TEMA DE PORTADA | JANAMTALÁB AXI TU OWMEDHÁL KʼAL A DIOS
¿Chubax i éjtowal ki kʼanidhaʼ a Dios?
«Ka lej jun putat kʼanidhaʼ a Dios, kʼal patal a ichích, kʼal patal a ejatal, ani kʼal patal a tsalápil. Nanáʼ tu uchálchik abal jaʼits an uchbixtaláb axi más winat exbadh».” (Jesucristo, támub 33) *
Waʼats i atiklábchik axi in atsʼál kʼibat kin kʼanidhaʼ a Dios. Kom walám kʼibat kin exlaʼ ani kom walám lej pojkax. Ki tsuʼuw jawaʼ talchik in ulúmal:
«Bélits abal u konchij i tolmixtaláb a Dios u atsʼál abal lej kʼibat ka utey kʼal nanáʼ. U tsuʼtal abal yab u kʼanidhom ani abal lej kʼibat ti kin kʼanidhaʼ nanáʼ.» (Marco, Italia.)
«U leʼak ku tʼojonchij a Dios pero kʼibat u atsʼalak kin utey kʼal a Jajáʼ. U tsalpayalak abal expidh u bolix tam yab u belkax ani abal yab u kʼanidhom.” (Rosa, Guatemala.)
«Tam tin tsakamej u tsalpayalak abal a Dios expidh in tʼajál ti kwéntaj jawaʼ yab i tʼajál alwaʼ abal tu ku boliy. Talbél u atsʼálak kʼibat kin utey kʼal Jajáʼ, ejtíl max pelak jun i eyal axi expidh in léʼ ti abatnom.» (Raimunda, Canadá.)
Ani tatáʼ, ¿jantʼoj a tsalpayal? ¿Walám i ejtowal ki kʼanidhaʼ a Dios?. Al yan i támub, yanchik in tʼajámal axéʼ xi konowixtaláb. In tʼajál jun i 500 i tamub, an atiklábchik yab in ólonchalak a Dios, ¿jaleʼ? Kom in tsʼejnalakchik a Dios. An Historiador Will Durant antsanáʼ tin uluw: «Jantʼiniʼ jun i atikláb axi walbidh in ejtowalak ka utey kʼal a Dios axi lej púlik in ey».
¿Jantʼoj in tʼajámal abal an atiklábchik kin tsalpay abal antsanáʼ in ey a Dios? ¿Jantʼoj in ulal an Biblia tin kwéntaj axéʼ? ¿Walám ki ejtow ki kʼanidhaʼ max ki exlaʼ jantʼiniʼ játs in ey?