An abatwálej Pablo in uchaʼ axéʼ xi kaw an epchalchik axi ti Tesalónica: «Ka tʼajaʼ ti kwéntaj abal yab kit tsʼatʼey kʼal jitaʼ axi in jekʼomnál axéʼ xi kaw» (2 Tes. 3:14). Ti biyál i exbayalak abal axéʼ xi olchixtaláb pelak abal an ókʼnomchik. Max jun i epchal yab kin bélkaʼ an tsalpadh kaw axi ti Biblia, an ókʼnomchik kwaʼalak kin boliy. Max an epchal yab ka bélkaxin, an ókʼnomchik kwaʼalak kin bínaʼ jun i tʼilomtaláb, abal an epchalchik kin exlaʼ abal nixéʼ an epchal kʼwajat ti jekʼombél. Tanáʼ abal okʼox, an epchalchik yabáts in lej júnkuwalak axéʼ xi epchal, expidh in júnkuwalak ban tamkuntaláb ani ban olnomtaláb.

Pero an olchixtaláb axi in bínaʼ an abatwálej Pablo tu exobchal abal ti kwetemtal kwaʼal ki takuy jantʼoj neʼets ki tʼajaʼ. Jaxtám an ókʼnomchik yabáts in yéjenchal kin bínaʼ jun i tʼilomtaláb. ¿Jaleʼ ti jalkʼun axéʼ? Ki tsuʼuw jantʼoj in léʼak tu ku exóbchij an abatwálej Pablo.

An abatwálej Pablo in uluw abal ban tamkuntaláb waʼatsak i epchalchik axi kʼwajatak ti jekʼombél. Yab in tʼajálak ti kwéntaj an olchixtaláb axi talak ban dhuchlab. Jun i tʼiplab, jun a kʼicháj an abatwálej Pablo in pidhaʼ axéʼ xi olchixtaláb an epchalchik: «Jitáts yab in kwaʼal in kulbétal ka tʼójon, yab in uchbíl ka kʼapúts». Pero tam ti a Pablo wichiy kin tsaʼbiy nixéʼ xi tamkuntaláb, in tʼajaʼ ti kwéntaj abal waʼatsak i epchalchik axi yab in léʼak ti tʼojnal, belits abal in éjtowalak kin tʼajaʼ. Jayej in tʼajaʼ ti kwéntaj abal waʼatsak i epchalchik axi xeʼetsak ti balkʼikʼíl juʼtáj ti yab in tomnál. ¿Jantʼoj kwaʼalak kin tʼajaʼ an epchalchik kʼal nixéʼ xi epchal axi kʼwajatak ti jekʼombél? (2 Tes. 3:​6, 10-12).

Kʼal an kaw axi a Pablo in uluw, in léʼak kin tólmiy an epchalchik kin tʼajaʼ ti kwéntaj jitaʼ játs an epchalchik axi kʼwajat ti jekʼombél, abal yab kin junkuw. Axéʼ xi kaw a Pablo in uchaʼ patal an epchalchik ani yab expidh an ókʼnom (2 Tes. 1:1; 3:6). Jaxtám, max jun i epchal kin tʼajaʼ ti kwéntaj abal kʼeʼat i epchal kʼwajat in jekʼomnál jun i tsalpadh kaw axi ban dhuchlab, jajáʼ tin kwetemtal kwaʼalak kin takuy max yabáts neʼets kin áynanchij kin junkuw.

¿Pero walám kwaʼalak kin tʼajaʼchik antsanáʼ jantʼiniʼ tam u pilmedháb jun i atikláb ti tamkuntaláb? Imbáj, kom an abatwálej a Pablo in uluw axéʼ xi kaw: «Ka tsʼalaʼ kom pel i epchal». Jaxtám an epchalchik neʼetsak kin aynanchij kin junkuw expidh ban tamkuntaláb ani ban olnomtaláb, pero yab neʼetsak kin junkuw abal ti kʼijidhbél o abal kin tʼajaʼ i ajib. ¿Ani jaleʼ yab kwaʼalak kin áynanchij kin junkuw? A Pablo in uluw axéʼ: «Abal ka tidhebéj kʼal in jekʼomtal». Max an epchalchik kin tʼajaʼ nixéʼ, tam an epchal axi jekʼombéj neʼets ka tolmiyat abal ka tidhebéj ani kin jalkʼuy in ey (2 Tes. 3:​14, 15).

¿Ani jantʼiniʼ in éjtowal kin exlaʼ an epchalchik xowéʼ ta kʼicháj jaykʼiʼ ti neʼets kin bélkaʼ axéʼ xi kaw? Okʼox, kwaʼal kin tʼajaʼchik ti kwéntaj max an epchal chubax kʼwajat in jekʼomnál jun i abatnaxtaláb axi ti Biblia o max expidh jajáʼchik játs axi in tsalpay abal kʼwajat ti jekʼombél. A Pablo yab tu exóbchij abal yabáts ki junkuw jun i epchal axi yab u tsalpax ejtíl wawáʼ o axi in takuyal jantʼoj axi lej pilits kʼal jawaʼ i tʼajál. Jayej a Pablo yab kʼwajatak ti kaw tin kwéntaj jun i epchal axi tu tʼajchij jantʼoj o tu yajbedhaʼ kʼal jantʼoj axi tu uchaʼ. A Pablo kʼwajatak ti kaw tin kwéntaj i epchalchik axi in áynanchal ka jekʼombéj ani yab in léʼ ka bélkaxin, belits abal boliyámej.

Max ki tʼajaʼ ti kwéntaj abal jun i epchal kʼwajat in jekʼomnál jun i exobchixtaláb axi ti Biblia, a wawáʼ ti kwetemtal neʼets ki takuy max yabáts neʼets ki áynanchij ki junkuw tam u tʼajnal jun i ajib o tam kʼwajat tu kʼijidhbél. Nixéʼ pel jantʼoj axi expidh neʼets ki takuy ti kwetemtal, ani expidh neʼets ki tʼilchij i yanél axi u kʼwajíl kʼal wawáʼ. Yab neʼets ku xeʼtsin ki tʼilchij an epchalchik jawaʼ i takuyámal ki tʼajaʼ, ani expidh neʼets ki junkuw ti tamkuntaláb ani ti olnomtaláb. Tam an epchal kin jalkʼuy jantʼiniʼ in ey, neʼets ki áynanchij ki junkuw jantʼiniʼ ti tʼajálak ti biyál.