EXOBINTALÁB 39
¿Kʼwajatits dhuchadh a bij «ban libro in kʼál an ejataláb»?
«Tin tamét Jajáʼ dhuchan jun i libro, abal ka tʼilchat in bij patal jitaʼchik in kʼakʼnál a Jehová» (MAL. 3:16).
AJATLÁB 61 ¡Avancen, Testigos!
JAWAʼ NEʼETS KI EXÓBNAʼ *
Al yan i támub, a Jehová in dhuchámal yan i bijláb ban «libro in kʼál an ejataláb». (Ka tsuʼuw an párrafos 1 ani 2).
1. Kʼal jawaʼ in ulal Malaquías 3:16, ¿jantʼoj tam libro kʼwajat in dhuchál a Jehová ani jantʼoj in dhuchál tanáʼ?
A JEHOVÁ biyálits tin tujchamal kin dhuchaʼ al jun i libro yan i bijláb. An kʼaʼál bijláb axi dhuchadh tanáʼ pel in kʼál a Abel, kom jajáʼ in bélkaʼ a Jehová (Luc. 11:50, 51). * Pero a Jehová in aynanchámal kin dhuchaʼ yan i bijláb al axéʼ xi libro. Jaxtám waʼtsits millones i bijláb. Ti Biblia, axéʼ xi libro u bijiyáb «an libro abal ka tʼilan i bijláb», «an libro in kʼál an ejataláb», ani «an uw juʼtáj ti dhuchadh i bijláb». Al axéʼ xi exobintaláb neʼets ki eyendhaʼ an kaw «an libro in kʼál an ejataláb» (ka ajiy Malaquías 3:16; Apoc. 3:5; 17:8).
2. ¿Jitaʼchik u dhuchuncháb in bij al axéʼ xi libro? b) ¿Jantʼoj kwaʼal ki tʼajaʼ abal ku dhúchunchat i bij tanáʼ?
2 Al axéʼ xi libro kʼwajat patal axi in kʼakʼnál a Jehová ani in lej kʼanidhál. Jajáʼchik in aychal ka kʼwajiy abal etsʼey ban alabél Tsabál o ti éb. I bij neʼets ka kʼwajiy tanáʼ max ki tsápnanchij ku kʼwajiy utat kʼal a Jehová ani max ki belaʼ kʼal in tsémtal a Jesucristo (Juan 3:16, 36). ¿Yab aníts abal patal i léʼ abal ku dhúchunchat i bij tanáʼ?
3, 4. a) Max i bij kʼwajatits dhuchadh ban libro, ¿walám pel kom neʼets ku kʼwajiyits abal etsʼey? b) ¿Jantʼoj neʼets ki exóbnaʼ al axéʼ xi exobintaláb ani al axi taʼtal?
3 ¿Walám awilej ka pákuwat i bij max dhúchadhits ban libro? An tokʼtsixtaláb i elál ti Éxodo 32:33. Tanáʼ a Jehová in uchaʼ a Moisés: «Neʼets ku pakwchij in bij jitaʼchik tin jekʼomnámal». Jaxtám i éxbayal abal an bijláb axi kʼwajatits tanáʼ awitsej ka pákuwat. Pel ejtíl max xowéʼ, a Jehová in dhuchámal kʼal i lápiz (Apoc. 3:5). Kwaʼal ki tsápnanchij abal a Jehová yab jaykʼiʼ tu ku pakwchij i bij ani abal etsʼey ka kʼwajiy tanáʼ.
4 Walám i tsalpayámal kʼal talchik i konowixtaláb ejtíl axéʼ. ¿Jantʼoj in ulal an Biblia tin kwéntaj jitaʼchik dhúchadhits in bij tanáʼ?, ¿ani jantʼoj in ulal tin kwéntaj jitaʼchik yabaye dhuchadh in bij?, ¿jaykʼiʼ ti neʼetschik kin batsʼuw an ejataláb abal etsʼey jitaʼchik in kwaʼalits dhuchadh in bij tanáʼ?, ¿jantʼoj tam aychixtaláb in kwaʼal jitaʼchik yab jaykʼiʼ in exlaʼ a Jehová?, ¿walám kʼwajat dhuchadh i bij al axéʼ xi libro? Játs neʼets ki exóbnaʼ al axéʼ xi exobintaláb ani al axi taʼtal.
¿JANTʼOJ TAM BIJLÁB KʼWAJAT DHUCHADH BAN LIBRO?
5, 6. a) Kʼal jawaʼ in ulal Filipenses 4:3, ¿jitaʼchik in kwaʼal dhuchadh in bij ban libro in kʼál an ejataláb? b) ¿Jaykʼiʼ ti neʼets ka jílkʼonits dhuchadh in bij abal etsʼey?
5 ¿Jantʼoj tam bijláb kʼwajat dhuchadh al axéʼ xi libro? Abal ki exlaʼ, neʼets ki exóbnaʼ tin kwéntaj boʼ i múkeʼ i atikláb. Talchik kʼal axéʼ xi múkeʼ in kwaʼal dhuchadh in bij al axéʼ xi libro ani talchik imbáj.
6 Ban kʼaʼál múkeʼ kʼwajat ajidh patal jitaʼ takuyámej abal ka kʼalej ti eyal kʼal a Cristo. ¿Walám kʼwajatits dhuchadh in bij ban libro in kʼal an ejataláb? Aníts. Kʼal jawaʼ an abatwálej Pablo in dhúchunchij an epchalchik axi ti Filipos, in tejwamédhanchij abal in bij an takudhchik kʼwajatits dhuchadh al axéʼ xi libro (ka ajiy Filipenses 4:3). Pero abal yabchik ka pakwchat in bij, jajáʼchik kwaʼal kin áynanchij putudh kʼal a Jehová. Jajáʼchik neʼets ka jílchinits dhuchadh in bij abal etsʼey tam ka tsemets, o max ij, okʼxidh ka tujey an púlik yajchiktaláb (Apoc. 7:3).
7. ¿Jantʼiniʼ tu tólmiyal Apocalipsis 7:16, 17 abal ki exlaʼ jaykʼiʼ ti neʼets ka dhúchunchatits in bij abal etsʼey an púlik mudhél i atikláb?
7 Ban tsabchíl múkeʼ kʼwajat an púlik mudhél i atikláb axi u exláb jantʼiniʼ i ovejas, ¿dhúchadhits in bij ban libro in kʼál an ejataláb? Aníts, ¿neʼets kin áynanchij in bij dhuchadh tanáʼ tam kin jekʼaʼchik an Armagedón? Aníts ( Apoc. 7:14). A Jesús in uluw abal axéʼ xi púlik mudhél i atikláb axi exladh jantʼiniʼ i ovejas, neʼets kin batsʼuw «i ejataláb abal etsʼey» (Mat. 25:46). Pero yab dhubat neʼets kin bátsʼuwchik an ejataláb abal etsʼey, jaxtám ejtíl max in bij neʼets ka kʼwajiy dhuchadh kʼal i lápiz. Ban Mil i Támub axi neʼets ti eyal a Jesús, axéʼchik xi atikláb neʼets ka beletnáj ejtíl max pel i ovejas ani «neʼets ka neʼdháchik juʼtáj ti etsʼey u elel an jáʼ abal kin utsʼaʼ». Jitaʼchik kin bélkaʼ an abatnaxtaláb axi kin bínaʼ a Jesús ani ka tsuʼtat ti bolidh kʼal a Jehová, játs axi neʼets ka dhúchunchat in bij al axéʼ xi libro ani yabáts jaykʼiʼ neʼets ka pákuwat (ka ajiy Apocalipsis 7:16, 17).
8. a) ¿Jitaʼchik yab in kwaʼal dhuchadh in bij ban libro in kʼál an ejataláb? b) ¿Jantʼoj neʼets ka watʼey kʼal jajáʼchik?
8 Ban oxchíl múkeʼ kʼwajatchik ajidh axi neʼets ka exláj ti cabras, jajáʼchik neʼets ka talabedháj abal etsʼey ti Armagedón. Jajáʼchik yab dhuchadh in bij ban libro in kʼál an ejataláb. A Jesús in uluw abal «neʼetschik ka talabedháj abal etsʼey» (Mat. 25:46). An abatwálej Pablo jayej in dhuchaʼ abal axéʼchik xi atikláb «neʼets ka talabedháj abal etsʼey» (2 Tes. 1:9; 2 Ped. 2:9). Jayetsej neʼets ka watʼey kʼal jitaʼchik tʼajchíl in kawiliyámal an espíritu santo, axéʼ pel jun i walabtaláb lej púlik. Jajáʼchik neʼets ka talabedháj abal etsʼey. Yabáts in kwaʼal an aychixtaláb abal ka edháj (Mat. 12:32; Mar. 3:28, 29; Heb. 6:4-6). Xowéʼ neʼets ki exóbnaʼ tin kwéntaj tsab i múkeʼ i atikláb axi neʼets ka edháj ban Tsabál.
¿JITAʼCHIK NEʼETS KA EDHÁJ?
9. ¿Jawaʼ tam tsab i múkeʼ neʼets ka edháj ti ít Tsabál, ani jaleʼ ti yab júnatchik? (Hechos 24:15).
9 An Biblia u kaw tin kwéntaj tsab i múkeʼ i atikláb axi in kwaʼal an aychixtaláb abal ka edháj ani ka kʼwajiychik ban it Tsabál: «axi bólidhchik» ani axi «yab bolidh» (ka ajiy Hechos 24:15). Axi «bólidhchik» játs axi in tʼojonchij a Jehová tin naktal in ejatal. An atiklábchik axi «yab bolidh» játs axi yab in exlaʼ tin kwéntaj a Jehová ani yab in tʼojonchij. Walám ma in tʼajaʼchik yan jantʼoj axi kidháb. Kom axéʼ xi tsab i múkeʼ i atikláb neʼets ka edháj, ¿walám kʼwajatits dhuchadh in bij ban libro in kʼál an ejataláb? Abal ki ejtow ki exlaʼ, i yéjenchal ki exóbnaʼ talchik jantʼoj tin kwéntaj axéʼ xi tsab i múkeʼ.
10. ¿Jaleʼ ti neʼets ka edháj an atiklábchik axi «bolidh», ani jantʼoj tam tʼojláb neʼets kin batsʼuw talchik kʼal jajáʼ? (Al axéʼ xi revista jayej a éjtowal ka tsuʼuw an pejach «Konowixtalábchik axi a tʼajámal», tanáʼ u kaw tin kwéntaj jitaʼchik neʼets ka edháj ti ít Tsabál).
10 Ban tseʼchíl múkeʼ kʼwajat ajidh «axi bólidhchik». Jajáʼchik u koʼonchábak dhuchadh in bij ban libro okʼxidh ka tsemets. ¿Walám pákuwat in bij tam ti tsemets? Imbáj. Kom a Jehová belej in tʼilál nixéʼchik xi atikláb. An Biblia in ulal abal a Jehová «yab pel i Dios kʼal i tsemélom». Jaxtám i exlál abal jajáʼchik kʼwajat ejat tin tsalápil a Dios. Jajáʼ in tsuʼtal patal axéʼ xi atikláb ejtíl max ejat (Luc. 20:38). Axéʼ xi kaw in léʼ kin uluw abal jitaʼchik in tʼojonchij a Jehová ti biyál neʼets kin áynanchij dhuchadh in bij ban libro tam ka éjtsinchik. Pero ejtíl max in bij neʼets ka kʼwajiy dhuchadh kʼal i lápiz (Luc. 14:14). I belál abal talchik i atikláb axi ka edháj, neʼets kin bajuw ti príncipes ban Tsabál (Sal. 45:16).
11. ¿Jantʼoj neʼets kin yéjenchij kin tʼajaʼ an atiklábchik axi «yab bólidh», abal ka dhúchunchat in bij ban libro?
11 Xowéʼ neʼets ku kawin tin kwéntaj an boʼchíl i múkeʼ. Játs «jitaʼchik yab bolidh». Jajáʼchik yab in tʼajaʼ jawaʼ tekedh kom walám yab in exlaʼ tin kwéntaj a Jehová. Jaxtám yabchik dhuchadh in bij ban libro in kʼál an ejataláb. Pero tam ka edháj, in éjtowalchik kin takuy kin tʼojonchij a Jehová ani tam, Jajáʼ in éjtowal kin dhúchunchij in bij al axéʼ xi libro. Axéʼchik xi atikláb neʼets kin yéjenchij ka lej tólmiyat, kom yan kʼal jajáʼ in tʼajaʼ jantʼoj axi lej kidháb. Jaxtám neʼets kin yéjenchij ka exóbchat jantʼiniʼ kin kʼakʼnaʼ a Jehová. In Éyaltal a Dios neʼets kin ókʼnaʼ jun i tʼojláb lej púlik abal ka exóbchat patal axéʼ xi atikláb.
12. a) ¿Kʼal jitaʼchik neʼets ka exóbchat an atikláb axi yab bolidh? b) ¿Jantʼoj neʼets ka watʼey kʼal an atiklábchik axi yab kin jilaʼ ka tólmiyat?
12 ¿Kʼal jitaʼchik neʼets ka exóbchat an atiklábchik axi yab bolidh? Kʼal an púlik mudhél i atikláb ani kʼal axi bólidhchik. ¿Jantʼoj kwaʼal kin tʼajaʼ an atiklábchik axi yab bolidh abal ka dhúchunchat in bij al axéʼ xi libro? Kwaʼal ka uteychik kʼal a Jehová ani kin pidhaʼ in ejatal. A Jesús ani axi takudhchik neʼets ka kʼwajiy kin lej tʼajaʼ ti kwéntaj jantʼoj in tʼajál axéʼchik xi atikláb (Apoc. 20:4). Max jun kʼal axéʼchik xi atikláb yab kin jilaʼ ka tólmiyat, neʼets ka talabedháj, belits max in kwaʼal 100 i támub (Is. 65:20). A Jehová ani a Jesús in exlál jawaʼ in tsálpayal patal an atikláb, jaxtám yab neʼets kin jilaʼ abal jun i atikláb kin tʼajaʼ jantʼoj kidháb ban ít Tsabál (Is. 11:9; 60:18; 65:25; Juan 2:25).
AXI NEʼETS KA EDHÁJ ABAL KA KʼWAJIY ABAL ETSʼEY ANI AXI NEʼETS KA BÓLIYAT
13, 14. a) ¿Jantʼiniʼ ti éxbayalak ti biyál jawaʼ in uluw a Jesús ti Juan 5:29? b) ¿Jantʼoj tam kaw kwaʼal ki lej tʼajaʼ ti kwéntaj tam i ajiyal axéʼ xi texto?
13 A Jesús jayej kawin tin kwéntaj jitaʼchik neʼets ka edháj ban Tsabál. Jajáʼ in uluw axéʼ xi kaw: «Lej chubax neʼets kin bajuw an hora tam neʼets ka tawnáj ka edháj patal an tsemélomchik axi kʼwajat tin tsalápil a Dios. Neʼets ka kaldhájchik ti al an jolimtaláb abal ka kʼwajiy abal etsʼey axi in tʼajámal jawaʼ alwaʼ. Ani neʼets ka boliyat kʼal a Dios axi in tʼajámal jawaʼ yab alwaʼ» (Juan 5:28, 29). ¿Jantʼoj in léʼak tu ku exóbchij a Jesús kʼal axéʼ xi kaw?
14 ¿Jantʼoj i belálak ti biyál kʼal an kaw axi in uluw a Jesús? I tsálpayalak abal kʼwajat ti kaw kʼal jawaʼ neʼets kin tʼajaʼ an atiklábchik tam ka edháj. I tsálpayalak abal ban ít Tsabál jayej neʼetsak ka waʼtsin i atikláb axi kin tʼajaʼ yan jantʼoj kidháb. Pero ki tʼajaʼ ti kwéntaj abal a Jesús yab in uluw abal jitaʼchik ka edháj neʼets kin tʼajaʼ jantʼoj axi kidháb. Jawaʼ a Jesús kʼwajatak in ulal pel jantʼoj axi watʼeyits. Jaxtám in uluw «axi in tʼajámal alwaʼ» ani «axi in tʼajámal yab alwaʼ». Kʼal axéʼ xi kaw i éxbayal abal játs jawaʼ in tʼajaʼchik ti biyál, okʼxidh ka tsemets. Jaxtám i exlál abal ban ít Tsabál, a Jehová yab neʼets kin jilaʼ abal an atiklábchik kin tʼajaʼ jantʼoj axi kidháb. An atiklábchik axi yab bolidh, in tʼajaʼchik yan jantʼoj kidháb pero okʼxidh ka tsemets. Tam, ¿jaleʼ tin uluw a Jesús abal talchik neʼets ka edháj «abal ka kʼwajiy abal etsʼey» ani «talchik abal ka boliyat»?
15. ¿Jitaʼchik neʼets ka edháj «abal ka kʼwajiy abal etsʼey» ani jaleʼ?
15 An atiklábchik axi in tʼajaʼ jawaʼ bolidh neʼets ka edháj «abal ka kʼwajiy abal etsʼey», kom in bij kʼwajatits dhuchadh ban libro in kʼál an ejataláb. An aychixtaláb axi kʼwajat ti Juan 5:29 jayetsej an aychixtaláb axi in olnál Hechos 24:15. Patal axéʼ u júmbinal kʼal jawaʼ in ulal Romanos 6:7. Tanáʼ in ulal abal «an tsemélom yabáts u abatnáb kʼal in tsap an walabtaláb». Tam ka tsemets jun i atikláb axi in tsapnanchámal kin tʼojonchij a Jehová, u pakwlancháb patal in wálab. Pero u jílkʼonal dhayach tin tsalápil a Jehová patal an tʼojláb axi in tʼajaʼ (Heb. 6:10). Pero tam axéʼchik xi atikláb ka edháj, kwaʼalchik kin áynanchij putudh kʼal a Jehová abal yabchik ka pakwchat in bij ban libro in kʼál an ejataláb.
16. ¿Abal jaleʼ ti neʼets ka edháj an atiklábchik axi in tʼajaʼ jawaʼ yab tekedh?
16 ¿Jantʼoj neʼets ka watʼey kʼal jitaʼchik in tʼajálak jawaʼ kidháb okʼxidh ka tsemets? Tam ti jajáʼchik tsemets pákwlanchat in wálab, pero yabchik jaykʼiʼ in tʼojonchij a Jehová. Jaxtám in bij yab kʼwajat dhuchadh ban libro in kʼál an ejataláb. Tam, an atiklábchik axi in tʼajaʼ jawaʼ yab alwaʼ játs axi u bijiyáb jantʼiniʼ axi «yab bolidh» ti Hechos 24:15. Jajáʼchik «neʼets ka edháj abal ka boliyat». * Axéʼchik xi atikláb neʼets ka lej tʼajchat ti kwéntaj jawaʼ kin tʼajaʼ ani talbél neʼetschik ka boliyat (Luc. 22:30). Neʼets ka yéjenchat i kʼij abal ka exláj jitaʼchik in tomnál ka dhúchunchat in bij ban libro in kʼál an ejataláb. Axéʼchik xi atikláb yabáts kwaʼal kin tʼajaʼ jawaʼ kidháb ani kwaʼal kin pidhaʼ in ejatal a Jehová.
17, 18. ¿Jantʼoj kwaʼal kin tʼajaʼchik jitaʼ ka edháj ban ít Tsabál? b) ¿Jantʼoj in ulal Apocalipsis 20:12, 13 abal neʼetschik ka tʼajchat ti kwéntaj?
17 Belits max in kʼakʼnaʼchik a Jehová o max in tʼajaʼ jawaʼ kidháb, an atiklábchik axi ka kʼwajiy ban ít Tsabál kwaʼal kin bélkaʼ an ít olchixtaláb axi ka bináj al an 1.000 i támub. An abatwálej Juan in jilaʼ dhuchadh jawaʼ in tsuʼuw al jun i tsuʼbixtaláb: «U tsuʼuw kʼwajatchik tin tamét a Dios axi tsémenekits ani ejat juníl. Kʼwajatchik axi púlik in éy tam ti xeʼtsin tsabál ani axi yab púlik in éy. A Dios in japiy i úw jun ti dhúchadhits in tʼajbíl ani in tʼajchichik an tsʼejkaxtaláb jantʼiniʼ kin tsuʼuw in tʼajbílchik. Waʼats i úw jun ti dhuchadh in bij jajáʼchik axi pidhnének i ít ejataláb kʼal a Dios» (Apoc. 20:12, 13).
18 ¿Jawaʼ játs in «tʼajbílchik» axi neʼets ka tʼajchat ti kwéntaj jitaʼchik ka edháj? ¿Walám neʼets ka tʼajchat ti kwéntaj jawaʼ in tʼajaʼchik okʼxidh ka tsemets? Imbáj. Ki tʼilaʼ abal jajáʼchik pakwchat in wálab tam ti tsemets. Yabchik neʼets ka tʼajchat ti kwéntaj jawaʼ in tʼajaʼ ti biyál. In «tʼajbílchik» axi neʼets ka tʼajchat ti kwéntaj játs jawaʼ kin tʼajaʼchik ban ít Tsabál, max kin jílaʼchik abal ka exóbchat kʼal a Jehová. Ma i atiklábchik ejtíl a Noé, a Samuel, a David ani a Daniel, kwaʼalchik kin exóbnaʼ tin kwéntaj a Jesucristo ani kin belaʼ abal jajáʼ in bínaʼ in ejatal abal kʼal wawáʼ. Jitaʼchik yab in exlaʼ tin kwéntaj a Jehová ti biyál, játs axi neʼets kin yéjenchij ka exóbchat más.
19. ¿Jantʼoj neʼets ka watʼey kʼal jitaʼchik yab kin jilaʼ ka exóbchat ban ít Tsabál?
19 ¿Jantʼoj neʼets ka watʼey kʼal jitaʼchik yab kin jilaʼ ka exóbchat ti ít Tsabál? Apocalipsis 20:15 in ulal axéʼ: «Jólowat ban kʼamal patal an atikláb axi yab dhuchadh in bij ti al an úw, jun ti dhúchadhits in bij axi pidhnének i ít ejataláb kʼal a Dios». Kʼal axéʼ xi kaw i éxbayal abal neʼetschik ka talabedháj abal etsʼey. Jaxtám ti lej exbadh abal i bij ka kʼwajiy al axéʼ xi libro ani yab jaykʼiʼ ka pákuwat.
Jun i epchal kʼwajat ti tólmix al an tʼojláb axi neʼets ka tʼajan al an mil i támub (ka tsuʼuw an párrafo 20).
20. ¿Jantʼoj tam tʼojláb neʼets ka tʼajan ban Mil i Támub axi neʼets ti ábatnom in Éyaltal a Dios? (Ka tsuʼuw an dibujo axi kʼwajat ban portada).
20 Ban Mil i Támub axi neʼets ka kʼwajiy ti ábatnom in Éyaltal a Dios, neʼets ka waʼtsin yan i tʼojláb. Tin puwél an Tsabál neʼets ka exóbchat yan i atikláb tin kwéntaj a Jehová. Jayej neʼets ka lej tʼajan ti kwéntaj jawaʼ kin tʼajaʼ jitaʼchik bolidh ani jitaʼchik yab bolidh (Is. 26:9; Hech. 17:31). ¿Jantʼoj neʼets ka tʼajan abal ka exóbchat patal nixéʼ xi atikláb? Játs neʼets ki exóbnaʼ al axi jun an exobintaláb ani jayej neʼets ki tsuʼuw jaleʼ tin tomnál ki pidhaʼ yan in jalbíl axéʼ xi tʼojláb.
AJATLÁB 147 Dios nos promete la vida eterna
^ Al axéʼ xi exobintaláb neʼets ki exóbnaʼ jawaʼ ít exbayámej kʼal jawaʼ in uluw a Jesús ti Juan 5:28, 29. Tanáʼ a Jesús kawin tin kwéntaj jitaʼchik neʼets ka edháj abal ka kʼwajiy abal etsʼey ani jitaʼchik neʼets ka edháj abal ka bóliyat. Neʼets ki tsuʼuw jitaʼchik játs jajáʼ ani jantʼoj neʼets ka watʼey kʼal jajáʼchik tam ka edháj.
^ A Jehová in tujchij kin dhuchaʼ i bijláb al axéʼ xi libro ma ti tújenek ka waʼtsin i atikláb. Axéʼchik xi atikláb játs jitaʼchik awits ka pákwlanchat in wálab kʼal a Jehová (Mat. 25:34; Apoc. 17:8). Jaxtám i belál abal an kʼaʼál bijláb axi kʼwajat al axéʼ xi libro pel in kʼál a Abel.
^ Ti biyál i ulalak abal an atiklábchik axi in tʼajaʼ jawaʼ yab tekedh, neʼetschik ka edháj abal tʼájatits ka jólbiyat. Ani walám junchikíl antsanáʼ ti éxbayal an kaw «boliy», pero walám jawaʼ in léʼnaʼ kin uluw a Jesús kʼal axéʼ xi kaw játs abal neʼets kin yejenchij más i kʼij abal ka boliyat axéʼchik xi atikláb, kom kwaʼal ka tʼajchat ti kwéntaj jawaʼ in tʼajál tin ejatal. Jun i diccionario in ulal abal nixéʼ xi kaw in léʼ kin uluw «ka tʼajchat ti kwéntaj jawaʼ jun i atikláb in tʼajál».
