An epchalchik axi ti Betel in neʼdhálakits jun i támub in tsʼejkál an atáj juʼtáj ti neʼetsak ka jilkʼon an estación de radio WBBR ti Staten Island (Nueva York). Okʼox wejan an tsabál, talbél tsʼejkáj an atáj juʼtáj ti neʼetsak ka kʼwajiy an tʼojnal ani tsʼejkáj kʼeʼat i atáj juʼtáj ti neʼetsak ka kʼwajiy an estación de radio. Talbél tam tin talabédhaʼchik kin tsʼejkaʼ an atáj, an epchalchik in tujchij kin tʼojojoy an estación de radio, pero waʼtsin kʼeʼat i kʼibataláb.

An kʼaʼál tʼojláb axi kwaʼalak ka tʼajan játs, abal kwaʼalak ka kuban jun i antena axi in kwaʼalak 91 metros in nakém, ani talbél jayej kuban tsab i antena axi in tʼekʼém 61 metros. Tam ti kʼaʼál, an epchalchik yab in ejtow kin kubaʼ, pero in belaʼchik abal neʼetsak ka tolmiyat kʼal a Jehová ani talbél in ejtow kin putuw kʼal an tʼojláb. Jun i epchal axi in bij Calvin Prosser in uluw axéʼ: «Max i éjtowalak ki tʼajaʼ an tʼojláb ti kʼaʼál, neʼetsak ki uluw: ‹Ka tʼajaʼchik ti kwéntaj jawaʼ i tʼajaʼ›». Pero an epchalchik in exlálak abal pel kʼal a Jehová ti tolmiyámej. Pero neʼetsak ka waʼtsin más i kʼibataláb.

Al nixéʼ xi kʼij, itej ti tujének ka eyendhaʼ an radio, jaxtám lej kʼíbatak kin elaʼchik patal jawaʼ neʼetsak ka eyan. An epchalchik in elaʼ jun i radio axi yabáts ít ani in tsalpaychik abal neʼets ka eyan. In eyendhaʼchik jantʼiniʼ i microfono jun i biyál teléfono ani in exaʼchik kin eyendháj ti febrero. Jajáʼchik in léʼak kin exlaʼ max neʼets kin eyendhaʼ an radio, jaxtám kʼwajiychik ti ajat. Jun i epchal axi in bij Ernest Lowe in ulal abal biyat kʼwajatak ti ajatchik, tawnaʼ ban teléfono kʼal an Juez Rutherford. b  An epchal Rutherford kʼwajatak in atsʼál an radio ti Brooklyn, in owem pelak jun i 25 kilómetros ma juʼtáj ti kʼwajatak an estación de radio.

An ecphal Rutherford in uluw: «Ka tepdhaʼchik nixéʼ, kom atsʼat ejtíl max kʼwajat ti péjel an mitsuʼ». An epchalchik wéʼ tidhebéj ani in tepdhaʼ an radio pero kulbéjchik kom in exlaʼ abal neʼetsak kin ejtow kin eyendhaʼ.

Ti 24 a febrero ti 1924 tujey ti eyendháb an radio. An epchal Rutherford in uluw abal nixéʼ an estación neʼetsak ka eyendháj «abal ka olnáj in Éyaltal a Dios». Jayej in uluw abal neʼetsak kin tólmiy an atikláb kin exbay jantʼoj in ulal an Biblia tin kwéntaj an xeʼtsintaláb ani jaleʼ ti kʼwajat ti watʼel yan jantʼoj tin puwél an tsabál.

Axéʼ xi kʼaʼál programa in atsʼaʼ yan i atikláb. Ani al 33 i támub an epchalchik in eyendhaʼ axéʼ xi estación de radio abal kin olnaʼ an alwaʼ kaw.

Ti julio ti 1924, an exóbalchik kʼal an Biblia tamkun al jun i púlik tamkuntaláb ti Columbus (Ohio). Chich yan i atikláb axi tin puwel an tsabál ani bináj i tʼilomtaláb ti alemán, árabe, francés, griego, húngaro, inglés, italiano, lituano, polaco, ruso, ucraniano ani al talchik i kawintaláb axi u eyendháb ban norte in kʼál a Europa. Talchik i pejach jayej watʼbáj ban radio. Jayej in konoychik abal ka kaldhaʼ ban periódico talchik i pejach in kʼál an púlik tamkuntaláb (Ohio State Journal).

Ti jueves 24 a julio, watʼadh 5.000 axi kʼalej kʼal an púlik tamkuntaláb kalej ti ólnom. In bukʼuwchik utat 30.000 libros ani in tujuwchik miles i exobintaláb kʼal an Biblia. An revista The Watch Tower in uluw abal nixéʼ a kʼicháj «játs axi más kʼijidh».

Ti viernes 25 a julio, watʼey jantʼoj lej kʼijidh ti púlik tamkuntaláb. An epchal Rutherford in ajiy jun i carta juʼtáj tin ulalak abal an kʼakʼnaxtaláb axi yab chubax kʼwajatak in olnal i janamtaláb. Nixéʼ xi carta in ulalak abal an eyalchik, an belomtaláb axi yab chubax ani an atiklábchik axi in kwaʼal jun in ey, kʼwajat in kʼámbiyal an atiklábchik. Jayej nixéʼ xi carta in ulalak abal axéʼ xi atiklábchik kʼwajat in tólmiyal an «Sociedad de Naciones». An exóbalchik kʼal an Biblia in yejenchij yan i iniktaláb abal kin ólchij an atiklábchik axéʼ xi kaw.

 An revista The Watch Tower in olnaʼ jantʼiniʼ ti tolmiyat an epchalchik kʼal an púlik tamkuntaláb: «Axéʼ xi mudhél i epchal axi chich kʼal an púlik tamkuntaláb, xowéʼ más tsapik in bélomtal, neʼets kin ejtow kin kuxuy patal jawaʼ ka uluwat tin kwéntaj jajáʼchik». An epchal Leo Claus, axi kʼalej kʼal axéʼ xi púlik tamkuntaláb in uluw: «Tu lej kanatbedháj axéʼ xi púlik tamkuntaláb, ani i léʼakits ki ólnaʼ an alwaʼ kaw».

Ti octubre, yan i epchalchik in tujchiy kin bukʼuw millones i copias in kʼál an cartas axi in ajiy an epchal Rutherford, axi in bij Eclesiásticos denunciados. Ti Cleveland (Oklahoma), an epchal Frank Johnson xeʼtsin in bukʼuwal an tratados. In bukʼuw lej dhubat jaxtám koʼoy kin aychij an epchalchik kʼal axi neʼetsak ka ikʼtat. Pero yabáts in ejtow ti aychix ban bel kom kʼwajatak ti aliyáb kʼal an atiklábchik axi u tsakúl, ani tam jajáʼ kʼalej ti tsínkʼonal al jun i iglesia. Yab waʼatsak jitaʼ ban iglesia, jaxtám jajáʼ in jilaʼ junchik i tratado ban laktem, ma in jilaʼ jun i tratado ban Biblia axi u eyendhábak ban iglesia ani kalej dhúbatkʼij. In bájuyej ka kʼalej al tsab i iglesia ani tanáʼ jayej in jilaʼ i tratados.

A Frank wichiy dhubat juʼtáj ti uchan abal kin aychij an epchalchik. Jajáʼ tsinkʼon al jun i gasolinera abal yab ka elan kʼal an atikláb kʼal axi kʼwajatak ti aliyáb. Jajáʼchik watʼey utat, pero yab tsuʼtat. Tam ti watʼenekits axéʼ xi atiklábchik, jayej ulits an epchalchik ani a Frank kʼalej kʼal jajáʼchik.

A Frank in uluw axéʼ: «Tam tu watʼey tin tamét óxlom an iglesia i tsuʼuw watʼadh cincuenta i atikláb, talchik kʼwajatak in ajiyal an tratado, ani kʼeʼatchik kʼwajatak in ólchal an okʼlek kʼal an iglesia. Wéʼ ku odhnáj pero yab jantʼoj i watʼaʼ. I lej kʼákʼnanchij a Jehová kom tu béletnaʼ, ani yab in jilaʼ abal ku odhnáj».

Al kʼeʼatchik i bichow axi pakdhaʼ, an exóbalchik kʼal an Biblia in tejwamédhaʼ i iniktaláb ban olnomtaláb. Jun i tʼiplab, ti norte a Francia, an epchal Józef Krett in ólchij an alwaʼ kaw i atiklábchik axi talak ti Polonia, jajáʼchik u tʼojnálak ban minas. Uchan an epchal Józef abal kin bínaʼ jun i tʼilomtaláb axi in bij: «Weʼits neʼets ka edháj an atiklábchik axi tsémenek. Tam ti an epchalchik xeʼtsin in bukʼuwal an kanixtaláb, jun i sacerdote in uchaʼ an atiklábchik abal yab ka kʼalej. Pero yabchik in bélkaʼ jawaʼ uchan kʼal an sacerdote. Tamkunchik watʼadh 5.000 i atikláb, jayej an sacerdote kʼalej. An epchal Józef in uchaʼ an sacerdote abal in éjtowalak kin olnaʼ jawaʼ in belálak, pero jajáʼ yab in léʼnaʼ. An epchal Józef in bukʼuw patal an publicaciones ani in olnaʼ abal yan i atiklábchik in léʼak kin exlaʼ tin kwéntaj an Biblia (Amós 8:11).

An epchal Claude Brown kʼalej ti África abal kin olnaʼ an alwaʼ kaw, al an bichow axi xowéʼ u exláb ti Ghana. An tʼilomtaláb ani an publicaciones axi an epchal in bukʼuw, in tólmiy abal yan atiklábchik kin exlaʼ an alwaʼ kaw al nixéʼ xi bichow. Jun i kwitól axi kʼwajatak ti exóbal ani in bij John Blankson, in atsʼaʼ jun kʼal an tʼilomtalábchik axi in bínaʼ an epchal Brown, ani dhúbatkʼij in tʼajaʼ ti kwéntaj abal in elaʼ an chubaxtaláb. Jajáʼ in ulal: «Tin lej kanatbedháj jawaʼ u exobnaʼ ani u lej kulbetnálak ku tʼilchij u juntal exóbal jawaʼ kʼwajatak u exóbnal».

Jun a kʼicháj, a John kʼalej al jun i iglesia abal kin konoy an sacerdote tin kwéntaj an Trinidad, jajáʼ in exlálakits abal an Biblia yab in olnál ni jantʼoj tin kwéntaj nixéʼ. Tam, an sacerdote tsákuy ani in uchaʼ: «¡Tatáʼ yab a belál kʼal a Cristo! ¡A tólmiyal an Diablo! ¡Yabáts kit wichiy tejéʼ!».

 Tam ti wichiy tin kʼimáʼ, a John in abchij jun i carta an sacerdote ani in uchálak abal ka tamkunchik, ani tanáʼ kin olnaʼ an sacerdote jaleʼ tin belálak kʼal an Trinidad. An sacerdote in uchaʼ a John abal ka kʼalej kin tsuʼuw an maestro axi in okʼnálak an escuela juʼtáj jajáʼ u tʼojnálak. Tanáʼ an maestro in konoy a John max jajáʼyej in dhúchunchij an sacerdote jun i carta.

A John in tókʼtsiy an maestro ani in uchaʼ: «Aníts».

An maestro in uchaʼ a John abal kin dhúchunchij junílekʼij jun i carta an sacerdote abal kin konchij ka pakwlanchat. Tam, a John in dhúchunchij an sacerdote axéʼ xi kaw:

«An maestro tin uchaʼ abal tu konchij abal ti kin pakwlanchij, pero expidh neʼets ku tʼajaʼ max tatáʼ ka uluw abal yab chubax jawaʼ kʼwajat a olnál».

An maestro in jikʼpaʼ jawaʼ in dhuchaʼ a John ani in uchaʼ: «¿Játs axéʼ jawaʼ a léʼ ka dhúchunchij?».

«Aníts, játs expidh jawaʼ u léʼ ku dhúchunchij».

An maestro in uluw: «Max játs jawaʼ a léʼ ka tʼajaʼ, tam neʼets kit kedhmayat ban escuela. Max tatáʼ ka áynanchij kʼal nixéʼ xi tsalap, yab neʼets ka ejtow ka áynanchij ti tʼojnal al axéʼ xi escuela, kom an eyal in tólmiyal an belomtaláb axi in olnál an sacerdote».

Tam a John tokʼtsin: «Tatáʼ tu exobchámal abal tam yab ki exbay jantʼoj, wawáʼ i éjtowal ki konoy jantʼoj játs axi a léʼ tu ku exóbchij, ¿yab a tʼilál?».

An maestro tokʼtsin: «Aníts, u tʼilál».

A John in uluw: «Maestro, játs jawaʼ watʼey kʼal an sacerdote. Jajáʼ kʼwajatak tu exóbchal tin kwéntaj an Biblia ani nanáʼ u tʼajchij jun i konowixtaláb. Jaxtám u tsalpayal abal yab in tomnál ku konchij abal ti kin pakwlanchij, kom expidh u tʼajchij jun i konowixtaláb».

A John in áynanchij ti tʼojnal ban escuela, ani yab in yejenchij kin konchij ka pakwlanchat kʼal an sacerdote.

An revista, The Watch Tower in olnaʼ jantʼoj in atsʼaʼ an epchalchik ban tamub 1924: «Antsanáʼ jantʼiniʼ tin ulal a David, wawáʼ jayej i ulal: ‹Tatáʼ neʼets ti kin pidhaʼ an tsapláb axi u yéjenchal abal kin kʼalej tin pejéx› (Salmo 18:​39, Versión Moderna, 1910). I atsʼámal lej kulbél axéʼ xi támub, kom i tsuʼúmal jantʼiniʼ tu tolmiyámal a Dios, an epchalchik in áynanchamal ti ólnom kʼal yan i kulbetaláb».

Tin taltal an támub 1924, an epchalchik tʼojojon abal kin áynanchij ti ólnom ban radio. Kʼwajbaʼ jun i estación de radio utat ti Chicago. Axéʼ xi estación de radio bíjiyat ti WORD, nixéʼ an kaw in léʼ kin uluw abal kʼwajatak ti olnáb an alwaʼ kaw tin kwéntaj a Dios ban radio. Xowéʼ eyendháj i patʼál axi más alwaʼ, jaxtám an alwaʼ kaw neʼetsak ka atsʼan al i kwenchal axi kʼwajatak lej owél.

Tam ka wenkʼon an támub an ólchixchik kʼal a Jehová neʼetsak kin exbay yan i exobchixtaláb kʼal an Biblia, kom neʼetsak ka wilkʼáj más alwaʼ an capítulo 12 in kʼál a Apocalipsis. Talchik i epchal yab neʼetsak kin batsʼuw axéʼ xi ít exobchixtaláb, pero waʼtsin yan axi in batsʼuw lej alwaʼ. Jajáʼchik neʼetsak kin atsʼaʼ lej kulbél kin exlaʼ jantʼoj kʼwajat ti watʼel tiwaʼ ti éb ani jantʼiniʼ a Jehová kʼwajat in tólmiyal in bichówil tejéʼ tsabál.