An alabél tsabál ani tatáʼ

KOM an Biblia yab in olnál yan tin kwéntaj an alabél tsabál, yab chubax. Talchik i atikláb axi exoblámadh in ulúmal: Kom an Biblia yab in olnál yan tin kwéntaj an alabél tsabál yab chubax. Jun i atikláb axi in exobnámal tin kwéntaj an religiones in bij Paul Morrris in dhuchaʼ: «An Biblia lej weʼ in olnál tin kwéntaj an alabél tsabál». Kʼeʼat i atiklábchik in tsálpayal ejtíl jajáʼ, bélits abal yab chubax.

Pero an Biblia tu ólchal yan jantʼoj tin kwéntaj a Adán, a Eva, an tsan ani an alabél tsabál. * Pero an janamtaláb axi olnál axéʼchik xi atikláb, yab lej púlik jantʼiniʼ axi in okʼnálchik an iglesias ani in ulal abal an alabél tsabál yab waʼtsin. ¿Jaleʼ ti ulal axéʼ? Kom antsanáʼ kʼwajat in ulal abal an Biblia in ulal i janamtaláb.

Max yab ki exbay patal jawaʼ watʼey ban alabél tsabál, kʼibat neʼets ki atsʼaʼ abal ki exbay in Káwintal a Dios. Tin áytal neʼets ki tsuʼuw jantʼoj in ulal an Biblia tin kwéntaj talchik i konowixtaláb ani axéʼ kwaʼal kin tsuʼuw kʼal jawaʼ watʼey ti alabél tsabál.

● ¿Jaleʼ tu payel ani u tsemel? Max a Adán ani a Eva in belkamalak a Jehová, neʼetsak ka kʼwajiychik abal etsʼey. (Génesis 2:​16, 17; 3:19). Pero kom in jekʼomnaʼ a Dios, in yajchiknaʼ ani tsemets Jajáʼchik tu jílchij an yajchiktaláb ani an walabtaláb. Jaxtám an Biblia in ulal axéʼ: «Kʼal junkáts i inik Adán, játs ti tsʼiʼkin an walabtaláb tejéʼ tsabál ani tin ebal an walabtaláb, játs tu tsemel an inik. Kom patal walbinének, jaxtám patal u tsemel» (Romanos 5:12).

● ¿Jaleʼ tin jilál a Dios ka waʼtsin i pojkaxtaláb? Ban alabél tsabál a Satanás in uluw abal a Jehová pel jun i janamkaw ani abal yab in pidhál jawaʼ alwaʼ axi in tsʼejkamal (Génesis 3:​3-5). Kʼwajatak in ulal abal a Dios yab pel jun i alwaʼ Eyal. A Adán ani a Eva in tólmiychik a Satanás ani in jekʼomnaʼ in awiltal a Dios abal ti abatnom. Antsanáʼ kʼwajatak in tejwamedhál abal an atiklábchik yab­in yéjenchal a Dios. ¿Jantʼoj in tʼajaʼ a Jehová? Kom Jajáʼ lej tsalpadh ani bolidh, in jilámal abal an atiklábchik kin abatnaʼ an tsabál al wéʼ i kʼij. Xowéʼ i tsuʼtal yan i pojkaxtaláb, kom játs axi in tʼajámal a Satanás. Jayej abal an atiklábchik yab in ejtowámal kin abatnaʼ tin kwetémtal (Jeremías 10:23).

● ¿Abal jaleʼ tin tsʼejkaʼ a Dios an tsabál? An alabél tsabál tu tejwamédhanchal abal a Dios in léʼak abal tin puwél an tsabál ka kʼwajiy alabél. Jajáʼ in uchbiy a Adán ani a Eva abal kin koʼoy in yanél ani kin alubmédhaʼ patal an Tsabál (Génesis 1:28). In tsalápil a Dios pel abal an tsabál ka alubmedháj, abal in tsakámilchik a Adán ani a Eva kin bajuwchik ti tʼokat, kulbél ani junkudh. In Káwintal a Dios, an Biblia in olnál jantʼiniʼ a Dios neʼets kin putuw axéʼ xi tsalap axi taʼtal a kʼicháj.

● ¿Jaleʼ ti chích a Jesucristo tejéʼ tsabál? Kom a Adán ani a Eva yab belkaxin, yabáts jilan abal ka kʼwajiy abal etsʼey. Pero kom a Dios tu lej kʼanidhál in abaʼ in Tsakámil, abal ki koʼoy jun i aychixtaláb (Mateo 20:28). ¿Jantʼiniʼ tu kʼa­niy a Jesús? An Biblia in ulal abal a Jesús, etsʼey in belkaʼ a Jehová. Jaxtám etsʼey kʼwajiy tʼokat. Jajáʼ in bínaʼ in éjatal abal patal an atikláb kin koʼoy jun i aychixtaláb. Antsanáʼ an atiklábchik axi putudh la in éjtowal ka pákwlanchat in wálab ani kin koʼoy jun i ejataláb ejtíl axi in kʼibaʼ a Adán ani a Eva (1 Corintios 15:​22, 45; Juan 3:16). Jaxtám, a Jesús chích ti tsabál abal an tsalap axi in kwaʼalak a Dios kin éjtow ka putun. *

I tsuʼumal abal an tsalap axi in kwaʼal a Dios, yab kʼibat ki exbay. Ti biyál ban alabél tsabál, an atiklábchik, an koʼnél­chik chubax kʼwajiy. Jaxtám, an alwaʼ kaw axi a Dios tu uchámal abal axi taʼtal a kʼicháj neʼets ka putun. ¿Jantʼoj in yéjenchal ki tʼajaʼ abal ki tsuʼuw ka putun axéʼ xi kaw? Kwaʼal ku kʼwajiy belkax kʼal a Dios. A Dios in léʼ abal patal an atiklábchik kin batsʼuw in láblixtal, bélits max jun a kʼicháj kʼiblon. ¿Jantʼiniʼ ti exlál? (1 Timoteo 2:​3, 4).

Okʼxidh ka tsemets, a Jesús tʼilmáts kʼal jun i inik axi in tʼajámalak yan jantʼoj axi yab tekedh. Nixéʼ xi inik in exlálak abal in tomnálak ka tsemdháj, pero bélits antsanáʼ, in uchaʼ a Jesús abal ka tólmiyat. Uchan kʼal a Jesús: «Neʼets ki kʼwajiy kʼal nanáʼ ti alabél tsabál» (Lucas 23:43). A Jesús in pidhaʼ jun i aychixtaláb axéʼ xi inik abal neʼetsak ka kʼwajiy ti alabél tsabál. Chubax abal ­a Jehová in léʼ tu ku pidhaʼ wawaʼ jayej. Max tatáʼ a léʼ ka bajuw axéʼ xi lablixtaláb, ka aynanchij ka ­exóbnaʼ tin ­kwéntaj a Jehová. Kom játs Jajáʼ axi in tsʼejkaʼ an alabél tsabál.

[Notas tin taltal an página]

[Recuadro/​An fotos]

AN KʼAʼÁL KʼEJ JAWAʼ IN ULAL AN BIBLIA TIN KWÉNTAJ AXÉʼ

«Neʼets ku tʼajaʼ abal tatáʼ ani an mimláb, a tsakámil ani in tsakámilchik jajáʼ, kit kʼwiyáxinchik». Jajáʼ neʼets ti kwadhaʼ ta okʼ ani tatáʼ neʼets ka ódhnanchij in tutub in akan (Génesis 3:15.)

Axéʼ játs an kʼej kaw axi in ulal an Biblia, axi a Dios in uluw ti edén Dios in uluw ti Edén. Pero ¿jitaʼ játs an uxum ani an tsan ani in tsakámilchik? ¿Jaleʼ tu «kʼwiyáxchik»?

AN TSAN

Pel a Satanás (Revelación 12:9).

AN UXUM

Pel in tʼojnálil a Jehová axi kʼwajat ti éb (Gálatas 4:​26, 27). A Isaías in kʼej uluw abal axéʼ xi «uxum» neʼetsak kin koʼoy jun i bichow axi tal ti éb (Isaías 54:1; 66:8).

IN TSKÁMIL AN TSAN

Jitaʼchik in tʼajchal in kulbétal a Satanás (Juan 8:44).

IN TSAKÁMIL AN UXUM

An kʼaʼál pel a Jesucristo, kom chích ma ti éb tejéʼ ti tsabál. Jayej u ajiyáb in epchal a Jesucristo axi kʼwajat ti éb. Axéʼchik xi aykol takuyámej abal ti eyal kʼal a Jesús ani antsanáʼ ti wenkʼon tin «bichówil a Dios» tiwaʼ ti éb (Gálatas 3:​16, 29; 6:16; Génesis 22:18).

TAM TI KWADHAN TIN TUTUB IN AKAN

Tam ti in tsakámil a Dios kʼwajiy tejéʼ ti tsabál, a Satanás in tʼajaʼ abal ka tsemdháj. Axéʼ in lej yajnaʼ pero yab ówey tsab ­edháj

TAM TI KWADHAN TIN OKʼ

A Jesús neʼets kin kwadhaʼ a Satanás tin okʼ ani kin talabédhaʼ abal etsʼey. Pero okʼox, neʼets kin tsʼejkaʼ jawaʼ a Satanás in tʼajaʼ tam ti a Adán ani a Eva in kʼibchij a Jehová (1 Juan 3:8; Revelación 20:10).

An folleto La Biblia y su mensaje, axi in tsʼejkaʼ an ólchixchik kʼal a Jehová, neʼets ka elaʼ más i ólchixtaláb kʼal jawaʼ in olnál an Biblia.

[An foto]

A Adán ani a Eva koʼoy kin yajchiknaʼ kom yab in belkaʼchik a Dios.