Ki tsuʼuw jantʼoj in ulal an Biblia.

Ti Hechos 24:15 in olnál abal «neʼets ka edháj jitaʼchik bolidh ani jitaʼchik yab bolidh». Axi bolidh játs axi in belkálak a Dios okʼxidh ka tsemets, jaxtám in bij kʼwajat dhuchadh ban libro in kʼál an ejataláb (Mal. 3:16). Kʼal an atiklábchik axi yab bolidh jayej ajidh axi yabchik in ejtow kin exlaʼ tin kwéntaj a Jehová okʼxidh ka tsemets, jaxtám yab kʼwajat dhuchadh in bij ban libro in kʼál an ejataláb.

Ti Juan 5:28, 29 jayej u kaw tin kwéntaj axéʼ xi tsab i múkeʼ i atikláb, axi in olnál ti Hechos 24:15. A Jesús in uluw abal «jitaʼchik in tʼajaʼ jawaʼ alwaʼ» neʼets ka edháj abal ka «kʼwajiy abal etsʼey,  ani jitaʼchik in tʼajaʼ jawaʼ kidháb, neʼets ka edháj abal ka boliyat». Axi bólidhchik, in tʼajaʼ yan jantʼoj alwaʼ okʼxidh ka tsemets, jaxtám neʼets ka edhájchik kom in bij kʼwajatits dhuchadh ban libro in kʼál an ejataláb. Axi yab bolidh in tʼajaʼ jawaʼ yab tekedh tam ti ejatak, jaxtám neʼets ka edháj abal ka boliyatchik. In bij yabaye dhuchadh ban libro in kʼál an ejataláb, jajáʼchik neʼets ka edháj abal kin tejwamédhaʼ max in léʼ kin kʼakʼnaʼ a Jehová. Jaxtám neʼets ka exóbchat abal kin tʼajaʼ jawaʼ tekedh, ani antsanáʼ ka dhúchunchat in bij ban libro in kʼál an ejataláb.

Apocalipsis 20:12 ani 13 in olnál abal patal jitaʼ ka edháj kwaʼal kin bélkaʼ an abatnaxtaláb axi ka bináj «ban ít rollos», tanáʼ kʼwajat patal an abatnaxtaláb axi neʼets ki batsʼuw ban ít Tsabál. Jitaʼchik yab ka bélkaxin neʼets ka talabedháj abal etsʼey (Is. 65:20).

Daniel 12:2 in olnál abal talchik neʼets ka edháj «abal ka kʼwajiy abal etsʼey ani kʼeʼatchik abal ka tidhebedháj ani ka talabedháj abal etsʼey». Axéʼ xi versículo tu ólchal jawaʼ neʼets ka watʼey tin taltal an Mil i Támub, talchik neʼets ka «kʼwajiyits abal etsʼey ani kʼeʼatchik neʼets ka talabedháj» (Apoc. 20:15; 21:3, 4).

Ki tsuʼuw jun i tʼiplab abal ki exbay más alwaʼ jawaʼ neʼets ka watʼey kʼal axéʼ xi tsab i múkeʼ i atikláb. An atiklábchik axi bolidh pel ejtíl jun i atikláb axi u pidhnal jun i uw, ani u úchnal abal in éjtowal ka kʼalej ti kʼwajíl al pil i bichow. An atiklábchik axi yab bolidh pel ejtíl jun i atikláb axi u pidhnal jun i uw, ani u úchnal abal expidh in éjtowal ka kʼalej ti belelél al wéʼ i kʼij al jun i bichow. Abal kin ejtowchik ka kʼwajiy al nixéʼ xi bichow kwaʼal kin putuw kʼal jawaʼ u kónchinal kʼal an eyal. Jayej an atiklábchik axi yab bolidh kwaʼal kin bélkaʼchik a Jehová ban ít Tsabál, antsanáʼ neʼets kin tejwamédhaʼ max chubax in léʼ ka jilkʼon ti kʼwajíl tanáʼ. An atiklábchik axi u kʼalel ti kʼwajíl al pil i bichow, yab etsʼey u jílchinalits ka kʼwajiy tanáʼ, junchikíl u wichbáb tin bichówil. Abal ka exláj max ka jílanits ka kʼwajiy tanáʼ, u tʼajchinal ti kwéntaj jawaʼ in tʼajál. Jayej jitaʼchik ka edháj neʼets ka lej tʼajchin ti kwéntaj jawaʼ kin tʼajaʼ ban ít Tsabál ani max ka kʼwajiychik putudh kʼal a Jehová.

A Jehová yab expidh tu yajnanchal, jayej pel jun i Dios axi etsʼey in tʼajál jawaʼ tekedh ani jawaʼ bolidh (Deut. 32:4; Sal. 33:5). Neʼets kin tejwamédhaʼ abal tu lej kʼanidhál tam kin édhaʼchik axi bolidh ani axi yab bolidh, pero jayej in aychal abal jitaʼchik ka edháj ban ít Tsabál, ka bélkaxin. Expidh jitaʼ kin kʼanidhaʼ a Jehová ani kin bélkaʼ an abatnaxtaláb axi kin bínaʼ, játs axi neʼets kin ejtow kin áynanchij ka kʼwajiy ban ít Tsabál.