1, 2. a) ¿Jantʼoj in uluw a Jesús abal kwaʼal ki tʼajaʼ ti kwéntaj? b) ¿Jaleʼ ti jílkakiyat a Jesús kʼal in aykolil? (Ka tsuʼuw jayej an imágenes).

 A JESÚS in uluw: «A ejatal in léʼ kin tʼajaʼ jantʼoj alwaʼ, pero a anam tʼuʼúl yab u lej tsapnél» (Mat. 26:41b). a Kʼal axéʼ xi kaw, a Jesús in tejwamédhaʼ abal in éxbayalak abal wawáʼ i éjtowal ku ukʼpin ani ku wálbin, pero jayej tu tólmiy ki tʼajaʼ ti kwéntaj abal kwaʼal ki béletnaʼ ti baʼ ani yab ki tsalpay abal yab neʼets ku ukʼpin. Okʼxidh kin uluw axéʼ xi kaw a Jesús, uchan kʼal in aykolil abal yab jaykʼiʼ neʼetsak ka jílkakiyat (Mat. 26:35). Jajáʼchik in léʼak kin tʼajaʼ jantʼoj alwaʼ, pero yab in tʼajaʼchik ti kwéntaj abal jun dhúbatkʼij awits ka atáj kʼal an takaxtaláb, jaxtám a Jesús in uluw: «Yabchik kit wayits, ani ki ólon abal yab ti ataʼ an tenekláb» (Mat. 26:41a).

² ¿Jantʼoj in tʼajaʼchik an aykol tam ti yakʼwan a Jesús? Jajáʼchik yab kʼwajiy tʼajtʼóm ti kwéntaj, jaxtám waypinchik ani in jílkaʼ a Jesús, belits abal in uluwchik abal yab jaykʼiʼ neʼetsak kin tʼajaʼ nixéʼ (Mat. 26:56).

3. a) ¿Jaleʼ ti yab in tomnál ki belaʼ kʼal wawáʼ ti kwetémtal? b) ¿Jantʼoj neʼets ki exóbnaʼ al axéʼ xi exobintaláb?

³ Wawáʼ jayej kwaʼal ku kʼwajiy tʼajtʼóm ti kwéntaj. Yab jaykʼiʼ i léʼ ku owméj kʼal a Jehová. Pero jayej kwaʼal ki tʼilaʼ abal u wálbidh, jaxtám junchikíl neʼets ki léʼnaʼ ki tʼajaʼ jawaʼ yab tekedh  (Rom. 5:12; 7:​21-23). Walám yab ki tsalpay ani tam ki tʼajaʼ ti kwéntaj u kʼwajatits tin tamét jun i takaxtaláb ani walám ki atsʼaʼ abal yab neʼets ki kuxuy. Max yab i léʼ ki kʼibchij a Jehová ani a Jesús, kwaʼal ku kʼwajiy tʼajtʼóm ti kwéntaj ani yab ki ukʼchiy jawaʼ in uluw a Jesús. Nixéʼ jats an tsalap axi in léʼ tu ku exóbchij axéʼ xi exobintaláb. Okʼox neʼets ki exóbnaʼ kʼal jantʼoj in tomnál ki lej tʼajaʼ ti kwéntaj, jayej neʼets ki tsuʼuw jantʼiniʼ ki watʼenchij jun i takaxtaláb. Tin taltal neʼets ki exóbnaʼ jantʼoj kwaʼal ki tʼajaʼ abal etsʼey ku kʼwajiy tʼajtʼóm ti kwéntaj.

¿KʼAL JANTʼOJ KWAʼAL KU KʼWAJIY TʼAJTʼÓM TI KWENTAJ?

4, 5. ¿Jaleʼ ti kwaʼal ku kʼwajiy tʼajtʼóm ti kwéntaj abal yab ki tʼajaʼ jun i walabtaláb belits abal yab lej púlik?

⁴ Waʼats talchik i walabtaláb axi yab lej púlik, belits antsanáʼ neʼets kin ejtow tu ku owmedhaʼ kʼal a Jehová ani in éjtowal tu ku tʼajaʼ abal ku walbin.

⁵ Patal i tametnál i takaxtaláb ani patal i yéjenchalej ku tʼójon kʼal jun jantʼoj, jaxtám lej pílchik an takaxtaláb axi awits ki tamétnaʼ. Walám talchik kʼwajat in tsápnanchal yab kin tʼajaʼ jun i walabtaláb lej kidháb, ejtíl ka kwatsiy kʼal jitaʼ kʼal axi yab pel in tomkíl. Kʼeʼatchik kʼwajat in tsápnanchal yab ka ubátʼin kʼal in iniktal ani yab kin tsuʼuw i pornografía. Waʼats axi kʼwajat in tsápnanchal yab kin nitsʼbiy jawaʼ u lej tejwamél ban xeʼtsintaláb, ejtíl ti tsákulom, ti tsʼejnom o kin tʼajaʼ jawaʼ in léʼ. Jaxtám a Santiago in uluw abal pel i kwetém wálbidh leʼnomtal axi tu nixoknál ani tu kʼámbiyal abal ku walbin (Sant. 1:14).

6. ¿Jantʼoj alwaʼ ki exlaʼ?

⁶ ¿A exlál tatáʼ jantʼoj in éjtowal ti tʼajaʼ abal ki walbin? Lej kʼakʼadh max ki tsalpay abal yab jaykʼiʼ neʼets ku ijkan al jun i takaxtaláb. Yab ki tsalpay abal u lej tsapik ani abal yab jaykʼiʼ neʼets ku ukʼpin (1 Juan 1:8). Jaxtám a Pablo in uluw abal «ma jitaʼ in kwaʼal tsapik in bélomtal kwaʼal kin lej béletnaʼ tin baʼ abal yab jayej ka walbin» (Gál. 6:1). Lej alwaʼ ki tsalpay jantʼoj jats axi in éjtowal kin tʼajaʼ abal ku walbin ani jantʼoj i yéjenchalej ki tʼajaʼ wawáʼ (2 Cor. 13:5).

7. ¿Jantʼoj jats axi kwaʼal ki béletnaʼ más? Ka olnaʼ jun i tʼiplab.

⁷ Max i exlálits jantʼoj in éjtowal kin tʼajaʼ abal ku walbin, ¿jantʼoj kwaʼal ki tʼajaʼ? Kwaʼal ki béletnaʼ más ti baʼ. Ki tsalpay kʼal jawaʼ u watʼelak ti biyál. An bichowchik axi  kʼwajatak alwaʼ tonidh kwaʼalak kin lej alwaʼ béletnaʼ an wiʼleb, ¿jaleʼ? Kom tanáʼ ti awitsak ka otsanchat kʼal an pojkax. Wawáʼ jayej kwaʼal ki lej tʼajaʼ ti kwéntaj jantʼoj awits kin tʼajaʼ abal ku walbin ani ki lej béletnaʼ ti baʼ (1 Cor. 9:27).

JANTʼINIʼ I ÉJTOWAL KI BÉLETNAʼ TI BAʼ

8, 9. ¿Jantʼoj kwaʼalak kin tʼajaʼ an kwitól axi ti Proverbios capítulo 7 abal yab ka walbin? (Proverbios 7:​8, 9, 13, 14, 21).

⁸ ¿Jantʼoj i éjtowal ki tʼajaʼ abal yab tu ku ataʼ jun i takaxtaláb? Ki tsuʼuw jantʼoj tu exóbchal Proverbios capítulo 7. Tanáʼ u kaw tin kwéntaj jun i kwitól axi walbin kom kwatsiy kʼal jun i mimláb axi yab pelak in kʼimádhil. An versículo 22 in ulal abal axéʼ xi kwitól kʼalej jun dhúbatkʼij kʼal an mimláb. Pero an versículos axi watʼenekits in ulal abal an kwitól in tʼajaʼ yan jantʼoj okʼxidh ka walbin. Kʼayúm kʼayúm tujey ti utel kʼal an walabtaláb.

⁹ ¿Jantʼoj jats axi in tʼajaʼ? Okʼox, nixéʼ xi kwitól kʼalej ti bélal akal ani watʼey utat juʼtáj tu kubél nixéʼ xi uxum (ka ajiy Proverbios 7:​8, 9). Talbél, tam ti an kwitól in tsuʼuw nixéʼ xi mimláb, yab nixkʼin, in jilaʼ ka tsʼutsʼbayat. An mimláb in uluw abal kʼalnek kin tʼajaʼ jun i tsʼakchixtaláb. Walám in uluw nixéʼ abal an kwitól kin tsalpay abal yab pelak jun i mimláb axi pojkax (ka ajiy Proverbios 7:​13, 14, 21). Max an kwitól yabak in tʼajámal nixéʼ, yab neʼetsak ka atáj kʼal an leʼnomtaláb ani yab neʼetsak ka walbin.

10. Ejtíl an kwitól axi ti Proverbios, ¿jantʼoj awits kin tʼajaʼ abal ku walbin?

¹⁰ Jitakits tam epchal axi in tʼójonchal a Jehová in éjtowal ka walbin. Walám kin tʼajaʼ jun i walabtaláb axi lej púlik ani talbél kin tsalpay abal yab in tʼajaʼ ti kwéntaj ani watʼey jun dhúbatkʼij. Walám kin uluw: «Yab u exlál jantʼiniʼ ti watʼey». Pero max ka kʼwajiy kin tsalpay jantʼiniʼ ti ijkan kʼal nixéʼ an walabtaláb, neʼets kin tʼajaʼ ti kwéntaj abal in tʼajaʼ yan jantʼoj okʼxidh ka walbin. Walám in junkuw i atikláb axi yab in tomnálak kin junkuw, walám in metʼálak ti internet jantʼoj axi yab in tomnál, o walám kʼalej juʼtáj ti waʼatsak i atiklábchik axi in tʼajál jantʼoj kidháb. Walám yabáts in ólonchalak a Jehová, yabáts in ajiyalak an Biblia, yabáts u kʼalelak kʼal an tamkuntaláb ani yabáts u kalelak ti ólnom. Neʼets kin tʼajaʼ ti kwéntaj abal yab patal watʼey jun dhúbatkʼij, antsanáʼ jantʼiniʼ an kwitól axi ti Proverbios.

11. ¿Jantʼoj kwaʼal ki tʼajaʼ abal yab ku walbin?

¹¹ ¿Jantʼoj i exobnál? Yab expidh neʼets ki pojkaʼ an walabtaláb, jayej neʼets ki tsápnanchij abal yab ki tujchij ki tʼajaʼ jantʼoj axi tu ku neʼdhaʼ abal ku walbin. Jats in uluw a Salomón tam tin tʼilaʼ an tʼilab tin kwéntaj an kwitól ani an mimláb axi yab tekedh in xéʼtsintal. Jaxtám in uluw: «Yab ki kʼalej tin belil nixéʼ an uxum» (Prov. 7:25). Jayej in uluw: «Yab ki utey kʼal jajáʼ, nibal ki kʼalej tin kʼimáʼ» (Prov. 5:​3, 8). Max yab i léʼ ku walbin, kwaʼal ku nixkʼin kʼal patal jawaʼ in éjtowal kin tʼajaʼ abal ku walbin. b Waʼats talchik i tʼajbiláb axi an epchalchik yab in tsuʼtal kidháb, pero walám wawáʼ yab kwaʼal ki tʼajaʼ kom in éjtowal tu ku tʼajaʼ ku walbin (Mat. 5:​29, 30).

12. ¿Jantʼoj in takuy a Job, ani kʼal jantʼoj ti neʼetsak ka tólmiyat abal ka kʼwajiy tʼajtʼóm ti kwéntaj? (Job 31:1).

¹² Max yab i léʼ ki tʼajaʼ jun i walabtaláb, kwaʼal ki punuw ti ejatal in tʼiplábil a Job.  Jajáʼ in kwaʼalakits tsalpadh tin ichích abal yab neʼetsak kin metʼaʼ nibal jun i mimláb kʼal jun i kidháb tsalap. Jajáʼ in uluw: «In tʼilmámadhits kʼal u wal» (ka ajiy Job 31:1). In putuw kʼal in káwintal, yab jaykʼiʼ in kʼambiy in kʼimádhil. Wawáʼ jayej kwaʼal ki alwaʼ tsalpay abal yab ki tʼajaʼ nibal jantʼoj axi kin tʼajaʼ ku ijkan al jun i walabtaláb.

13. ¿Jaleʼ ti kwaʼal ki lej tʼajaʼ ti kwéntaj kʼal jawaʼ i tsálpayal? (Ka tsuʼuw jayej an imágenes).

¹³ Jayej kwaʼal ki tʼajaʼ ti kwéntaj kʼal jantʼoj i tsálpayal (Éx. 20:17). Waʼats axi in tsálpayal abal yab jantʼoj in kwaʼal max in kwaʼal tin tsalápil jun i walabtaláb, expidh yab kin tʼajaʼ. Pero kʼwajatchik ukʼpidh, kom tam jun kin lej tsalpay kʼal jun i walabtaláb más neʼets kin léʼnaʼ kin tʼajaʼ. Tam junchikíl, nixéʼchik xi tsalap u ulel tin kwetémtal, ¿jantʼoj kwaʼal ki tʼajaʼ? Kwaʼal ki kaldhaʼ dhúbatkʼij ti ókʼ, ani kwaʼal ki ódhaʼ i tsalap axi alwaʼ. Antsanáʼ yab neʼets ka púwey jun i kidháb leʼnomtaláb ti ichích, kom talbél neʼets ki atsʼaʼ más tʼojláb ki tixkʼaʼ ani neʼets tu ku tʼajaʼ ku walbin (Filip. 4:8; Col. 3:2; Sant. 1:​13-15).

14. ¿Jantʼoj más neʼets tu ku tólmiy abal yab ku ijkan ban walabtaláb?

¹⁴ ¿Jantʼoj más in éjtowal tu ku tólmiy abal yab ku ijkan ban walabtaláb? Kwaʼal ki lej belaʼ abal expidh neʼets ku kʼwajiy alwaʼ max ki bélkaʼ jawaʼ tu uchál a Jehová. Junchikíl walám neʼets ki atsʼaʼ kʼibat ki tʼajaʼ abal i tsalápil ka kʼwajiy junat kʼal jawaʼ tu konchal a Jehová abal ki tʼajaʼ, pero max ki tsápnanchij neʼets ku kʼalej alwaʼ.

15. ¿Jaleʼ tin tomnál ki koʼoy i alwaʼ tsalap?

¹⁵ Kwaʼal ki tsápnanchij abal ki koʼoy i alwaʼ tsalap, ki pojkaʼ jawaʼ kidháb ani ki kulbétnaʼ jawaʼ alwaʼ (Amós 5:15). Max ki tʼajaʼ antsanáʼ, nixéʼ neʼets tu ku tólmiy abal ki tʼajaʼ jawaʼ tekedh ani yab ku utey kʼal an walabtaláb, ani neʼets ku kʼwajiy más tsapik abal ki tamétnaʼ jun i takaxtaláb axi ka ulkan jun dhúbatkʼij.

16. ¿Jaleʼ ti lej alwaʼ ku kʼwajiy tʼojlidh kʼal jawaʼ tu konchámal a Jehová ki tʼajaʼ? (Ka tsuʼuw jayej an imágenes).

¹⁶ ¿Jantʼoj i éjtowal ki tʼajaʼ abal ki koʼoy i  alwaʼ tsalap? Ki tsápnanchij abal etsʼey ku kʼwajiy tʼojlidh kʼal jawaʼ a Jehová tu uchamal ki tʼajaʼ. Tam u kʼwajat ti tamkuntaláb o ti ólnomtaláb yab neʼets ki atsʼaʼ kʼibat ki tamétnaʼ jun i takaxtaláb, kom u kʼwajat utat kʼal a Jehová (Mat. 28:​19, 20; Heb. 10:​24, 25). Max ki ajiy an Biblia, ki exóbnaʼ ani ki lej tsalpay kʼal jawaʼ i ajiyal, nixéʼ neʼets tu ku tólmiy abal ki kʼanidhaʼ jawaʼ alwaʼ ani ki pojkaʼ jawaʼ yab alwaʼ (Jos. 1:8; Sal. 1:​2, 3; 119:​97, 101). Ani ki tʼilaʼ abal a Jesús tu pidhaʼ axéʼ xi olchixtaláb: «Kit ólon abal yab ti ataʼ an tenekláb» (Mat. 26:41). Tam i jolkʼál i kʼij abal ki ólonchij a Jehová, nixéʼ tu lej tólmiyal ani más neʼets ki léʼnaʼ ki kulbedhaʼ (Sant. 4:8).

ETSʼEY KU KʼWAJIY TʼAJTʼÓM TI KWÉNTAJ

17. ¿Kʼal jantʼoj jats axi más in koʼoy kin lubaʼ a Pedro?

¹⁷ Walám neʼets ki ejtow ki watʼenchij talchik i takaxtaláb, pero walám waʼats talchik axi neʼets ki atsʼaʼ más kʼibat. Játs in watʼaʼ an abatwálej Pedro. Jajáʼ in tsʼejnaʼ an atiklábchik, jaxtám jun a kʼicháj ma in uluw ox i kalel abal yab in exlálak a Jesús (Mat. 26:​69-75). Pero talbél in tejwamédhaʼ yan i iniktaláb tin tamét an Sanedrín, ani walám ki tsalpay abal yabáts u jikʼélak (Hech. 5:​27-29). Pero talchik i támub talbél junílekʼij atáj kʼal an jikʼeltaláb ani ma in jilaʼ ti kʼapul kʼal junchik i epchaláb axi yab pelak i judíos (Gál. 2:​11, 12). Tanáʼ tejwaméj juníl abal junchikíl u atábak kʼal an jikʼeltaláb. Yab i exlál max jun a kʼicháj in ejtow kin ataʼ an jikʼeltaláb.

18. ¿Jantʼoj in éjtowal ka watʼey kʼal talchik i takaxtaláb?

¹⁸ Wawáʼ jayej walám kwaʼal ki lupchij kʼal jun i takaxtaláb axi i kwaʼalak ti biyál, axi walám i tsalpay abal i atamalits. Jun i epchal inik in uluw: «U neʼdhálakits 10 i támub ti yab u tsuʼtalak i pornografía ani u tsálpayalak abal u atamalits, pero an leʼnomtaláb tanáʼ kʼwajatak. Pelak ejtíl jun i koʼnél lej pojkax axi in léʼak ti kin odhnaʼ». Pero axéʼ xi epchal yab in walbaʼ tin baʼ. In exbay abal walám kwaʼal kin tsápnanchij chudhél chudhél tin nakél in ejatal. Lej tolmiyámej kʼal in kʼimádhil ani kʼal an ókʼnomchik abal yab ka atáj kʼal an pornografía.

19. ¿Jantʼoj i éjtowal ki tʼajaʼ max waʼats jun i takaxtaláb axi i atsʼál tʼojláb ki ataʼ?

 ¹⁹ Max waʼats jun i takaxtaláb axi i atsʼál tʼojláb ki ataʼ, ¿jantʼoj i éjtowal ki tʼajaʼ abal yab tu ku neʼdhaʼ ku walbin? Ki bélkaʼ jawaʼ in uluw a Jesús, ku kʼwajiy tʼajtʼóm ti kwéntaj. Belits max i tsálpayal abal yab neʼets ku ijkan, ki áynanchij ki béletnaʼ ti baʼ ani yab ki uténchij jun i takaxtaláb (1 Cor. 10:12). Ka áynanchij ka eyendhaʼ patal jawaʼ ti tolmiyámal abal yab ki ijkan ban walabtaláb. Proverbios 28:14 in ulal: «An atikláb axi etsʼey kʼwajat tʼajtʼóm ti kwéntaj, neʼets ka kʼwajiy kulbél» (2 Ped. 3:14).

¿JALEʼ TI LEJ ALWAʼ KU KʼWAJIY TʼAJTʼÓM TI KWÉNTAJ?

20, 21. a) ¿Jantʼoj tam alwaʼtaláb i bátsʼuwal max ku kʼwajiy tʼajtʼom ti kwéntaj? b) ¿Jantʼoj neʼets kin tʼajaʼ a Jehová max wawáʼ ki tsápnanchij ki tʼajaʼ jawaʼ ki ejtow? (2 Corintios 4:7).

²⁰ Neʼets ki batsʼuw yan i alwaʼtaláb max ku kʼwajiy tʼajtʼóm ti kwéntaj abal yab ku ijkan ban takaxtaláb. Jitaʼchik in tʼajál jun i walabtaláb expidh neʼets kin atsʼaʼ kulbél jun wéʼ, pero jitaʼchik in belkál a Jehová neʼets ka kʼwajiy kulbél abal etsʼey (Heb. 11:25; Sal. 19:8). A Jehová tu tsʼejkaʼ abal ki tʼajchij in kulbétal (Gén. 1:27). Expidh max ki tʼojonchij a Jehová neʼets ki ejtow ki koʼoy koyat i tsalápil ani neʼets ki ejtow ku kʼwajiy abal etsʼey (1 Tim. 6:12; 2 Tim. 1:3; Jud. 20, 21).

²¹ Chubax «abal i anam tʼuʼúl yab u lej tsapnél» abal kin tamétnaʼ jun i takaxtaláb, pero a Jehová neʼets ka kʼwajiy tanáʼ abal tu ku tólmiy (ka ajiy 2 Corintios 4:7). Axéʼ xi versículo tu exóbchal abal a Dios jats axi tu pidhál i tsapláb, pero wawáʼ kwaʼal ki tsápnanchij chudhél chudhél abal yab ku ijkan kʼal jun i walabtaláb. Max wawáʼ ki tʼajaʼ patal jawaʼ ki ejtow abal ki kuxuy an takaxtaláb, a Jehová neʼets tu ku pidhaʼ in tsap (1 Cor. 10:13). A Jehová neʼets tu ku tólmiy abal ku kʼwajiy tʼajtʼóm ti kwéntaj ani yab tu ku ataʼ nibal jun i takaxtaláb.