TEMA DE PORTADA | JANAMTALÁB AXI TU OWMEDHÁL KʼAL A DIOS
An janamtalab axi in tʼajaʼ ka tsinkanchat in bij a Dios
JAWA IN ULAL AN ATIKLABCHIK
Yab i ejtowamal ki exlaʼ max a Dios in kwaʼal jun in bij, ani max in kwaʼal yab i exlál jawaʼ jats.» (Profesor David Cunningham, en su libro Theological Studies.)
JAWA IN ULAL AN BIBLIA
A Dios in uluw: «Nanáʼ pel in Jehová, antsanáʼ u bij» (Isaías 42:8). An bijláb Jehová kaldhach ti hebreo ani in leʼ kin uluw abal neʼets kin tʼajaʼ jawaʼ kin yejenchji abal kin putuw in tsalapil (Génesis 2:4, nota).
A Jehová in leʼ abal ki eyendhanchi in bij. An Biblia in ulal: «Ki olnanchij in bij. Ka olnanchijchik in bij ani patal in alwaʼ tʼajbilabil kʼal an bichowchik. Ka olnaʼchik abal in bij lej in kwaʼal in exbádh» (Isaías 12:4).
A Jesús in eyendhanchij in bij a Dios ani jayej in exóbchij in aykolilchik. A Jesus in olonchi a Dios ani in uchaʼ: «Nanáʼ u olnámal a bij». ¿Jaleʼ tin tʼajaʼ? Jajáʼ in uluyej: «Abal kin ejtow ti kʼanidhom jantʼiniʼ tatáʼ it lej kʼanidhom kʼal nanáʼ abal kin exlaʼchik abal in kʼwajat junax kʼal jajáʼchik» (Juan 17:26).
JALEʼ TIN TOMNÁL KA EXLAʼ
An teólogo Walter Lowrie in dhuchaʼ: «An atiklab axi yab in exlanchal in bij a Dios, yab in exlanchal jantʼiniʼ in ey ani yab in éjtowal kin kʼanidhaʼ max yab in exlál».
Max in bij a Dios kʼwajat ban Biblia, tam yab in tomnál ki tsinkaʼ
Jun i inik in bij Victor u kʼalelak in aytal an semana ti iglesia pero yab in exlalak in bij a Dios. Jajáʼ in ulal: «Tam tu exobnaʼ abal a Dios in bij Jehová, tam u exlaʼ jitaʼ jats jajáʼ ani u exlaʼ jita yabak u exlalak. U ejtow ku lej belaʼ kʼal a Dios ani xóʼ pelits u jaʼúb».
A Jehová u utel kʼal «jitaʼ in leʼ kin exlanchij in bij» ani in ulal axéʼ xi kaw: «Neʼets tu yajnanchij jantʼiniʼ jun i inik in yajnanchal in tsakámil kʼal jitaʼ tu tʼojoncháb» (Malaquías 3:16, 17). A Jehová jayej in labliyal jitaʼchik in eyendhanchal in bij. An Biblia in ulal ti Romanos 10:13 abal patal jitaʼ kin eyendhanchij in bij a Dios neʼets ka jekʼondháj (Romanos 10:13).
