I yéjenchal ki koʼoy i belomtaláb max i léʼ ki kulbedhaʼ a Jehová, pero an Biblia in ulal abal yab patal in kwaʼal i belomtaláb (2 Tes. 3:2). Tam ti an abatwálej Pablo in dhuchaʼ axéʼ, kʼwajatak ti kaw tin kwéntaj i atiklábchik kʼal axi tu ayoknáb. Axéʼchik xi atikláb lej pojkaxak, pero axéʼ xi kaw jayej u eynal abal kʼeʼat i atiklábchik, ejtíl, waʼats i atiklábchik axi yab in léʼ kin belaʼ kʼal a Dios belits abal in éxbayal abal Jajáʼ jats axi in tsʼejkaʼ patal (Rom. 1:20). Jayej waʼats kʼeʼat i atikláb axi in belál abal waʼats jitaʼ axi in kwaʼal más i tsapláb, pero nixéʼ yab pel an belomtaláb axi a Jehová in léʼ abal ki koʼoy.

Max i léʼ ki kulbedhaʼ a Jehová, i yéjenchal ki belaʼ abal Jajáʼ chubax ejat ani abal neʼets tu ku tólmiy max ki belaʼ kʼal Jajáʼ (Heb. 11:6). A Jehová neʼets tu ku tólmiy kʼal an espíritu santo abal ki koʼoy i belomtaláb. Jaxtám i yéjenchal ki konchij ti olábil abal tu ku pidhaʼ i espíritu santo (Luc. 11:​9, 10, 13). Jayej lej exbadh ki ajiy an Biblia, ki tsalpay kʼal jawaʼ i ajiyal ani ki tsápnanchij ki eyendhaʼ ti ejatal jawaʼ i exobnál. Antsanáʼ neʼets tu ku tólmiy a Jehová kʼal an espíritu santo abal ki belaʼ más kʼal Jajáʼ.