An pórtico pelak jun i baʼteʼ axi tsalmidh ani kʼwajatak tin tamét an templo, tanáʼ u belnabak abal ka ulits ban Santo. ¿Jayak in puwém in kwaʼalak? Okʼxidh kʼal an támub 2023, an Traducción del Nuevo Mundo in ulalak axéʼ ti 2 Crónicas 3:4: «An pórtico axi kʼwajat tin tamét an templo, jayetsej in tsʼikwem kʼal an atáj: in kwaʼal 20 codos ani 120 codos in tʼekʼem». Jayej talchik i Biblia in ulal abal an pórtico in kwaʼalak «120 codos» in tʼekʼem. Kʼal axéʼ i éxbayal abal an baʼteʼ in kwaʼalak 53 metros in tʼekʼem.

Pero ban támub 2023 axéʼ xi versículo jalkʼun ban Traducción del Nuevo Mundo, ani xowéʼ in ulal antsanáʼ: «In tʼekʼem pelak 20 codos», axéʼ pel 9 metros in tʼekʼem (30 pies). a Xowéʼ ki tsuʼuw jaleʼ ti jáluwat.

Ti 1 Reyes 6:3 yab in olnál jay in tʼekʼem in kwaʼalak an pórtico. Tejéʼ a Jeremías yab in olnaʼ jay in tʼekʼem, jay in tsikʼwem ani jay in nakel in kwaʼalak an pórtico. Pero ban capítulo 7, a Jeremías in olnál kʼeʼat jantʼoj tin kwéntaj an templo, ejtíl, tin kwéntaj an Mar axi tsʼejkadh kʼal i patʼál, an laju i carritos ani tsablom an columnas axi tsʼejkadh kʼal i cobre, axéʼ kʼwajatak tin tamét an pórtico (1 Rey. 7:​15-37). Max an pórtico chubax in tʼekʼem 50 metros, tam játsak axi más neʼets ka tejwaméj. Tam, ¿jaleʼ ti a Jeremías yab in olnaʼ? Yan i támub talbél talchik i judíos in uluw abal an pórtico yabak lej tʼekʼat, axi más tʼekʼat jatsak an templo.

Yan i atikláb axi exoblámadh in ulal abal yab in éjtowal kin belaʼ max jun i baʼteʼ neʼets kin ejtow kin kuxuy in além jun i pórtico axi in tʼekʼem 120 codos. Ti biyál tam u tsʼejkabak jun i baʼteʼ u eyendhábak i tʼujub ani i ladrillo. Jun i tʼiplab, ti Egipto waʼatsak yan i templos ani tam u tsʼejkanchábak an wiʼleb, tin akan u tsʼejkanchábak tsʼikodh ani biyat u jílkʼonalak más tʼekʼat, neʼetsak ti xuyel más. Pero an templo in kʼál a Salomón yabak antsanáʼ ti tsʼejkadh. An atiklábchik axi exoblámadh in ulal abal in tsʼikwem an baʼteʼ pelak seis codos, xowéʼ i exlál jantʼiniʼ 2 metros kʼal 70 centimetros. Jun i inik axi pel i arquitecto ani in bij Theodor Busink in uluw axéʼ: «Max ki tʼajaʼ ti kwéntaj in tsʼikwem an baʼteʼ in kʼál an templo, i tsalpanchal abal max an pórtico pelak 120 codos in tʼekʼem, an baʼteʼ yab neʼets kin ejtow kin kuxuy».

Walám ukʼpinchik tam ti in tsab dhuchaʼ 2 Crónicas 3:4. Waʼats talchik i dhuchlab axi in ulal «120 codos», ani talchik in ulal «20 codos», ejtíl an Códice alejandrino (axi ban siglo quinto) ani an Códice ambrosiano (axi ban siglo sexto). ¿Jaleʼ ti walám in tsalpayalchik abal ukʼpin? Ti hebreo an kaw cien ani an kaw codos jayétsekʼij jantʼiniʼ tu dhuchnal. Jaxtám walám tam ti an atikláb in tsab dhuchaʼ axéʼ xi texto, in dhuchaʼ «ciento veinte» ani yab «veinte codos».

Lej alwaʼ ki exlaʼ jantʼiniʼ ti kʼwajatak tsʼejkadh an templo in kʼál a Salomón, pero jawaʼ más exbadh, játs ki exlaʼ jantʼoj u tʼájnalak tanáʼ abal ka kʼakʼnáj a Jehová. I lej kʼakʼnál abal a Jehová in kaniyamal lej yan i atikláb abal ka kʼakʼnáj al axéʼ xi templo (Heb. 9:​11-14; Apoc. 3:12; 7:​9-17).