YAN i atikláb in tsálpayal abal an oláb yab u lej tólmix. Pero nixé’ yab játs jawa’ in ulal an Biblia (Lucas 22:40; Santiago 5:13). An oláb tu tólmiyal abal ku utey k’al a Dios, abal ku k’wajiy kulbél ani abal yab ku lej t’e’pin. ¿Jalé’ tu lej tólmiyal an oláb?

Ki tsalpay k’al axé’ an t’iplab: tam jun i tsakam ka pidhan jun i ts’ejwalixtaláb, ¿jant’oj u uchnal k’al in tátajchik abal kin uluw? U exóbchinal abal yab expidh kwa’al ka kulbéj kom pidhan, kwa’al kin uluw k’ak’namal. Tam i t’ajál antsaná’, ne’ets i ujnál ki ­k’ak’nanchij axi k’e’at. Jayetsej u wat’el k’al a Dios tam i ólonchal. Ki tsu’uw jant’oj ­tam oláb i éjtowal ki t’aja’ ani jant’oj tam alwa’taláb i báts’uwal.

Oláb abal ki k’ak’nanchij jawa’ tu pidhál. Tam i k’ak’nanchal a Dios jawa’ tu pidhámal, i t’ajál ti kwéntaj abal chudhél chudhél i báts’uwal yan jant’oj alwa’. In t’ajál abal yab expidh ki tsalpay k’al an t’e’pintaláb ani jayej i ats’ál más u kulbél (Filipenses 4:6).

T’iplab: Al jun i oláb, a Jesús in k’ak’nanchij in Tátaj kom ets’ey u ats’nalak (Juan 11:41).

Oláb abal ki konoy ku pákwlanchat. Tam ki konchij a Dios abal tu ku pákwlanchij, in t’ajál abal yabáts ki ats’a’ lej t’e’pidh k’al jawa’ i t’ajámal. Jayej tu tólmiyal ki jila’ ki t’aja’ jawa’ kidháb ani ki exbay jale’ ti yabáts in tomnál ki t’aja’.

T’iplab: An oláb axi in t’aja’ a David tam ti in ats’álak lej t’e’pidh kom wálbin (Salmo 51).

An oláb abal ki konchij a Dios tu ku exóbchij. Tu tólmiyal ki ko’oy i tsa’ataláb ani ki exbay abal yab i éjtowal ki t’aja’ jant’oj ti kwetémtal. Jayej tu tólmiyal ki bela’ más k’al a Jehová (Proverbios 3:5, 6).

T’iplab: An oláb axi a Salomón in t’ajchij a Dios abal kin konchij ka tólmiyat ani abal ka exóbchat jant’ini’ kin abatna’ an bichow Israel (1 Reyes 3:5-12).

An oláb tam u k’wajat lej t’e’pidh. Tam i kwa’al jun i t’e’pintaláb jawa’ más tu tólmiyal játs ki ólchij a Dios patal jawa’ i ats’ál. Axé’ in t’ajál abal ets’ey ki aliy a Jehová (Salmo 62:8).

T’iplab: An oláb axi in t’aja’ a Asá tam ti ne’etsak ka k’alej ti pejéx (2 Crónicas 14:11).

An oláb abal ki konoy abal ka tólmiyat axi k’e’at. Axé’ tu tólmoyal abal yab expidh ki tsalpay k’al wawa’, ki yájnanchij axi k’e’at ani ki exbay jawa’ in ats’ál.

T’iplab: Tam ti a Jesús in kónchinchij in aykólil ka tólmiyat (Juan 17:​9-17).

Oláb abal ki puwénchij a Dios. Tam i puwénchal a Jehová kom lej alwa’inik ani in ts’ejkamal yan jant’oj, i bájuwal ki k’ak’na’ ani ki k’anidha’ más. Jayej tu tólmiyal abal ku utey más k’al a Dios.

T’iplab: An oláb axi a David in t’ajchij a Dios abal kin puwénchij k’al patal jawa’ in ts’ejkámal (Salmo 8).

Pero wa’ats k’e’at i alwa’taláb axi i báts’uwal tam i ólonchal a Dios: in t’ajál abal ki bats’uw «an koyattaláb in k’ál a Dios ani játs axi tu béletnanchal i ichích» (Filipenses 4:7). Patal i lé’ak max ki ats’a’ koyat i ichích, kom lej wa’ats i k’ibataláb. ¡Ki ko’oy koyat i ichích jayej tu tólmiyal ki ats’a’ más kanat! (Proverbios 14:30.) Pero, ¿jant’ini’ i éjtowal ki ats’a’ nixé’ xi koyattaláb ti ichích? ¿I éjtowal ki ela’ ti kwetémtal, o i yéjenchal abal jita’ tu ku tólmiy?