Konowixtalábchik axi a tʼajámal
Salmo 12:7 in ulal: «Tatáʼ neʼets ka béletnaʼ». ¿Jitaʼchik jats axi neʼets ka beletnáj? ¿Pel «an atiklábchik axi in yajchiknál» (versículo 5), o «pel in káwintal a Jehová» (versículo 6)?
An textos axi kʼwajat tin tujtal ani tin taltal, in tejwamedhál abal axéʼ an versículo u kaw tin kwéntaj i atiklábchik.
Salmo 12:1 ma ti 4 in ulal abal «yabáts waʼats i atiklábchik axi putudh». Ki tʼajaʼ ti kwéntaj a Salmo 12:5 ma ti 7 abal ki tókʼtsiy an konowixtaláb axi kʼwajat ebál.
«Neʼets ku tólmiy an atiklábchik axi kʼwajat in yajchiknál,
axi kʼwajat tsʼejwantál.
Jats jawaʼ in ulúmal a Jehová.
Neʼets ku kʼaniy tin tamét an atiklábchik kʼal axi tu kʼwiynal.
In káwintal a Jehová lej tʼokat,
pel ejtíl i plata axi tʼokedhámej buk i kalel ban kʼamal.
Tatáʼ neʼets ka tólmiy Jehová;
ma xowéʼ ta kʼicháj ani abal etsʼey, neʼets ka béletnaʼ».
An versículo 5 in ulal jawaʼ a Dios neʼets kin tʼajaʼ «kʼal an atiklábchik axi kʼwajat in yajchiknál»: Jajáʼ neʼets kin kʼaniy.
An versículo 6 in ulal: «In káwintal a Jehová lej tʼokat; pel ejtíl an plata axi tʼokedhámej». Patal in tʼojnálil a Jehová i lej belál axéʼ xi kaw (Sal. 18:30; 119:140).
Xowéʼ ki tsuʼuw jawaʼ in ulal an Salmo 12:7: «Tatáʼ neʼets ka tólmiy Jehová; ma xowéʼ ta kʼicháj ani abal etsʼey». ¿Jaleʼ tin ulal axéʼ xi versículo abal neʼets ka beletnájchik?
Kom ban versículo 7 u kaw tin kwéntaj in káwintal a Jehová, talchik in tsalpayal abal an kaw «jajáʼchik» in léʼ kin uluw tin kwéntaj in káwintal a Jehová. A Jehová in beletnámal an Biblia abal yab ka talabedháj kʼal an atiklábchik axi pojkax (Is. 40:8; 1 Ped. 1:25).
Pero jayej in tomnál ki lej tʼajaʼ ti kwéntaj jawaʼ in ulal an versículo 5. A Jehová in lej kʼaniyamal ani in beletnámal an atiklábchik axi kʼwajat in yajchiknál ani neʼets kin áynanchij kin tʼajaʼ (Job 36:15; Sal. 6:4; 31:1, 2; 54:7; 145:20).
Tam, ¿jantʼoj in léʼ kin uluw an kaw «jajáʼchik» axi kʼwajat ban versículo 7?
Jawaʼ dhuchadh okʼxidh kʼal axéʼ xi versículo u kaw tin kwéntaj an atiklábchik.
Salmo 12:1, 2 in ulal abal waʼatsak yan i atikláb axi in uchálak i janamtaláb in tʼojnálil a Dios. Talbél a Jehová in uluw abal neʼets kin talabedhaʼ jitaʼchik in ulalak i janamtaláb. An salmo tu uchál abal neʼets kin kʼaniy in bichówil kom jajáʼ tʼokat.
Jaxtám, tam an versículo 7 in ulal «neʼets ku kʼaniy jajáʼchik» kʼwajat ti kaw kʼal an atiklábchik axi u odhnáb kʼal axi pojkax.
Ban texto masorético u tejwamél an kaw «jajáʼchik». Ban versión griega jayej u tejwamél tsab i kalel an kaw «jajáʼchik». Axéʼ kʼwajat ti kaw tin kwéntaj an Salmo 12:7 juʼtáj tin ulal abal neʼets kin kʼaniy jitaʼchik kʼwajat in yajchiknál (11:8, Septuaginta). An versículos 7 ani 8 in ulal abal a Jehová neʼets kin kʼaniy in tʼojnálil abal yab ka odhnáj kʼal an atiklábchik axi pojkax (Sal. 12:7, 8). An atiklábchik axi in wilkʼaʼ an Biblia ti arameo in ulal abal an versículo 7 antséʼ tin léʼ kin uluw: «Tatáʼ, SEÑOR, neʼets ka béletnaʼchik jitaʼ in tʼajál jawaʼ tekedh, yab neʼets ka jilaʼ abal ka odhnáj kʼal axi pójkax belits abal neʼets ka ayoknaʼ». Axéʼ xi pejach tu tólmiyal ki exbay abal an Salmo 12:7 yab kʼwajat ti kaw tin kwéntaj in káwintal a Jehová.
Jaxtám, patal jitaʼ in tʼójonchal a Jehová in tomnál kin lej belaʼ abal etsʼey neʼets ka beletnáj kʼal a Jehová.
