XOWÉ’ ta k’icháj, yan i atikláb in ulal abal i éjtowal ki ólonchij jitakits, kom bélits antsaná’ a Dios in ats’ál. Jayejtsej in tsálpayal an atiklábchik axi in tsápnanchal kin k’ak’na’ jun tamkudh a Dios ani jita’chik in ulal abal a Dios in báts’uwal patal an k’ak’naxtaláb. ¿Walám tekedh ki tsalpay antsaná’?

Ti Biblia i elál yan i oláb axi in t’aja’ i atiklábchik, pero yab in ólonchij jita’ in tomnálak. Ti biyál, an atiklábchik in ujnámak kin ólonchij i walekláb. Pero a Dios in ucha’ in bichówil abal yab alwa’ kin t’aja’ ­antsaná’. Ti Salmo 115:​4-6 in ulal abal an ­waleklábchik «in kwa’al in xutsun, pero yab tu ots’owiyal». Lej ta­jax jawa’ tu exóbchal axé’ xi kaw. Max i exlálits abal axé’ xi waleklábchik yab tu ots’owiyal, tam, ¿jale’ i ólonchal?

Abal ki exbay axé’ xi tsalap, ki tsu’uw jawa’ in ulal an Biblia abal in t’aja’ a Elías. In ucha’ an sacerdotes abal jajá’chik kin ólonchij a Baal ani a Elías ne’etsak kin ólonchij a Dios ani jita’ ka tók’tsin ne’etsak kin tejwamédha’ abal játs an Dios axi chubax. An sacerdotes in tújchijchik kin ólonchij a Baal. Bélits abal in lej ólonchij, «yabchik tók’tsiyat nibal t’ajanchik ti kwéntaj» (1 Reyes 18:29). Pero, ¿jant’oj wat’ey k’al a Elías?

Tam ti a Elías taley ti ól, a Dios in aba’ i k’amal tejé’ Tsabál ani in tala’ an ts’akchixtaláb axi in t’aja’ a Elías. ¿Jale’ ti jajá’ tók’tsiyat? Ban oláb axi i elál ti 1 Reyes 18:36, 37 i tsu’tal jale’ ti a Elías tók’tsiyat. Al axé’ xi oláb, i t’ajál ti kwéntaj abal a Elías in uluw oxíl, an bijláb Jehová.

¿Jale’ ti kwa’alak kin eyendha’ axé’ xi bijláb? Kom a Baal, an dios in k’ál an cananeos, u púnchinalak yan i bij. Pero an bijláb Jehová expidh u eyendháb abal ka bíjiyat an Dios axi chubax; axi más Púlik tin puwél an Tsabál. Jajá’ in uluw: «Naná’ pel in Jehová. Antsaná’ játs u bij; yab jayk’i’ ne’ets ku pidha’ k’e’at jawa’ in tomnál ku bats’uw naná’» (Isaías 42:8).

¿Walám awil ki tsalpay abal an oláb axi in t’aja’ an sacerdotes ani axi in t’aja’ a Elías pelak abal a Jehová? Imbáj. Kom tam in k’ak’nálakchik a Baal in binálakchik i atikláb jant’ini’ i ts’akchixtaláb ani in t’ajálak k’e’at i kidháb t’ajbiláb. Pero an k’ak’naxtaláb axi u pídhnalak a Jehová pelak t’okat, Jajá’ yab in kónoyalak ka t’ajan i kidháb t’ajbiláb. Tam, an oláb axi u t’ajchinalak a Jehová, a Baal yab in éjtowalak kin ats’a’. Jun i t’iplab, pel ejtíl max ki abchij jun i carta jun i ja’úb axi lej i k’ak’nál ani ka ulits k’al k’e’at i atikláb axi in ujnám kin t’aja’ i kidháb t’ajbiláb.

Jita’chik in ólonchal a Jehová k’wajat in ólonchal jita’ in ts’ejka’ patal jawa’ wa’ats ban Tsabál. * Al jun i oláb axi in t’aja’ an kawlomej Isaias, in uluw: «Tatá’, Jehová, pel an Tataláb» (Isaías 63:16). Ani a Jesús játs axi k’wajatak in bíjiyal tam ti in ucha’ in aykólil axé’: «Ne’ets kin k’adhiy k’al u Tátaj axi jayej pel a Tátaj, ne’ets kin k’adhiy k’al u Dios axi jayej pel a Dios» (Juan 20:17). Tam, max a Jehová pel in Tátaj a Jesús, játs an Dios axi in ólonchij ani játs axi in tomnál ki ólonchij wawá’ (Mateo 6:9).

¿Walám tu uchál an Biblia abal kwa’al ki ólonchij a Jesús, a María, an santos ani an ángeles? Imbáj, expidh kwa’al ki ólonchij a Jehová. Ki tsu’uw jale’. An k’a’ál tsalap játs axé’, jita’ ki ólonchij játs kom k’wajat i k’ak’knál ani an Biblia in ulal abal expidh a Jehová játs axi in tomnál ki k’ak’na’ (Éxodo 20:5). An tsabchíl tsalap játs kom a Dios, játs «an Ots’ol k’al an oláb» (Salmo 65:2). A Jehová in pidhámal i t’ojláb in t’ojnálilchik axi ti éb, pero yab jita’ in uchbiyámal abal tu ku ats’anchij i olábil.

Pero max i lé’ abal a Jehová tu ku ats’anchij i olábil, kwa’al ki tawna’ Jajá’. An Biblia in ulal: «Patal jita’ kin palenchij a Jehová, játs ne’ets ka k’aniyat» (Hechos 2:21). Tam, ¿walám in ats’ál a Jehová patal an oláb axi u t’ajchinal? ¿O jant’oj más in yéjenchal kin t’aja’ an atiklábchik abal ka ats’an?