1, 2. Max in kʼíbchalej ka tʼajaʼ jantʼoj abal kit pujan, ¿jaleʼ ti yab in tomnál kit tʼeʼpin? (Ka tsuʼuw an fotos axi kʼwajat ban portada).

 Lej alwaʼ max a léʼ kit pujan, pero ka konowiy ta baʼ: «¿In kʼwajatits tʼojojodh abal kin pujan?». Max a tsalpayámal kit pujan ani an ókʼnomchik ti uchamal abal a éjtowal ka tʼajaʼ, yab ka tsalpay más. Max kit pujan neʼets ka ejtow ka tʼojonchij a Jehová kʼal i kulbetaláb abal etsʼey.

² Pero max an ókʼnom ti uchaʼ abal in kʼíbchalej ka tʼajaʼ jantʼoj, o max tatáʼ játs axi a tsálpayal abal in kʼibchal jantʼoj, yab kit tʼeʼpin. Belits max tatáʼ it paynekits o it tsákamej, neʼets ka ejtow ka bajuw kit pujan.

3. ¿Jantʼoj konówiyat a Felipe kʼal jun i eyal axi ti Etiopía? (Hechos 8:36, 38).

³ (Ka ajiy Hechos 8:36, 38). Jun i eyal axi ti Etiopía, in tʼajchij axéʼ xi konowixtaláb a Felipe: «¿Awits kin pujan?». Axéʼ xi inik chubax in léʼakits ka pujan, pero, ¿walám kʼwájatakits tʼojojodh?

4. ¿Jantʼiniʼ tin tejwamédhaʼ an etíope abal in léʼak kin exóbnaʼ más?

⁴ An inik axi ti Etiopía u wichélakits tin kʼimáʼ «talak ti kʼakʼnax kʼal a Dios ti Jerusalén» (Hech. 8:27). Axéʼ xi inik yab pelak i judío, pero jajáʼ in léʼak kin kʼakʼnaʼ a Dios, jaxtám kʼalej ma ti Jerusalén. Jajáʼ in exlálak jawaʼ in ulal an dhuchlab ani in exlálakits yan jantʼoj tin kwéntaj a Jehová, pero in léʼak kin exóbnaʼ más. ¿Jantʼoj kʼwajatak in tʼajál axéʼ xi inik tam ti elan kʼal a Felipe? Kʼwajatak in ajiyal an rollo in kʼal a  Isaías (Hech. 8:28). Jawaʼ kʼwajatak in ajiyal an etíope pelak i exobchixtaláb axi lej kʼibat. An etíope yab expidh in léʼak kin exóbnaʼ jawaʼ yab kʼibat, jajáʼ in léʼak kin áynanchij ki exóbnaʼ yan jantʼoj más.

5. ¿Jantʼoj in tʼajaʼ an etíope kʼal jawaʼ in exobnámal?

⁵ An inik axi talak ti Etiopía in kwaʼalak yan in ey, u tʼojnálak tin kʼimáʼ an uxum tsʼalej Candace axi ti Etiopía. An Biblia in ulal abal in beletnálak patal an kʼaláb axi in kwaʼalak an tsʼalej (Hech. 8:27). Axéʼ xi inik in kwaʼalak yan in uchbíl ani yan i tʼojláb. Pero in jolkʼaʼ i kʼij abal kin kʼakʼnaʼ a Jehová. Jajáʼ yab expidh in léʼak kin exlaʼ an chubaxtaláb, jajáʼ in léʼak kin tʼajaʼ jantʼoj, in léʼak kin eyendhaʼ jawaʼ in exobnámal. Jaxtám kʼalej ma ti Jerusalén abal kin kʼakʼnaʼ a Jehová. Lej owak ani in pakuw yan i tumín, pero kʼalej kom in léʼak kin kʼakʼnaʼ a Jehová.

6, 7. ¿Jantʼoj in tʼajaʼ an etíope abal kin kʼanidhaʼ más a Jehová?

⁶ A Felipe in ólchij an etíope i exobchixtaláb axi lej exbadh, ejtíl abal a Jesús jatsak an Mesías (Hech. 8:34, 35). An etíope in lej jikʼpaʼ patal jawaʼ a Jesús in tʼajámal abal kʼal jajáʼ. Pero. ¿jantʼoj neʼetsak kin tʼajaʼ kʼal jawaʼ in exobnámal? Jajáʼ in éjtowalak kin áynanchij kin kʼakʼnaʼ a Dios jantʼiniʼ tin tʼajálakits, pero kom in lej kʼanidhálak a Jehová ani a Jesús, in léʼnaʼ ka wenkʼon ti aykol kʼal a Cristo. A Felipe in tsuʼuw abal an etíope kʼwájatakits tʼojojodh abal ka pujan, jaxtám in pujay.

⁷ In tʼiplábil an etíope neʼets ti tólmiy abal ka ejtow kit pujan. Walám tatáʼ jayej a tsalpayámal jantʼiniʼ an etíope: «¿Awits kin pujan?». Tin aytal an exobintaláb neʼets ki tsuʼuw abal tatáʼ jayej a éjtowal ka tʼajaʼ jantʼiniʼ an etíope: ka áynanchij ka exóbnaʼ tin kwéntaj a Jehová, ka eyendhaʼ ta ejatal jawaʼ a exobnámal ani ka kʼanidhaʼ más a Jehová.

8. Kʼal jawaʼ in ulal Juan 17:3, ¿jantʼoj in tomnál ki tʼajaʼ?

⁸ (Ka ajiy Juan 17:3 ani an nota). Walám axéʼ xi kaw axi in uluw a Jesús játs axi ti tólmiy abal ka tujchij ti exóbal. Pero axéʼ xi kaw jayej tu tólmiyal ki exbay abal kwaʼal ki áynanchij ki exóbnaʼ tin kwéntaj a Jehová. Yab jaykʼiʼ neʼets ki bajuw ki exlaʼ patal tin kwéntaj a Jehová, jaxtám i léʼ ki áynanchij ki tʼajaʼ (Ecl. 3:11). Neʼets ki ejtow ki exóbnaʼ tin kwéntaj a Jehová abal etsʼey ani biyat más ki exlaʼ, neʼets ki atsʼaʼ más utat kʼal Jajáʼ (Sal. 73:28).

9. ¿Jantʼoj in tomnál ki tʼajaʼ max i exlálits an exobchixtalábchik axi yab lej kʼibat?

⁹ Tam jun in tujchal kin exóbnaʼ tin kwéntaj a Jehová, u exóbchinal i exobchixtaláb  axi yab kʼibat. An abatwálej Pablo in uluw abal axéʼ xi exobchixtaláb «játs axi exlantálits ani yab kʼibat». A Pablo yab kʼwajatak tu uchál abal an exobchixtaláb «axi kʼaʼál i exobnámalits tin kwéntaj a Cristo yab exbadh», jawaʼ kʼwajatak in ulal játs abal max ku jilkʼon kʼal axéʼ xi exobchixtaláb «neʼets ki bajuw jantʼiniʼ jun i tʼeleʼ axi yabaye in kʼapal i lej teʼnél» (Heb. 5:12; 6:1). An abatwálej Pablo in uchaʼ an epchalchik abal yab expidh kin exóbnaʼ i exobchixtaláb axi yab kʼibat. In tolmiychik abal kin kulbétnaʼ kin exóbnaʼ más tin kwéntaj a Jehová, ma an exobchixtalábchik axi más kʼibat. Ani tatáʼ, ¿jantʼoj a atsʼál kʼal an exobchixtaláb axi ti Biblia? ¿A léʼ ka tsápnanchij ka exlaʼ más tin kwéntaj a Jehová?

10. ¿Jaleʼ ti yan i atikláb in atsʼál kʼibat ti exóbal?

¹⁰ Yan i atikláb in atsʼál kʼibat ti exóbal ani walám tatáʼ jayej. ¿A kulbetnálak ti ajum ani ti exóbal tam ta kʼalelak ti escuela? Walám imbáj ani a tsalpay abal yab jaykʼiʼ neʼets ka ejtow ka ajiy jun i libro. Max belej a atsʼál antsanáʼ, ka tʼilaʼ abal a Jehová neʼets ti tólmiy ani ti exóbchij. Jajáʼ játs an más alwaʼ exóbchix.

11. ¿Jaleʼ ti ulal abal a Jehová játs an «Púlik exóbchix»?

¹¹ A Jehová in ulal abal «Jajáʼ játs an púlik exóbchix» (Is. 30:20, 21). Jajáʼ tu exóbchal kʼal yan i kʼayaʼtaláb, tu kʼanidhál ani tu éxbayal alwaʼ. Jayej in lej tʼajál ti kwéntaj jawaʼ i tʼajál alwaʼ (Sal. 130:3). A Jehová yab jaykʼiʼ neʼets tu ku konchij ki tʼajaʼ jantʼoj axi yab neʼets ki ejtow ki tʼajaʼ. Jajáʼ tu tsʼejkaʼ ani in exlál jantʼiniʼ tu tʼojnal i katsin (Sal. 139:14). I kulbetnál ki exlaʼ yan jantʼoj ani játs kom a Jehová antsanáʼ tu tsʼejkaʼ. Jajáʼ in léʼ ki áynanchij ki exóbnaʼ tin kwéntaj Jajáʼ abal etsʼey, jaxtám ma xowéʼits tin tomnál ki léʼnaʼ ki exóbnaʼ in káwintal (1 Ped. 2:2). ¿Jantʼoj neʼets ti tólmiy abal ka tʼajaʼ? Ka tsalpay kʼal i ayláb axi a éjtowal ka tʼajaʼ, jayej ka ajiy ani ka exóbnaʼ an Biblia chudhél chudhél (Jos. 1:8). A Jehová neʼets ti tólmiy abal ka kulbétnaʼ ka exóbnaʼ tin kwéntaj Jajáʼ.

12. ¿Jaleʼ ti lej exbadh ki exóbnaʼ tin kwéntaj in ejatal a Jesús ani jawaʼ in tʼajaʼ ban olnomtaláb?

¹² Ka jolkʼaʼ i kʼij abal ka tsalpay kʼal jawaʼ in tʼajaʼ a Jesús ban olnomtaláb tam ti xeʼtsin tejéʼ ti tsabál. Abal ki áynanchij ki tʼojonchij a Jehová tin taltal axéʼ xi xeʼtsintaláb, lej exbadh ki nitsʼbiy a Jesús (1 Ped. 2:21). A Jesús in uchaʼ in aykolil abal neʼetsak kin tamétnaʼ i kʼibataláb (Luc. 14:27, 28). Pero in exlálak abal neʼetsak kin ejtowchik kin áynanchij kin tʼojonchij a Jehová (Juan 16:33). Ka exóbnaʼ más tin kwéntaj a Jesús ani ka tsápnanchij ka nitsʼbiy chudhél chudhél.

13. ¿Jantʼoj kwaʼal ka áynanchij ka konchij a Jehová, ani jaleʼ?

¹³ Wawáʼ yab expidh i léʼ ki exlaʼ yan jantʼoj tin kwéntaj a Jehová, jawaʼ i léʼ játs ki kʼanidhaʼ ani ki lej belaʼ kʼal Jajáʼ (1 Cor. 8:1-3). Ka áynanchij ka exóbnaʼ más tin kwéntaj a Jehová ani ka konchij ti tólmiy abal ka koʼoy más i belomtaláb (Luc. 17:5). Jajáʼ neʼets ti tokʼtsinchij a olábil ani neʼets ti tólmiy abal ka exóbnaʼ yan jantʼoj. Tam ki exlaʼ más tin kwéntaj a Jehová, an belomtaláb neʼets ka tsapnéj ani neʼets ki léʼnaʼ ki tʼojonchij más (Sant. 2:26).

14. ¿Jantʼiniʼ tin tejwamédhaʼ a Pedro abal lej exbadh ki eyendhaʼ jawaʼ kʼwajat i exóbnal? (Ka tsuʼuw an imagen).

¹⁴ An abatwálej Pedro in uluw abal jitaʼchik in léʼ ti aykol kʼal a Cristo kwaʼal kin eyendhaʼ tin ejatal jawaʼ in exobnámal. Abal kin tólmiy kin éxbaychik in eyendhaʼ in tʼiplábil a  Noé. A Noé uchan kʼal a Jehová abal neʼetsak kin talabedhaʼ an atiklábchik axi pojkax kʼal jun i púlik ukʼeltaláb. Pero a Noé ani in yanél yab expidh kwaʼalak kin exlaʼ jantʼoj neʼetsak ka watʼey, jayej kwaʼalak kin tʼajaʼ kʼeʼat jantʼoj abal kin kʼaniy in ejatal. A Pedro in uluw abal okʼxidh ka ulits «an púlik ab, a Noé in tsʼejkaʼ an púlik tan» (1 Ped. 3:20). A Noé ani in yanél bélkaxin, in tʼajaʼ jawaʼ uchan kʼal a Jehová ani in tsʼejkaʼ an arca (Heb. 11:7). An abatwálej Pedro in jumbiy jawaʼ in tʼajaʼ a Noé kʼal an pujantaláb. In uluw abal a Noé ani in yanél kʼániyat tam ti otsits ban tan, aníyej wawáʼ i kʼániyal i ejatal tam ku pujan (1 Ped. 3:21). An tʼojláb axi in tʼajaʼ a Noé abal kin tsʼejkaʼ an arca ejtílits an tʼojláb axi tatáʼ kʼwajat a tʼajál abal ka ejtow kit pujan. Tam, ¿jantʼoj kʼwajat a tʼajál tatáʼ abal ka ejtow kit pujan?

15. ¿Jantʼiniʼ i tejwamedhál abal u tʼeʼpinal kʼal i wálab?

¹⁵ Jawaʼ in yéjenchal ki tʼajaʼ abal ki ejtow ku pujan játs ku tʼeʼpin kʼal i wálab (Hech. 2:37, 38). Ku tʼeʼpin kʼal i wálab játs ki jilaʼ ki tʼajaʼ jantʼoj axi yab tekedh. Walám tatáʼ a jilamal ti iníkbej, ti uxúmbej, ti jutsʼul, o ka uluw i kidháb kaw kom patal axéʼ a Jehová yab in kulbetnál (1 Cor. 6:9, 10; 2 Cor. 7:1; Efes. 4:29). Pero max yabaye a ejtowamal ka jilaʼ, ka tsápnanchij ka tʼajaʼ. Max a yéjenchal kit tólmiyat, ka tʼilmay axi ti exóbchal kʼal an Biblia o jayej a éjtowal ka tʼilmay an ókʼnomchik. Ani max it tsákamej ani it kʼwajíl kʼal a tátajchik, a éjtowal ka uchaʼ abal ti tólmiy abal ka jilaʼ jawaʼ ti tʼokʼbayal abal kit pujan.

16. ¿Jantʼoj i yéjenchal ki tʼajaʼ abal ki kʼakʼnaʼ a Jehová?

¹⁶ Lej exbadh ka koʼoyits bíjidh jawaʼ neʼets ka tʼajaʼ abal ka kʼakʼnaʼ a Jehová. Ejtíl yab ka palkʼanchij kit kʼalej ban tamkuntaláb ani ka bínaʼ i tokʼtsixtaláb (Heb. 10:24, 25). Ani tam kit bíjiyat ti publicador ka tsápnanchij kit kalej tit ólnom. Biyat más kit kalej, más neʼets ka kulbétnaʼ (2 Tim. 4:5). Max it tsákamej, ka tsalpay max pel a tátajchik axi ti nixoknál kit kʼalej ti tamkuntaláb o ti ólnom, o max a tʼajál kʼal a kulbétal. Tam tatáʼ a tʼajál patal axéʼ kʼal a kulbétal a tejwamedhál abal a kʼanidhál a Jehová, abal a bélal kʼal Jajáʼ ani abal a kʼákʼnanchal jawaʼ in tʼajámal. Max ki koʼoyits bíjidh jawaʼ neʼets ki tʼajaʼ abal ki  kʼakʼnaʼ a Jehová i tejwamedhál abal i léʼ ki tʼajaʼ jawaʼ in léʼ Jajáʼ, ani antsanáʼ ejtíl max i pidhál i tsʼejwalixtaláb a Jehová (2 Ped. 3:11; Heb. 13:15). A Jehová yab in léʼ tu ku nixoknaʼ ki tʼojonchij, Jajáʼ in aychal ki tʼajaʼ kʼal i kulbétal (ka jumbiy kʼal 2 Corintios 9:7). Wawáʼ i atsʼál lej kulbél ki tʼojonchij a Jehová.

17, 18. ¿Jantʼoj neʼets ti tólmiy abal ka bajuw kit pujan? (Proverbios 3:3-6).

¹⁷ Patal jitaʼ in léʼ ka pujan neʼets kin tamétnaʼ i kʼibataláb. Walám kit telan o kit ayoknáj kom a jalkʼuy a bélomtal (2 Tim. 3:12). O walám tatáʼ a atsʼál kʼibat ka jilaʼ ka tʼajaʼ jantʼoj axi yab tekedh ani walám junchikíl ti atál nixéʼ xi kʼibataláb. Walám it tʼeʼpinal kom a tsálpayal abal yab jaykʼiʼ neʼets ka ejtow kit pujan. ¿Jantʼoj neʼets ti tólmiy abal yab ka walbaʼ ta báʼ? An kʼanidhomtaláb axi a koʼonchal a Jehová.

¹⁸ An kʼanidhomtaláb axi i koʼonchal a Jehová játs jawaʼ más exbadh (ka ajiy Proverbios 3:3-6). Max an kʼanidhomtaláb axi a atsʼál abal kʼal a Jehová lej tsapik, neʼets ka ejtow ka watʼenchij jawákits tam kʼibataláb. An Biblia in ulal abal a Jehová yab jaykʼiʼ in jilamal kin kʼanidhaʼ in tʼojnálil ani jayej yab neʼets kin jílkakay (Sal. 100:5). A Jehová tu tsʼejkámal abal ki ejtow ki nitsʼbiy Jajáʼ (Gén. 1:26). Tam, ¿jantʼiniʼ i éjtowal ki tejwamédhaʼ i kʼanidhomtaláb ejtíl Jajáʼ?

19. ¿Jantʼoj a éjtowal ka tʼajaʼ abal ka kʼákʼnanchij a Jehová jawaʼ in tʼajál chudhél chudhél abal kʼal tatáʼ? (Gálatas 2:20).

¹⁹ Jawaʼ kʼaʼál kwaʼal ki tʼajaʼ játs ki kʼákʼnanchij a Jehová jawaʼ tu pidhámal (1 Tes. 5:18). Chudhél chudhél ka tsalpay kʼal axéʼ: «¿Jantʼiniʼ tin tejwamédhanchij a Jehová axéʼ a kʼicháj abal tin kʼanidhál?». Tam ka ólonchij a Jehová ka uchaʼ jantʼoj játs axi a kʼákʼnanchal. Ka kʼákʼnanchij a Jehová kom chudhél chudhél ti tejwamédhanchal abal ti kʼanidhál, antsanáʼ tin tʼajaʼ an abatwálej Pablo (ka ajiy Gálatas 2:20). Ka konowiy ta baʼ: «¿U léʼ ku tejwamédhanchij a Jehová abal nanáʼ jayej u kʼanidhál?». An kʼanidhomtaláb axi a koʼonchal a Jehová neʼets ti tólmiy abal yab ti ataʼ jun i kidháb leʼnomtaláb. Jayej neʼets ti tólmiy abal ka tamétnaʼ jawákits tam kʼibataláb ani ka áynanchij ka kʼakʼnaʼ a Jehová. Antsanáʼ neʼets ka tejwamédhaʼ chudhél chudhél abal a kʼanidhál a Jehová.

20. ¿Jantʼoj játs ki pidhaʼ i ejatal a Jehová ani jaleʼ ti lej exbadh ki tʼajaʼ?

 ²⁰ An kʼanidhomtaláb axi a koʼonchal a Jehová kʼayúm kʼayúm neʼets ka púwey ani tam neʼets ka léʼnaʼ ka pidhaʼ a ejatal. Tam tatáʼ ka tʼajchij nixéʼ xi exbadh oláb a Jehová, neʼets ka atsʼaʼ lej alwaʼ kom neʼets ka ejtow ka tʼojonchíts abal etsʼey. Al axéʼ xi oláb a uchál a Jehová abal neʼets ka tʼojonchij abal etsʼey, belits max ka tamétnaʼ i kʼibataláb. Axéʼ xi oláb lej exbadh kom junílkʼej ti tʼajchal a Jehová. Jayej ki tʼilaʼ abal tam i pidhál i ejatal a Jehová i bátsʼuwal yan i alwaʼtaláb, jaxtám játs axi más in tomnál ki tʼajaʼ (Sal. 50:14). A Satanás neʼets kin exaʼ ka jilaʼ ka kʼanidhaʼ a Jehová, abal kʼayúm kʼayúm ka jilaʼ ka tʼojonchij. Pero yab ka walbaʼ ta baʼ (Job 27:5). An kʼanidhomtaláb axi a koʼonchal a Jehová neʼets ti tólmiy abal ka putuw jawaʼ a uchamal abal neʼets ka tʼajaʼ. Ani jayej neʼets ti tólmiy abal ki utey más kʼal Jajáʼ.

21. ¿Jaleʼ ti ulal abal an pujantaláb pel in tujtal abal ki tʼojonchij a Jehová?

²¹ Talbél ta tʼajchámalits an oláb a Jehová abal ka pidhaʼ a ejatal, ka tʼilmay an ókʼnomchik abal ti uchaʼ jantʼoj kwaʼal ka tʼajaʼ abal kit pujan. An kʼakʼnaxtaláb axi a pidhál a Jehová yab u talél tam kit pujan, játs tanáʼ ti neʼets ka tujchij. Jaxtám ka tsalpay jantʼoj a éjtowal ka tʼajaʼ ma xowéʼ abal chudhél chudhél ka kʼanidhaʼ más a Jehová. Nixéʼ neʼets ti tólmiy abal ka ejtow kit pujan ani tam ka bajuw ka tʼajaʼ, neʼets ka atsʼaʼ lej kulbél. Tatáʼ a éjtowal ka áynanchij ka kʼanidhaʼ a Jehová ani a Jesucristo abal etsʼey.