¿Jaleʼ ti kwaʼal ki eyendhanchij in bij a Jesús tam u ól?
TAM A JESÚS u exobchixak in lej olnalak tin kwéntaj an olab. Tin kʼichájil a Jesús an okʼnomchik kʼal an belomtaláb in ujnamak ti ól ban bél abal ka tsuʼtatchik. ¿Jaleʼ tin tʼajalakchik? Kom in léʼak ka tsuʼtat abal chubax in belalák kʼal a Dios. U owelakchik ti ól kom in tsalpayalak abal max kin eyendhaʼ yan i kaw antsanáʼ neʼets ka atsʼan kʼal a Dios (Mateo 6:5-8). A Jesús in uluw abal jawaʼ in tʼajalakchik nixéʼ xi atikláb yab tekedh, nixéʼ in tʼajaʼ abal an atiklábchik axi chubax in léʼak ka utey kʼal a Dios kin exlaʼ jantʼoj yab in tomnal kin tʼajaʼ tam u ól. Jayej in exóbchij kʼeʼat jantʼoj tin kwéntaj an oláb.
A Jesús jayej tu exóbchij jantʼoj kwaʼal ki konoy ti olabil, jajáʼ in uluw abal ki konoy abal ka tʼokedhanchat in bij a Dios, ka chich in Eyaltal, ani ka tʼajan in kulbetál ani abal ki konchij a Dios abal tu ku pidhaʼ jawaʼ i yejenchal (Mateo 6:9-13; Lucas 11:2-4). Axéʼ tu exobchal abal kwaʼal ki konoy yanil, ki tejwamédhaʼ i belomtaláb ani i tsaʼataláb max i léʼ abal a Jehová tu ku otsʼowiy (Lucas 11:5-13; 18:1-14). Ani a Jesús tu punchij an tʼiplab (Mateo 14:23; Marcos 1:35).
Axéʼ in lej tólmiy in aykolil a Jesús abal kin exlaʼ jantʼiniʼ ka oláts. An akal okʼxidh ka tsemdhaj a Jesús in pidhaʼ in aykolil kʼeʼat i exobchixtaláb tin kwéntaj an olab.
«In exóbchij kʼeʼat jantʼoj axi kwaʼalak kin tʼajachik abal ka utey kʼal a Dios»
Nixéʼ xi akal a Jesús in lej kanatbedhaʼ an abatwalejchik. Jayej in exobchichik jantʼoj ít: «Nanaʼits an bel, expidh max ti kin belnanchij u ey, neʼets kit ulits kʼal u Tatáj ti éb». Talbél in kanatbedhaʼchik kʼal axéʼ xi kaw: «Nanáʼ neʼets tu pidhaʼ patal jawaʼ ka konchij u Tatáj ti éb kʼal nanáʼ bij, antsanáʼ nanáʼ tin tsakámil a Dios neʼets tu pidhaʼ abal ka puwénchat in bij u Tatáj ti eb. Jawakits tam konchixtaláb ka moʼkaʼ tin kʼubak u Tatáj ti éb kʼal nanáʼ u bij, nanáʼ neʼets tu pidhaʼ». Jayej in uchaʼchik: «Yabayej a konchamal u Tatáʼ ti éb jantʼoj kʼal nanáʼ u bij, ma xowéʼ ka konchij ani Jajáʼ neʼets ti pidhaʼ abal kit jun putat kulbejchik a ichích» (Juan 14:6, 13, 14; 16:24).
Lej exbadh jawaʼ a Jesús in exóbchij in abatwalejchik. Jun i diccionario bíblico in ulal abal axéʼ xi kaw «in lej jalkʼuy jantʼiniʼ tin ujnamakchik kin tʼajaʼ an oláb». Axéʼ yab in léʼ kin uluw abal a Jesús kʼwajatak in exobchalakchik abal ka olonchat jajáʼ ani yab a Dios. Jawaʼ kʼwajatak in tʼajál játs kin tólminchij abal ka uteychik kʼal a Jehová.
A Dios etsʼey in otsʼowiyal an oláb axi u tʼajchinal kʼal in tʼojnalil (1 Samuel 1:9-19; Salmo 65:2). Tam ti a Dios in tsʼejkaʼ jun i kaw kʼal an bichow Israel, patal jitaʼ kin léʼnaʼak ka utey kʼal Jajáʼ, kwaʼalak kin belaʼ abal a Israel pelak jun i bichow axi takudh. Tin kʼichájil a Salomón, an atiklábchik kwaʼalak kin tʼilaʼ abal a Dios in takuyamal an templo abal tanaʼchik kin bínaʼ i tsʼakchixtaláb (Deuteronomio 9:29; 2 Crónicas 6:32, 33). Pero talbél neʼetsak ka jalkʼun. An abatwalej Pablo in dhuchaʼ abal an tsʼakchixtaláb axi in tʼajalak an israelitas, in tʼipoyalak jawaʼ a Jesús neʼetsak kin tʼajaʼ talbél (Hebreos 10:1, 2). Axéʼ neʼetsak ka putun axi taʼtal a kʼicháj (Colosenses 2:17). Jaxtam ma ban tamub 33 jitats in léʼak ka utey kʼal a Jehová yab in yejenchalak kin belkaʼ an abatnaxtaláb axi pidhan a Moisés. Kwaʼalakchik kin belkaʼ a Jesucristo antsanáʼ jantʼiniʼ tin ulalak an abatnaxtaláb (Juan 15:14-16; Gálatas 3:24, 25).
An bijláb axi más exbadh
A Jesús in bínaʼ jun i alwaʼ tʼiplab jantʼiniʼ ku utey kʼal a Jehová. A Jesús pel jun i alwaʼ jaʼúb axi tu tólmiyal abal a Dios tu ku atsʼanchij i olábil. ¿Jaleʼ ti a Jesús in éjtowal tu ku tólmiy?
Kom patal u walablom belíts max ki binaʼ i tsʼakchixtaláb o kʼeʼat jantʼoj, yab neʼets ki ejtow ku utey kʼal a Jehová ti kwetemtal, kom Jajáʼ lej tʼokat (Romanos 3:20, 24; Hebreos 1:3, 4). Tam ti a Jesús in bínaʼ in ejatal jantʼiniʼ i tsʼakchixtaláb, tu tólmiy abal ki ejtow ku utey kʼal a Jehová (Romanos 5:12, 18, 19). Patal jitaʼ in léʼ ka kʼwajiy tʼokat tin tamét a Dios ani kin ejtow kin utenchij, kwaʼal kin lej belaʼ kʼal a Jesús ani kin eyendhanchij in bij tam ka oláts (Efesios 3:11, 12).
Tam i olonchal a Jehová tin bij a Jesús, i tejwamedhál abal i belal kʼal in ey axi pidhnének: 1) A Jesús pel «an Cordero de Dios», axi abnenek kʼal a Jehová abal tu ku pakwlanchij i waláb. 2) Tam a Jesús edhaj kʼal a Jehová ani kʼadhiy ti éb, xowéʼ in tʼajal ti «sumo sacerdote» ani in ejtowal tu ku tólmiy abal ku pakwlanchat i waláb. 3) expidh jajáʼ in éjtowal tu ku tólmiy ku utey kʼal a Jehová tam ki olonchij (Juan 1:29; 14:6; Hebreos 4:14, 15).
Tam i eyendhanchal in bij a Jesús i pidhál in jalbil in ey. Axéʼ in lej tomnál kom játs in kulbetal a Jehová «abal patal an ejataláb tam ka olnanchat in bij a Jesús kin kʼakʼnaʼchik [...], tin patal kin olnaʼ abal a Jesús játs an ajatil, antsanáʼ neʼets ka puwenchat in bij a Dios, jayej tam ka olnanchat ani ka kʼakʼnanchat in bij a Jesucristo» (Filipenses 2:10, 11). Jayej tam ki eyendhanchij in bij a Jesús i puwenchal a Jehová, kom játs Jajáʼ axi in binaʼ in tsakamil abal tu ku kʼany (Juan 3:16).
Tam ku olats kwaʼal ki tʼajaʼ kʼal patal i ichích ani yab expidh kom i ujnamits ki tʼajaʼ.
Ti Biblia i elal yan i bijláb jantʼiniʼ tu exlab a Jesús, axéʼ tu tólmiyal ki exlaʼ jay in ey in kwaʼal. Jayej tu tólmiyal ki exlaʼ jantʼoj kʼwajat in tʼajál a Jesús ani an lablixtaláb axi neʼets ki batsʼuw axi taʼtal a kʼicháj. (Ka ajiy an recuadro « In exbadh in ey a jesús» .) A Jesús játs an atikláb axi más “kom pidhnenek in ey ti éb ani tejéʼ tsabál (Filipenses 2:9; Mateo 28:18). *
Yab expidh kom i ujnam ki eyendhaʼ
Jantʼiniʼ i exobnamal kwaʼal ki eyendhanchij in bij a Jesús tam ku uteykʼal a Jehová abal Jajáʼ tu ku atsʼaʼ (Juan 14:13, 14). Pero yab i léʼ ki eyendhanchij in bij a Jesús expidh kom i ujnamits ki uluw. ¿Jaleʼ?
Ka tsalpay ba axéʼ xi tʼipláb. Walám a tʼajamal ti kwéntaj abal tam a batsʼuwal jun i carta, tin taltal in ulal «ti tsapnedhál» ani in punuwal in bij. ¿Walám játs jawaʼ in atsʼál an atikláb o játs kom antsanáʼit in ujnam kin uluw? Tam kin eyendhanchij in bij a Jesús ti olábil in tomnál ki pidhaʼ yan in jalbil in ey ani yab expidh ki eyendhaʼ kom i ujnamits ki tʼajaʼ. Jehová in aychal abal tam ki olonchij ki olchij patal jawaʼ i atsʼal ti ichích ani yab juniniʼ an kaw axi ki eyendhaʼ (1 Tesalonicenses 5:17; Salmo 119:145).
¿Jantʼoj i éjtowal ki tʼajaʼ abal tam ki eyendhanchij in bij a Jesís ki pidhaʼ in exbadh? ¿Jaleʼ ti yab i lupudh tsalpayal abal jantʼiniʼ játs in ey a Jesús? ki tsalpay ba patal jawaʼ in tʼajamal Jesús ani in léʼ kin tʼajaʼ abal tu ku tólmiy. Tam ki olonchij a Jehová ki kʼakʼnanchij ani ki puwenchij kom in binaʼ in tsakamil abal tu ku kʼaniy. Max antsanáʼ ki tʼajaʼ neʼets ki lej belaʼ abal neʼets ka putun an kaw axi a Jesús: «Neʼets ka konchij u tátaj ti éb kʼal nanáʼ u bij ani lej chubax neʼets ti pidhaʼchik patal jawaʼ ka konchij» (Juan 16:23).
^ párr. 14 An Diccionario expositivo de palabras del Antiguo ani del Nuevo Testamento exhaustivo de W. E. Vine in ulal, ti griego an kaw «bijláb» junchikil u eyendhab abal ka exlanchat «in uchbil, in exbadh ani in tsap in kʼal jun i atikláb».