AN ISRAELITAS in lej kulbetnálak an ajatláb. An Biblia in olnál tin kwéntaj talchik in tʼojnálil an Jehová axi u tʼénelak ani u ajatak. Waʼats talchik i pejach axi ti Biblia axi tsʼejkadh ejtíl i ajatláb, ejtíl an libros in kʼal an Salmos, El Cantar de los Cantares ani a Lamentaciones. Jun libro axi in bij La música en la vida bíblica (Music in Biblical Life) in ulal abal an Biblia «in olnál abal an israelitas in kulbetnálakchik ti ajat juʼtámakits ka kʼwajiy».

An israelitas in eyendhálak an son. Jajáʼchik in eyendhálak an son abal kin tejwamédhaʼ jantʼiniʼ tin atsʼálak (Is. 30:29). An mimlábchik u ajatak ani u bíxomak tam ka bíjiyat jun i tsʼalej, tam in kʼakʼnálak a Dios ani tam an soldados in atálak jun i pextaláb (Juec. 11:34; 1 Sam. 18:​6, 7; 1 Rey. 1:​39, 40). An israelitas jayej u ajatak tam u tsémelak jitaʼ kom antsanáʼ in tejwamedhálak abal in yajnálak jawaʼ watʼey (2 Crón. 35:25). Jun i enciclopedia in ulal: «An israelitas in lej kulbetnálak ti ajat» (Cyclopedia, de McClintock y Strong).

An tsʼálejchik jayej in kulbetnálak an ajatláb. An tsʼalej Saúl in takuy a David abal kin tʼéney an arpa (1 Sam. 16:​18, 23). Tam ti a David in bajuw ti tsʼalej in tsʼejkaʼ i it eyextaláb abal ti tʼénel, jayej in tsʼejkaʼ i it ajatláb ani in takuy talchik i atikláb abal ka ajatin ban templo (2 Crón. 7:6; Amós 6:5). An tsʼalej Salomón in takuy talchik i inik ani i mimláb abal ka ajatin ti palacio (Ecl. 2:8).

An israelitas in eyendhálak i son abal kin kʼakʼnaʼ a Jehová. Ban templo in kʼal a Jehová waʼatsak 4.000 i atiklábchik axi witʼadhak ti tʼénel, waʼats axi in tʼeneyalak an címbalos, an arpa ani an trompetas (1 Crón. 23:5; 2 Crón. 5:12). Pero yab expidh in eyendhálak an son abal kin kʼakʼnaʼ a Jehová. Jayej in eyendhálakchik tam neʼets ti bélal abal ti Jerusalén (Sal. 120-134). Talchik i dhuchlab in ulal abal an israelitas in ajatnálak an Hallel a tam in tʼajálakchik an Pascua.

Xowéʼ ta kʼicháj jayej in bichówil a Jehová in pidhál yan in exbadh an ajatláb (Sant. 5:13). I eyendhál an ajatláb abal ki puwénchij a Jehová (Efes. 5:19). An ajatláb tu tólmiyal abal ku kʼwajiy más junkudh kʼal an epchalchik ani jayej tu tólmiyal abal ki kuxuy an kʼibataláb (Hech. 16:25; Col. 3:16). Jayej antsanáʼ i tejwamedhál abal i kʼanidhál a Jehová ani abal i belál kʼal Jajáʼ.