1. ¿Jantʼoj neʼets kin tʼajaʼ a Jesús?

 XOWÉʼ ta kʼicháj kʼwajat ti watʼel yan jantʼoj axi lej exbadh ani lej weʼits a Jesús neʼets kin boliy an atiklábchik. ¿Jaleʼ ti exlál abal weʼits neʼets kin tʼajaʼ nixéʼ a Jesús? A Jesús in ólchij in aykolilchik jun i kʼej kaw axi neʼetsak kin tejwamédhaʼ abal jajáʼ kʼwajatits in boliyal an atiklábchik (Mat. 24:3). Axéʼ xi kʼej kaw neʼets ki elaʼ ban capítulo 24 ani 25 in kʼál a Mateo, jayej ban capítulo 13 in kʼál a Marcos ani an capítulo 21 in kʼál a Lucas.

2. ¿Jantʼoj neʼets ki tsuʼuw al axéʼ xi exobintaláb ani jaleʼ ti lej exbadh?

² A Jesús in olnaʼ ox i tʼiplab axi neʼets tu ku tólmiy abal ku kʼwajiy tʼojojodh. An kʼaʼál pel kʼal tin kwéntaj an ovejas ani an cabras, an tsabchíl pel tin kwéntaj an laju i tsʼikʼách ani an oxchíl tin kwéntaj an talentos. Axéʼchik xi tʼiplab neʼets tu ku tólmiy ki tsuʼuw jantʼoj neʼets kin tʼajaʼ ti kwéntaj a Jesús tam kin boliy an atiklábchik. Al axéʼ xi exobintaláb neʼets ki exóbnaʼ axéʼ xi ox i tʼiplab ani neʼets ki tsuʼuw jantʼoj tu exóbchal. Ki exóbnaʼ an kʼaʼál tʼiplab, tin kwéntaj an ovejas ani an cabras.

AN OVEJAS ANI AN CABRAS

3. ¿Jaykʼiʼ neʼets kin boliy a Jesús an atiklábchik?

³ A Jesús tu exóbchij abal tam ka chich kin boliy an atiklábchik, neʼets kin tʼajaʼ ti kwéntaj max in batsʼuw an alwaʼ  kaw ani in tólminchij an epchalchik axi takudh (Mat. 25:​31-46). ¿Jaykʼiʼ ti neʼets kin uluw a Jesús jitaʼchik játs an ovejas ani jitaʼchik játs an cabras? Axéʼ neʼets kin tʼajaʼ tam ka tujey an púlik yajchiktaláb, okʼxidh kʼal a Armagedón (Mat. 24:21). Tam a Jesús ka chich neʼets kin tʼajaʼ jantʼiniʼ jun i béletnom koʼnél, neʼets kin pilmedhaʼ jitaʼchik in tólmiy axi takudh ani jitaʼchik yab in tʼajaʼ.

4. Kʼal jawaʼ in ulal Isaías 11:​3, 4, ¿jaleʼ ti lej belál abal a Jesús neʼets kin boliy tekedh an atiklábchik? (Ka tsuʼuw jayej an imágenes).

⁴ An Biblia in ulal abal a Jehová in bíjiy a Jesús abal kin boliy an atiklábchik ani tam kin tʼajaʼ neʼets kin tʼajaʼ kʼal i tekedhtaláb (ka ajiy Isaías 11:​3, 4). A Jesús in lej tʼajál ti kwéntaj jawaʼ i ulal, jawaʼ i tsalpayal ani jawaʼ i tʼajál. Jayej in lej tʼajál ti kwéntaj jantʼiniʼ exom i tólmiyal an epchalchik axi takudh (Mat. 12:​36, 37; 25:40).  a Jaxtám jajáʼ neʼets kin exlaʼ jitaʼchik in tólmiy an epchalchik axi takudh abal kin putuw kʼal an tʼojláb axi bijchinének. Ejtíl, neʼets ki tólmiy axi takudhchik max ki áynanchij tu ólnom, ani jitaʼ ka tolmixin neʼets ka tsuʼtat ti bolidh ani neʼets kin koʼoy an aychixtaláb ka kʼwajiy abal etsʼey ban tsabál (Mat. 25:46; Apoc. 7:​16, 17). Lej alabél an aychixtaláb axi neʼets ki batsʼuw. Jitaʼchik kin áynanchij putudh kʼal a Jehová ban púlik yajchiktaláb ani talbél, neʼets ka dhúchunchat in bij «ban uw in kʼál an ejataláb» (Apoc. 20:15).

5. ¿Jantʼoj i exóbnal kʼal an tʼiplab tin kwéntaj an ovejas ani an cabras?

⁵ Ku kʼwajiy putudh ani ki tólmiy a Jesucristo. An tʼiplab tin kwéntaj an ovejas ani an cabras, pel abal patal jitaʼchik in kwaʼal an aychixtaláb ka kʼwajiy abal etsʼey tejéʼ ban tsabál. Jajáʼchik in tejwamedhál abal putudh tam u bélkax ani tam in tólmiyal an epchalchik axi takudh ban olnomtaláb, ani jayej tam i belkál patal an olchixtaláb axi in binál an tʼojnal axi putudh ani tsalpadh kom pel kʼal a Jesús ti takuyámej (Mat. 24:45). Pero patal axi takuyámej abal ka kʼalej ti eb jayej in tomnál kin lej tʼajaʼ ti kwéntaj an tʼiplab tin kwéntaj an ovejas ani an cabras. ¿Jaleʼ? Kom jajáʼchik jayej exom ti tʼajchinal ti kwéntaj kʼal a Jesús jawaʼ in tʼajálchik, jawaʼ in ulal ani jawaʼ in tsalpayal. Jaxtám jajáʼchik jayej in tomnál kin áynanchij putudh. Xowéʼ ki exóbnaʼ tsab i tʼiplab axi jayej kʼwajat ban capítulo 25 in kʼál a Mateo. Tejéʼ waʼats i olchixtaláb axi u lej eynal abal an epchalchik axi takudh. Okʼox neʼets ki tsuʼuw an tʼiplab tin kwéntaj an laju i tsʼikʼách.

AN LAJUW I TSʼIKʼÁCH

6. ¿Jantʼiniʼ tin tejwamédhaʼ bóʼ i tsʼikʼách abal in kwaʼal i tsalpadhtaláb? (Mateo 25:​6-10).

⁶ Al axéʼ xi tʼiplab a Jesús in uluw abal laju i tsʼikʼách kʼalej in támuwal an novio (Mat. 25:​1-4). Patal jajáʼchik in léʼak ka kʼalej ban ajib, pero a Jesús in uluw abal bóʼ kʼal jajáʼchik in tejwamédhaʼ «i tsalpadhtaláb ani bóʼ imbáj». An bóʼ i tsʼikʼách axi tsalpadh, kʼwájatakchik tʼojojodh abal kin aychij an novio al jawákits tam hora ka ulits. Jajáʼchik in neʼdhálak an lámparas tʼuchat kʼal i aceite ani jayej in neʼdhálak más abal max kin yejenchij talbél. Nixéʼ neʼetsak ka eyan abal yab ka teptsin an lámparas axi in neʼdhálak (ka ajiy Mateo 25:​6-10). Tam ti ulits an novio, an tsʼikʼáchchik axi tsalpadh otsits kʼal jajáʼ ban ajib. Jayetsej neʼets ka watʼey kʼal an epchalchik axi takudh. Jitaʼchik kin tejwamédhaʼ abal putudh ani abal kʼwajat tʼajtʼóm ti  kwéntaj, neʼets kin ejtow ka otsits kʼal a Jesús tam kin tujchij ti ábatnom (Apoc. 7:​1-3). b ¿Ani jantʼoj neʼets ka watʼey kʼal an bóʼ i tsʼikʼách axi yab in tejwamédhaʼ i tsalpadhtaláb?

7. ¿Jantʼoj in watʼaʼ an bóʼ i tsʼikʼách axi yab tsalpadh, ani jaleʼ tin watʼaʼ nixéʼ?

⁷ An boʼ i tsʼikʼách axi yab tsalpadh, yab kʼwajatchik tʼojojodh tam ti ulits an novio. An Biblia in ulal abal tam ti axéʼchik xi tsʼikʼách in tsuʼuw abal utatits ti tal an novio, in tʼajaʼchik ti kwéntaj abal weʼits neʼetsak ka teptsin an lámparas. Ani kom jajáʼchik yab in chiʼdhálak más i aceite, in koʼoychik ka kʼalej kin tsʼaʼiy. Jaxtám, tam ti ulits an novio, axéʼchik xi tsʼikʼách yabaye u wichélak. «An bóʼ i tsʼikʼách axi tsalpadh játs axi otsits kʼal an novio juʼtáj tu tʼajnal an tomkintaláb ajib, tam mápuyat an wiʼleb» (Mat. 25:10). Tam ti wíchiychik an bóʼ i tsʼikʼách axi yab tsalpadh, in léʼakchik ka otsits ban ajib, pero tam uchan kʼal an novio: «Nanáʼ yab tu exlál» (Mat. 25:​11, 12). Jajáʼchik yab kʼwajatak tʼojojodh tam ti ulkan an novio. ¿Jantʼoj in exobnál axi takudhchik, kʼal axéʼ xi tʼiplab?

8, 9. ¿Jantʼoj in exobnál an epchalchik axi takudh, kʼal an tʼilab in kʼál an laju i tsʼikʼách? (Ka tsuʼuw jayej an imágenes).

⁸ Ka tejwamédhaʼ abal it kʼwajat tʼojojodh ani tʼajtʼóm ti kwéntaj. Kʼal axéʼ xi tʼiplab, a Jesús yab in léʼak tu ku exóbchij abal waʼatsak tsab i kwenél i epchalchik axi takudh. Jawaʼ a Jesús in léʼak kin exóbchichik an epchalchik axi takudh játs abal max yab ka kʼwajiychik tʼojojodh, yab neʼets kin ejtow kin batsʼuw an lablixtaláb axi kʼwajatits bíjidh abal jajáʼchik (Juan 14:​3, 4). Axéʼ pel jantʼoj axi patal kwaʼal ki tʼajaʼ ti kwéntaj. Max wawáʼ i aychal ku kʼalej ti eb o ku jilkʼon tejéʼ ti tsabál, kwaʼal ki lej tʼajaʼ ti kwéntaj an tʼiplab in kʼal an laju i tsʼikʼách. Kwaʼal ku kʼwajiy tʼajtʼóm ti kwéntaj ani ku kʼwajiy tʼojojodh abal tam ka ulits in kʼichájil a Jehová (Mat. 24:13).

 ⁹ Ban tʼiplab axi a Jesús in uluw tin kwéntaj an laju i tsʼikʼách, in tejwamédhaʼ abal jawaʼ más exbadh, játs ku kʼwajiy tʼojojodh ani tʼajtʼóm ti kwéntaj. Ani talbél in tʼilaʼ tin kwéntaj an talentos, tanáʼ in tejwamédhaʼ abal lej exbadh ki tʼajaʼ tu ikʼax.

AN TALENTOS

10. ¿Jantʼoj in tʼajaʼ an tsab i tʼojnal axi ikʼax? (Mateo 25:​19-23).

¹⁰ Tam ti a Jesús kawin tin kwéntaj an talentos, kawin tin kwéntaj tsab i inik axi in tʼajaʼ ti ikʼax ani jun axi imbáj (Mat. 25:​14-18). Okʼxidh ka kʼalej an amo ti belál al pil i bichow, in jilchij i talentos in tʼojnálil, pelak yan i tumín. Tsab kʼal axéʼ xi inik in tʼajaʼ ti ikʼax ani in tʼojondhaʼ an tumín axi jilchin kʼal in amo. Ani tam ti wichiy an amo, axéʼ xi tsab i tʼojnal in atanchamalits más i tumín kʼal axi jilchin. An amo in atsʼaʼ lej kulbél ani in uluw: «Kit otsitschik teʼ kʼal nanáʼ ani ku junax kulbéj» (ka ajiy Mateo 25:​19-23). ¿Ani jantʼoj in tʼajaʼ an oxchíl tʼojnal?

11. ¿Jantʼoj in watʼaʼ an tʼojnal axi obej?

¹¹ An amo in pidhaʼ an oxchíl tʼojnal jun i talento abal kin tʼojondhaʼ ani kin atanchij más i tumín, pero axéʼ xi tʼojnal lej obej, jaxtám in tsajaʼ jun i jol ani in joliy an talento. Tam ti an amo wichiy, an tʼojnal expidh in wíchbanchij jawaʼ pidhnének. An tʼojnal in tejwamédhaʼ abal yab in kwaʼalak jun i alwaʼ tsalap, kom expidh in uluw abal an amo «in lej watʼkʼanchal kʼal jawaʼ in konchal kin tʼajaʼ an tʼojnal». ¿Jantʼoj watʼey? An amo in tíxkʼanchij an talento, in kʼwiyaʼ ani in kedhmay tin kʼimáʼ (Mat. 25:​24, 26-30).

12. ¿Jitaʼ in tʼipoyal tsablom an tʼojnal axi ikʼax?

¹² Tsablom an tʼojnal axi ikʼax, in tʼipoyal an epchalchik axi takudh. A Jesús jats an amo ani in uchál in tʼojnálil: «Kit otsits tejéʼ kʼal nanáʼ ani ku junax kulbéj abal etsʼey». Jajáʼchik játs axi in bátsʼuwal an alwaʼtaláb ka edháj ti éb tam ka tsemets tejéʼ tsabál (Mat. 25:​21, 23; Apoc. 20:5a). An takudhchik jayej in éjtowal kin exóbnaʼ jantʼoj kʼal in tʼiplábil an tʼojnal axi obej. Ki exóbnaʼ jaleʼ.

13, 14. ¿Jantʼoj in exobnál an takudhchik, kʼal an tʼiplab in kʼal an talentos? (Ka tsuʼuw jayej an imágenes).

 ¹³ Ka tejwamédhaʼ abal i ikʼax ti tʼojnal. A Jesús yab in eyendhaʼ an tʼiplab in kʼál an talentos abal kin uluw abal an takudhchik pel obej. Tam, ¿jaleʼ tin eyendhaʼ? Antsanáʼ jantʼiniʼ an tʼiplab kʼal an laju i tsʼikʼách, a Jesús in eyendhaʼ an tʼiplab in kʼál an talentos abal kin exóbchij an takudhchik jantʼoj axi lej exbadh. Kʼwajatak in tʼilchal jantʼoj awits ka watʼey max jun a kʼicháj kin kʼibaʼ an kanataláb axi in kwaʼalakchik, jaxtám in uchaʼchik: «Epchalábchik, ka lubaʼ ka exlaʼ ta ichích max chubax it kanidhits ani i takudhits» (2 Ped. 1:10).

¹⁴ A Jesús in eyendhaʼ an tʼiplab in kʼál an laju i tsʼikʼách ani an talentos, abal kin exóbchij an takudhchik abal kwaʼal ka kʼwajiy tʼojojodh, tʼajtʼóm ti kwéntaj ani kin tʼajaʼ ti ikʼax. Pero waʼats kʼeʼat i exobchixtaláb axi a Jesús in pidhaʼ an takudhchik. Axéʼ kʼwajat ti Mateo 24:40 ani 41. Ki exóbnaʼ axéʼ xi versículos.

¿JITAʼ NEʼETS KA NEʼDHÁJ?

15, 16. Kʼal jawaʼ in ulal Mateo 24:​40, 41, ¿jaleʼ ti lej exbadh abal an takudhchik ka kʼwajiy tʼajtʼóm ti kwéntaj?

¹⁵ Okʼxidh kin olnaʼ tin kwéntaj óxlom an tʼilab, a Jesús in uluw abal an takudhchik neʼets ka boliyat, ani tanáʼ ti neʼets ka exláj jitaʼchik neʼets ka kʼalej ti éb. Jajáʼ kawin tin kwéntaj tsab i inik axi xeʼets ti tʼojnal ban alteʼ ani tsab i mimláb axi kʼwajat ti tseʼel. Tejwaʼ abal tsablom an inik ani tsablom an mimláb kʼwajatak ti tʼojnal, pero a Jesús in uluw: «Jun neʼets ka neʼdháj ani jun neʼets ka jilan» (ka ajiy Mateo 24:​40, 41). Jun i versículo más okʼox a Jesús in uchaʼ in aykolil: «Kom yab a tsoʼbím an hora tam nanáʼ kin chich, jaxtám ka neʼdháj júniniʼ tsʼejkakadhits a ichích ti kin batsʼuw» (Mat. 24:42). Axéʼ xi kaw ejtílits axi in eyendhaʼ tam tin tʼilaʼ an tʼiplab tin kwéntaj an laju i tsʼikʼách (Mat. 25:13). ¿Jantʼoj in léʼak tu ku exóbchij a Jesús kʼal axéʼ xi kaw? In léʼak tu ku exóbchij abal expidh an takudhchik axi ka kʼwajiy putudh kʼal a Jehová, játs axi neʼets kin ejtow ka kʼalej ti eyal tiwaʼ ti éb (Juan 14:3).

¹⁶ Ka tejwamédhaʼ abal i kʼwajat tʼajtʼóm ti kwéntaj. Max jun i takudh yab ka kʼwajiy tʼajtʼóm ti kwéntaj, yab neʼets kin batsʼuw an alwaʼtaláb ka kʼalej ti ábatnom ti éb kʼal a Jesús (Mat. 24:31). Pero jayej patal axi in kwaʼal an aychixtaláb ka kʼwajiy tejéʼ ti tsabál, kwaʼal ka kʼwajiy tʼajtʼóm ti kwéntaj ani kin áynanchij putudh kʼal a Jehová.

17. ¿Jaleʼ yab tu tʼeʼpindhál max a Jehová xoweykʼij in takuyámal i epchalchik abal ka kʼalej ti éb?

¹⁷ Wawáʼ i bajuwámal ki exlaʼ más a Jehová ani i belál kʼal jajáʼ, jaxtám yab tu tʼeʼpindhál max a Jehová xoweykʼij in takuyámal i epchalchik abal ka kʼalej ti éb. c Walám i tʼilál an tʼilab axi in uluw a Jesús tin kwéntaj an tʼojnal axi talbélits ti ulits ani tujey ti tʼojnal (Mat. 20:​1-16). An inik axi ulits dhajuwej ti tʼojnal ani axi talbélits ti ulits, jayetsej an jalbixtaláb axi in batsʼuw. Ani jayetsej neʼets ka watʼey kʼal an takudhchik, belits max biyálits o itekʼij ti takuyámej, jayetsej an alwaʼtaláb axi neʼets kin batsʼuw.

KA TʼAJAʼ TI KWÉNTAJ AN OLCHIXTALÁB AXI U PIDHNAL

18, 19. ¿Jantʼoj tam olchixtaláb ani jantʼoj tam exobchixtaláb i batsʼúmal al axéʼ xi exobintaláb?

¹⁸ Kʼal an tʼiplab in kʼál an ovejas ani an cabras, u tʼílchinal an epchalchik axi in kwaʼal an aychixtaláb ka kʼwajiy tejéʼ tsabál, abal  kwaʼal kin áynanchij putudh xowéʼ ani ma ka tuyej an púlik yajchiktaláb. Tam kin bajuw nixéʼ a kʼicháj, a Jesús játs axi neʼets kin uluw jitaʼchik játs axi kʼwajinek putudh, ani jitaʼ neʼets kin batsʼuw an alwaʼtaláb abal ka kʼwajiy abal etsʼey tejéʼ ban tsabál (Mat. 25:46).

¹⁹ Jayej i tsuʼuw tsab i tʼiplab kʼal axi neʼets ka lej tolmiyat an takudhchik abal ka kʼwajiy tʼojojodh. Ban tʼiplab in kʼál an laju i tsʼikʼách, i exóbnaʼ abal boʼ kʼwajiychik tʼojojodh ani tʼajtʼóm ti kwéntaj. Jajáʼchik in tejwamédhaʼ abal kʼwajatak tʼojojodh kom in neʼdhaʼ patal jawaʼ neʼetsak kin yejenchij biyat in aychalak an novio. Ani axi boʼ an tsʼikʼách axi yab kʼwajatak tʼojojodh yab jílanchik ka otsits ban ajib kʼal an novio. ¿Jantoj i exóbnal? Abal kwaʼal ki áynanchij ku kʼwajiy tʼojojodh, ma tam a Jesús kin talabedháj axéʼ an xeʼtsintaláb. Ban tʼiplab in kʼál an talentos i exóbnaʼ abal tsab i tʼojnal lej ikʼaxak. Jajáʼchik kʼwajiy putudh ani in tʼojondhaʼ an talentos, jaxtám lej lábliyat kʼal an amo. Pero an tʼojnal axi obej yab in batsʼuw nibal jun i alwaʼtaláb. ¿Jantʼoj i exóbnal kʼal axéʼ? Abal kwaʼal ku kʼwajiy tʼojlidh kʼal an tʼojláb axi tu bijchámal a Jehová ma kin bajuw in taltal axéʼ an xeʼtsintaláb. Jayej i exóbnaʼ abal an takudhchik kwaʼal ka kʼwajiy tʼojojodh ani tʼajtʼóm ti kwéntaj abal yab kin kʼibaʼ an aychixtaláb ka neʼdháj ti éb. Jajáʼchik in lej aychal ka neʼdháj ti éb ani ka junax tʼójon kʼal a Jesucristo. Talbél kʼal an Armagedón, an novia neʼets ka tomkin kʼal a Jesucristo (2 Tes. 2:1; Apoc. 19:9).

20. ¿Jantʼoj neʼets kin tʼajaʼ a Jehová max wawáʼ ki tʼajaʼ ti kwéntaj an tʼiplabchik?

²⁰ A Jesús lej weʼits neʼets kin boliy an atiklábchik, pero yab in tomnál ku jikʼey. Max ku kʼwajiy putudh kʼal a Jehová, Jajáʼ neʼets tu ku pidhaʼ in lej tsap, ani neʼets ki ejtow ku kʼwajiy tin tamét (2 Cor. 4:7; Luc. 21:36). Belits max i aychal ku kʼwajiy tejéʼ ti tsabál, in lej tomnál ki tʼajaʼ ti kwéntaj an tʼiplabchik axi in uluw a Jesús. Max antsanáʼ ki tʼajaʼ, a Jehová neʼets tu ku lej lábliy ani neʼets kin jilaʼ dhuchadh i bij, «ban uw» in kʼál an ejataláb (Dan. 12:1; Apoc. 3:5).