Isaías 60:1 in ulal: «Kit kubiy mimláb, an tajaxtaláb ulnek kʼal tatáʼ, a Jehová neʼets kin tʼajaʼ abal kit lej tajkʼan». An capítulo axi kuxlab in tejwamedhál abal «an mimláb» in tʼipoyal a Jerusalén (Is. 60:14; 62:​1, 2). a A Jerusalén in abatnálak an bichow Israel. Tam, ¿jaykʼiʼ ti kubiy a Jerusalén ani tujey in tejwamedhál i tajaxtaláb? ¿Walám axéʼ xi kʼej kaw neʼetsej ka putun axi taʼtal a kʼicháj? Ki tsuʼuw an tokʼtsixtaláb abal axéʼchik xi konowixtaláb.

¿Jaykʼiʼ ti kubiy a Jerusalén ani tujey in abnál i tajaxtaláb? An judíos kʼwajiy ti Babilonia 70 i támub jantʼiniʼ i wikʼnél, al nixéʼ xi kʼij an templo axi ti Jerusalén kʼwajatak lej odhnach. Pero tam ti an medos ani an persas in otsaʼ Babilonia, an israelitas in ejtowchik ka wichiy junílekʼij ti Jerusalén, abal kin tsab tsʼejkaʼ an templo ani kin kʼakʼnaʼ junílekʼij a Jehová (Esd. 1:​1-4). Ban támub 537 okʼxidh ka waʼtsin a Cristo talchik i judíos wichiy ti Jerusalén (Is. 60:4). Jajáʼchik in tujchij junílekʼij kin pidhaʼ i tsʼakchixtaláb a Jehová, kin tʼajaʼ an ajib ani kin tsab tsʼejkaʼ an templo (Esd. 3:​1-4, 7-11; 6:​16-22). Nixéʼ in tʼajaʼ abal ti Jerusalén junílekʼij ka waʼtsin i tajaxtaláb ani ka kʼakʼnáj a Jehová jantʼiniʼ tin tomnál. Axéʼchik xi judíos in tólmiy an bichowchik abal ka kalej ban yikʼwaxtaláb.

Pero axéʼ xi kʼej kaw yab putun abal etsʼey, kom talbél yan i israelitas yab in áynanchij kin bélkaʼ a Jehová (Neh. 13:27; Mal. 1:​6-8; 2:​13, 14; Mat. 15:​7-9). Ani talbél talchik i atikláb yab in batsʼuw an Mesías, a Jesucristo (Mat. 27:​1, 2). Ban támub 70, an templo axi ti Jerusalén talabedháj.

A Jehová in ókʼxidh ulúmalits jawaʼ neʼetsak ka watʼey kʼal nixéʼ xi bichow (Dan. 9:​24-27). Axéʼ in tejwamedhál abal a Jehová yab in aychalak abal an israelitas kin putuw an kʼej kaw axi kʼwajat ban capítulo 60 in kʼál a Isaías.

¿Walám axéʼ xi kʼej kaw neʼetsej ka putun axi taʼtal a kʼicháj? Aníts, pero xowéʼ an mimláb in tʼipoyal «an Jerusalén axi kʼwajat ti éb». ¿Ani jitaʼ játs an Jerusalén axi ti éb? Pel in bichowil a Dios axi kʼwajat ti éb, an ángeles ani patal axi u kʼwajíl tanáʼ. An abatwálej Pablo in uluw axéʼ tin kwéntaj an mimláb: «Jáʼits an mimláb abal patal wawáʼ» (Gál. 4:26). In tsakámil axéʼ xi mimláb pel a Jesús ani an 144.000 axi takudhchik abal ka kʼalej ti éb, tanáʼ jayej ajidh an abatwálej Pablo. Jajáʼchik jayej u bijiyáb «an takudhchik kʼal a Dios» (1 Ped. 2:9; Gál. 6:16).

¿Jantʼiniʼ ti kubiy an Jerusalén axi ti éb ani tujey ti tájbax? Nixéʼ ti tajaxtaláb tejwaméj kʼal an tʼojláb axi in tʼajaʼ an epchalchik axi takudh axi u jílkʼonalej tejéʼ tsabál. Ki lej tʼajaʼ ti kwéntaj an kʼej kaw axi kʼwajat ban capítulo 60 in kʼál a Isaías ani ki tsuʼuw jantʼiniʼ ti putun kʼal jajáʼchik.

An takudhchik koʼoy ka kubiy abal kin tʼajaʼ ka waʼtsin i tajaxtaláb, jajáʼchik ejtíl max kʼwajatak al an yikʼwaxtaláb kom tam ti tsemets an abatwálejchik, tujey ti bukʼuwáb i exobchixtaláb axi yab chubax (Mat. 13:​37-43). Jayej, ejtíl max jajáʼchik kʼwajatak wikʼat kʼal an kʼakʼnaxtaláb axi yab chubax ani ti 1914 tújeychik ti walkáb (Mat.  13:​39, 40). Ani ti 1919 tújeychik ti tájkʼanal kom in tujchichik kin olnaʼ an alwaʼ kaw. b Tin puwél an tsabál útenek yan i atikláb al axéʼ xi tajaxtaláb, ani kʼal axéʼ xi púlik múkeʼ jayej waʼats axi takudhchik abal ka kʼalej ti éb. Isaías 60:3 in ulal abal jajáʼchik neʼets kin tʼajaʼ ti tsʼalej tiwaʼ ti éb (Apoc. 5:​9, 10).

Ban kʼicháj axi taʼtal an takudhchik neʼets kin tejwamédhaʼ más an tajaxtaláb. Tam an takudhchik ka tsemets neʼets ka kʼalej ti éb ani neʼets ka tólmixin jantʼiniʼ i tsʼalej ani i sacerdotes (Apoc. 14:1; 21:​1, 2, 24; 22:​3-5).

An takudhchik neʼets ka tʼójon lej tsapik abal ka putun an kʼej kaw axi ti Isaías 60:1 (ka jumbiy kʼal Isaías 60:​1, 3, 5, 11, 19, 20 ani kʼal Apocalipsis 21:​2, 9-11, 22-26). Ti biyál an bichow Jerusalén jats juʼtáj tu ábatnomak an tsʼalej axi ti Israel. Xowéʼ ta kʼicháj an Jerusalén axi ti éb ani a Jesucristo játs axi neʼets kin abatnaʼ tejéʼ tsabál. ¿Jantʼoj i éxbayal tam a Apocalipsis in ulal abal an Jerusalén axi ti éb ani a Jesucristo, kʼwajat ti paʼíl tejéʼ tsabál? In léʼ kin uluw abal neʼets kin tólmiy an atiklábchik abal kin tsuʼuw an tajaxtaláb ani jayej neʼets kin jékʼondhaʼchik kʼal an walabtaláb ani an tsemláj (Apoc. 21:​3, 4, 24). Jayej neʼets ka tólmixin abal ka putun an kʼej kaw axi in uluw a Isaías ani kʼeʼat i kawlomej (Hech. 3:21). Axéʼ xi tʼojláb tujey tam ti a Jesucristo tujey ti ábatnom ti éb ani neʼets ka taʼpan tam ka taley an Mil i Támub tam kin wíchbanchij in Éyaltal a Jehová.