EXOBINTALÁB 40
Lej yan axi «neʼets ka tsuʼtat ti bolidh»
«Jitaʼchik kin tólmiy an atikláb abal kin tʼajaʼ jawaʼ tekedh neʼets ka tajkʼan lej alabél abal etsʼey, antsanáʼ jantʼiniʼ an ót» (DAN. 12:3).
AJATLÁB 151 Jehová los llamará
JAWAʼ NEʼETS KI EXÓBNAʼ *
1. ¿Jantʼoj tam alwaʼtaláb neʼets ki batsʼuw al an Mil i Támub tam ka kʼwajiy ti ábatnom a Jesús?
¿A TSÁLPAYAMAL jantʼiniʼ ti neʼets ka atsʼaʼ tam a Jehová ka tujey kin edháj an atiklábchik al an Mil i Támub? Patal jitaʼ in kʼibamal jun in yanél i lej léʼits ki tsuʼuw ka edháj. A Jehová jayej in léʼits kin tʼajaʼ (Job 14:15). Patal neʼets kin atsʼaʼ lej kulbél tam kin tsuʼuw junílekʼij in yanél. Ban exobintaláb axi watʼey, i exóbnaʼ abal an bólidhchik neʼets ka edháj abal ka kʼwajiy abal etsʼey (Hech. 24:15; Juan 5:29). Walám i yanél játs axi kʼaʼál ka edháj. * Jayej jitaʼchik yab in exlaʼ tin kwéntaj a Jehová neʼets ka edháj abal ka boliyatchik.
2, 3. a) Kʼal jawaʼ in ulal Isaías 11:9, 10, ¿jawaʼ játs an tʼojláb axi neʼets ka tʼajan ban ít Tsabál? b) ¿Jantʼoj neʼets ki exóbnaʼ?
2 Patal axi ka edháj neʼets kin yéjenchij ka exóbchat yan jantʼoj (Is. 26:9; 61:11). Jaxtám ti neʼets ka yéjenchat yan i tolmix abal ka exóbchat patal axéʼ xi atikláb (ka ajiy Isaías 11:9, 10). An atiklábchik axi yab in exlaʼ tin kwéntaj a Jehová okʼxidh ka tsemets, neʼets kin yéjenchij ka exóbchat jaleʼ ti a Jesús in bínaʼ in ejatal. Jayej kwaʼal ka exóbchat tin kwéntaj in Éyaltal a Dios ani jaleʼ ti expidh a Jehová in tomnál ti ábatnom. Ma jitaʼchik tsemets putudh kʼal a Jehová, neʼets kin yéjenchij ka exóbchat jawaʼ itekʼij tu exobchámal a Jehová. Yan in tʼojnálil a Jehová tsemets yan i támub okʼxidh ka talabedháj ka dhuchan an Biblia. Jaxtám i éxbayal abal axi bolidh ani axi yab bolidh neʼets kin yéjenchij ka exóbchat yan jantʼoj.
3 Al axéʼ xi exobintaláb neʼets ki tókʼtsiy talchik i konowixtaláb: ¿jantʼiniʼ ti neʼets ka exóbchat patal axéʼ xi atikláb? ¿jantʼoj neʼets kin watʼaʼ jitaʼchik kin batsʼuw an exobchixtaláb? Ani, ¿jantʼoj neʼets kin watʼaʼ jitaʼchik yab kin batsʼuw? Wawáʼ jayej in tomnál ki lej tsalpay kʼal axéʼ xi konowixtaláb. Talchik i kʼej kaw ejtíl axi kʼwajat ti Daniel ani ti Apocalipsis, neʼets tu ku tólmiy ki exbay jantʼoj neʼets ka watʼey tam ka edháj an atiklábchik ban Tsabál. Okʼox, ki exóbnaʼ jawaʼ in ulal a Daniel 12:1, 2.
«AXI KʼWAJAT TI KOYOL BAN POJODH NEʼETS KA EDHÁJ»
4, 5. ¿Jantʼoj in ulal a Daniel 12:1 abal neʼets ka watʼey tin taltal a kʼicháj?
4 (Ka ajiy Daniel 12:1). An libro in kʼal a Daniel tu ólchal jantʼiniʼ ti neʼets ka putun yan i kʼej kaw tin taltal a kʼicháj. Jun i tʼiplab, ti Daniel 12:1 in ulal abal a Jesucristo kʼwajat kubat abal kin tólmiy in bichówil a Dios. Axéʼ xi pejach kʼal an kʼej kaw tujey ti putnal ti 1914, tam ti a Jesús bíjiyat ti tsʼalej tin Éyaltal a Dios.
5 Pero a Daniel jayej uchan abal a Jesús neʼets ka kubiy ti tolmix «al jun i kʼij tam ka lej yáney an kʼibataláb». Axéʼ játs «an púlik yajchiktaláb» axi u olnáb ti Mateo 24:21. A Jesús u kubél kin tólmiy in bichówil a Dios, tin táltalits axéʼ xi púlik yajchiktaláb, axéʼ játs ti Armagedón. An libro in kʼál a Apocalipsis in ulal abal axéʼ xi atiklábchik, jayej u bijiyáb «an púlik mudhél» axi neʼets kin jekʼaʼ in ejatal «ban púlik yajchiktaláb» (Apoc. 7:9, 14).
6. ¿Jantʼoj neʼets ka watʼey kʼal an púlik mudhél i atikláb talbél kʼal an púlik yajchiktaláb? (Jayej a éjtowal ka tsuʼuw al axéʼ xi revista an pejach «Konowixtalábchik axi a tʼajámal» axi u kaw tin kwéntaj jitaʼchik neʼets ka edháj ban ít Tsabál).
6 (Ka ajiy Daniel 12:2). ¿Jantʼoj neʼets ka watʼey tam ka kʼániyat an púlik mudhél i atikláb ban púlik yajchiktaláb? Axéʼ xi kʼej kaw in ulal abal neʼets ka waʼtsin yan jitaʼ axi neʼets ka edháj. Tejéʼ yab kʼwajat ti kaw tin kwéntaj jitaʼchik takuyamej abal ka kʼalej ti eb. * Xowéʼ i exobnámal abal pel an atiklábchik axi neʼets ka edháj ban ít Tsabál. ¿Jaleʼ ti belál abal játs antsanáʼ? Ti Job 17:16 u eyendháb an kaw «pojodh» ani axéʼ xi kaw jayej in léʼ kin uluw «jolimtaláb». Kʼal axéʼ i éxbayal abal an kʼej kaw axi kʼwajat ti Daniel 12:2 u kaw tin kwéntaj an atiklábchik axi neʼets ka edháj talbél kʼal an púlik yajchiktaláb ani kʼal a Armagedón.
7. a) ¿Jantʼoj in léʼ kin uluw abal talchik neʼets ka edháj abal ka kʼwajiychik abal etsʼey? b) ¿Jaleʼ ti pel jun i alwaʼtaláb lej púlik abal jitaʼchik ka wichiy ka edháj?
7 ¿Jantʼoj in léʼ kin uluw Daniel 12:2 tam in ulal abal talchik neʼets ka edháj «abal ka kʼwajiy abal etsʼey»? In léʼ kin uluw abal patal jitaʼ kin bélkaʼ a Jehová ani a Jesús, ani kin áynanchij kin exlaʼ tin kwéntaj jajáʼchik al an Mil i Támub, neʼets kin batsʼuw i ejataláb abal etsʼey (Juan 17:3). Belits abal talchik i atikláb edháj ti biyál, wichiy ka tsemets. Pero axi taʼtal a kʼicháj patal axi ka edháj neʼets kin ejtow ka kʼwajiy abal etsʼey (Heb. 11:35).
8. ¿Jaleʼ ti talchik neʼets ka edháj abal ka tidhebedháj ani abal ka talabedháj abal etsʼey?
8 Pero yab patal axi ka edháj neʼets kin léʼnaʼ kin exóbnaʼ tin kwéntaj a Jehová. An kʼej kaw in kʼál a Daniel in ulal abal talchik neʼets ka edháj «abal ka tidhebedháj ani abal ka talabedháj abal etsʼey». Kom yab bélkaxin, yab neʼets ka dhúchunchat in bij al an libro in kʼál an ejataláb, nibal neʼets ka pidhan i ejataláb abal etsʼey. A Daniel 12:2 kʼwajat in ulal jawaʼ neʼets kin watʼaʼ patal jitaʼchik ka edháj ban ít Tsabál. Talchik neʼets kin ejtow ka kʼwajiy abal etsʼey ani talchik imbáj (Apoc. 20:12). Abal ka boliyatchik neʼets ka tʼajchat ti kwéntaj patal jawaʼ kin tʼajaʼ talbél ka edháj. *
«LEJ YAN AXI NEʼETS KA TSUʼTAT TI BOLIDH»
9, 10. Kʼal jawaʼ in ulal Daniel 12:3, ¿Jantʼoj más neʼets ka watʼey talbél kʼal an púlik yajchiktaláb? b) ¿Jitaʼchik neʼets ka tsʼumimláts jantʼiniʼ an kʼaʼylál?
9 (Ka ajiy Daniel 12:3). ¿Jantʼoj más neʼets ka watʼey talbél kʼal an Mil i Támub? A Daniel 12:3 in olnál jantʼoj neʼets ka watʼey talbél.
10 ¿Jitaʼchik játs axi neʼets «ka lej tajkʼan jantʼiniʼ an kʼaʼylál»? An kaw axi in uluw a Jesús ti Mateo 13:43 tu tólmiyal ki exlaʼ. Jajáʼ in uluw: «Jitáts bolidh in ichích neʼets ka kʼwajiy tin Éyaltal a Dios ani tiwaʼ neʼets ka tsuʼtat tsʼumimíl ejtíl a kʼicháj». Tejéʼ a Jesús kʼwajatak ti kaw tin kwéntaj jitaʼchik takudh abal ka kʼalej ti eyal kʼal jajáʼ (Mat. 13:38). Jaxtám i éxbayal abal Daniel 12:3 kʼwajat ti kaw tin kwéntaj jitaʼchik takudh abal ka kʼalej ti eb ani an tʼojláb axi neʼets kin tʼajaʼ al an Mil i Támub.
An 144.000 neʼets ka tʼójon junax kʼal a Jesucristo abal kin exóbchij an atiklábchik axi tin puwél an Tsabál al Mil i Támub. (Ka tsuʼuw an párrafo 11).
11, 12. ¿Jantʼoj tam tʼojláb neʼets kin tʼajaʼ an 144.000 al an Mil i Támub?
11 An takudhchik neʼets kin tólmiy yan i atikláb abal kin «tʼajaʼ jawaʼ tekedh». ¿Jantʼiniʼ ti neʼets kin tʼajaʼchik axéʼ? Neʼets ka tʼójon junax kʼal a Jesús abal kin exóbchij an atikláb axi tin puwel an Tsabál al Mil i Támub. An 144.000 yab expidh neʼets kin tʼajaʼ ti tsʼalej, jayej neʼets ka tʼojonchik jantʼiniʼ i sacerdotes (Apoc. 1:6; 5:10; 20:6). Jajáʼchik neʼets kin tólmiy patal an atikláb axi tin puwél an Tsabál abal kʼayúm kʼayúm kin jalkʼuy in ejatal ani ka tixkʼan an walabtaláb (Apoc. 22:1, 2; Ezeq. 47:12). ¡Lej kulbél neʼets kin atsʼaʼchik ka tólmixin ba axéʼ xi tʼojláb!
12 ¿Jitaʼchik játs axi neʼets ka tólmiyat abal kin tʼajaʼ jawaʼ tekedh? Pel patal jitaʼ ka edháj, jitaʼchik kin jékʼondhaʼ in ejatal ban Armagedón ani an tsakamchik axi ka waʼtsin ban ít Tsabál. Tin taltal an Mil i Támub patal jitaʼ ka kʼwajiy ban ít Tsabál, yabáts neʼets kin koʼoy i walabtaláb. Tam, ¿jaykʼiʼ ti neʼets ka jílkʼonits dhuchadh abal etsʼey in bij ban libro in kʼál an ejataláb?
JAWAʼ NEʼETS KA WATʼEY TIN TALTAL
13, 14. ¿Jantʼoj kwaʼal kin tʼajaʼ an atiklábchik axi ka kʼwajiy ban ít Tsabál abal kin batsʼuw i ejataláb abal etsʼey?
13 In tomnál ki tʼilaʼ abal ma jun i atikláb axi tʼokatits in éjtowal kin kʼibchij a Jehová ani kin kʼibaʼ an ejataláb abal etsʼey. Ki tsalpay kʼal a Adán ani a Eva. Jajáʼchik pelak tʼokat, pero kwaʼalak kin tejwamédhaʼ abal in belkál a Jehová abal antsanáʼ kin ejtow kin batsʼuw an ejataláb abal etsʼey. Pero jajáʼchik yab bélkaxin (Rom. 5:12).
14 Ma tejéʼ i exóbnaʼits abal tin taltal an Mil i Támub, patal jitaʼ ka kʼwajiy ban ít Tsabál yabáts neʼets kin koʼoy i walabtaláb. ¿Walám patal axéʼ xi atikláb neʼets kin bélkaʼits a Jehová abal etsʼey? ¿O walám neʼets ka jekʼombéj antsanáʼ jantʼiniʼ a Adán ani a Eva? ¿Jantʼoj kwaʼal ka tʼajan abal kin tejwamédhaʼchik abal in belkál a Jehová?
15, 16. a) ¿Jaykʼiʼ ti kwaʼal kin takuy an atiklábchik max neʼets kin kʼakʼnaʼ a Jehová? b) ¿Jantʼoj neʼets ka watʼey kʼal jawaʼ kin takuychik ?
15 A Satanás neʼets ka mapuyat al Mil i Támub. Al nixéʼ xi kʼij yab neʼets kin ejtow kin kʼambiy nibal jitaʼ. Tin taltal an Mil i Támub neʼets ka walkáj ani neʼets kin exaʼ kin kʼambiy an atiklábchik. Al axéʼ xi kʼij patal an atikláb kwaʼal kin tejwamédhaʼ max neʼets kin kʼakʼnaʼ a Jehová ani max in léʼ kin tólmiy in Éyaltal (Apoc. 20:7-10). Kʼal jawaʼ kin tʼajaʼ neʼets kin tejwamédhaʼ max in léʼ ka dhúchunchat in bij ban libro in kʼál an ejataláb.
16 Talchik neʼets kin tʼajaʼ ejtíl a Adán ani a Eva, yabchik neʼets kin léʼnaʼ kin bélkaʼ a Jehová. ¿Jantʼoj neʼets ka watʼey kʼal jajáʼchik? Ti Apocalipsis 20:15 in ulal: «In talaʼ jolow ti al an kʼamal patal an atiklábchik axi yab dhuchadh in bij al an uw jun ti dhúchadhits in bijchik axi pidhnének i it ejataláb kʼal a Dios». Axéʼchik xi atikláb neʼets ka talabedháj abal etsʼey. Pero más yan axi neʼets kin takuy kin bélkaʼ a Jehová tin taltal an Mil i Támub. In bij neʼets ka jílkʼonits dhuchadh abal etsʼey ban libro in kʼál an ejataláb.
TIN TALTAL A KʼICHÁJ
17. ¿Jantʼoj uchan a Daniel abal neʼets ka watʼey tin taltal a kʼicháj? (Daniel 12:4, 8-10).
17 ¡I atsʼál lej kulbél kʼal patal jawaʼ neʼets ka watʼey ban ít Tsabál! Pero a Daniel jayej, tejwamédhanchat kʼal jun i ángel jawaʼ neʼets ka watʼey tin taltal axéʼ xi xeʼtsintaláb (ka ajiy Daniel 12:4, 8-10; 2 Tim. 3:1-5). Uchan: «Neʼets kin bajuw ka exláj jawaʼ lej chubax». Kʼal axéʼ i éxbayal abal in bichówil a Jehová neʼets kin exbay más alwaʼ an kʼej kaw axi kʼwajat ti Daniel. Pero an ángel in uluw kʼeʼat jantʼoj axi neʼetsak ka watʼey. In uluw: «An pójkaxchik neʼets ki tʼajaʼ yan jantʼoj kidháb ani yab neʼets kin léʼnaʼ kin jilaʼ kin tʼajaʼ».
18. ¿Jantʼoj neʼets kin watʼaʼ an pojkaxchik?
18 An atiklábchik axi in tʼajál jawaʼ kidháb ejtíl max in tʼajál jawaʼ tekedh (Mal. 3:14, 15). Pero lej wéʼits a Jesús neʼets kin pílmedhaʼ an atiklábchik axi ejtíl i cabras ani neʼets kin jilaʼ pil axi in tʼajál ejtíl i ovejas (Mat. 25:31-33). An pójkaxchik yab neʼets ka kʼániyat ban púlik yajchiktaláb, nibal neʼets ka edháj ban ít Tsabál abal ka kʼwajiy abal etsʼey. In bij yab neʼets ka dhúchunchat ban libro axi in olnál Malaquías 3:16.
19. ¿Jantʼoj in tomnál ki tʼajaʼ xowéʼ ani jaleʼ? (Malaquías 3:16-18).
19 Xowéʼ tin tomnál ki tejwamédhaʼ abal yab i tólmiyal an pójkaxchik (ka ajiy Malaquías 3:16-18). A Jehová kʼwajat in támkuyal patal jitaʼ in tsuʼtal jantʼiniʼ in kʼál. ¿Yab aníts abal wawáʼ jayej i léʼ abal a Jehová tu ku kʼálnaʼ?
¡Neʼets ki atsʼaʼ lej kulbél tam ki tsuʼuw ka edháj a Daniel, i yanél ani yan i atikláb axi kʼwajatchik ti koyol! (Ka tsuʼuw an párrafo 20).
20. ¿Jantʼoj uchan a Daniel, ani jaleʼ ta léʼ ka tsuʼuw abal ka putun?
20 U lej kulbél kʼal patal jawaʼ i tsuʼtal abal kʼwajat ti watʼel. Pero lej wéʼits neʼets ka watʼey yan jantʼoj más. Wéʼits neʼets ka talabedháj patal an pojkaxtaláb axi waʼats. Talbél neʼets ki tsuʼuw ka putun jawaʼ a Jehová in uchaʼ a Daniel: «Tin taltal a kʼicháj neʼets kit kubiy abal ka batsʼuw jawaʼ neʼets kit pidhan» (Dan. 12:13). ¿A léʼits ka tsuʼuw ka edháj a Daniel, ani a yanél axi kʼwajatchik ti koyol? Tam, ka tsápnanchij kit kʼwajiy putudh kʼal a Jehová abal a bij ka kʼwajiy al an libro in kʼál an ejataláb ani yab kit pakwchat.
AJATLÁB 80 «Prueben y vean que Jehová es bueno»
^ Axéʼ xi exobchixtaláb neʼets tu ku tólmiy ki exbay más alwaʼ an kaw axi ti Daniel 12:2, 3. Axéʼ játs tin kwéntaj an tʼojláb axi neʼets ka tʼajan ban ít Tsabál abal ka exóbchat an atikláb. Neʼets ki exóbnaʼ jaykʼiʼ ti neʼets ka watʼey ani jitaʼchik neʼets ti tolmix. Jayej neʼets ki exóbnaʼ abal axéʼ xi exobchixtaláb neʼets tu ku tólmiy ki kuxuy an takaxtaláb axi neʼets ka waʼtsin tin taltal an Mil i Támub.
^ Walám axi kʼaʼál ka edháj játs axi itekʼij ti tsémenek. Ani antsanáʼ neʼets kin áynanchij ma ka talaʼ edháj axi tsemets ti biyál. Antsanáʼ patal neʼets kin ejtow kin batsʼuw in yanél axi biyál ti tsémenek. An Biblia tu exóbchal abal jitaʼchik u edháb ti eb, neʼets ka edháj tin ay. Jaxtám i belál abal ti Tsabál jayej neʼets ka tʼajan antsanáʼ (1 Cor. 14:33; 15:23).
^ Axéʼ xi exobchixtaláb in kálchiyal axi kʼwajat ban capítulo 17 in kʼal an libro Prestemos atención a las profecías de Daniel ani An Ólchix Uw axi ti 1 a julio ti 1987, páginas 21 ma ti 25.
^ Hechos 24:15 in eyendhál an kaw «axi bólidhchik» ani axi «yab bolidhchik», jayej Juan 5:29 in eyendhál an kaw «jitaʼchik in tʼajaʼ jawaʼ tekedh» ani «jitaʼchik in tʼajaʼ jawa kidháb». Axéʼ xi tsab i texto u kaw tin kwéntaj jawaʼ in tʼajaʼ okʼxidh ka tsemets.
