EXOBINTALÁB 23
AJATLÁB 28 Cómo hacernos amigos de Jehová
A Jehová tu kániyal ku kʼwajiy tin kʼimáʼ
«Nanáʼ neʼets tu kaniy tu kʼimáʼ abal ti kin kʼakʼnaʼ» (EZEQ. 37:27).
JAWAʼ NEʼETS KI EXÓBNAʼ
Axéʼ xi exobintaláb neʼets tu ku tólmiy abal ki pidhaʼ in jalbíl an alwaʼtaláb axi i kwaʼal kom i éjtowal ku kʼwajiy tin kʼimáʼ a Jehová, ani jayej neʼets tu ku tólmiy ki exbay jantʼiniʼ tu beletnál al axéʼ xi atáj.
1, 2. ¿Jantʼoj tam kanixtaláb in tʼajchal a Jehová in tʼojnálil?
MAX jitaʼ ti konoy jitaʼ játs a Jehová, ¿jantʼoj neʼets ka tókʼtsiy? Walám neʼets ka uluw: «A Jehová pel u jaʼúb, u Dios, pel u Papá», o walám pil jantʼiniʼ ti neʼets ki tokʼtsin. Pero, ¿a tsalpayámal abal a Jehová jayej in éjtowal ti kaniy tin kʼimáʼ?
2 An tsʼalej David in uluw abal a Jehová pel ejtíl jun i atikláb axi in kániyal tin kʼimáʼ in jaʼúbchik. Jaxtám a David in uluw axéʼ: «Jehová, ¿jitaʼ neʼets kin ejtow ka kʼwajiy ta kʼimáʼ? ¿Jitaʼ neʼets kin ejtow ka kʼwajiy ta tamét?» (Sal. 15:1). Axéʼ xi kaw tu exóbchal abal i éjtowal ku kʼwajiy tin kʼimáʼ a Jehová ani i éjtowal ki jaʼúbnaʼ. ¡Pel jun i púlik lablixtaláb ki ejtow ki jaʼúbnaʼ a Jehová!
A JEHOVÁ TU KÁNIYAL TIN KʼIMÁʼ
3. a) ¿Jitaʼ játs axi kʼaʼál kániyat tin kʼimáʼ a Jehová? b) ¿Jantʼiniʼ tin atsʼálak a Jehová ani a Jesús?
3 Okʼxidh kin tsʼejkaʼ jawaʼ waʼats, a Jehová u kʼwajilak kwetém. Axi kʼaʼál in kaniy tin kʼimáʼ pel a Jesús. An Biblia in ulal abal a Jehová in atsʼaʼ lej kulbél kom axi kʼaʼál in kaniy pel in tsakámil, ani a Jesús in atsʼaʼ lej kulbél kin ejtow ka kʼwajiy tin tamét in papá (Prov. 8:30).
4. ¿Jitaʼ játs axi a Jehová in kaniy tin kʼimáʼ?
4 Tam ti watʼey an kʼij, a Jehová in tsʼejkaʼ kʼeʼat i ángeles, ani jayej in kaniy tin kʼimáʼ. An Biblia in ulal abal jajáʼchik pel «in tsakámil a Dios», ani in atsʼálchik lej kulbél ka kʼwajiy utat kʼal Jajáʼ (Job 38:7; Dan. 7:10). Al yan i támub, a Jehová expidh in ejtow kin jaʼúbnaʼ jitaʼ u kʼwajilak ti éb, pero más talbél in ejtow kin jaʼúbnaʼ jitaʼchik u kʼwajilak ban tsabál. Talchik i atikláb axi in koʼoy an alwaʼtaláb ka kʼwajiy tin kʼimáʼ a Jehová pel a Enoc, a Noé, a Abrahán ani a Job. An Biblia in ulal abal jajáʼchik pelak in jaʼúb a Dios (Gén. 5:24; 6:9; Job 29:4; Is. 41:8).
5. ¿Jantʼoj tu exóbchal an kʼej kaw axi kʼwajat ti Ezequiel 37:26, 27?
5 Al patal an tamub axi watʼenek, a Jehová in aynanchámal kin kaniy in jaʼúbchik tin kʼimáʼ. Ki tsalpay kʼal an kʼej kaw axi kʼwajat ti Ezequiel 37:26, 27 (ka ajiy). Axéʼ xi kʼej kaw tu exóbchal abal a Jehová in lej léʼ abal wawáʼ ki koʼoy jun i jaʼubtaláb kʼal Jajáʼ. A Jehová in uluw abal neʼetsak «kin tsʼejkaʼ jun i kaw kʼal jajáʼchik abal kin ejtow ka kʼwajiychik koyat». Axéʼ xi kaw neʼets ka putun tam axi takudhchik ani jitaʼchik in kwaʼal an aychixtaláb abal ka kʼwajiy tejéʼ ti tsabál, ka kʼwajiy junkudh jantʼiniʼ jun i yaneláb (Juan 10:16). Ani játs kʼwajatits ti putnal xowéʼ.
A JEHOVÁ TU BELETNÁL JUʼTÁMAKITS KU KʼWAJIY
6. ¿Jaykʼiʼ tu otsits tin kʼimáʼ a Jehová, ani juʼtáj ti kʼwajat nixéʼ?
6 Ti biyál, u tsʼejkábak i tsakam atáj ani u mapuyabak kʼal i toltom, axéʼ in eyendhálak an atiklábchik abal ka koyóts ani ka tsalmin. Ani tam ka ulits jun i tsaʼbix in exlálak abal neʼetsak ka bátsʼuwat alwaʼ. Xowéʼ ta kʼicháj, wawáʼ i éjtowal ku otsits tin kʼimáʼ a Jehová tam ki pidhaʼ i ejatal (Sal. 61:4). Tanáʼ i éjtowal ki batsʼuw yan i exobchixtaláb axi pel ejtíl i kʼapnél ani i éjtowal ki junkuw i atiklábchik axi a Jehová in kaniyamal. Pero, ¿juʼtáj ti kʼwajat axéʼ xi atáj? Axéʼ kʼwajat tin puwél an tsabál, juʼtáj ti waʼats i atikláb axi in tʼójonchal a Jehová. Yan i epchal axi kʼalnek al pil i bichow in exlamal yan i epchalchik ani in tʼajámal ti kwéntaj abal in kʼimáʼ a Jehová lej púlik (Apoc. 21:3).
7. ¿Jaleʼ ti ulal abal jitaʼchik tsemets putudh kʼal a Jehová belej ajidh tin kʼimáʼ? (Ka tsuʼuw jayej an imagen).
7 ¿Ani jantʼoj neʼets ka watʼey kʼal in tʼojnálil a Jehová axi tsémenek putudh? ¿Belej ajidh tin kʼimáʼ a Jehová? Aníts. ¿Ani jaleʼ ti ulal nixéʼ? An Biblia in ulal abal a Jehová in tʼiltʼom jitaʼ tsémenek. A Jesús in uluw axéʼ: «A Moisés in olnaʼ jantʼiniʼ ti tawnáj kʼal a Dios, ani kʼal in káwintal i tsoʼobits abal neʼets ka edháj an tsemélomchik. Uchan abal a Dios pel in Diosil a Abrahán, in Diosil a Isaac ani in Diosil a Jacob. Kom a Dios pel in Diosil nixéʼ xi ox i inik axi tsémenek tejéʼ tsabál, ejtíl max ejatej tin tamét a Dios. A Dios in tsuʼtal abal ejatej patal an inikchik» (Luc. 20:37, 38).
Patal in tʼojnálil a Jehová axi kʼwajiy putudh kʼal Jajáʼ pero tsemets, bel in bátsʼuwal tin kʼimáʼ. (Ka tsuʼuw an párrafo 7).
AN ALWAʼTALÁB AXI I BÁTSʼUWAL ANI I UCHBÍL
8. ¿Jantʼoj tam alwaʼtaláb in bátsʼuwal jitaʼchik kʼwajat tin kʼimáʼ a Jehová?
8 Antsanáʼ jantʼiniʼ jun i atáj tu tólmiyal abal yab tu ku odhnaʼ an ab ani an tsamay, in kʼimáʼ a Jehová tu tólmiyal abal ku kʼwajiy utat kʼal Jajáʼ. Max ku kʼwajiy utat kʼal a Jehová, a Satanás yab neʼets kin ejtow tu ku odhnáj kʼal ni jantʼoj (Sal. 31:23; 1 Juan 3:8). Ani ti ít tsabál, a Jehová neʼets kin áynanchij kin kʼaniy axi putudh ani neʼets kin tʼajaʼ abal yabáts jaykʼiʼ ka tsemets (Apoc. 21:4).
9. ¿Jantʼiniʼ in tomnál ka xeʼtsin jitaʼ kaniyamej tin kʼimáʼ a Jehová?
9 ¡Pel jun i púlik alwaʼtaláb ku kʼwajiy tin kʼimáʼ a Jehová, kom antsanáʼ neʼets ki ejtow ki jaʼúbnaʼ! Pero, ¿jantʼoj in tomnál ki tʼajaʼ max i léʼ abal a Jehová kin áynanchij tu ku batsʼuw tin kʼimáʼ? Xowéʼ ki tsalpay kʼal axéʼ, max jun i atikláb tu ku kaniy tin kʼimáʼ, wawáʼ i léʼ abal tu ku uchaʼ jantʼoj in léʼ abal ki tʼajaʼ tin kʼimáʼ. Ejtíl, max jajáʼ in léʼ abal ki tixkʼaʼ i pajab tam ku otsits tin kʼimáʼ, wawáʼ neʼets ki tʼajaʼ kʼal i kulbétal. Jayetsej i léʼ ki tʼajaʼ patal jitaʼ i tʼójonchal a Jehová, i léʼ abal Jajáʼ tu ku uchaʼ jantʼoj kwaʼal ki tʼajaʼ abal ku kʼwajiy tin kʼimáʼ. Ani kom wawáʼ i lej kʼanidhál i tsápnanchal ki tʼajaʼ patal jawaʼ Jajáʼ tu ólchal (Col. 1:10). A Jehová pel i jaʼúb, pel i Dios, ani pel i tátaj, jaxtám in tomnál abal wawáʼ ki kʼákʼnanchij in bij (Sal. 25:14). Yab ki ukʼchiy jitaʼ játs a Jehová. I lej kʼanidhál a Jehová, jaxtám neʼets ki tsápnanchij abal etsʼey ki tʼajaʼ axi tekedh ani yab ki tʼajaʼ jantʼoj axi kin lúklinchij in bij. Jaxtám i léʼ ki áynanchij ki koʼoy i tsaʼataláb abal etsʼey ku kʼwajiy utat kʼal Jajáʼ (Miq. 6:8).
YAB IN POKʼODH TSUʼUW NIBAL JITAʼ AXI KʼWAJIY BAN DESIERTO
10, 11. ¿Jawaʼ tam tʼiplab tu tejwamédhanchal abal a Jehová yab in pokʼodh tsuʼtal in tʼojnálil?
10 A Jehová yab jaykʼiʼ in pokʼodh tsuʼtal an atiklábchik (Rom. 2:11). Jun i tʼiplab pel tam ti kʼwajiy an israelitas ban desierto ti Sinaí.
11 Talbél tam ti an israelitas kalej ti Egipto, a Jehová in bíjiy i sacerdotes abal ka tʼojonchik ti tabernáculo. Jayej in bíjiy an levitas abal kin tʼajaʼ kʼeʼat i tʼojláb ban tabernáculo. ¿Walám kʼwajatak más alwaʼ béletnadh jitaʼchik u tʼojnálak ban tabernáculo, o jitaʼchik u kʼwajilak tanáʼ utat? Imbáj, patal jajáʼchik kʼwajatak alwaʼ béletnadh.
12. ¿Jantʼiniʼ in tejwamédhaʼ a Jehová abal yab in pokʼodh tsuʼuw an israelitas ban desierto? (Éxodo 40:38; ka tsuʼuw jayej an imágenes).
12 Patal an israelitas tam ti kʼwajiy ban desierto in éjtowalakchik kin jaʼúbnaʼ a Jehová, belits max yab in kwaʼalak jun in uchbíl o max u kʼwajilak owél ban tabernáculo. Jun i tʼiplab, a Jehová in tʼajaʼ abal patal an israelitas kin ejtow kin tsuʼuw an tokow ani an kʼamal axi kʼwajatak eblim ban tabernáculo (ka ajiy Éxodo 40:38). Ani tam u yatsnálak an tokow, patal an israelitas in tújchalak ti belál. Belits abal yab u kʼwajilak utat ban tabernáculo, in éjtowalakchik kin penaʼ patal jawaʼ in kwaʼal ani ka kʼalej junax kʼal patal axi más an israelitas (Núm. 9:15-23). Jayej u juchuyábak tsab i trompetas axi tsʼejkadh kʼal i plata abal an israelitas kin exlaʼchik tam kwaʼalak ka beláts (Núm. 10:2). Axéʼ tu exóbchal abal belits max jun i israelita u kʼwajilak ow ban tabernáculo, in éjtowalak kin tʼajaʼ tin jaʼúb a Jehová. Jayej tu tʼilchal abal patal an israelitas in éjtowalak kin tʼajaʼ tin jaʼúb a Jehová ani kʼal Jajáʼ neʼetsak ka beletnáj. Xowéʼ ta kʼicháj jayetsej in tʼajál a Jehová, Jajáʼ tu kʼanidhál, tu beletnál ani tu kʼániyal juʼtámakits ku kʼwajiy.
A Jehová in jilaʼ abal ka punuwat an tabernáculo tsʼejel juʼtáj tu kʼwajilak patal an israelitas, antsanáʼ in tejwamédhaʼ abal yab u pokʼodh tsuʼux. (Ka tsuʼuw an párrafo 12).
A JEHOVÁ YAB IN POKʼODH TSUʼTAL AN ATIKLÁBCHIK XOWÉʼ TA KʼICHÁJ
13. ¿Jantʼiniʼ tin tejwamedhál xowéʼ ta kʼicháj a Jehová abal in bátsʼuwal patal in tʼojnálil tin kʼimáʼ?
13 Talchik i epchal u kʼwajíl utat ban sucursal ani kʼeʼatchik kʼwajat ti tolmix tanáʼ. Axéʼchik xi epchal in éjtowal kin junkuw i epchalchik axi in okʼnál in bichowil a Jehová. Jayej waʼats i epchal axi kʼwajat ti tolmix ti ókʼnom kʼal an circuito ani kʼeʼatchik in kwaʼal pil in uchbíl. Pero yab patal an epchalchik in batsʼúmal jun in uchbíl tin bichówil a Jehová. Bélakits max tatáʼ yab a kwaʼal nixéʼ xi uchbíl, ka tʼilaʼ abal a Jehová ti kʼanidhál, ti bátsʼuwal tin kʼimáʼ ani neʼets ti béletnaʼ (1 Ped. 5:7). Axéʼ tu exóbchal abal a Jehová neʼets ti pidhaʼ patal jawaʼ ka yejenchij, jayej neʼets ti exóbchij, neʼets ti ólchij jantʼiniʼ ka tʼajaʼ jun i tʼojláb ani neʼets ti béletnaʼ.
14. ¿Jantʼiniʼ más in tejwamedhál a Jehová abal yab u pokʼodh tsuʼux?
14 Kʼeʼat jantʼoj axi in tejwamedhál abal a Jehová yab u pokʼodh tsuʼux, játs kom in jilamal abal an Biblia ka bukʼuwat tin puwél an tsabál. An Biblia dhuchan ti hebreo, ti arameo ani ti griego, pero ¿walám jitaʼchik in ajiyal an Biblia al axéʼchik xi kawintaláb kʼwajat más utat kʼal a Jehová? Imbáj (Mat. 11:25).
15. Ka olnaʼ kʼeʼat jantʼoj axi in tejwamedhál abal a Jehová yab u pokʼodh tsuʼux. (Ka tsuʼuw jaye an imágenes).
15 A Jehová tu kanal ki jaʼúbnaʼ belits max yab u lej exoblámadh, o max yab i exlál ki ajiy an Biblia jantʼiniʼ ti dhuchan ti kʼaʼál. A Jehová in jilál abal patal an atiklábchik kin koʼoy an tsalpadhtaláb axi Jajáʼ in binál, yab expidh jitaʼchik lej exoblámadh. An Biblia wilkʼamej al yan i kawintaláb, antsanáʼ an atiklábchik axi tin puwél an tsabál in éjtowal kin exlaʼ jawaʼ a Jehová tu exóbchal (2 Tim. 3:16, 17).
An Biblia wilkʼamej al yan i kawintaláb, antsanáʼ in tejwamedhál a Jehová abal yab u pokʼodh tsuʼux. (Ka tsuʼuw an párrafo 15).
KA ÁYNANCHIJ KA KʼAKʼNAʼ A JEHOVÁ
16. ¿Jitaʼ in bátsʼuwal a Jehová tin kʼimáʼ? (Hechos 10:34, 35).
16 Pel jun i púlik lablixtaláb ki ejtow ku kʼwajiy tin kʼimáʼ a Jehová. A Jehová lej alwaʼ inik, kʼanidhom ani in kulbetnál kin batsʼuw tin kʼimáʼ an atiklábchik. A Jehová yab u pokʼodh tsuʼux, belits max pil i káwintal, i bichowil o i kwenchálil. Jajáʼ expidh in kónoyal abal jitaʼchik ka kʼwajiy tin kʼimáʼ kin bélkaʼ an abatnaxtaláb axi in binál (ka ajiy Hechos 10:34, 35).
17. ¿Jantʼoj neʼets ki exóbnaʼ axi júnakej an exobintaláb?
17 Ti Salmo 15:1, a David in uluw axéʼ: «Jehová, ¿jitaʼ in éjtowal ka kʼwajiy ta kʼimáʼ? ¿Jitaʼ neʼets kin ejtow ka kʼwajiy ta tsʼenil axi tʼokat?». Ani talbél a Jehová in tʼajaʼ abal a David kin exlaʼ an tokʼtsixtaláb. Axi jún an exobintaláb neʼets ki exóbnaʼ jantʼoj i yéjenchalej ki tʼajaʼ abal ki ejtow ki áynanchij ku kʼwajiy tin kʼimáʼ a Jehová.
AJATLÁB 32 ¡Ponte de parte de Dios!
