«Kit kʼanidhaxin»

«Tokot u leʼ tu jilchij i ít uchbixtaláb antséʼ: Kit kʼanidhaxin jun kʼal axi jun, jantʼiniʼ nanáʼ tu kʼanidhálchik. Antsanáʼ pel a uchbíl kit kʼanidhaxin kʼal an belomchik. Max chubax kit kʼanidhaxin, tam patal an inikchik neʼets kin tsoʼobnaʼ abal tatáʼchik pel tu lej exóbalil.» (JUAN 13:​34, 35)

¿Jantʼoj in leʼnaʼ kin uluw a Jesús? A Jesús in uchaʼ in aykolilchik abal kwaʼalak ka kʼanidhaxin jantʼiniʼ jajáʼ in kʼanidhamalak. ¿Jantʼiniʼ tin tejwamédhanchij a Jesús i kʼanidhomtalab an atiklábchik? A Jesús yab jaykʼiʼ in pojkaʼ ni jun i atikláb nibal an mimlábchik (Juan 4:​7-10). Jayej in eyendhaʼ an kʼij ani in tsap abal kin tólmiy an atiklábchik belits abal junchikil lej tsekenekak (Marcos 6:​30-34). Ani tam tin bínaʼ in ejatal, in tejwamédhaʼ an kʼanidhomtaláb axi tu koʼonchal. Jajáʼ in uluw: «Nanáʼits in alwaʼ beletnom kʼal jitaʼchik tin belál. Neʼets ku bínaʼ tu baʼ kin tsemdháj abal tatáʼchik kit jekʼondháj» (Juan 10:11).

In tʼiplabil an kʼaʼál aykolchik. Jajáʼchik in bijiyalak in juntal belom ti epchal (Filemón 1, 2). Ban tamkuntaláb in batsʼuwalak jitakits tam atiklábchik, belits max pil in bichowil, jajáʼchik in tsuʼtalak jununúl an atiklábchik, belits max pelak i judíos o griegos, kom pel kʼal a Cristo kʼal jitaʼ tu okʼnabakchik (Romanos 10:​11, 12). Ban tamub 33, talbél kʼal an ajib kʼal an Pentecostés, an aykolchik axi ti kʼaʼál siglo in nujuw in kʼalabil ani in tsabalil abal kin tólmiy an epchalchik kʼal jawaʼ kin yejenchij. Pero, ¿jaleʼ tin tʼajaʼchik? Abal kin tólmiy jitaʼ itej ti pujnenek abal kin aynanchij kin atsʼaʼ in exóbchixtal a Jesús (Hechos 2:​41-45). Utat doscientos i támub talbél ti tsemenek an aykolchik axi ti kʼaʼál siglo, a Tertuliano in uluw jaleʼ ti an aykolchik in bínaʼ jawaʼ in kwaʼalak. In uluw jawaʼ kʼeʼatchik in olnalak tin kwéntaj an aykolchik: ¡Ka tsuʼuw tejwaʼ abal u lej kʼanidhaxchik ma in binálchik in ejatal!».

¿Xowéʼ ta kʼicháj jitaʼchik in aynál axéʼ xi tʼiplab? Ban libro Historia de la decadencia y ruina del Imperio ­romano in ulal abal al yan i tamub, jitaʼchik in ulal abal pel i aykol kʼal a Cristo in odhnalakchik in at belom, u odhnabakchik más kʼal in juntal belom ani yab kʼal jitaʼ yab u belom. In uluw abal jununúl jawaʼ in tsalpayalchik jitaʼ in ulal abal pel i belom ani jitaʼ in kʼeʼatnál an atiklabchik. Patal jajáʼchik in ulal abal pel i aykol kʼal a Cristo. An atiklabchik axi al kʼeʼat i bichow yabchik u exláx jantʼiniʼ juntal belom belits abal juniniʼ jawaʼ in belálchik. Jaxtám yab in tólmiyal in at belom tam kin koʼoy jun i yejenchixtaláb.

Ejtíl ti támub 2004, ti bichow Florida (EE.UU.) watʼey tseʼ i tsapik ikʼlom al tsab a ítsʼ. Weʼ i kʼij talbél jita in okʼnál abal ka tólmiyat an atiklabchik axi in watʼamal i yajchiktaláb in leʼnaʼ kin exlaʼ jantʼiniʼ ti kʼwajatak ti eyendháb in tuminal abal ka tólmiyat an atiklabchik. Ani tam ti tʼajaʼ ti kwéntaj abal an ólchixchik kʼal a Jehová kʼwajat alwaʼ tʼojojodh abal ka tólmixin tam ka waʼtsin jun i yajchiktaláb, uchanchik abal neʼetsak ka pidhan jawaʼ kin yejenchij. Ti támub 1997 jun i mukʼeʼ i ólchixchik kʼál a Jehová kʼalej ti Congo abal kin nenchij in epchalchik i ilál, i kʼapnél ani jawaʼ kin yejenchij ani abal kʼeʼat i atiklábchik. An ólchixchik kʼal a Jehová axi ti Europa in bínaʼchik jun i millón de dólares abal kin tólmiychik in epchal axi ti República Democrática del Congo.