in tʼajál an ókʼnomchik tam ka watʼey axéʼ? Jats neʼets ki exóbnaʼ al axi jun an exobintaláb.
AJATLÁB 103 Nuestros pastores son un regalo de Dios
a Ti biyál i ulalak comités judiciales. Pero yabáts neʼets ki uluw antsanáʼ, kom in tʼojlábil an ókʼnomchik yab expidh pel kin boliy an epchal. Xowéʼ expidh neʼets ki bíjiy comités de ancianos.
b Jayetsej neʼets ka tʼajan max an tsakamláb kʼwajat ti beletnáb kʼal kʼeʼat i epchal axi yab pel in tátajchik.
